SENA buumi bwanu bwakacinca akaambo kabulwazi butasilikiki? kumana kwacikwati? kufwidwa muyandwa wanu? Ikuti mwajanika mubukkale mbomutakonzyi kucinca, inga mwalimvwa kuti kunyina ncomukonzya kucita pele kuyanda buyo kuti bukkale bucince. Mbuti mbomukonzya kutalika alimwi kubweendelezya buumi bwanu?

Mwaapostolo Paulo wakali kweenda misinzo milamfwu kali misyinali musungu wamumwaanda wamyaka wakusaanguna. Pele naakaangwa akubikkwa muŋanda kagatelwa asikalumamba kwamyaka yobilo, mulimo wakwe wakweendeenda wakaima. Muciindi cakutyompwa, Paulo wakabikkila maano kuzintu nzyaakali kukonzya kucita. Wakali kubapa lugwasyo lwakumuuya akubaumbulizya boonse ibakali kumuswaya. Alimwi wakalemba magwalo manji aali mu Bbaibbele.—Milimo 28:30, 31.

Mbubwenya mbokwaambwa mucibalo cainda, ba Anja tabacikonzyi kuzwa aŋanda. Baamba kuti: “Bulwazi bwakkansa bwapa kuti zintu zyoonse zicince mubuumi bwangu. Akaambo kakuti tandiyandi kutambukilwa malwazi aambi, ndakacileka kubeleka alimwi akucita zintu zyakulikondelezya.” Ino ba Anja baliyumya buti mubukkale bwabo mbobatakonzyi kucinca? Bakaamba kuti: “Kucinca mulongo wazyakucita cakandigwasya kapati. Ndakabikkila maano kuzintu zyakali kuyandika kulindime mpoonya akupanga mulongo weendelana azintu nzyondikonzya kucita. Eeci candigwasya kweendelezya buumi bwangu.”

Ikuti naa bukkale mbomutakonzyi kucinca bweendelezya buumi bwanu, amusole kucita zintu zitobela:

• Amubikkile maano kuzintu nzyomukonzya kucita. Mucikozyanyo, inga tiimwacikonzya kucinca zintu zyoonse kutegwa kamutaciswi, pele sena mulakonzya kunyanyaasya mubili, kulya zyakulya zijisi busani alimwi akulyookezya bweelede?

• Amube ambaakani nzyomuyanda kuzuzikizya mubuumi bwanu. Amuzyibe ncomukonzya kucita kutegwa musike ambaakani eezyo. Amusoleke kuba aciindi nociceya abuzuba ikuzuzikizya mbaakani zyanu.

• Amucite milimo, noiba misyoonto iikonzya kumupa kulimvwa kuti kuli zintu nzyomukonzya kweendelezya. Amusalazye tebulu yamuncikini alimwi akusanzya mbale. Amusame cabulondo. Amusaangune kucita milimo iiyandika kapati mafwumofwumo.

• Amulange-lange mpindu nzyomukonzya kujana kweelana abukkale bwanu. Mucikozyanyo, sena bukkale bwanu bumupa maano aakumvwisya mbomukonzya kuliyumya mumapenzi? Sena inga mwabelesya maano aaya kugwasya bamwi?

Masimpe Ngakuti: Inga tiimwacikonzya kweendelezya bukkale bwanu cakumaninina, pele mulakonzya kweendelezya mbomulimvwa kujatikizya bukkale oobo.