Bantu bamwi baamba kuti tacikonzyeki kumulumbaizya kapati mwanaanu. Bamwi baamba kuti kumulumbaizya lyoonse mwanaanu kulakonzya kumupoizya akumupa kuti kalimvwa kuti uleelede kulumbaizyigwa alimwi akuti ulakonzya kucita kufwumbwa ncayanda.

Nomuyeeya mpomweelede kusika kulumbaizya mwanaanu, mweelede kubona ambomweelede kumulumbaizya. Ino nkulumbaizya ikuli buti ikuyookulwaizya mwanaanu? Ino nkulumbaizya kuli buti ikukonzya kupa kuti ataciti kabotu? Mbuti mbomukonzya kulumbaizya munzila iiyoogwasya kapati?

Kulumbaizya takweelene. Amulange-lange twaambo tutobela.

Kulumbaizya kapati kulakonzya kuleta mapenzi. Bazyali bamwi balaciindizya kulumbaizya kutegwa bakulwaizye mbobalimvwa bana babo. Pele kweelana asyaazibwene wazina lyakuti Dr.  David Walsh mbwaakacenjezya, bana “balicenjede cakuti balakonzya kuzyiba kuti mwaciindizya akubona kuti mubwini tamulumbaizyi buya. Balizyi kuti tiibali kweelela kulumbaizyigwa alimwi balakonzya kwaamba kuti tabakonzyi kumusyoma.” *

Kulumbaizya ikuyeeme azintu nzyakonzya kucita mwana kuli kabotu. Amweezyeezye kuti mwanaanu musimbi ucita kabotu mumakani aakudulowiŋa. Mbuli cilengwa, muyanda kumulumbaizya, calo icitiimukulwaizye kuyungizya luzyibo lwakwe. Pele kuli cikonzya kumupilusya musyule. Kulumbaizya ikuyeeme buyo acintu ncacita kabotu cilikke kulakonzya kupa kuti mwanaanu ayeeye kuti zyakucita iziyandika nzyeezyo buyo izitakatazyi. Ulakonzya mane akutantamuka kucita zintu izipya, kayoowa kuti inga waalilwa. Inga wayeeya kuti, ‘Ikuti cintu cimwi kacikatazya kucita, nkaambo nzi ncondeelede kulipenzya kucicita?’

Kulumbaizya akaambo kakusolekesya nkokwiinda kubota. Ibana balumbaizyigwa akaambo kakubeleka canguzu alimwi akuliyumya ikutali akaambo kakuti baluuzyi mulimo, balaiya kaambo kamasimpe kakuti kuba aluzyibo kuyandika kukkazika moyo alimwi akusolekesya. Bbuku liitwa kuti Letting Go  With Love and Confidence lyaamba kuti “balabeleka canguzu kutegwa mulimo ube ampindu. Noliba leelyo nobaalilwa, tabaliboni kuti baalilwa, pele balibona kuti mbaasikwiiya.”

Amulumbaizye kusolekesya ikutali buyo luzyibo. Ikwaambila mwanaanu kuti “Ndabona kuti ulabikkila maano kapati mukudulowiŋa kwako,” kulakonzya kugwasya kapati kwiinda kwaamba kuti “Yebo kudulowiŋa kuli mubulowa.” Twaambo toonse tobilo tulalumbaizya, pele kaambo kabili kapa muzeezo wakuti izintu izili mubulowa nzyezintu zilikke mwanaanu nzyanoocita kabotu.

Ciindi nomulumbaizya akaambo kakusolekesya, muyiisya mwanaanu kuti kwiinda mukucita nzyakonzya ulakonzya kuyaambele. Mpoonya mwanaanu ulakonzya kucita zintu zipya kajisi lusyomo lwakuti ulakonzya kuzicita.—Njiisyo yamu Bbaibbele: Tusimpi 14:23.

Amumugwasye mwanaanu kuti naa waalilwa. Nobaba bantu bacita kabotu balalubizya, ambweni cakwiinduluka-induluka. (Tusimpi 24:16) Pele ciindi cili coonse nobalubizya, balatalika alimwi ncobali kucita, akwiiya kuli ceeco icabacitikila mpoonya akuzumanana. Mbuti mbomukonzya kugwasya mwanaanu kuti kazibona munzila iili boobo izintu?

Nkokuti alimwi, amubikkile maano kukusolekesya. Amulange-lange cikozyanyo eeci: Amweezyeezye kuti kanji-kanji mwaambila mwanaanu kuti “Yebo namba zili mubulowa,” mpoonya wafeela musunko wanamba. Ulakonzya kuyeeya kuti waalilwa kucita cintu ncaakali kucita kabotu aboobo taakwe kaambo kakusolekesya kuti ayaambele.

Nokuba boobo, nomubikkila maano kukusolekesya, mugwasya mwanaanu kuti kaliyumya. Mugwasya mwanaanu kubona ceeco icacitika mbubwenya mbocacitika, kutali kuti ndipenzi lipati. Aboobo muciindi cakuti acileke, ulakonzya kusola nzila iimbi naa kubeleka canguzu kapati.—Njiisyo yamu Bbaibbele: Jakobo 3:2.

Amwaambe bulubizi munzila iigwasya. Ciindi bulubizi nobwaambwa munzila iili kabotu, mwana ulagwasyigwa kutali kumutyompya. Kuyungizya waawo ikuti lyoonse kamumulumbaizya bweelede, kulalangilwa kuti mwanaanu uyookutambula kululamikwa akubona mbwakonzya kuyaambele. Mpoonya izintu nzyacita cakuzwidilila ziyoomupa kukkutila walo alimwi andinywe.—Njiisyo zyamu Bbaibbele: Tusimpi 13:4.