1-3. (a) Nkaambo nzi ncotukonzya kuba masimpe kuti tulakonzya kuba balongwe ba Leza? (b) Mbantu bali mbotutiilange-lange mucibalo eeci?

MU BBAIBBELE, ziindi zyotatwe Abrahamu waambwa kuti mulongwe wa Leza. (2 Makani 20:7; Isaya 41:8; Jakobo 2:23) Ngomuntu alikke iwaambwa cacigaminina mu Bbaibbele kuti mulongwe wa Leza. Sena eeci caamba kuti Abrahamu ngomuntu alikke iwakaba mulongwe wa Jehova? Peepe. Ibbaibbele litondezya kuti toonse tulakonzya kuba acoolwe eeci.

² Ijwi lya Leza lizwide zibalo zyaamba baalumi abamakaintu basyomeka banji ibakali kuyoowa Jehova, ibakali kumusyoma alimwi ibakaba balongwe bakwe beni-beni. (Amubale Intembauzyo 25:14.) Aaba bantu bali akati ‘kankamu mpati yabakamboni’ njaakaamba Paulo. Bantu aaba boonse baindene-indene bakali balongwe ba Leza.—Bahebrayo 12:1.

³ Atulange-lange cakusitikila balongwe ba Jehova botatwe ibaambidwe mu Bbaibbele: (1) Rute, mukamufwu mwana-mwana uusyomeka iwakazwa ku Moabu, (2) Hezekiya, mwami uusyomeka wa Juda, alimwi a (3) Mariya, mukaintu uulicesya alimwi  banyina Jesu. Ino ncinzi ncotukonzya kwiiya kuli umwi aumwi mbwaakaba mulongwe wa Leza?

4, 5. Ncintu nzi cikatazya ncaakasala Rute, alimwi nkaambo nzi kusala ooko ncokwakali kukatazya kapati? (Amubone cifwanikiso icili kumatalikilo aacibalo.)

⁴ Naomi abamukabana bakwe, Rute a Olipa, bakali mulweendo lulamfwu kuzwa ku Moabu kuya ku Israyeli. Kabali munzila, Olipa wakasala kupiluka kuŋanda ku Moabu. Pele Naomi wakalikanzide kupiluka ku Israyeli, kucisi cokwabo. Ino ncinzi Rute ncaakasala kucita? Wakali kuyandika kusala cintu cikatazya kapati. Sena wakeelede kupiluka kwabo ku Moabu kutegwa akabe antoomwe amukwasyi wakwe, naa sena wakeelede kukkala a Naomi, banyinazyala, akuunka ku Betelehemu?—Rute 1:1-8, 14.

⁵ Mukwasyi wa Rute wakali kukkala ku Moabu. Rute wakali kukonzya kupiluka kuli mbabo, alimwi ambweni bakali kukonzya kumulanganya. Wakalibazyi bantu baku Moabu, mwaambo ngobakali kwaambaula alimwi azilengwa zyabo. Akati kazintu eezyo, Naomi kunyina ncaakali kukonzya kusyomezya Rute ku Betelehemu. Alimwi Naomi wakali kulibilika kuti tanaakali kukonzya kumujanina musankwa naa ŋanda. Aboobo Naomi wakamwaambila kuti apiluke ku Moabu. Mbubwenya mbotwabona, Olipa ‘wakapiluka kubantu bakwe akuli baleza bakwe.’ (Rute 1:9-15) Pele Rute wakasala kutapiluka kubantu bakwe alimwi akuli baleza babo ibakubeja.

6. (a) Mbuti Rute mbwaakasala cabusongo? (b) Nkaambo nzi Boazi ncaakaambila kuti Rute wakajana mayubilo mumababa aa Jehova?

⁶ Kulibonya kuti Rute wakaiya kujatikizya Jehova kumulumaakwe naa kuli Naomi. Wakaiya kuti Jehova tanaakali mbuli baleza babana Moabu. Rute wakali kuyanda Jehova alimwi wakalizyi kuti wakeelede kumuyanda akumukomba. Aboobo Rute wakasala cabusongo. Wakaambila Naomi kuti: “Bantu bako bayooba bantu bangu, alimwi Leza wako uyooba Leza wangu.” (Rute 1:16) Tulakulwaizyigwa mumoyo twayeeya luyando Rute ndwaakajisi kuli Naomi. Pele icikondelezya kapati, nduyando Rute ndwaakajisi kuli Jehova. Eeci cakamukulwaizya awalo Boazi, ooyo iwakamutembaula akaambo kakujana mayubilo mumababa aa Jehova. (Amubale Rute 2:12.) Majwi ngaakabelesya Boazi alakonzya kutuyeezya twana twatuyuni mbotuyandaula lukwabililo mumababa aabazyali bantuto. (Intembauzyo 36:7; 91:1-4) Mbubwenya buyo, caluyando Jehova wakakwabilila Rute alimwi wakamulongezya akaambo kalusyomo lwakwe. Rute kunyina naakaba akaambo kali koonse ikakamupa kulimvwa kutyompwa akaambo kakusala nkwaakasala.

