Lwizi Lutajisi Buumi lwatalika kuyaabuceya mita yomwe amwaka. Bamwi balalibilika kuti ambweni kuzoosika mumwaka wa 2050 lwizi oolu luyakuyuminina. Beendelezi bayandaula nzila iikonzya kubagwasya kumana penzi eeli. Nzila imwi njobacilanga-langa njakugusya munyo mumaanzi aamu Lwizi Lusalala kutegwa bantu kabanywa mpoonya akwaatila mu Lwizi Lutajisi Buumi maanzi aamunyo aacaala. Pele basikukazya baamba kuti inzila eeyi ilakonzya kunyonganya zilenge zilibedelede izili mu Lwizi Lutajisi Buumi.

Kweelana abuvwuntauzi bwakacitwa akkampani imwi ya insyuwalansi, kwaambwa kuti Buzuba bwa Kkilisimasi, mweelwe wabantu ibaciswa moyo ibajatwa kucibbadela ulayungizyika a 33 pesenti kwiinda ziindi zimwi mumwaka. Kkampani eeyi yakaamba kuti kulibilika kapati akaambo kakuyandaula zipego zya Kkilisimasi akuciindizya kulangila zintu zinji kulubazu lwamukwasyi abalongwe, nzezintuzipati zileta bulwazi bwamoyo..

Basayaansi baku Britain bakaambilizya kuti inkumba yaku Iceland iyakali kuyeeyelwa kuti yakajisi myaka iili 405, mubwini yakajisi myaka iili 507 ciindi noyakafwa cakutayeeyelwa mu 2006. Inkumba eeyi yakapona myaka minji kwiinda banyama bamwi. * Nkumba eeyi yakafwa ciindi basikuvwuntauzya nobakaibikka mufiliji kutegwa baitole kulaabbu.

Kumuswaangano wakacitilwa ku Havana, mucisi ca Cuba, kumatalikilo aamwaka uuno, zisi zili 33 zyamumbunga yiitwa kuti Community of Latin American and Caribbean States zyakaambilizya kuti zisi zyabo ‘ncilawo caluumuno’ kwiinda mukuzuminana kuti banoomana mazwanga akati kabo kakunyina nkondo. Akati kabaabo ibakaliko kumuswaangano ooyu kwakali ba Secretary General iba United Nations, ba Ban Ki-moon.