1, 2. Ino Davida wakatondezya buti kuti ulasyomeka kuli Leza? (Amubone cifwanikiso icili kumatalikilo aacibalo.)

SAULO abasikalumamba bakwe ibali 3,000 bakali kuyandaula Davida munkanda ya Juda kutegwa bamujaye. Pele busiku bumwi, Davida abaalumi bakwe bakaajana mpaakabede Saulo abasikalumamba bakwe. Boonse bakalilede, aboobo Davida a Abisai bakeenda cakaumuumu kubaindilila basikalumamba akujana Saulo. Abisai wakamupetekezya Davida kuti: “Leka ndimuyase ciindi comwe buyo asumo mane likayasilizye aansi, alimwi nsikokwiinduluka pe.” Pele Davida taakwe naakayanda kuti amulekele kujaya Saulo. Wakaambila Abisai kuti: “Utamuyasi pe, nkaambo nguni uukonzya kutandabika janza lyakwe akujaya munanike wa Jehova akutaba amulandu?” Mpoonya Davida wakaamba kuti: “Tandeelede naaceya pe mumeso aa Jehova kuti nditandabike janza lyangu akujaya munanike wa Jehova!”—1 Samuele 26:8-12.

² Davida wakalizyi ncaakeelede kucita kutegwa asyomeke kuli Jehova.  Wakalizyi kuti wakeelede kumulemeka Saulo, alimwi Davida taakwe naakayeeya kucisa Saulo pe. Ino nkaambo nzi? Nkaambo Leza wakasalide Saulo kuti abe mwami wa Israyeli. Mazuba aano, mbubwenya mbuli kaindi, Jehova uyanda kuti babelesi bakwe boonse kabasyomeka kulinguwe alimwi akulemeka baabo mbapede nguzu zyakweendelezya.—Amubale Mika 6:8.

3. Ino Abisai wakali kusyomeka buti kuli Davida?

³ Abisai wakali kumulemeka Davida nkaambo wakalizyi kuti Leza wakasalide Davida kuti abe mwami. Pele naakaba mwami, Davida wacita zibi zipati. Wakacita bumambi amukaintu wa Uriya akulailila Joabu kuti akasinizye ncobeni kuti Uriya akajaigwe munkondo. (2 Samuele 11:2-4, 14, 15; 1 Makani 2:16) Joabu wakali mwanookwabo Abisai, aboobo kweelede kuti Abisai wakamvwa nzyaakacita Davida, pele wakazumanana kumulemeka Davida. Kuyungizya waawo, Abisai wakali musololi wabasikalumamba aboobo wakali kukonzya kubelesya nguzu zyakwe kulibikka kuba mwami, pele taakwe naakacita boobo pe. Muciindi caboobo, wakamubelekela Davida akumukwabilila kuli basinkondonyina.—2 Samuele 10:10; 20:6; 21:15-17.

4. (a) Mbuti Davida mbwaakali cikozyanyo cibotu cakusyomeka kuli Leza? (b) Ino nzikozyanyo nzi azimbi nzyotutiilange-lange?

⁴ Davida wakali kusyomeka kuli Jehova mubuumi bwakwe boonse. Ciindi naakacili musyoonto, wakajaya Goliati mubbabbani, iwakali kusampaula Jehova abana Israyeli. (1 Samuele 17:23, 26, 48-51) Davida naakali mwami, musinsimi wa Jehova Natani wakamululamika akaambo kazibi nzyaakacita. Mpoonya-mpoonya Davida wakazumina kubisya kwakwe akweempwa. (2 Samuele 12:1-5, 13) Kumbele, ciindi Davida naakacembaala, wakapa zintu zinji ziyandisi kutegwa zibelesyegwe mukuyaka tempele lya Jehova. (1 Makani 29:1-5) Cilisalede kuti nokuba kuti Davida wakacita zibi zipati mubuumi bwakwe, taakwe naakaleka kusyomeka kuli Leza. (Intembauzyo 51:4, 10; 86:2) Mucibalo eeci, tulabandika cikozyanyo ca Davida alimwi azikozyanyo zyabamwi ibakali kupona aciindi eeciya akwiiya mbotukonzya kusyomeka kapati kuli Jehova kwiinda kumuntu uumbi uuli woonse. Mpoonya tulabandika bube bukonzya kutugwasya kusyomeka.

5. Nciiyo nzi ncotwiiya kukulubizya kwa Abisai?

⁵ Ciindi Abisai naakali kuyanda kujaya Saulo, wakali kuyanda kusyomeka kuli Davida. Pele akaambo kakuti Davida wakalizyi kuti cakali cibi kucisa “munanike wa Jehova,” taakwe naakamulekela Abisai kuti ajaye mwami. (1 Samuele 26:8-11) Eeci cituyiisya ciiyo ciyandika kapati cakuti: Ciindi notuyandika kusala muntu nkotweelede kusaanguna kusyomeka, tweelede kuyeeya njiisyo zyamu Bbaibbele izikonzya kutugwasya mubukkale bwesu.

