NCOLYAAMBA BBAIBBELE
Bulondo
Sena bulondo bwesu bwakumubili kuli mbwabubona Leza?
“Atulisalazye kuzintu zyoonse zisofwaazya mubili amuuya.”—2 Bakorinto 7:1.
NCOLYAAMBA BBAIBBELE
Mulengi wesu ulatuyanda alimwi uyanda kuti katupona buumi buli kabotu lyoonse. Leza waamba kuti: “Moyo wako ubambe milawo yangu, nkaambo ilakuyungizyila mazuba manji amyaka yabuumi alimwi aluumuno.” (Tusimpi 3:1, 2) Luyando lwa Leza kubantu lwakalibonya mumilawo njaakapa bana Israyeli, yalo iyakali kubikkilizya amalailile aagaminide kujatikizya bulondo. (Deuteronomo 23:12-14) Ciindi bana Israyeli nobakali kwaatobela malailile aayo aagwasya, bakali kupona buumi buli kabotu alimwi akulikwabilila kumalwazi aakali kupenzya bantu bakali muzisi zyakabazingulukide, mbuli cisi ca Egepita, calo catakajisi milawo eeyo iisumpukide.—Deuteronomo 7:12, 15.
Mbubwenya buyo amazuba aano, bantu ‘ibalisalazya kuzintu zyoonse zisofwaazya mubili,’ zyalo izibikkilizya micito mibyaabi mbuli kufweba, kuciindizya kunywa bukoko, alimwi akubelesya misamu iikola, balalikwabilila kumalwazi aakumubili alimwi amumizeezo, alimwi baloongola. Alimwi akaambo kakuti tukkala abantu, kutobela malailile aa Leza aajatikizya bulondo ncitondezyo cakuti tulababikkila maano bamwi.—Marko 12:30, 31.
Sena Leza ulabikkila maano kubulondo bwakumuuya alimwi amukulilemeka?
‘Amujaye zizo zyamubili wanu kujatikizya zisusi mbuli bwaamu, busofwaazi, luunyaunya, kulombozya kubyaabi, alimwi abulyato kwalo kuli nkukomba mituni. Akaambo kazintu eezyi bukali bwa Leza bulaboola.’—Bakolose 3:5, 6.
NCOLYAAMBA BBAIBBELE
Mbubwenya mbokwaambwa kale, Ibbaibbele litukulwaizya “kulisalazya kuzintu zyoonse zisofwaazya mubili alimwi amuuya.” Ciindi ncaakapona Jesu Kristo, bantu banji, kubikkilizya abasololi bacikombelo caba Juda, bakali kuciindizya kusalala kumubili, pele tiibakali kubikkila maano kukusalala mukulilemeka alimwi akumuuya. (Marko 7:1-5) Kutegwa abagwasye kuzibona munzila iiluzi zintu, Jesu wakaamba kuti: “Taakwe cilaanze icinjila mumuntu cikonzya kumusofwaazya, mbwaanga cilanjila . . . mwida kusikila limwi cazwa anze.” Mpoonya wakayungizya kuti: “Eeco cizwa mumuntu ncecisofwaazya muntu. Nkaambo mukati, mumoyo wamuntu, momuzwa mizeezo mibi, bwaamu, bubbi, bujayi, bumambe, busyaacivwulemwangu, bubi, lweeno, bukkale busesemya, munyono, . . . alimwi abufwubafwuba. Zintu zyoonse eezyi zibi . . . zilamusofwaazya muntu.”—Marko 7:18-23.
Kweelana amajwi aa Jesu, bantu ibaciindizya kubikkila kapati maano kubulondo bwamubili, mpoonya tababikkili maano kumilawo ya Leza yakulilemeka, bali mbuli nkapu iisalala nkoili kunze pele mukati ilaatombe.—Matayo 23:25, 26.
Sena zyeelelo zyamu Bbaibbele zilaminya?
“Nkaambo kuyanda Leza caamba kuti katubamba milawo yakwe; alimwi buya milawo yakwe tiiminyi.”—1 Johane 5:3.
NCOLYAAMBA BBAIBBELE
Mulugwalo lwa Mika 6:8, tubala kuti: “Ino ncinzi Jehova ncayanda kulinduwe? Uyanda buyo kuti kocita bululami, koyandisya kusyomeka, alimwi akweenda cakulibombya a Leza wako!” Sena kulomba zintu eezi nkuciindizya? Alimwi buya, Mulengi wesu uyanda kuti katumumvwida akaambo kakuti tulamuyanda. Ikucita boobo citupa kukkomana kapati. (Intembauzyo 40:8) Alimwi ciindi notwalubizya, tulakonzya kuumbulizyigwa akaambo kaluse lwa Leza. “Mbubonya usyi mbwabafwida luse bana bakwe, awalo Jehova mbwabafwida luse aabo bamuyoowa. Nkaambo ulizyi kabotu mbotupangidwe, ulaibaluka kuti tuli bulongo buyo,” tulalezya alimwi tatulondokede.—Intembauzyo 103:13, 14.
Mubufwaafwi, malailile aa Leza aajatikizya bulondo bwakumubili, kulilemeka, alimwi akumuuya atondezya bubotu alimwi aluyando lwakwe kulindiswe. Kulyaaba kwesu kutobela malailile aaya ncitondezyo cabusongo alimwi aluyando ndotujisi kuli Leza.
Andiza Inga Mwaakkomanina Ayaaya
NGAZI YAMULINDIZI
Ino Leza Ukubona Buti Kufweba?
Kunyina Bbaibbele mpolyaamba makani aatombwe, aboobo mbuti mbotukonzya kuzyiba?
SINSIMUKA!
