BA FRANK aba Jerry bakajisi penzi licitikila bantu banji. Ciindi bantu bobilo nobazwangana, kanji-kanji boonse balanyema, ambweni aumwi inga katongooka mweenzinyina. Kuti tiibaabamba makani, cilongwe cabo cilakonzya kumana.

Ambweni mwakalijana kale mubukkale buli boobu. Kuti naa kacili boobo, kweelede kuti tiimwakabukkomanina bukkale oobo! Bwini mbwakuti, toonse tulayanda kupona muluumuno alimwi amulukamantano abeenzuma alimwi abasimukoboma. Pele ino mbuti mbotukozya kucita boobo nokuba kuti zimwi ziindi tulakonzya kuzwangana? Sena cilakonzyeka kuzunda bube butali kabotu mbotujisi alimwi akulekelela bamwi ciindi nobatubisizya? Sena cilakonzyeka kwaabamba makani munzila yabulongwe kakunyina kulwana?

Amulange-lange bukkale bwaba Frank alimwi abwaba Jerry. Kweelede kuti cilongwe cabo cakatalika kunyongana ciindi nobakatalika kutobela nzila zitaluzi: (1) ba Jerry tiibakali kumubikkila maano mweenzinyina, (2) ba Frank bakatondezya kunyema kwabo munzila yatakabakkomanisya ba Jerry, (3) boonse bakanyema, alimwi (4) boonse bakaalilwa kulicesya.

Nokuba boobo, mukuya kwaciindi, bakaabona munzila yeelede makani. Baalumi aaba bakaabandika makani akubamba luumuno. Ino ncinzi cakabagwasya kuzwidilila? Bakazibelesya njiisyo zimwi zyalo izyagwasya balongwe banji kutali buyo kuzwa mumapenzi ngobakajisi, pele akuyumya zilongwe zyabo.

Njiisyo eezyo zilajanika mubbuku ilyamwaigwa kapati munyika yoonse, Ibbaibbele. Bbuku eeli lilatukulwaizya kuba abube ibukonzya kutugwasya kubamba luumuno alimwi akumana mapenzi aamumoyo, ibube oobo bubikkilizya bupampu, busongo, luzyalo, luyando, alimwi akukkazyika moyo.—Tusimpi 14:29; 1 Bakolinto 13:4, 5.

 Ba Frank aba Jerry nzikozyanyo zyobilo buyo zitondezya nguzu nzyolijisi Bbaibbele zyakucinca buumi bwabantu kuti bubote. Kuli zikozyanyo zinji, kubikkilizya abantu balo ibakazunda bube butali kabotu. Mucikozyanyo, Ba Robert, ibakkala ku Australia, bakabuzunda bube butali kabotu bwakufwambaana kunyema. Ba Nelson, ibakkala ku Timor-Leste, bakabuzunda bube butali kabotu akupanga cilongwe amuntu ngobakali kuzwangana limwi kaindi. Mbuti Bbaibbele mbolyakabagwasya ba Robert alimwi aba Nelson? Balembi ba Sinsimuka! bakababuzya-buzya.

BA ROBERT, amutwaambile makani masyoonto buyo aajatikizya buumi bwanu.

Ndakakomenena mumukwasyi mwakanyina lukkomano. Mucikozyanyo, Bataata bakali kufwambaana kunyema alimwi kanji-kanji bakali kunduuma. Zimwi ziindi, bakali kundisiya kandizwa bulowa alimwi kandinetukide. Akaambo kaceeci, andime ndakaba muntu uunyema-nyema alimwi sinkondo. Nondakali mukubusi, ndakaiya kwamyaka yobilo kucikolo cabana baange. Kumane, ndakauma muntu calo cakapa kuti ndinjile muntolongo. Nondakazwa muntolongo, ndakalongela ku Australia kandijisi makanze aakucinca bukkale bwangu.

Sena kulonga kwakamugwasya kucinca bukkale bwanu?

Takuli kulonga kwakapa kuti ndicince pe, ndi Bbaibbele, lyalo ndyondakaiya a Bakamboni ba Jehova. Nokuba boobo, ndakacili kujana buyumu-yumu kulwana penzi lyakunyema-nyema alimwi kanji-kanji ndakali kulimvwa kucimwa akubula mpindu. Mpoonya bumwi buzuba ndakayeeya majwi aali mulugwalo lwa Tusimpi 19:11, aakuti: ‘Busongo bwamuntu bulamumusya kukalala, ulayandisya kulekelela milandu.’ Kandijisi makanze aakuba abusongo oobo, ndakatalika kuyeeya citupa kunyema, kwaambaula munzila imwi alimwi akucita zintu zimwi. Akaambo kakuyeeya boobu, aasyoonto-syoonto ndakatalika kumvwisya, kukkazyika moyo, alimwi akulekelela.

Sena inga mwatupa cikozyanyo?

