1. Mbuti mbotweelede kucibona coolwe cakupaila kuli Jehova?

 TULIJISI coolwe cilibedelede cakupaila ku Mulengi wajulu alimwi anyika. Amuyeeye buyo kaambo aaka: Tulakonzya kupaila kuli Jehova kuzwa ansi aamoyo kufwumbwa ciindi alimwi mumwaambo uuli woonse, kakunyina kumulomba buya. Tulakonzya kupaila notucisidwe mucibbadela naa notuli muntolongo, katujisi lusyomo lwakuti Taateesu siluyando ulatuswiilila. Eelo kaka tulalumba kucoolwe cakupaila.

2. Mbuti Mwami Davida mbwaakatondezya kuti wakali kucikkomanina coolwe cakupaila?

² Mwami Davida wakali kucikkomanina coolwe cakupaila. Kayi wakaimbila Jehova kuti: “Mupailo wangu aube mbuli tununkilizyo tubambidwe kabotu kumbele lyako.” (Int. 141:1, 2) Kuciindi ncaakali kupona Davida, tununkilizyo itwakali kubelesyegwa abapaizi mubukombi bwakasimpe, twakali kubambwa cakubikkila maano. (Kul. 30:34, 35) Mbubwenya buyo aabo ibakali kubamba tununkilizyo mbobakali kubikkila maano, awalo Davida wakali kuyanda kubikkila maano kuzintu nzyaakali kuyanda kwaambila Jehova mumupailo. Andiswe mbotuyanda kucita oobo. Tuyanda kuti mipailo yesu kaimukkomanisya Jehova.

3. Muunzila nzi motweelede kupaila kuli Jehova alimwi nkaambo nzi?

³ Ciindi notupaila kuli Jehova, tatweelede kucuubya-ubya coolwe eeci. Muciindi caboobo, tweelede kupaila cabulemu kapati. Amuyeeye zilengaano zigambya nzyaakabona Isaya, Ezekieli, Daniele a Johane. Zilengaano eezyi zyakaliindene, pele zyakalikozyenye munzila imwi. Zyoonse  zitondezya Jehova kuti Mwami singuzu kapati. Isaya ‘wakabona Jehova kakkede acuuno cabwami cilamfwu kapati.’ (Is. 6:1-3) Ezekieli wakabona Jehova kakkede ankalaki yakwe yakujulu, kazingulukidwe “mumuni uumweka . . . mbuli kumweka kwafulicoongo.” (Ezk. 1:26-28) Daniele wakabona “Sinsiku” uusamide zisani zituba, izijisi mabangabanga aamulilo aazwa kucuuno cakwe cabwami. (Dan. 7:9, 10) Mpoonya Johane wakabona Jehova kakkede acuuno cizungulukidwe afulicoongo uulibonya mbuli bbwe lyaemarodi libotu lyamubala wanyanzabili. (Ciy. 4:2-4) Ciindi notuyeeya bulemu bwa Jehova buteeli, tulayeezyegwa coolwe cibotu kapati cakupaila kulinguwe alimwi ambociyandika kucita oobo cabulemu kapati. Pele ino mbuti mbotweelede kupaila?

4. Ncinzi ncotwiiya kumajwi aamatalikilo mumupailo wacikozyanyo uuli ku Matayo 6:9, 10?

⁴ Amubale Matayo 6:9, 10. Mu Mulumbe waa Cilundu, Jesu wakayiisya basikwiiya bakwe mbobakeelede kupaila munzila iimukkomanisya Leza. Naakamana kwaamba kuti “aboobo mboobu mbomweelede kupaila,” Jesu wakasaanguna kwaamba zintu ziyandika kapati iziswaangene amakanze aa Jehova: kusalazyigwa kwazina lyakwe; kuboola kwa Bwami bwalo ibuyoonyonyoona basikukazya Leza boonse; alimwi azintu nzyayoocita kujatikizya bantu alimwi anyika. Kwiinda mukubikkilizya makani aaya mumipailo yesu, tutondezya kuti kuyanda kwa Leza kulayandika kapati kulindiswe.

