BA NATALYA amwanaabo musankwa Aslan, uujisi myaka iili fwuka, bakaswena munsi aaba Zarina amwanaabo musimbi Anzhelika, uujisi myaka iili 12. Bana bambi bainda ku 1,000 alimwi abapati bakalikkede antoomwe, kabagatelwa azigwebenga zyakajisi ntobolo.

Muli Bwatatu buzuba oobo, mu September 1, 2004, bana alimwi abazyali babo bakali anze kumwi kabalibambilide kusekelela buzuba bwakujula zikolo mu Beslan, dolopo nsyoonto ku Alania, Russia. Cakutayeeyela, zigwebenga izyakajisi ntobolo alimwi ama suicide bombers bakabasikila akudubula mujulu kumwi kabaambaula cakoompolola. Zigwebenga eezyi iziinda ku 30 zyakaambila nkamu yabantu yakayoowede kuti banjile muluumu yakucitila zisobano iyaacikolo, mpoonya zyakabikka tubbomba kuzinguluka luumu eeyi.

Aaya ngaakali matalikilo aakubandika kwatakazwidilila akati kazigwebenga alimwi abasikalumamba. Ba Natalya, ibakali kwiiya Bbaibbele a Bakamboni ba Jehova balayeeya mbocakabede nobaamba kuti: “Kunyina nondakapailide boobu.”

Cakali ciindi cacilimo, aboobo muluumu mwakusobanina zisobano mwakali kupya kapati. Kutalikila mafwumofwumo buzuba bwabili, zigwebenga tiizyakabapa bantu cakulya naa meenda. Kuzoosika mubuzuba bwatatu—muli Bwasanu—bantu bamwi bakatalika kunywa minsyu alimwi akulya maluba bana bacikolo ngobakaletelede bamayi babo. Ba Natalya baamba kuti: “Kasankwa kakakkede munsi lyesu kakandipa tuvwu. Ndakabaabanya ba Anzhelika alimwi a Aslan.”

Mubuzuba bwatatu mbubwenya, kwakaba manyongwe. Ba Natalya baamba kuti: “Kubboloka kwatubbomba kwakapa kuti ndiwide ansi. Busi bwakaunta mujulu, mpoonya bakatalika kudubula.” Ba Natalya a Aslan bakakalaba kwiinda abusena ibwakali akati kabasikalumamba alimwi azigwebenga  ibakali kudubulana. Ba Alan ibakali kukkala mu Ossetia bakabakwelela kulubazu kwakanyina ntenda. Ibanji tiibakacikonzya kutija.

Bana banji alimwi abapati bakafwa, kubikkilizya a Anzhelika. Kwansondo zili mbozibede, kulila kwakali kumvwugwa mu Beslan. Ŋanda yaba Natalya ili afwaafwi acikolo, pele nokuba kuti kwakayakwa cikolo cipya, Aslan tanaakali kulyata mweendo acikolo eeci. Tanaakali kuunka aanze kuyoosobana. Ba Natalya baamba kuti: “Twakalomba Jehova kuti amugwasye kuleka kuyoowa.” Mukuya kwaciindi, wakaliyumya akutalika alimwi kuunka kucikolo.

Sunko ndyobakajisi ba Natalya lyakali lyakuunka kumiswaangano ya Bunakristo ku Ŋanda ya Bwami. Baamba kuti: “Lyoonse ndanooli abantu banji mukasena kasyoonto, ndakali kulimvwa mbuli kuti kwakali zigwebenga zyakali kuyanda kutunjilila. Ndakali kupaila kutegwa kutacitiki cili coonse. Nokwakainda ciindi, ndakacileka kuunka kumiswaangano. Alimwi mizeezo yakuti bantu banji bakafwa, kakuli swebo twakafwutuka yakali kundipenzya.”

Ba Natalya baamba kuti: “Ndilabalumba kapati bantu bamumbungano bakazumanana kundiyumya. Kamboni wazina lyakuti Tatyana wakali kundiswaya lyoonse kwainda mazuba otatwe. Kumbele, wakaboola a Kamboni umwi wazina lya Ulyana, walo iwakajisi lubomba, wakali mupampu, mubombe alimwi wakalilizyi kabotu Bbaibbele. Wakandilumbaizya akaambo kakusoleka nkondakali kucita, alimwi wakali kundiswiilila nondakali kwaambaula.

“Ulyana wakandibalila majwi aa Munakristo mwaapostolo Paulo aalembedwe mulugwalo lwa 2 Bakorinto 1:9. Niyakainda ntenda yakacitikila ku Asia, Paulo wakaamba kuti: ‘Twakalimvwa kuti twapegwa mulandu wakuti tweelede kujaigwa.’ Alimwi wakabala lugwalo lwa Isaya 40:31 ilwaamba kuti: ‘Aabo balangila Jehova bayooba anguzu alimwi. Bayakuuluka kuya mujulu amababa mbuli basikwaze.’ Magwalo aaya, kubikkilizya alugwasyo lwa Ulyana abamwi buyo, zyakandiyumya kutalika alimwi kujanika kumiswaangano ya Bunakristo, antoomwe abana bangu. Nokuba boobo, kuba mu Ŋanda ya Bwami kulandilibilisya.”

Ba Zarina bakazikuba Bakamboni ba Jehova alimwi balangila ciindi nobayootambula Anzhelika aakubusyigwa anyika mbotu, yaluumuno iinooyendelezyegwa a Bwami bwa Leza. (Matayo 6:9, 10; Milimo 24:15) Ba Natalya abana babo bakabbapatizyigwa mu 2009. Bacikkala afwaafwi amatongo aaŋanda yakucitila zisobano, pele bakaleka kuyeeya zintu zibi zyakacitika. Ba Natalya baamba kuti: “Lino ndilakonzya kwaamba kujatikizya buzuba obuya kumoyo kakutuba alimwi kanditayoowede. Leza nguutugwasya kuliyumya.”