6. Nokuba kuti twakalengwa munzila yakuti katuyanda kusyomeka kubanamukwasyi akubalongwe, nkaambo nzi ncotweelede kucenjela?

⁶ Twakalengwa munzila yakuti katuyanda kusyomeka kumuntu ngotuyanda, mbuli mulongwe naa munamukwasyi. Pele akaambo kakuti tatulondokede, mbotulimvwa inga kwapa kuti twaalilwe kusyomeka. (Jeremiya 17:9) Aboobo ikuti muntu umwi ngotuyanda ucita  cintu cimwi citaluzi mpoonya wazwa mukasimpe, tweelede kuyeeya kuti cilayandika kapati kusyomeka kuli Jehova kwiinda kumuntu uumbi uuli woonse.—Amubale Matayo 22:37.

7. Mbuti mucizyi umwi mbwaakazumanana kusyomeka kuli Leza mubukkale bukatazya?

⁷ Kuti umwi mumukwasyi wanu wagusyigwa mumbungano, mulakonzya kumutondezya Jehova kuti mulasyomeka kulinguwe. Mucikozyanyo, bumwi buzuba banyina baba Anne, ibakagusyidwe mumbungano, bakatuma fooni kuli ba Anne akubaambila kuti bakali kuyanda kubaswaya. ^[1] (Amubone bupanduluzi buyungizyidwe.) Banyina baba Anne bakaamba kuti tiibakakkomene akaambo kakuti banamukwasyi bakali kukaka kubaambauzya. Eeci cakapa ba Anne kuusa, alimwi bakasyomezya kubaingula kwiinda mukubalembela lugwalo. Pele kabatanalemba lugwalo, ba Anne bakazinzibala kuyeeya njiisyo zimwi zyamu Bbaibbele. (1 Bakorinto 5:11; 2 Johane 9-11) Mpoonya, mulugwalo bakapandulula cabulemu kuti banyina mbibakazwa mumukwasyi ciindi nobakabisya akukaka kweempwa. Ba Anne bakaambila banyina kuti nzila ilikke iyakali kukonzya kubagwasya kukkomana alimwi yakali buyo yakupiluka kuli Jehova.—Jakobo 4:8.

8. Mbube nzi ibuyootugwasya kusyomeka kuli Leza?

⁸ Babelesi ba Leza basyomeka ibakali kupona muciindi ca Davida abalo bakali kulicesya, bakali basiluse, alimwi bakali basicamba. Atubone bube oobu mbobukonzya kutugwasya kusyomeka kuli Jehova.

9. Nkaambo nzi Abineri ncaakali kuyanda kujaya Davida?

⁹ Mwana wa Saulo Jonatani alimwi amupati wabasikalumamba babana Israyeli, Abineri, bakalibonena Davida naakaleta mutwe wa Goliati kuli Saulo Mwami. Jonatani wakazikuba mulongwe wa Davida alimwi wakazumanana kusyomeka kulinguwe. (1 Samuele 17:57–18:3) Pele Abineri taakwe naakasyomeka. Kumbele wakazikugwasya Saulo, iwakali kuyanda kujaya Davida. (1 Samuele 26:1-5; Intembauzyo 54:3) Boonse bobilo, Jonatani alimwi a Abineri bakalizyi kuti Leza wakali kuyanda Davida kuti abe mwami uutobela wa Israyeli. Pele ciindi Saulo naakafwa, Abineri taakwe naakamugwasya Davida. Muciindi caboobo, wakasola kugwasya mwana wa Saulo, Isibosete, kuti abe mwami. Mukuya kwaciindi, Abineri ambweni wakali kuyanda kuba mwami lwakwe mwini,  alimwi ambweni nkakaambo ncaakacitila bwaamu amukaintu umwi wa Mwami Saulo. (2 Samuele 2:8-10; 3:6-11) Nkaambo nzi Jonatani a Abineri ncobakali kulanga Davida munzila iindene? Nkaambo Jonatani wakali kusyomeka kuli Jehova alimwi wakali kulicesya pele Abineri taakwe naakali boobo pe.

10. Nkaambo nzi Abisalomu ncaatakasyomeka kuli Leza?

¹⁰ Abisalomu, mwana wa Mwami Davida, taakali kusyomeka kuli Leza nkaambo taakwe naakali kulicesya. Wakali kuyanda kuba mwami, aboobo wakabweza “nkalaki akulijanina mabbiza abaalumi bali 50 ibakali kuzuza kumbele lyakwe.” (2 Samuele 15:1) Alimwi wakayunga bana Israyeli banji kuti basyomeke kulinguwe. Mane buya wakasola kujaya bausyi, nokuba kuti wakalizyi kuti Jehova ngowakabikka Davida kuba mwami wa Israyeli.—2 Samuele 15:13, 14; 17:1-4.

