MUNYAMA ooyu wamumaanzi iweenda masiku ulalipangila mumuni ikutegwa katabonwi—pele kuti mumuni ooyu kaunjilana kabotu amumuni wamwezi alimwi awanyenyeezi. Icipa kuti munyama ooyu kacita boobu nkweendelana kuliko akazunda kagusya mumuni. Kweendelana ooku andiswe kulakonzya kutugwasya, pele munzila iindene. Kulakonzya kutugwasya kuba abuumi buli kabotu.

Mucikozyanyo: Munyama ooyu ukkala mumaanzi aali kufwaafwi ansumbu zyaku Hawaii. Mumuni uuzwa kumwezi alimwi akunyenyeezi upa kuti cinzimweemwe camunyama ooyu kacilibonya kubanyama bamwi bakonzya kumunyonganya. Mpoonya walo munyama ooyu ugusya mumuni abula bwakwe uukozyenye amumuni wamasiku munguzu alimwi akukomena. Acita boobu inga kunyina cinzimweemwe. Cibelesyo cisumpukide ncabelesya munyama ooyu ncibeela cipa mumuni calo cibamba tuzunda tupa mumuni iweelede kucintu cipegwa mumuni ooyo.

Kazunda aaka alimwi kalakonzya kupa kuti munyama ooyu wamumaanzi kaona bweelede. Eeci cilabakkomanisya basikuvwuntauzya akaambo kakuti munyama ooyu tali buyo alikke uujisi kweendelana kuliko akati katuzunda alimwi ama circadian cycles. Mucikozyanyo mubanyama bategwa mammals, kazunda ikagwasyilizya mukugaya cakulya kalakonzya kweendelana ama circadian rhythms. Kunyonganizyigwa kwama rhythms aaya kwaambwa kuti nkokuleta malwazi aakutyompwa, aasyuga, aakuneneya kapati alimwi aakubula ŋonzi. Aboobo, kwiiya kujatikizya tuzunda twamunyama ooyu uutegwa bobtail squid alimwi acitweendelezya, kulakonzya kutupa luzyibo kujatikizya buumi bwabantu.

Ino muyeeya buti? Sena cibeela cipa mumuni kumunyama uutegwa bobtail squid waku Hawaii cakabako akaambo kakusanduka naa cakalengwa buya?