7. Ncinzi cikonzya kubagwasya aabo ibawayawaya kulyaaba kuli Jehova?

⁷ Bantu banji balaiya kujatikizya Jehova pele basala kutajana mayubilo mulinguwe. Balawayawaya kulyaaba kulinguwe alimwi akubbapatizyigwa. Ikuti naa mbomulimvwa oobo, amuzinzibale kuyeeya cimupa kuwayawaya. Umwi aumwi ulijisi leza ngwakomba. (Joshua 24:15) Cintu cabusongo muntu ncakonzya kusala nkukomba Leza mwini-mwini. Ciindi nomulyaaba kuli Jehova, mutondezya kuti mulijisi lusyomo lwakuti uyooba mayubilo aanu. Alimwi uyoomugwasya kuzumanana kumubelekela nokuba kuti mwajana buyumuyumu buli buti. Eeco ncecintu Leza ncaakacitila Rute.

8. Amupandulule bukkale mwaakakkomenena Hezekiya.

⁸ Bukkale mwaakakkomenena Hezekiya bwakaliindene kapati abukkale mwaakakkomenena  Rute. Hezekiya wakazwa mucisi icakalyaabide kuli Leza. Pele tabali bana Israyeli boonse ibakazumanana kusyomeka. Bausyi Hezekiya, nkokuti Mwami Ahazi, wakali muntu mubyaabi. Tanaakalilemeka tempele lya Leza alimwi wakayunga bantu kutegwa batalike kukomba baleza bambi. Kuyungizya waawo, Ahazi wakaumpa banabokwabo Hezekiya bamwi kuti babe zituuzyo kuli baleza bakubeja. Hezekiya wakakkomenena mubukkale bubyaabi!—2 Bami 16:2-4, 10-17; 2 Makani 28:1-3.

9, 10. (a) Nkaambo nzi ncocakali kukonzya kuubauba kuli Hezekiya kukalala? (b) Nkaambo nzi ncotuteelede kukalalila Leza? (c) Nkaambo nzi ncotuteelede kuyeeya kuti mbotwakakkomena nceciyakupa kuti tukabe bantu mbotuya kuba kumbele?

⁹ Cikozyanyo cibyaabi ca Ahazi nocakapa mwanaakwe Hezekiya kubijilwa naa kunyemena Jehova. Mazuba aano, bamwi ibakacitikilwa zintu zikozyenye azyeezyo zyakacitikila Hezekiya balimvwa kuti balijisi twaambo tubotu itubapa ‘kukalalila Jehova’ naa kubijilwa ambunga yakwe. (Tusimpi 19:3) Bamwi balimvwa kuti bukkale bubyaabi bwamukwasyi mobakakkomenena bulakonzya kubapa kuba abuumi bubyaabi naa kwiinduluka zintu nzyobakalubizya bazyali babo. (Ezekieli 18:2, 3) Pele sena kuyeeya kuli boobu kuliluzi?

¹⁰ Buumi bwa Hezekiya businizya kuti bwiinguzi kumubuzyo ooyo mbwakuti peepe! Kunyina kaambo kabotu ikapa kukalalila Jehova. Tapi kuti zintu zibyaabi kazibacitikila bantu. (Jobu 34:10) Masimpe kuti bazyali balakonzya kuyiisya bana babo kucita zintu zibotu naa zibyaabi. (Tusimpi 22:6; Bakolose 3:21) Pele eeci tacaambi kuti bukkale motwakakkomenena mumukwasyi bulakonzya kupa kuti tube bantu babotu naa babyaabi. Nkaambo nzi? Akaambo kakuti Jehova wakatupa cipego cakulisalila, nkokuti tulakonzya kulisalila kucita zintu zibotu naa zibyaabi. (Deuteronomo 30:19) Mbuti Hezekiya mbwaakacibelesya cipego eeco citaliboteli?