11. Ino inga twagwasyigwa buti kuzibalo zyamu Bbaibbele zijatikizya Abineri, Abisalomu alimwi a Baruki?

¹¹ Ciindi muntu natalicesyi alimwi nayanda kuba aanguzu zinji zyakweendelezya, nciyumu kulinguwe kuzumanana kusyomeka kuli Leza. Masimpe ngakuti, tulamuyanda Jehova, alimwi tatuyandi kuba bantu baliyanda alimwi babi mbuli mbwaakabede Abineri alimwi a Abisalomu. Pele tweelede kucenjela kuti tutataliki kulombozya kuba amali manji naa mulimo uutupa kulimvwa kuti tulayandika kapati. Eeci inga canyonganya cilongwe cesu a Jehova. Kwaciindi cili mbocibede, Baruki, mulembi wa Jeremiya, wakali kuyanda kuba acintu cimwi ncaatakajisi alimwi taakakkomene kubelekela Leza. Mpoonya Jehova wakati kuli Baruki: “Bona! Eeco ncendakayaka ndilacimwaya, acalo eeco ncendakasyanga ndilacizyula, nkokuti cisi coonse mbocizulwa. Pele yebo uliyandawida zintu zipati. Koleka kuyandaula zintu zili boobu.” (Jeremiya 45:4, 5) Baruki wakaswiilila nzyaakaamba Jehova. Andiswe tweelede kumuswiilila, nkaambo ino-ino uyoonyonyoona nyika eeyi mbyaabi.

12. Amwaambe ikaambo ncotutakonzyi kusyomeka kuli Leza ikuti katuliyanda.

¹² Ba Daniel, mukwesu waku Mexico, bakali kuyandika kusala nkobakeelede kusyomeka. Bakali kuyanda kukwata musimbi iwatakali kukomba Jehova. Ba Daniel bakati: “Ndakazumanana kumulembela magwalo nociba ciindi nondakatalika mulimo wabupainiya.” Pele bakazoozyiba kuti bakali kucita boobu akaambo buyo kakuliyanda. Tiibakali kusyomeka  kuli Jehova, alimwi bakali kuyandika kulicesya. Aboobo bakaambila mwaalu uusimide kujatizya musimbi ooyo. Ba Daniel bakaamba kuti: “Bakandigwasya kubona kaambo kakuti, ikuti kandiyanda kusyomeka kuli Leza, ndakeelede kuleka kumulembela musimbi. Nondakapaila cakwiinduluka-induluka akulila, ndakacita mbondakaambilwa. Tiilyakalampa, lukkomano lwangu mumulimo wamumuunda lwakayungizyika.” Ba Daniel lino balikwete mukaintu uuyanda Jehova, alimwi balabeleka kabali mulangizi wabbazu.

13. Mbuti Natani mbwaakazumanana kusyomeka kuli Leza akuli Davida ciindi Davida naakabisya?

¹³ Kuti katusyomeka kuli Jehova, tulakonzya alimwi kusyomeka kubantu bambi akubagwasya munzila mbotu kwiinda. Musinsimi Natani wakazumanana kusyomeka kuli Jehova alimwi wakali kusyomeka kuli Davida. Ciindi Davida naakabweza mukamuntu akujaya mulumaakwe, Jehova wakatuma Natani kuti amupe lulayo. Natani wakali sicamba alimwi wakamvwida Jehova. Pele alimwi wakacita cabusongo akwaambaula a Davida calubomba. Wakali kuyanda kugwasya Davida kumvwisya bupati bwazibi nzyaakacita. Aboobo wakamwaambila kaano kamwaalumi muvwubi iwakabba kabelele komwe buyo nkaakajisi mwaalumi umwi mucete. Ciindi Davida naakamvwa makani aaya, wakanyema kapati akaambo kacintu ncaakacita mwaalumi muvwubi. Mpoonya Natani wakaamba kuti: “Yebo ndonduwe mwaalumi ooyo!” Davida wakazyiba kuti wakabisizya Jehova.—2 Samuele 12:1-7, 13.

