MAKANI AAYEEME AMUTWE UULI ACIVWUMBYO | SENA BBAIBBELE LILAYANDIKA MAZUBA AANO?
Njiisyo Zigwasya Lyoonse Kubantu Boonse—Kulilesya
NJIISYO YAMU BBAIBBELE: “Mufwubafwuba ulatondezya bukali boonse buli mumoyo wakwe, pele musongo ulakkazika moyo alimwi ulalijata.”—Tusimpi 29:11.
“Ndilimvwa mbuli kuti ndakabusyigwa kubafwu!”
IBUBOTU BULIKO: Ibubotu buliko mukulilesya mbunji kapati cakuti tabukonzyi kubandaukwa boonse. Alimwi buya bube oobu butupa kupona buumi bubotu. Bbaibbele lyaamba kuti: “Moyo uukkede upa buumi kumubili [naa, “ulaponya mubili,” bupanduluzi buyungizyidwe].” Alimwi lyaamba kuti “moyo uukkomene musamu mubotu uuponya.” (Tusimpi 14:30; 17:22) Mbubwenya buyo, buvwuntauzi butondezya kuti kanji-kanji bantu ibanyema-nyema alimwi basilunya balalangilwa kuciswa kwaambisya malwazi aamoyo. Pele kulilesya kulagwasya munzila azimwi.
Ba Cassius, lino ibajisi myaka iili 30 baamba kuti: “Ndakali siluta alimwi ndakali kufwambaana kunyema, kanji-kanji ndakali kutalisya nkondo. Tiindakali kulemekwa. Pele zintu zyakacinca nondakatalika kwiiya Bbaibbele akubelesya njiisyo zili mumo. Ndakaiya kulijata kuti ndanyema alimwi akuba amuuya wakulicesya alimwi akulekelela. Buyo-buyo nokunga ndili muntolongo. Mubwini, ndilimvwa mbuli kuti ndakabusyigwa kubafwu!”
Ba Cassius bakaiya kulijata alimwi akulekelela
Andiza Inga Mwaakkomanina Ayaaya
SINSIMUKA!
Zyeelelo Zyakulilemeka Zigwasya Ncobeni
Bukkale budumide kapati mbwakuti, ‘Kuti kamuyeeya kuti cili kabotu, amucicite. Amucite amoyo wanu woonse.’ Sena kuyeeya kuli boobu nkwabusongo? Amubone mu Bbaibbele zyeelelo zikonzya kumugwasya.