11. Ncinzi cakapa kuti Hezekiya abe umwi wabami babotu mubwami bwa Juda?

¹¹ Nokuba kuti bausyi bakali umwi wabami babyaabi kapati mu Juda, Hezekiya wakaba umwi wabami bali kabotu kapati. (Amubale 2 Bami 18:5, 6.) Wakasala kutatobela cikozyanyo cibyaabi cabausyi. Muciindi caboobo, wakasala kuswiilila kapati kubasinsimi ba Jehova, mbuli Isaya, Mika,  a Hosea. Wakabikkila maano kapati kululayo lwabo alimwi akukululamika kwabo. Eeci cakamukulwaizya kwaamana mapenzi manji bausyi ngobakaleta. Wakasalazya tempele, wakalomba Leza kuti alekelele zibi zyabantu, alimwi wakainyonyoona mituni mucisi coonse. (2 Makani 29:1-11, 18-24; 31:1) Kumbele, ciindi mwami wa Asuri Sanakeribu naakayanda kulwana Jerusalemu, Hezekiya wakatondezya busicamba kapati alimwi alusyomo. Wakasyoma kuti Jehova ulabakwabilila alimwi wakayumya bantu bakwe. (2 Makani 32:7, 8) Aciindi cimwi Hezekiya wakalisumpula, pele ciindi Jehova naakamululamika, wakalibombya. (2 Makani 32:24-26) Cilisalede kuti, Hezekiya ncikozyanyo cibotu kapati ncotweelede kwiiya. Kunyina naakalekela bukkale mwaakakkomenena kunyonganya buumi bwakwe. Muciindi caboobo, wakatondezya kuti wakali mulongwe wa Jehova.

12. Mbubwenya mbuli Hezekiya, mbuti bantu banji mazuba aano mbobasinizya kuti mbalongwe ba Jehova?

¹² Nyika yabija mazuba aano alimwi kunyina luyando, alimwi bana banji balakkomena kabatajisi bazyali babatondezya luyando akubababikkila maano. (2 Timoteyo 3:1-5) Nokuba kuti Banakristo banji mazuba aano bakakkomenena mumikwasyi iikatazya, bakasala kuba acilongwe cibotu a Jehova. Mbubwenya mbuli Hezekiya, balatondezya kuti bukkale bwamumikwasyi mobakakkomena tabweelede kupa kuti bakabe bantu babyaabi kumbele. Leza wakatupa cipego cakulisalila, aboobo tulakonzya kusala kumubelekela alimwi akumulemeka, mbubwenya mbwaakacita Hezekiya.

13, 14. Nkaambo nzi mukuli ngwaakapegwa Mariya ncoulibonya kuti wakali muumu kapati, pele ino wakaamba nzi kuzintu Gabriyeli nzyaakamwaambila?

¹³ Nokwakainda myaka minji kuzwa ciindi Hezekiya naakali mwami, musimbi uulicesya iwakali kwiitwa kuti Mariya wakajisi cilongwe cilibedelede a Jehova alimwi wakapegwa mukuli waalubazu. Wakali kuyoomita akuzyala Mwana wa Leza alimwi akumukomezya! Kweelede kuti Jehova wakali kumuyanda alimwi akumusyoma Mariya kutegwa amupe coolwe cilibedelede eeco. Pele ino wakalimvwa buti ciindi cakusaanguna naakamvwa zyamukuli ooyo?

¹⁴ Kanji-kanji tulaamba kujatikizya coolwe cipati Mariya ncaakapegwa. Pele ino kulangilwa kuti nzintu nzi zimwi nzyaakali kuyoowa? Mucikozyanyo, mungelo Gabriyeli wakaamba kuti wakali kuyoomita kakunyina koona amusankwa. Pele Gabriyeli tanaakabapandulwida bamukwasyi wa Mariya naa basimukobonyina mbwaakali kuyoomita. Ino ncinzi ncobakali kuyooyeeya? Mbuti mbwaakali kuyoomupandulwida Josefa kutegwa asyome kuti tanaakacita cakutasyomeka kulinguwe? Kuyungizya waawo, wakajisi mukuli mupati wakukomezya Mwana wa Leza kali muntunsi! Tatuzyi zintu zyoonse nzyaakali kulibilika Mariya,  pele tulizyi ncaakacita Mariya ciindi naakamana kubandika anguwe Gabriyeli. Wakati: “Bona, mebo ndili muzike wa Jehova! Akube mbubonya mbowaamba.”—Luka 1:26-38.

