ZICITIKA MUNYIKA
Kuyubununa Zicitika Mubukombi
Bukombi bweelede kukamantanya bantu. Pele kanji-kanji mbobupa kuti kakuli mazwanga akutasyomana.
Nyika
Bantu bainda ku 75 pesenti nyika yoonse bakkala muzisi izijisi milawo iikasya bukombi, ambweni akaambo kamilawo yamfwulumende naa lunya. Mumyaka yosanwe yainda, mweelwe wazisi izyakacitilwa lunya mumakani aabukombi wakayungizyika ziindi zitandila kuli zyobilo.
AMUYEEYE KUJATIKIZYA MAKANI AAYA: Ntwaambo nzi itupa bamwi kuba alunya kujatikizya bukombi?—Matayo 23:27, 28; Johane 15:19.
England
Mumuteende uutegwa Observer, Tony Blair iwakali mweendelezi wakaamba kuti, “ikuteendelezya kabotu bukombi” ncecintu cipa kuti kakuli micito yalunya. Alimwi wakayungizya ikwaamba kuti, “nkondo izilwanwa mumwaanda wamyaka uuno, kanji-kanji tazibooli akaambo kamizeezo yabasitwaambo twacisi—mbuli zyamumwaanda wamyaka wa 20—pele zilalwanwa akaambo katwaambo tujatikizya kwiindana kwabukombi alimwi abukkale.”
AMUYEEYE KUJATIKIZYA MAKANI AAYA: Nkaambo nzi bukombi kanji-kanji ncobupa bantu kuzwangana?—Marko 7:6-8.
Australia
Kabunga kategwa Bureau of Statistics kaku Australia kaamba kuti muntu omwe akati kabantu bosanwe ku Australia baamba kuti tababalilwi kucikombelo cili coonse. Alimwi lipooti yaamba kuti, “kuba acikombelo taceelene akujata bubi mumakani aabukombi.” Baalumi ibasika ku 15 pesenti alimwi abamakaintu ibasika ku 22 pesenti ibakomba, mbebaamba kuti balatola lubazu muzintu zicitika mutubunga twabo twabukombi.
AMUYEEYE KUJATIKIZYA MAKANI AAYA: Ino nzintu nzi izitali kabotu nzyomubona mubukombi mazuba aano?—Matayo 7:15-20.
Andiza Inga Mwaakkomanina Ayaaya
NGAZI YAMULINDIZI
Sena Kuli Cikombelo Ncomukonzya Kusyoma?
MIBUZYO IIVWULA KUBUZYIGWA
Nkaambo Nzi Bakamboni ba Jehova Ncobatatoli Lubazu Mutwaambo Twacisi?
Sena baleta manyongwe mucisi?
