AMUYEEYE buzuba mbomwakakkomene kapati mubuumi bwanu. Sena mbuzuba nomwakakwata naa kukwatwa naa mbuzuba naakazyalwa mwanaanu wakusaanguna? Naa sena mbuzuba nomwakabbapatizyigwa? Ambweni oobu mbobwakali buzuba buyandika kapati naa buzuba bukkomanisya mubuumi bwanu. Alimwi buzuba oobo, bakwesu abacizyi bakakkomana kumubona kamutondezya luyando kuli Leza amoyo wanu woonse, buumi bwanu boonse, amizeezo yanu yoonse, alimwi anguzu zyanu zyoonse!—Marko 12:30.

Mubwini, mwajana lukkomano mukubelekela Jehova kuzwa ciindi nomwakabbapatizyigwa. Nokuba boobo basikumwaya banji baleka kujana lukkomano ndobakajisi kaindi. Ino ncinzi capa kuti eeci cicitike? Ino ntwaambo nzi ntotujisi twakuzumanana kubelekela Jehova calukkomano?

Mulumbe wa Bwami utupa kukkomana kapati. Nkaambo nzi? Nkaambo Jehova usyomezya kuti Bwami lino-lino buyonyoonyoona nyika mbyaabi akuleta nyika mpya ya Leza. Lugwalo lwa Zefaniya 1:14 lutwaambila kuti: “Buzuba bupati bwa Jehova buli afwaafwi! Buli afwaafwi alimwi bulaboola cakufwambaana kapati!” Pele ikuti naa twalimvwa kuti calampa ciindi cakulangila kwiinda mbotwakali kulangila, lukkomano lulakonzya kumana. Eeci cilakonzya kupa kuti tuleke kusungwaala mumulimo wa Leza.—Tusimpi 13:12.

Ciindi notuli abakwesu abacizyi, tulakulwaizyigwa kuzumanana kubelekela Jehova calukkomano. Bube bubotu bwabantu ba Jehova ambweni mbobwakatupa kuyanda bukombi bwakasimpe alimwi bwakatugwasya kutalika kubelekela Leza calukkomano. (1 Petro 2:12) Nokuba boobo, ino ncinzi cinga cacitika ikuti mukwesu naa mucizyi umwi wapegwa lulayo akaambo kakuti taakatobela milawo ya Leza? Eeci cilakonzya kutyompya bamwi mumbungano akubapa kuti baleke kuba alukkomano.

Kuyandisya zintu zyakumubili akwalo kulakonzya kupa kuti tuleke kukkomana. Munzila nzi? Nyika ya Saatani isola kutoongelezya kuti katuula zintu mubwini nzyotutayandiki. Aboobo atuyeeye majwi aa Jesu aakuti: “Taakwe uukonzya kubelekela basimalelo bobilo; nkaambo uyoosula umwi akuyanda umbi, naa uyoosyomeka kuli umwi akusampula umbi. Tamukonzyi kubelekela Leza alimwi a Lubono.” (Matayo 6:24) Tatukonzyi kubelekela Jehova calukkomano aciindi comwe katusoleka kujana zyoonse nzyotuyanda munyika eeyi.

Kubelekela Jehova tacili cintu ciminya kuli baabo bamuyanda. (1 Johane 5:3) Amuyeeya kuti Jesu wakaamba kuti: “Amuboole kulindime nyoonse nomukatede akulemenwa, eelyo ndilamukatalusya. Amulikulike joko lyangu, mwiiye kulindime, nkaambo ndili mubombe moyo, alimwi ndilalicesya, eelyo mulakatalusyigwa. Nkaambo joko lyangu talikatazyi kunyamuna, alimwi mukuli wangu muuba.” (Matayo  11:28-30) Kuba Munakristo wakasimpe kulakatalusya alimwi kuleta lukkomano. Masimpe tulijisi twaambo tutupa kukkomana mumulimo wa Jehova. Lino atulange-lange twaambo totatwe.—Habakuku 3:18.

Tubelekela Sikutupa Buumi, Leza uukkomene. (Milimo 17:28; 1 Timoteyo 1:11) Tulizyi kuti Mulengi wesu. Aboobo atuzumanane kumubelekela calukkomano, tacikwe makani amyaka yainda kuzwa notwakabbapatizyigwa.

Atulange-lange ba Héctor, ibakabelekela Jehova kabali mulangizi weendeenda kwamyaka iili 40. ‘Nokuba mubucembele’ bacikkomene kubelekela Jehova. (Intembauzyo 92:12-14) Kuciswa kwabakaintu babo kwabapa kutacita zinji mumulimo wa Leza, pele ba Héctor kunyina nobaleka kukkomana. Bakaamba kuti: “Nokuba kuti cilausisya kubona bakaintu bangu kabaciswa-ciswa alimwi nokuba kuti kuli buyumuyumu bwakubalanganya, tiindazumizya eeci kundilesya kukkomana kubelekela Leza wakasimpe. Kuzyiba kuti tuponena Jehova, iwakalenga muntu akaambo kakuti wakalijisi makanze ncaakamulengela, ikaambo aaka keelede kutupa kumuyanda kapati akumubelekela camoyo woonse. Ndilasoleka kuba musungu mumulimo wakukambauka, alimwi ndilasola kubikka aambele bulangizi bwa Bwami mumizeezo yangu kutegwa ndizumanane kukkomana.”

