1. Ncinzi Jehova ncaakacita mbobakabisyila buyo ba Adamu a Eva? (Matalikilo 3:15)

 MBOBAKABISYILA buyo ba Adamu a Eva, Jehova wakapa bana babo bulangizi kwiinda mubusinsimi buyandika kapati. Majwi ngaakaamba alilembedwe ku Matalikilo 3:15.​—Amubale.

2. Nkaambo nzi businsimi oobu ncobuyandika?

² Businsimi oobu bujanika mubbuku lyakusaanguna mu Bbaibbele. Nokuba boobo, mabbuku aambi aamu Bbaibbele kuli mbwaaswaangene abusinsimi oobu. Mbubwenya guluu mboiswaanganya mapeeji oonse aabbuku, mbombubo aalo majwi aali ku Matalikilo 3:15 mbwaaswaanganya mulumbe woonse uuli mumabbuku aamu Bbaibbele wakuti, Leza uyootuma Sikufwutula, walo uuyoonyonyoona Diabolosi alimwi abasikumutobela boonse. * Eelo kaka makani aaya mabotu kuli baabo boonse ibamuyanda Jehova!

3. Ino tulabandika nzi mucibalo eeci?

³ Mucibalo eeci, tulaingula mibuzyo eeyi iitobela iijatikizya businsimi buli ku Matalikilo 3:15: yakuti Mbaani baambidwe mubusinsimi oobu? Mbuti mbobuzuzikizyigwa? Alimwi mbuti mbotugwasyigwa abusinsimi oobu?

4. Ino “nzoka” nguni alimwi ino tuzyi buti oobo?

⁴ Bbuku lya Matalikilo 3:14, 15 lyaamba kujatikizya “nzoka,” “alunyungu” lwanzoka, “mukaintu,” “alunyungu” lwamukaintu. Bbaibbele lilatugwasya kubazyiba boonse aaba. * Lino atutalike ‘anzoka.’ Nzoka iini buya, niyatakamvwa cini Jehova ncaakali kwaamba mumuunda wa Edeni. Aboobo nkokuti Jehova wakali kubeteka cilenge camuuya. Ncilenge nzi? Bbuku lya Ciyubunuzyo 12:9 cakusalazya lilapandulula kuti “muzoka wakaindi” ngu Saatani Diabolosi. Pele ino lunyungu lwakwe mbaani?

5. Ino lunyungu lwanzoka mbaani?

⁵ Ciindi Bbaibbele nolyaamba lunyungu munzila yamaambilambali, lyaamba bantu bayeeya akucita zintu mbuli usyi wamucikozyanyo. Aboobo, lunyungu lwanzoka nzilenge zyamuuya abantu, mbuli Saatani, ibakazya Jehova Leza alimwi abantu bakwe. Lunyungu lulakonzya kubikkilizya bangelo ibakasiya milimo yabo kujulu mumazuba aa Nowa, alimwi abantu babyaabi ibacita zintu mbuli Diabolosi usyi.—Matl. 6:1, 2; Joh. 8:44; 1Joh. 5:19; Jud. 6.

6. Nkaambo nzi “mukaintu” ncaatakali Eva?

⁶ Lino atubandike kujatikizya “mukaintu.” Ooyu takonzyi kuba Eva. Nkaambo nzi? Atubandike kaambo komwe buyo. Businsimi bwaamba kuti lunyungu lwamukaintu lwakali ‘kuyoowupwayaula’ mutwe wanzoka. Kweelana ambotwabandika, nzoka ncilenge camuuya, nkokuti Saatani, alimwi kunyina muntu uutalondokede walunyungu lwa Eva iwakajisi nguzu zyakumupwayaula Saatani. Ino mbuti Saatani mbwaakali kukonzya kunyonyoonwa?

7. Kweelana ambokutondezyedwe ku Ciyubunuzyo 12:1, 2, 5, 10, ino mukaintu waambidwe ku Matalikilo 3:15 nguni?

 ⁷ Bbuku lyamamanino mu Bbaibbele lilatwaambila kujatikizya mukaintu waambidwe ku Matalikilo 3:15. (Amubale Ciyubunuzyo 12:1, 2, 5, 10.) Ooyu tali mukaintu waanyika pe! Ujisi mwezi kumaulu aakwe alimwi amusini wanyenyeezi zili 12 amutwe wakwe. Mpoonya wakazyala mwana uulibedelede—Bwami bwa Leza. Oobu Bwami buli kujulu, nkokuti awalo mukaintu ngwakujulu. Wiiminina cibeela cambunga ya Jehova cakujulu cibambidwe aazilenge zyamuuya zisyomeka.—Gal. 4:26.

8. Ino cibeela cakusaanguna calunyungu lwamukaintu nguni, alimwi ndilili naakaba boobo? (Matalikilo 22:15-18)

⁸ Ijwi lya Leza alimwi lilatugwasya kucizyiba cibeela cakusaanguna calunyungu lwamukaintu. Lunyungu oolu wakeelede kuba waluzubo lwa Abrahamu. (Amubale Matalikilo 22:15-18.) Kweelana abusinsimi, Jesu nguwakali waluzubo lwasyaanene ooyu uusyomeka. (Lk. 3:23, 34) Pele lunyungu lwakeelede kuba anguzu kapati kwiinda zyabuntunsi kutegwa anyonyoone Saatani Diabolosi. Aboobo, ciindi Jesu naakali amyaka yakuma 30, wakananikwa kuba Mwana wa Leza simuzyalaalikke. Naakali kubbapatizyigwa, ndendilyo Jesu naakaba cibeela cakusaanguna calunyungu lwamukaintu. (Gal. 3:16) Jesu naakafwa alimwi akubusyigwa, Leza “wakamusamika musini wabulemu abwami” alimwi ‘wakamupa nguzu zyoonse kujulu alimwi aanyika,’ kubikkilizya anguzu ‘zyakunyonyoona milimo ya Diabolosi.’—Heb. 2:7; Mt. 28:18; 1Joh. 3:8.

