NZYOBAAMBA BANTU

Kutegwa muzumanane kuba amulimo ngomujisi, mweelede kuubikkila maano kapati kwiinda zintu zyoonse. Kuyeeya kuli boobu kwapa bamwi kuciindizya kubeleka cakuti bacileka akubikkila maano mikwasyi yabo alimwi abuumi bwabo beni.

NCOLYAAMBA BBAIBBELE

Bbaibbele likulwaizya kuulanga munzila yeelede mulimo. Likulwaizya kubeleka canguzu alimwi talikulwaizyi butolo. (Tusimpi 6:6-11; 13:4) Kulubazu lumwi, Bbaibbele talyaambi kuti tweelede kulijaya buya kubeleka. Muciindi caboobo litukulwaizya kuba aciindi cakulyookezya. Lugwalo lwa Mukambausi 4:6 lwaamba kuti: “Kulyookezya kusyoonto nkubotu kwiinda kulijaya kubeleka mulimo muyumu akutandaanya muwo.” Aboobo tatweelede kuciindizya kubeleka cakuti twaleka kubikkila maano kumukwasyi wesu naa kubuumi bwesu. Tacigwasyi kulijaya kubeleka!

“Kumuntu, kunyina cintu cibotu kwiinda kulya, kunywa alimwi akukkomana mumilimo njabeleka canguzu.” —Mukambausi 2:24.

NZYOBAAMBA BANTU

Ikuti mulimo kauvwolwa mali manji nkokuti mulimo ooyo uli buyo kabotu. Ikuyeeya kuli boobu kubikkilizya asunko lyakupanga mali manji, kwapa bantu bamwi kucita makwebo cabumpelenge alimwi akubeleka milimo iikasyigwa amulawo.

Bamwi kwiinda mukuyungwa amizeezo mbuli yakuti ‘kolitakata kubeleka kusikila wacijana ncoyanda’ alimwi awakuti ‘kocita mulimo ngokkomanina,’ wapa bantu bamwi kusala buyo kucita mulimo uubamvwisya kabotu. Ikuti mulimo kautali yooyo ngobayanda mubuumi bwabo, alimwi ikuti naa kautabakkomanisyi, ubamvwisya butolo. Akaambo kaceeci, cipa kuti kabatabeleki canguzu kumulimo. Balakonzya kwiikaka noiba milimo mibotu akaambo kakuti balimvwa kuti taibeeleli.

NCOLYAAMBA BBAIBBELE

Bbaibbele talikulwaizyi kubeleka milimo yabumpelenge naa eeyo iikonzya kupa kuti bamwi babe muntenda. (Levitiko 19:11, 13; Baroma 13:10) Mulimo uuli kabotu ulabagwasya bantu alimwi upa sikuucita “kuba amanjezyeezya mabotu.”—1 Petro 3:16.

Bbaibbele alimwi liyiisya kuti mulimo taupi buyo muntu kulimvwa kuti wacita cintu cimwi pele ninzila imwi yakugwasya mukwasyi alimwi akuujanina cakulya. Nokuba kuti tacilubide kuukkomanina mulimo ngotucita, pele taweelede kubonwa kuti ncecintu ciyandika kapati mubuumi.

Masimpe kuti myuulo yazintu ilakonzya kukkwela calo cikonzya kutupa kulibilika kujatikizya mbotutiijanine mukwasyi cakulya, pele Bbaibbele litukulwaizya kutaciindizya kulibilika. Lyaamba kuti: “Twanoojisi cakulya azisani, tunookkutila azintu eezyi.” (1 Timoteyo 6:8) Majwi aaya taambi kuti tweelede kuba bacete. Pele tulakonzya kuula cintu cimwi ncotukonzya akutaciindizya kuba azintu.—Luka 12:15.

NCOCAAMBA KULINDINYWE

Amubeleke canguzu kumulimo wanu. Amuukkomanine kuzwa ansi amoyo. Nokuba kuti mulimo ngomucita uboneka kuti tausumpukide naa tauli ngomusyobo wamulimo ngomwakali kuyanda, amube amakanze aakuubeleka cabunkutwe. Mulimo uubelekwa cabunkutwe upa kukkutila alimwi kuubeleka cabusungu kulakonzya kuyungizya kukkutila nkomujisi amulimo.

Kulubazu lumwi, tamweelede kuciindizya kubeleka. Kamujana ciindi cakulyookezya akulikatalusya. Ziindi zili boobu zilakkomanisya kapati ikuti mwamana kubeleka cabusungu. Kuyungizya waawo, ikuti twajana zintu nzyotuyanda, tuyoolijanina bulemu alimwi abantu bayootulemeka, kubikkilizya abamukwasyi wesu.—2 Batesalonika 3:12.

“Mutanoolibiliki akwaamba kuti, ‘Ino tuyoolya nzi?’ naa, ‘Ino tuyoonywa nzi?’ naa, ‘Ino tuyoosama nzi?’ . . . Uso wakujulu ulizyi kuti muyandika zintu eezyi zyoonse.”— Matayo 6:31, 32.