5. Sena cileelela kupailila zintu zitugeme?

⁵ Mucibeela citobela camupailo, Jesu wakatondezya kuti cileelela kupailila zintu zitugeme. Tulakonzya kumulomba Jehova kutupa cakulya cabuzuba oobo, kutulekelela zibi zyesu, kutukwabilila kumasunko alimwi akutuvwuna kumubi. (Mt. 6:11-13) Ciindi notumulomba zintu eezyi Jehova, tutondezya kuti tusyoma nguwe alimwi akuti tuyanda kumukkomanisya.

6. Sena tweelede kupailila buyo zintu zyaambidwe mumupailo wacikozyanyo? Amupandulule.

⁶ Jesu tanaakaamba kuti basikumutobela beelede kuwiinduluka buya bbala abbala mupailo wacikozyanyo. Mumipailo iimbi  njaakapaila, Jesu wakaamba zintu ziindene izyakali kuyandika kulinguwe aciindi eeco. (Mt. 26:39, 42; Joh. 17:1-26) Mbubwenya buyo, andiswe tulakonzya kupailila cintu cili coonse ciyandika kulindiswe. Ciindi notuyanda kusala cintu cimwi, tweelede kupaila kulomba busongo alimwi akumvwisya. (Int. 119:33, 34) Alimwi ciindi notuyanda kutalika mulimo umwi uukatazya, tulakonzya kupaila kulomba luzyibo alimwi abupampu. (Tus. 2:6) Bazyali balakonzya kubapailila bana babo, abalo bana balakonzya kubapailila bazyali babo, alimwi toonse tulakonzya kubapailila mbotwiiya limwi Bbaibbele abaabo mbotukambaukila. Nokuba boobo, mipailo yesu tayeelede kuba yakwiile kulomba buyo lyoonse.   

7. Nkaambo nzi ncotweelede kumutembaula Jehova mumipailo?

⁷ Tatweelede kuluba kumutembaula Jehova mumipailo yesu. Kunyina uumbi iweelela kutembaulwa kwiinda Leza wesu. ‘Mubotu alimwi ulilibambilide kutulekelela zibi. Ngusiluse alimwi ngusilweetelelo, tafwambaani kukalala alimwi uzwide luyando lutamani akusyomeka.’ (Int. 86:5, 15) Aboobo tulijisi twaambo tubotu itweelede kutupa kumutembaula Jehova akaambo kambwabede alimwi azintu nzyatucitila.

8. Nkaambo nzi ncotweelede kumulumba Jehova? (Intembauzyo 104:12-15, 24)

⁸ Kunze buyo lyakumutembaula Jehova mumipailo yesu, tulakulwaizyigwa kumulumba akaambo kazintu zibotu kapati nzyatupa. Mucikozyanyo, tulamulumba Jehova akaambo kamibala iindene-indene njotubona kumaluba-luba, zyakulya zibotu ziindene-indene, alimwi abalongwe babotu mbotujisi. Taateesu siluyando ulatupa zintu eezyi alimwi azimwi zinji kutegwa katukkomana. (Amubale Intembauzyo 104:12-15, 24.) Kwiinda zyoonse, tweelede kumulumba Jehova akaambo kacakulya cakumuuya cinji ncatupa alimwi abulangizi bwakumbele bubotu kapati.

9. Ncinzi cikonzya kutugwasya kutaluba kumulumba Jehova? (1 Batesalonika 5:17, 18)

⁹ Ncuuba-uba kuluba kumulumba Jehova kuzintu zyoonse nzyatucitila. Ncinzi cikonzya kutugwasya kutaluba? Tulakonzya kulemba mulongo wazintu zigaminide nzyotwakalomba  akuzilanga ciindi aciindi kutegwa tubone Jehova mbwaakatwiingula. Mpoonya tulakonzya kupaila kutegwa tumulumbe akaambo kalugwasyo lwakwe. (Amubale 1 Batesalonika 5:17, 18.) Amuyeeye kujatikizya kaambo aaka: Tulakkomana alimwi akulimvwa kuyandwa ciindi bamwi nobatulumba. Mbubwenya buyo, ciindi notuyeeya kumulumba Jehova akaambo kakwiingula mipailo yesu, cilamukkomanisya kapati. (Kol. 3:15) Pele ino nkaambo nzi akambi ikayandika kapati ncotweelede kumulumba Leza wesu?

