CIINDI nomwakacili bana, ino mwakajisi mbaakani nzi mubuumi? Ambweni mwakali kuyanda kukwata, kuyungizya luzyibo lwanu kujatikizya mulimo umwi, naa kuyandaula mulimo uukkomanisya. Pele talili lyoonse zintu nozicitika mbuli mbotuyanda. Ibuyumuyumu mbotutalangili bulakonzya kucinca makanze ngotujisi. Eeci ncicakacitikila ba Anja, ba Delina alimwi aba Gregory.

• Ba Anja baku Germany, bakajanika abulwazi bwakkansa nibakajisi myaka iili 21, alimwi lino tabacikonzyi kuzwa aŋanda.

• Ba Delina baku United States baciswa bulwazi bwa neuromuscular disorder ibwiitwa kuti dystonia. Kuyungizya waawo, balanganya banabokwabo botatwe balemene.

• Ba Gregory baku Canada bajisi bulwazi bwakulibilika bwalo bupa kuti mubili kautali kabotu.

Nokuba kuti bali mubukkale buli boobu, ba Anja, ba Delina alimwi aba Gregory bacikonzya kweendelezya buumi bwabo. Munzila nzi?

Kasimpi kamu Bbaibbele kaamba kuti: “Ikuti watyompwa muziindi zyamapenzi, nkokuti nguzu zyako zilaceya.” (Tusimpi 24:10, bupanduluzi buyungizyidwe) Bupanduluzi bulisalede: Cilayandika kubona mbomuzilanga zintu. Bantu bauside balaalilwa kusala kabotu zintu zikonzya kubagwasya, kakuli aabo bazilanga kabotu zintu kanji-kanji balijisi nguzu zyakusala kabotu akujana lukkomano nokuba kuti bali mubukkale butali kabotu.

Amulange-lange majwi aaya mbwaakaba aamasimpe kuli ba Anja, ba Delina alimwi aba Gregory.