Nywebo mukkomanina zisobano, pele ngomukwetene limwi ukkomanina kubala. Mulacita zintu cabunkutwe alimwi cabulondo pele ngomukwetene limwi taciti zintu munzila eeyo. Mulakkomana kubandika-bandika abantu pele ngomukwetene limwi tali boobo pe.

Akaambo kaceeci mwalyaambauzya akuti ‘Tatweendelani pe!, nkaambo nzi ncondatakazyibila limwi notwakali kweebana?’

Kweelede kuti mwakalizyi nokuceya. Pele aciindi eeco ambweni mwakali kufwambaana kutumana twaambo—cintu ncomukonzya kutalika kucita alimwi, mbwaanga lino mulikwetene. Cibalo eeci cilamugwasya mbomukonzya kucita oobo. Aboobo, cakusaanguna amulange-lange twaambo tujatikizya zintu nzyomunga mwabona kuti muliimpene.

Kwiimpana kumwi nkupati. Ciindi cakweebana, nceciindi cakubona zintu nzyomweendelana. Aboobo, ikuti kwajanika kuti kuli kwiimpana kupati ciindi cakweebana, bantu banji balaleka kweebana muciindi cakuzumanana akunjila mucikwati citakonzyi kuzwidilila. Pele ino mbuti kujatikizya kwiimpana kusyoonto, kwalo ikujanika mucikwati cili coonse?

Kunyina bantu bobilo bakonzya kweendelana cakumaninina. Aboobo, tacigambyi ikuti banabukwetene kabaindene mucintu cimwi naa zili mbozibede akati kazintu zitobela:

Nzyomukkomanina. Mukaintu wazina lyakuti Anna * wakaamba kuti: “Zisobano zicitilwa anze tandinabuzuba ndaziyanda. Pele balumi bangu kuzwa kubwana bakali kuyanda kutanta malundu aajisi caanda alimwi akweenda musyokwe mazuba manji.”

Zilengwa. Mwaalumi wazina lyakuti Brian wakaamba kuti: “Mukaintu wangu ulakonzya kumuka koona pesi akubuka aciindi ca 05 mafwumofwumo, pele mebo ndeelede koona mawoola aali 7 naa 8, kwataba boobo, ndiba apenzi lyakunyema.”

Bube. Ambweni nywebo muli baumuzi, pele ngomukwetene limwi ulaambaula. Mwaalumi wazina lya David wakaamba kuti: “Ndakakomena kanditaambi mapenzi ngondijisi. Pele mukaintu wangu uzwa kumukwasyi nkobakali kwaambila abuleya zintu zyoonse.”

Kwiimpana kulakonzya kugwasya. Mukaintu wazina lyakuti Helena wakaamba kuti: “Nzila njondasala kucita cintu ilakonzya kuti kaili buyo kabotu, pesi tacaambi kuti nenzila ilikke iikonzya kubelesyegwa.”

Amugwasyanye. Mwaalumi wazina lya Adam wakaamba kuti: “Mukaintu wangu Karen tazikkomanini zisobano. Pele tuunka limwi kwaakweebelela zisobano zinji alimwi akuweelela antoomwe. Kulubazu lumwi, Karen uyanda kapati kuunka kuŋanda nkobatondezya zintu zyakuzekaula (art museum), aboobo ndilaunka anguwe, alimwi tulakkala ooko kusikila walo waamba kuti tupiluke. Ndilasolekesya kutondezya luyandisyo muzintu zyakuzekaula akaambo kakuti zilayandika kulinguwe.”—Njiisyo yamu Bbaibbele: 1 Bakorinto 10:24.

Amuzumine mizeezo yabamwi. Mbwazibona zintu ngomukwetene limwi takulubide akaambo buyo kakuti nywebo muzilanga munzila iimbi. Eeci ncaakaiya mwaalumi wazina lya Alex. Wakaamba kuti: “Lyoonse ndakali kuyeeya kuti kuli buyo nzila yomwe yakucita cintu cimwi akuti nzila zimbi inga tiizyabeleka. Pele kuba mucikwati kwandigwasya kubona kuti kuli nzila zinji, akuti nzila imwi aimwi ilabeleka.”—Njiisyo yamu Bbaibbele: 1 Petro 5:5.

Amulange zintu kweelana ambozibede. Ikweendelana tacaambi kuti mulikozyenye. Aboobo tamweelede kuyeeya kuti tiimwakasala kabotu wakukwatana limwi akaambo buyo kakwiimpana kusyoonto nkomwabona. Bbuku litegwa The Case Against Divorce lyaamba kuti: “Bantu banji inga balipa cilitamizyo cakuti ‘Luyando lwakandivwumba ameso.’” Alimwi bbuku eeli lyaamba kuti, “buzuba bumwi abumwi mbomukkala kamukkomene citondezya kuti taciko makani atumpenda ntomujisi, mulakonzya kuyandana.” Amusole “kweengelelana . . . nokuba kuti umwi kajisi kaambo kakutongooka mweenzinyina.”—Bakolose 3:13.

Amusole nzila eeyi: Amulembe zintu nzyomuyanda kujatikizya ngomukwetene limwi alimwi anzyomweendelana. Mpoonya amulembe zintu nzyomuteendelani. Muyoojana kuti zintu nzyomuteendelani tazili zipati kweelana ambomuyeeya. Nzyomwalemba alimwi zilatondezya mpomukonzya kumumvwisya ngomukwetene limwi. Mwaalumi wazina lya Kenneth wakaamba kuti: “Ndilalumba ciindi mukaintu wangu natobela nzyondiyanda alimwi ndilizyi kuti awalo ulalumba ndatobela nzyayanda. Nokuba kuti inga cayanda kulyaaba, kumubona kakkomene kundipa kukkomana andime.”—Njiisyo yamu Bbaibbele: Bafilipi 4:5.