NZYOBAAMBA BANTU

Bantu banji babona kubbeja kuti ncisobano cili kabotu, kuti kakuzumizyidwe amulawo. Misyobo imwi yakubbeja iizumizyidwe amulawo, mbuli yeeyo yeendelezyegwa amfwulumende, ilapanga mali kutegwa mfwulumende igwasye banamaleya.

NCOLYAAMBA BBAIBBELE

Bbaibbele kunyina nolyaamba cacigaminina kujatikizya kubbeja. Nokuba boobo, lilijisi njiisyo zitondezya mbwalimvwa Leza kujatikizya kubbeja.

Ikubbeja inga kujatikizya kuwina mali aabantu bamwi. Pele eeci taceendelani alulayo lwamu Bbaibbele ‘lwakulikasya kubusyaacivwulemwangu.’ (Luka 12:15) Mubwini icipa kubbeja mbusyaacivwulemwangu. Basikucita makwebo aakubbeja baambilizya kuti muntu inga wajana mali manji, pele tabasyomeki caboola kukubapa coolwe cakujana mali aaya akaambo kakuti balizyi kuti kuyanda kuvwuba kupa bantu kubbeja mali manji kumasena nkobasobanina cisobano eeci. Muciindi cakugwasya muntu kulikasya kubusyaacivwulemwangu, kubbeja kusumpula luyandisyo lwakujana mali munzila iitakatazyi.

Kubbeja kuyeeme aabusyaaacivwulemwangu mbotwakazyalwa ambubo: kuwina mali ngobasweekelwa bantu bamwi. Nokuba boobo, Bbaibbele likulwaizya muntu uuli woonse kuti “kayandisya kugwasya bamwi ikutali buyo kuligwasya lwakwe mwini.” (1 Bakorinto 10:24) Alimwi mulawo umwi akati ka Milawo Iili Kkumi waamba kuti: “Utanyonokeli . . . cintu cili coonse camweenzinyoko.” (Kulonga 20:17) Ciindi sikubbeja nabikkila maano kukuwina, mubwini ulombozya kuti bamwi baluze mali aabo kutegwa walo ajane mpindu.

Alimwi Bbaibbele lilakasya kubona coolwe kuba cintu cikonzya kupa kuti kube zilongezyo. Mu Israyeli yansiku, kwakali bantu ibakanyina lusyomo muli Leza ibakatalika ‘kubambila leza wa Mvwuma tebulu.’ Sena kulyaaba kuli boobo kuli “leza wa Mvwuma” wakali kukutambula Leza? Peepe, wakabaambila kuti: “Mwakazumanana kucita zintu zibi mumeso aangu, alimwi mwakasala cintu icatakali kundikkomanisya.”—Isaya 65:11, 12.

Masimpe, mumasena amwi aanyika mali aajanwa kukubbeja kuzumizyidwe amulawo alabelesyegwa kubbadela kuzikolo, milimo yalusumpuko alimwi amilimo imwi yabuleya. Pele mbwaabelesyegwa mali aayo takucinci nzila mbwaakajanwa—nzila izikulwaizya bulyato alimwi akuliyanda alimwi izikulwaizya kujana cintu kakunyina kucibelekela.

“Utanyonokeli . . .  cintu cili coonse camweenzinyoko.”—Kulonga 20:17.

NCOLYAAMBA BBAIBBELE

Bbaibbele litucenjezya kuti “aabo bakanzide kuvwuba banjila mumasunko alimwi balacegwa mukakole amuzisusi zinji zyabufwubafwuba alimwi ziletela macise eezyo zitola bantu mukunyonyooka akuloba.” (1 Timoteyo 6:9) Kubbeja kuyeeme abusyaacivwulemwangu, bwalo ibujisi ntenda mpati cakuti Bbaibbele lyaamba kuti buli akati kazintu nzyotweelede kusulaika.—Baefeso 5:3.

Akaambo kakuti bupa muntu kubikkila buyo maano kujana mali munzila iitakatazyi, kubbeja kupa muntu kuyandisya mali, cintu Bbaibbele ncolyaamba kuti “ngomuyanda wamisyobo yoonse yazintu zibyaabi.” Kuyandisya mali kulakonzya kutalika kweendelezya buumi bwamuntu, calo icikonzya kupa muntu kulibilika kapati akunyonganya lusyomo lwakwe muli Leza. Munzila yamaambilambali, Bbaibbele lyaamba baabo ibacegwa mukakole kakuyandisya mali kuti “baliyasaula koonse-koonse amacise manji.”—1 Timoteyo 6:10.

Busyaacivwulemwangu bupa muntu kutakkutila amali ngajisi calo icipa muntu kutakkomana. “Muntu uuyandisya nsiliva takakkutili ansiliva pe, awalo muntu uuyandisya buvwubi takakkutili azyeezyo nzyajana.” —Mukambausi 5:10.

Banji ibacegwa mukakole kakubbeja balijana kuti baba acizibilizi mumucito ooyu. Bantu banji balilijisi penzi eeli alimwi kwaambwa kuti mamiliyoni aabantu ku United States kulikke balaacizibilizi eeci.

Kasimpi kamwi kaamba kuti: “Lukono ilusaanguna kujanwa cabusyaacivwulemwangu kumamanino talukabi cileleko pe.” (Tusimpi 20:21) Kubbeja kwapa baabo ibalaacizibilizi kuba azikwelete naa kumaninwa mali, kumaninwa milimo, zikwati alimwi azilongwe. Kutobela njiisyo zyamu Bbaibbele kulakonzya kugwasya muntu kweeleba mapenzi aaboola akaambo kakubbeja alo aakonzya kubujatikizya buumi alimwi alukkomano.

“Aabo bakanzide kuvwuba banjila mumasunko alimwi balacegwa mukakole amuzisusi zinji zyabufwubafwuba alimwi ziletela macise eezyo zitola bantu mukunyonyooka akuloba.”—1 Timoteyo 6:9.