Cimwi ciindi ndakamunyemya mweenzuma cakutazyiba, mpoonya walo, akaambo kakunyema wakatalika kundifwubaazya akati kabantu. Ndakausa kapati, aboobo ndakayeeya lulayo lwamu Bbaibbele lwakuti “mutapilusizyi muntu uuli woonse bubi” mpoonya ndakafwambaana kulilekelela. (Baloma 12:17) Ciindi mweenzuma naakatontomana, ndakamusikila kumbali alimwi ndakazyiba kuti wakajisi mapenzi aamumukwasyi. Twakabamba luumuno, kumane nokwakainda ciindi wakandipa cikkoti cibotu. Ndilatilimuka ndayeeya cakali kunoocitika kuti nondakanyema mbuli mbondakali kunyema kaindi ciindi mweenzuma naakandifwubaazya.

Ino mwaayendelezya buti mapenzi aamumukwasyi?

Mumukwasyi tujisi mwana musankwa uujisi myaka yakuzyalwa iili 20, alimwi mbubwenya mbuli mikwasyi iimbi, andiswe zimwi ziindi tulazwangana. Pele ndakaiya zinji kuzwa mu Bbaibbele, kubikkilizya ambociyandika kwaamba kuti, “amundijatile.” Cilagambya kubona bbala eeli mbolikonzya kulesya mazwanga, ikuti naa lyaambwa kuzwa ansi aamoyo.

BA NELSON, muli bantu baseka-seka cabulongwe. Nokuba boobo, aciindi cimwi mwakali basinkondo. Sena mbombubo?

Inzya! Nondakali mwaalumi mwana-mwana, ndakanjila mukabunga kakazyanya amfwulumende. Alimwi tiindakali kukayanda kabunga kamapolitikisi ikakali kuyanda kweendelezya dolopo mondakali kukkala. Aboobo kutegwa ndicizyibe kulwana, ndakaiya kulwana kwiinda mukubelesya zibbakela alimwi ndakali kuuma kufwumbwa buyo wandinyemya.

Ino ncinzi cakamupa kuti mucince?

Ndakatalika kwiiya Bbaibbele akuzibelesya nzyoliyiisya, alimwi kuli njiisyo zyobilo zyakandisika amoyo. Yakusaanguna njakuti: “Zyintu zyoonse nzimuyanda kuti bantu bamucitile, anywebo nzimweelede kubacitila.” (Matayo 7:12) Yabili njakuti: “Weelede kuyanda simukobonyoko mbubonya mbuli mboliyanda omwini.” (Matayo 22:39) Aboobo, ndakabona kuti Bakamboni ibakali kundiyiisya Bbaibbele bakali kulutondezya luyando luli boobu nokuba kuti twakaliindene musyobo. Andime ndakali kuyanda kuba mbuli mbabo. Mukuya kwaciindi, ndakazwidilila cakuti balongwe bangu bakaindi bakagambwa kapati alimwi lino bakaleka kundiyoowa.

Sena mucinyema-nyema mbuli kaindi?

Kutali akati kabantu. Pele zimwi ziindi aŋanda cilandiyumina kulijata kutegwa nditanyemi. Alimwi buya, cimwi ciindi ndakanyema kapati cakuti ndakabauma bakaintu bangu, calo cindipa kulimvwa bubi kapati kuti naa ndayeeya. Nokuba boobo, bakaintu bangu bakandilekelela, calo cakapa kuti ndibe amakanze akweendelezya kunyema kwangu.

Mwaamba kuti bantu bakaleka kumuyoowa. Sena inga mwatupa cikozyanyo?

Inzya. Bumwi buzuba ndakaswaanganya mwaalumi uulemekwa kapati wazina lya Augusto, umwi walupati-pati wamukabunga kamapolitikisi kaya nkondaambide kale. Kumatalikilo, wakalilibilikide. Pele ndakamujuzya cabulongwe, kutondezya kuti twaalube aakaindi, alimwi ndakamutamba kuŋanda yangu. Mpoonya wakazumina alimwi wakagambwa kubona mbondakacinca cakuti awalo wakatalika kwiiya Bbaibbele. Lino mebo aba Augusto tatuli buyo balongwe beni-beni, pele alimwi tuli banabokwabo bakumuuya.

Zintu zikonzya kutalisya mazwanga ziliindene-indene alimwi zilakatazya, alimwi tabali boonse balibambilide kubamba luumuno. Nkakaambo kaako Bbaibbele ncolipa lulayo oolu lugwasya lwakuti: “Kamusoleka kusikila mpomugolela kukkala muluumuno abantu boonse.”—Baloma 12:18.

Bantu ibaambwa mucibalo eeci bakazyiba kuti busongo bujanwa mu Bbaibbele bulabeleka ncobeni, akuti bulijisi nguzu zyakucinca “zyintu zyoonse ziyumu nta” mbuli bube butali kabotu, kufwumbwa buyo kuti twalizumizya kucita boobo. (2 Bakolinto 10:4) Kujatikizya busongo oobo, lugwalo lwa Tusimpi 3:17, 18 lwaamba kuti: “Inzila zyabo ninzila zibotezya, amigwagwa yabo yoonse njaluumuno. Musamu wabuumi kuliboonse babujana, bali acoolwe boonse babujatisya.”

Sena mulayanda kukkomana alimwi akukkala muluumuno? Sena mulalombozya kuba azilongwe zitamani nokuba kuti zyasunkwa? Ikuti naa kacili boobo, tamukatyompwi pe kuti mwalekela Bbaibbele kumusololela.