10. Kweelana a 1 Petro 2:21, nkaambo nzi ncotweelede kumulumba Jehova akaambo kakutuma Mwanaakwe Jesu anyika?

¹⁰ Amubale 1 Petro 2:21. Tweelede kumulumba Jehova akaambo kakutuma Mwanaakwe uuyandwa kuzootuyiisya. Tulaiya zinji kujatikizya Jehova alimwi ambotukonzya kumukkomanisya kwiinda mukwiiya buumi bwa Jesu. Ikuti twatondezya lusyomo mucipaizyo ca Kristo, tulakonzya kuba acilongwe cibotu a Jehova Leza alimwi akuba aluumuno anguwe.—Rom. 5:1.

11. Nkaambo nzi ncotupaila muzina lya Jesu?

¹¹ Tulamulumba Jehova akaambo kakuti tulakonzya kupaila kulinguwe kwiinda mu Mwanaakwe. Jesu nenzila Jehova njabelesya kwiingula mipailo yesu. Jehova ulaiswiilila akuyiingula mipailo iipegwa kwiinda muzina lya Jesu. Jesu wakaamba kuti: “Kufwumbwa ncomulomba muzina lyangu, ndiyoocicita cintu eeco, ikutegwa Taata akalemekwe kwiinda mu Mwana.”—Joh. 14:13, 14.

12. Nkaambo nzi akambi ikeelede kutupa kumulumba Jehova akaambo ka Mwanaakwe?

¹² Jehova ulatulekelela zibi zyesu kwiinda mucipaizyo cacinunuzyo ca Jesu. Magwalo apandulula Jesu kuti ‘mupaizi mupati ulikkede kujanza lyalulyo lyacuuno cabwami ica Mupati kujulu.’ (Heb. 8:1) Jesu “mugwasyi kuli Taata.” (1Joh. 2:1) Eelo kaka tulamulumba kapati Jehova akaambo kakutupa Mupaizi Mupati uutweetelela mukubula nguzu kwesu alimwi “uutukombelezyela”! (Rom. 8:34; Heb. 4:15) Tatulondokede, aboobo ikuti nokwanyina cipaizyo ca Jesu nocitakonzyeki kumusikila Jehova mumupailo. Cakutadooneka, tulalumba kaka kucipego citaliboteli ncaakatupa Jehova, nkokuti Mwanaakwe uuyandwa!

13. Mubusiku katanafwa, mbuti Jesu mbwaakatondezya kuti wakali kubayanda basikwiiya bakwe?

¹³ Mubusiku katanafwa, Jesu wakatola ciindi cilamfwu kupailila basikwiiya bakwe, kulomba Usyi kuti ‘abakwabilile akaambo kamubi.’ (Joh. 7:15) Eelo kaka Jesu wakali kubayanda basikwiiya bakwe! Wakali kulangila sunko pati; nokuba boobo, wakabikkila maano kuli nzyobakali kuyandika baapostolo bakwe.

14. Mbuti mbotukonzya kutondezya kuti tulabayanda bakwesu alimwi abacizyi?

¹⁴ Mukwiiya Jesu, tatubikkili buyo maano kuzintu nzyotuyanda swebo tobeni. Muciindi caboobo, ciindi aciindi tulabapailila bakwesu abacizyi. Ciindi notucita boobo, tutobela mulawo wa Jesu wakuyandana alimwi tutondezya Jehova mbotubayanda basyomima. (Joh. 13:34) Kupailila bakwesu abacizyi takuli kusowa buyo ciindi. Ijwi lya Leza litwaambila kuti “mupailo wakukombelezya wamuntu mululami ulabeleka canguzu kapati.”—Jak. 5:16.

15. Nkaambo nzi ncotuyandika kubapailila bakombima?

¹⁵ Tuyandika kubapailila bakombima akaambo kakuti balajana masunko manji. Tulakonzya kulomba Jehova kuti abagwasye  kuliyumya kumapenzi aabacitikila mbuli kuciswa, ntenda zilicitikila, nkondo, kupenzyegwa, naa mapenzi aambi buyo. Tulakonzya kubapailila bakwesu abacizyi ibalyaaba kugwasya baabo bayandika lugwasyo. Ambweni kuli mbomuzyi ibajisi mapenzi aali boobu. Sena inga tiimwabaamba mazina mumipailo yanu? Kwiinda mukucita boobo, tutondezya luyando lwini-lwini lwabunyina notulomba Jehova kuti abagwasye kuliyumya.