Jehova wakatupa cituuzyo cacinunuzyo, eeci cipa kuti tukonzye kukkomana mubuumi. Mubwini, “Leza wakaiyanda kapati nyika cakuti wakapa Mwanaakwe simuzyalwaalikke, kutegwa muntu uuli woonse uumusyoma atanyonyoonwi, pele abe abuumi butamani.” (Johane 3:16) Inzya, zibi zyesu zilakonzya kulekelelwa alimwi tulakonzya kuba abuumi butamani ikuti twaba alusyomo mucipego ca Leza caluyando cacinunuzyo. Aaka nkaambo kabotu kapati keelede kutupa kulumba. Kutondezya kulumba kucinunuzyo kuyootukulwaizya kubelekela Jehova calukkomano.

Mukwesu wiitwa kuti Jesús, iwakali kukkala ku Mexico, wakaamba kuti: “Ndakali muzike kumulimo wangu, zimwi ziindi ndakali kuzumanana kubeleka kakunyina kukotoka casika ciindi nokuba kuti tiindakeelede kucita oobo. Ndakacita oobo kutegwa ndivwole mali manji. Mpoonya ndakaiya kujatikizya Jehova alimwi ambwaakapa Mwanaakwe uuyandwa kubantu. Ndakaba aluyandisisyo lwakumubelekela. Aboobo ndakalyaaba kubelekela Jehova, nokwakainda myaka iili 28 yakubeleka mukkampani, ndakayeeya kuti ndileke akutalika mulimo waciindi coonse.” Oobu ba Jesús mbobakatalika kubelekela Jehova calukkomano.

Tupona buumi bwakulilemeka, eeci citupa kukkomana. Sena mulayeeya buumi bwanu mbobwakabede kamutanamuzyiba Jehova? Mwaapostolo Paulo wakayeezya Banakristo baku Roma kuti ‘bakali bazike bacibi’ pele bakazyooba “bazike  babululami.” Akaambo kakuti bakali kupona buumi buli kabotu, bakali kukonzya kulangila kuba abuumi butamani. (Baroma 6:17-22) Andiswe tutobela zyeelelo zya Jehova, aboobo tuleeleba bubi buboola akaambo kakutalilemeka naa kupona buumi bwalunya. Eelo kaka eeci cilatukkomanisya!

Atulange-lange ba Jaime, ibatakali kusyoma muli Leza alimwi ibakali kusyoma njiisyo yakusanduka alimwi ibakali mucisobano cakulwana mfwaindi. Ba Jaime bakatalika kujanika kumiswaangano ya Bunakristo alimwi bakakkomana aluyando ndobakajana. Kutegwa baleke kupona buumi mbobakajisi kaindi, ba Jaime bakalomba Jehova kuti abagwasye kusyoma mulinguwe. Ba Jaime bakaamba kuti, “Buce-buce, ndakaiya kuti nkwali Leza Taata siluyando alimwi silubomba. Kubamba zyeelelo zya Jehova zisalala kwandikwabilila. Ikuti nondatakacinca, andiza nondakajaigwa, mbuli beenzuma mbotwakali limwi mucisobano cakulwana mfwaindi. Myaka njondakakkomene kapati njiyeeyo nondakali kubelekela Jehova.”

Ino tweelede kulimvwa buti ciindi notulindila kuti nyika mbyaabi inyonyoonywe? Amuyeeye, tucita kuyanda kwa Leza alimwi tulangila buumi butamani. “Aboobo tutaleki pe kucita zibotu, nkaambo kuciindi ceelede tuyootebula ikuti naa tiitwatyompwa.” (Bagalatiya 6:8, 9) Kwiinda mukugwasyigwa a Jehova, atuzumanane kuliyumya, kubeleka canguzu kutegwa tube abube mbotuyandika kutegwa tukafwutuke ‘mapenzi mapati,’ akuzumanana kubelekela Jehova calukkomano.—Ciyubunuzyo 7:9, 13, 14; Jakobo 1:2-4

Tulakonzya kusyoma kuti Jehova uyookulongezya kuliyumya kwesu nkaambo ulizyi mulimo ngotucita alimwi aluyando ndotutondezya kulinguwe akuzina lyakwe. Ikuti twazumanana kumubelekela calukkomano, tuyooba mbuli Davida, iwakaamba kuti: “Ndibikkide Jehova kumbele lyangu ciindi coonse. Akaambo kakuti uli kujanza lyangu lyalulyo, tandikazungaanizyigwi pe. Aboobo moyo wangu ulakondwa, alimwi ndilikkomene kapati. Kunze lyaboobo, ndilakkala cakuliiba.”—Intembauzyo 16:8, 9.