“Ncobeni, Leza taciti bubi pe.” —Jobu 34:12.

NZYOBAAMBA BANTU

Bantu bamwi baamba kuti zintu zyoonse zicitika nkuyanda kwa Leza. Aboobo, basyoma kuti Leza nguupa kuti katupenga. Mucikozyanyo, ciindi nokwacitika ntenda zilicitikila, bayeeya kuti ninzila imwi Leza njabelesya kusubula baabo ibacita zibi.

NCOLYAAMBA BBAIBBELE

Bbaibbele cakusalazya liyiisya kuti Leza talinguwe uupa kuti katupenga. Mucikozyanyo, Bbaibbele lyaamba kuti ciindi notusunkwa, inga kwaba kulubizya kwaamba kuti: “Ndili mukusunkwa a Leza.” Nkaambo nzi? Akaambo kakuti “kunyina muntu uunga wasunka Leza azintu zibyaabi alimwi walo mwini tasunki muntu uuli woonse azintu zibyaabi.” (Jakobo 1:13) Munzila imwi, Leza kunyina naleta masunko alimwi amapenzi ngotujana. Kucita oobo, nkubi, pele “Leza taciti bubi pe.”—Jobu 34:12.

Ikuti naa Leza talinguwe uupa kuti katupenga, ino nguni naa ncinzi cipa kuti katupenga? Cuusisya ncakuti, bantu balapenzyegwa abantunyina batalondokede. (Mukambausi 8:9) Kuyungizya waawo, tulakonzya kucitikilwa ntenda zimwi akaambo ‘kazintu zitalangilwi,’ nkokuti akaambo kakuba abusena bumwi aciindi citeelede. (Mukambausi 9:11) Bbaibbele liyiisya kuti “mweendelezi wanyika eeyi,” Saatani Diabolosi, nguupa kuti bantu kabapenga akaambo kakuti “nyika yoonse ili mumaanza aamubi.” (Johane 12:31; 1 Johane 5:19) Saatani nguupa kuti bantu kabapenga, ikutali Leza.

“Mumapenzi aabo oonse wakali kupenga mumoyo awalo.”—Isaya 63:9.

NZYOBAAMBA BANTU

Bantu bamwi bayeeya kuti Leza tabikkili maano kukupenga kwesu. Mucikozyanyo, sikulemba umwi wakaamba kuti Leza “tajisi luse kujatikizya kupenga kwesu.” Sikulemba ooyu waamba kuti, ikuti naa Leza nkwali, kweelede kuti bantu “tababikkili maano.”

NCOLYAAMBA BBAIBBELE

Muciindi cakwaamba kuti Leza tajisi luse naa tabikkili maano, Bbaibbele lyaamba kuti Leza ulapenga kapati akaambo kakupenga kwesu—akuti lino-lino uyookumana kupenga. Amulange-lange twaambo totatwe tuumbulizya tujanika mu Bbaibbele.

Leza ulikubwene kupenga kwesu. Kuzwa ciindi bantu nobakatalika kupenga, Jehova, * walo uujisi ‘meso aalangisya,’ walikukubona kupenga koonse kwabantu. (Intembauzyo 11:4; 56:8) Mucikozyanyo, ciindi bakombi bakwe kaindi nobakali kupenzyegwa, Leza wakaamba kuti: “Masimpe ndaabona mapenzi aabantu bangu.” Pele sena wakali kubona buyo kuti balapenga? Peepe, nkaambo wakati: “Ndilaazyi kabotu mapenzi aabo.” (Kulonga 3:7) Bantu banji baumbulizyigwa akaambo kakuzyiba kasimpe aaka kakuti Leza ulaazyi mapenzi eesu oonse, naaba masunko bamwi ngobatakonzyi kuzyiba nokuba kumvwisya.—Intembauzyo 31:7; Tusimpi 14:10.

Leza ulatweetelela ciindi notupenga. Jehova Leza ulaazyi mapenzi aabantu pele alimwi ulabeetelela. Mucikozyanyo, Leza wakausa kapati ciindi bakombi bakwe bakaindi nobakali kusunkwa. Bbaibbele lyaamba kuti: “Mumapenzi aabo oonse wakali kupenga mumoyo awalo.” (Isaya 63:9) Nokuba kuti Leza mupati kapati kwiinda bantu, ulabeetelela aabo bapenga—ulimvwa mbuli kuti kucisa kwabo kuli mumoyo wakwe! Masimpe, “Jehova ulaalubomba kapati alimwi aluse.” (Jakobo 5:11) Kuyungizya waawo, Jehova ulatugwasya ciindi notupenga.—Bafilipi 4:12, 13.

Leza uyookumana kupenga koonse kwabantu. Kweelana ancolyaamba Bbaibbele, Leza uyakwaamana mapenzi aabantu boonse ibali anyika. Kwiinda mukubelesya Bwami bwakwe bwakujulu, Jehova uyoobucinca bukkale bwabantu kuti bubote. Kujatikizya ciindi eeco, Bbaibbele lisyomezya kuti Leza “uyoosindula misozi yoonse kumeso aabo, alimwi lufwu talukabi limbi, akwalo koomoka, kulila nokuba kucisa takukabi limbi pe. Zintu zyakaindi zyamana.” (Ciyubunuzyo 21:4) Ino mbuti kujatikizya bafwide? Leza uyoobabusya kutegwa abalo bakakkomane kupona buumi butajisi mapenzi. (Johane 5:28, 29) Sena kuli uyoopenga mumizeezo akaambo kazintu zibyaabi zyakaindi? Peepe, nkaambo Jehova usyomezya kuti: “Zintu zyakaindi tazikaibalukwi limbi pe, nokuba kuyeeyegwa mumoyo.”—Isaya 65:17. *