15. Nkaambo nzi lusyomo lwa Mariya ncolulibedelede?

¹⁵ Masimpe lusyomo lwa Mariya lulilibedelede! Mbubwenya mbuli muzike, wakalilibambilide kucita kufwumbwa ncaakali kuyakwaambilwa kuti acite. Wakajisi lusyomo lwakuti Jehova uyoomubamba alimwi akumukwabilila. Mbuti Mariya mbwaakaba alusyomo luyumu boobu? Tiitwakazyalwa katujisi lusyomo. Pele tulakonzya kuba alusyomo kuti twayanda alimwi akulomba Leza kuti akulongezye kusolekesya kwesu. (Bagalatiya 5:22; Baefeso 2:8) Mariya wakabeleka canguzu kutegwa ayumye lusyomo lwakwe. Ino tuzyi buti? Atulange-lange mbwaakaswiilila alimwi azintu nzyaakaamba.

16. Ncinzi citondezya kuti Mariya wakali muswiilizi mubotu?

¹⁶ Mariya mbwaakali kuswiilila. Ibbaibbele lyaamba kuti tweelede “kufwambaana kuswiilila, kumuka kwaambaula.” (Jakobo 1:19.) Mariya wakali muswiilizi mubotu. Ibbaibbele litondezya kuti wakaswiilila cakubikkila maano zintu nzyaakamvwa, ikwaambisya zintu nzyaakaiya kujatikizya Jehova. Wakali kuba aciindi cakuzinzibala kuyeeya zintu eezyo izyakali kuyandika kapati. Cikozyanyo cimwi mumakani aaya cakali ciindi Jesu naakazyalwa ciindi beembezi nobakaambila Mariya zyamulumbe iwakazwa kumungelo. Kumbele, ciindi Jesu naakali amyaka iili 12, wakaamba zintu zimwi izyakamugambya Mariya. Mubukkale boonse oobu bobilo, Mariya wakaswiilila, wakayeeya, alimwi wakazinzibala kuyeeya cakubikkila maano zintu nzyaakamvwa.—Amubale Luka 2:16-19, 49, 51.

17. Ncinzi ncotukonzya kwiiya kujatikizya Mariya kuzintu nzyaakaamba?

¹⁷ Zintu Mariya nzyaakaamba. Ibbaibbele talitwaambili zinji Mariya nzyaakaamba. Makani manji ngaakaamba ajanika mulugwalo lwa Luka 1:46-55. Majwi aaya atondezya kuti Mariya wakalaazyi kabotu Magwalo aa Chihebrayo. Munzila nzi? Zintu nzyaakaamba Mariya zilikozyenye azyaambidwe mumupailo wa Hana, banyina Samuele. (1 Samuele 2:1-10) Kulibonya kuti Mariya wakazubulula Magwalo ziindi zili 20 mumakani ngaakaamba. Cilisalede kuti wakali kukkomana kwaamba kujatikizya kasimpe nkaakaiya ku Mulongwe wakwe mupati, Jehova.

18. Muunzila nzi motukonzya kwiiya lusyomo lwa Mariya?

¹⁸ Mbubwenya mbuli Mariya, zimwi ziindi tulakonzya kutambula mikuli kuzwa kuli Jehova njotuyeeya kuti miyumu kapati. Atwiiye cikozyanyo cakwe, cakulicesya atwiitambule mikuli, akusyoma kuti Jehova uyootugwasya. Alimwi tulakonzya kwiiya lusyomo lwa Mariya ciindi notuswiilila cakubikkila maano kuli Jehova akuzinzibala kuyeeya nzyotwakaiya kujatikizya nguwe alimwi amakanze aakwe. Mpoonya calukkomano tulakonzya kwaambila bamwi nzyotwakaiya.—Intembauzyo 77:11, 12; Luka 8:18; Baroma 10:15.

19. Mbotuyaabuzumanana kwiiya zikozyanyo izilibedelede zyamu Bbaibbele zyabantu ibakajisi lusyomo, ncinzi ncotukonzya kuba masimpe?

¹⁹ Cilisalede kuti Rute, Hezekiya a Mariya bakali balongwe ba Jehova, mbubwenya mbwaakabede Abrahamu. Bakali akati ‘kankamu mpati yabakamboni’ ibakajisi coolwe cakuba balongwe ba Leza. Atuzumanane kwiiya zikozyanyo zitaliboteli zili boobo zyabantu ibakajisi lusyomo. (Bahebrayo 6:11, 12) Ikuti naa twacita oobo, tulakonzya kulangila kuyooba acoolwe cakuba balongwe ba Jehova kukabe kutamani!