14. Mbuti mbomukonzya kusyomeka kuli Jehova alimwi akubalongwe banu naa bacibbululu banu?

¹⁴ Andinywe mulakonzya kusaanguna kusyomeka kuli Jehova alimwi akusyomeka kubantu bambi kwiinda mukuba basilubomba. Mucikozyanyo, mulakonzya kamujisi bumboni ibusinizya kuti mukwesu wakacita cibi cipati. Inga mwayanda kuzumanana kusyomeka kulinguwe, kwaambisya kuti kali mulongwe wanu ngomumvwana kapati naa wamumukwasyi. Pele alimwi mulizyi kuti kusyomeka kuli Jehova kulayandika kwiinda. Aboobo, mbubonya mbuli Natani, amumumvwide Jehova, pele amutondezye lubomba kumukwesu. Amumwaambile kuti alombe lugwasyo kubaalu akuti afwambaane kucita oobo. Kuti tabaambili baalu, nkokuti mweelede kubaambila nywebo lwanu. Kwiinda mukucita boobu, munoosyomeka kuli Jehova. Alimwi aciindi nciconya, mutondezya lubomba kumunyoko nkaambo baalu balakonzya kumugwasya kutegwa alimwi abe aacilongwe cibotu a Jehova. Bayoomululamika cabubombe.—Amubale Levitiko 5:1; Bagalatiya 6:1.

15, 16. Nkaambo nzi Husai ncaakali kuyandika busicamba kutegwa asyomeke kuli Leza?

¹⁵ Husai wakali umwi wabalongwe basyomeka ba Mwami Davida. Ciindi bantu nobakali kuyanda kuti babikke Abisalomu kuba Mwami, Husai wakali kuyandika busicamba kutegwa azumanane kusyomeka kuli Davida akuli Leza. Wakalizyi kuti Abisalomu wakasikide ku Jerusalemu  abasikalumamba bakwe akuti Davida wakatija. (2 Samuele 15:13; 16:15) Pele ino Husai wakacita nzi? Sena wakamulekelezya Davida akutalika kugwasya Abisalomu? Peepe. Nokuba kuti Davida wakalicembeede alimwi bantu banji bakali kuyanda kumujaya, Husai wakazumanana kusyomeka kulinguwe nkaambo Jehova wakasalide Davida kuti abe mwami. Aboobo Husai wakaunka ku Cilundu Camaolifa kuti akaswaangane a Davida.—2 Samuele 15:30, 32.

¹⁶ Davida wakalomba Husai kuti apiluke ku Jerusalemu akuyoolicengeezya kuba mweenzinyina wa Abisalomu kutegwa aambile Abisalomu kuswiilila kululayo lwakwe muciindi cakuswiilila kululayo lwa Ahitofeli. Husai wakali sicamba alimwi wakabikka buumi bwakwe muntenda kutegwa acite ncaakaamba Davida akuzumanana kusyomeka kuli Jehova. Davida wakapaila kuti Jehova agwasye Husai, alimwi eeci ncecakacitika. Abisalomu wakaswiilila nzyaakaamba Husai muciindi cakuswiilila Ahitofeli.—2 Samuele 15:31; 17:14.

17. Nkaambo nzi ncotuyandika busicamba kutegwa katusyomeka?

¹⁷ Tuyandika busicamba kutegwa katusyomeka kuli Jehova akumumvwida muciindi cakucita ncobayanda kuti tucite banamukwasyi, babelesima, naa mfwulumende. Mucikozyanyo, kuzwa ciindi nobakacili bana, ba Taro, bakucisi ca Japan, bakali kusolekesya kubakkomanisya bazyali babo. Bakali kubamvwida alimwi bakali kusyomeka kulimbabo, ikutali buyo akaambo kakuti bakeelede kucita boobo, pele akaambo kakuti bakali kubayanda bazyali babo. Pele ciindi nobakatalika kwiiya a Bakamboni ba Jehova, bazyali babo bakali kuyanda kuti baleke kwiiya. Eeci cakabapa kuusa ba Taro, alimwi cakabakatazya kapati kwaambila bazyali babo kuti bakasalide kuunka kumiswaangano. Ba Taro bakaamba kuti: “Bakanyema kapati cakuti kwamyaka minji bakali kundikasya kubaswaya kuŋanda. Ndakapaila kuti ndibe abusicamba kutegwa ndikakatile kukusala nkondakacita. Lino bakacinca asyoonto mbobazilanga zintu, alimwi bunji bwaziindi ndilabaswaya.”—Amubale Tusimpi 29:25.

18. Ino mwagwasyigwa buti acibalo eeci?

¹⁸ Mbubwenya mbuli Davida, Jonatani, Natani alimwi a Husai, andiswe atukkomane akukkutila kuboola akaambo kakusyomeka kuli Jehova. Tatuyandi kuba mbuli Abineri alimwi a Abisalomu ibatakali kusyomeka. Masimpe kuti tatulondokede alimwi tulalubizya. Nokuba boobo, atumutondezye Jehova kuti kusyomeka kulinguwe ncecintu ciyandika kapati mubuumi bwesu.