16. Nkaambo nzi ncotweelede kubapailila aabo batusololela?

¹⁶ Aabo basololela mumbungano balalumba kapati ciindi notubapailila alimwi mipailo eeyo ilabagwasya. Eeci ncecakacitika kumwaapostolo Paulo. Wakalemba kuti: “Amundipailile andime, kutegwa ndipegwe majwi ndajalula mulomo wangu, kuti ndicikonzye kwaambaula cakutayoowa nondizyibya bamwi maseseke aa Leza aamakani mabotu.” (Ef. 6:19) Ncimwi buyo amazuba aano, tulijisi bakwesu banji ibabeleka canguzu kutusololela. Tulatondezya luyando kulimbabo kwiinda mukulomba Jehova kuti ailongezye milimo yabo.

17-18. Ndilili notukonzya kulombwa kwiiminina bamwi mumupailo, alimwi ncinzi ncotweelede kuyeeya?

¹⁷ Zimwi ziindi, tulakonzya kulombwa kwiiminina bamwi mumupailo. Mucikozyanyo, mucizyi uuyanda kusololela ciiyo ca Bbaibbele ulakonzya kulomba mucizyi ngobabeleka limwi kuti apaile. Pele mucizyi ooyo ambweni tamuzyi kabotu sikwiiya, aboobo ambweni inga walombozya kupa mupailo wamamanino. Munzila eeyo, cilakonzya kumugwasya kwaamba nzyayandika sikwiiya mumupailo wakwe.

¹⁸ Mukwesu ulakonzya kulombwa kupaila lyamuswaangano wakulibambila mulimo wamumuunda naa lyamuswaangano wambungano. Bakwesu bapedwe coolwe eeci beelede kuyeeya makanze aamuswaangano. Ciindi cakupaila taceelede kubelesyegwa kupa lulayo kumbungano naa zyakwambilizya. Lyamuswaangano wambungano, lwiimbo amupailo wakujalula zyeelede kupegwa mumaminiti osanwe, aboobo mukwesu uupaila tayelede kubelesya “majwi manji,” ikapati kumatalikilo aamuswaangano.—Mt. 6:7.

19. Ncinzi cikonzya kutugwasya kulibambila buzuba bwa Jehova bwalubeta?

¹⁹ Mbobuyaabuswena buzuba bwa Jehova bwalubeta, mupailo weelede kuba cintu ciyandika kapati mubuumi bwesu. Kujatikizya makani aaya, Jesu wakaamba kuti: “Aboobo amupakamane lyoonse, kamupaila mipailo yakukombelezya ciindi coonse kutegwa mukakonzye kufwutuka muzintu zyoonse eezyo zyeelede kucitika akwiima kumbele lya Mwanaamuntu.” (Lk. 21:36) Aboobo, kupaila lyoonse kuyootugwasya kuzumanana kupakamana kumuuya, kutegwa buzuba bwa Leza butakatujani katutalibambilide.

20. Mbuti mipailo yesu mboikonzya kuba mbuli tununkilizyo tununkilila kabotu?

²⁰ Ino ncinzi ncotwaiya? Tulalumba kapati kucoolwe ncotujisi cakupaila. Zintu ziyandika kapati nzyotweelede kubikkilizya mumipailo yesu zijatikizya makanze aa Jehova Leza. Tulakonzya kulumba akaambo ka Mwana wa Leza, bweendelezi bwa Bwami bwakwe alimwi akubapailila bakombima. Kunze lyaboobo, tulakonzya kupaila kulomba nzyotuyandika kumubili alimwi akumuuya. Ciindi notubikkila maano kuyeeya nzyotwaamba mumipailo yesu, tutondezya kuti tulacikkomanina kapati coolwe eeci. Majwi eesu ayelede kuba mbuli tununkilizyo tununkilila kabotu kuli Jehova, nkokuti ‘anoomubotela.’—Tus. 15:8.