9-10. (a) Mbaani bamwi ibali mucibeela calunyungu lwamukaintu, alimwi ndilili nobaba boobo? (b) Ncinzi ncotutiilange-lange lino?

⁹ Kunze lya Jesu kuli abambi baba cibeela cabili calunyungu. Mwaapostolo Paulo wakacaamba eeci cibeela calunyungu ciindi naakaambila ba Juda alimwi abamasi Banakristo bananike kuti: “Ikuti kamubalilwa kuli Kristo, nkokuti muli lunyungu lwa Abrahamu ncobeni, basikukona kweelana acisyomezyo.” (Gal. 3:28, 29) Ciindi Jehova nananika Munakristo amuuya uusalala, muntu ooyo uba cibeela calunyungu lwamukaintu. Aboobo lunyungu lubambwa aa Jesu Kristo alimwi abasikulelanyina bali 144,000. (Ciy. 14:1) Boonse aaba, batondezya muuya wa Bausyi, nkokuti Jehova Leza.

¹⁰ Lino mbwaanga twabazyiba baambwa ku Matalikilo 3:15, atulange-lange mubufwaafwi buyo Jehova mbwaali kubuzuzikizya businsimi oobu alimwi ambotugwasyigwa.

11. Ino muunzila nzi lunyungu lwamukaintu mbolwakalumwa “kukasindi”?

¹¹ Kweelana abusinsimi buli ku Matalikilo 3:15, nzoka yakali kuyooluma lunyungu lwamukaintu “kukasindi.” Eeci cakazuzikizyigwa ciindi Saatani naakayunga ba Juda alimwi abana Roma ikujaya mwana wa Leza. (Lk. 23:13, 20-24) Mbubwenya buyo muntu iwalicisa kukasindi mbwatakonzyi kweenda kwamazuba aali mbwaabede, Jesu tanaakali kucikonzya kucita cintu cili coonse ciindi naakali mucuumbwe kwamazuba otatwe.—Mt. 16:21.   

12. Ndilili alimwi mbuti mutwe wanzoka mbouyoopwayaulwa?

¹² Businsimi buli ku Matalikilo 3:15 butondezya kuti, Jesu wakeelede kubusyigwa. Nkaambo nzi? Nkaambo kweelana abusinsimi, lunyungu lwakali kuyoowupwaya mutwe wanzoka. Eeci cakali kwaamba kuti Jesu wakeelede kupona kucilonda cakukasindi. Alimwi oobo mbocakaba! Mubuzuba bwatatu  kuzwa ciindi naakafwa, Jesu wakabuka kali cilenge camuuya citafwi. Aboobo muciindi ncabikkide Leza, Jesu uyoomunyonyoona Saatani. (Heb. 2:14) Aabo mbayoolela limwi Kristo bayoomusangana mukunyonyoona boonse basinkondonyina Leza bali anyika, nkokuti lunyungu lwanzoka.—Ciy. 17:14; 20:4, 10. *

13. Mbuti mbotugwasyigwa akuzuzikizyigwa kwabusinsimi oobu?

¹³ Ikuti kamuli mubelesi wa Leza uubbapatizyidwe, nkokuti mulagwasyigwa akuzuzikizyigwa kwabusinsimi oobu. Jesu wakaboola aano anyika kali muntu. Wakabutondezya cakumaninina bube bwa Bausyi. (Joh. 14:9) Aboobo kwiinda mulinguwe twakamuzyiba alimwi akumuyanda Jehova Leza. Alimwi tulagwasyigwa kwiinda munjiisyo zya Jesu alimwi abusolozi bwakwe munzila mbwayendelezya mbungano ya Bunakristo mazuba aano. Kunze lyaboobo, wakatuyiisya mbotweelede kupona kutegwa katukkomaninwa a Jehova. Kuyungizya waawo, tulagwasyigwa alufwu lwa Jesu, nkokuti kulicisa kwakwe kukasindi. Munzila nzi? Ciindi Jesu naakabusyigwa, wakapa muulo wabulowa bwakwe bulondokede kacili cinunuzyo ‘citusalazya kuzibi zyoonse.’—1Joh. 1:7.

14. Ino tuzyi buti kuti businsimi mbwaakaamba Jehova mumuunda wa Edeni tiibwakazuzikizyigwa aciindi eeco? Amupandulule.

¹⁴ Majwi Jehova ngaakaamba mumuunda wa Edeni akatondezya kuti kwakeelede kwiinda ciindi kutegwa businsimi buzuzikizyigwe cakumaninina. Cakali kuyootola ciindi kutegwa mukaintu azyale lunyungu lwakasyomezyedwe, kuti Diabolosi abungike basikumutobela, alimwi akuti businkondo naa lusulo, zibe akati kankamu eezyi zyobilo. Kuzyiba businsimi oobu kulatugwasya, nkaambo bulatucenjezya kuti nyika yeendelezyegwa a Saatani iyoobasula bakombi ba Jehova. Kumbele Jesu wakaambila basikwiiya bakwe kucenjezya kukonzyenye akooku. (Mk. 13:13; Joh. 17:14) Masimpe twakubona kuzuzikizyigwa kwacibeela cabusinsimi oobu, kwaambisya myaka iili 100 yainda. Mubuti?

15. Nkaambo nzi nyika ncoibasulide kapati bantu ba Leza, alimwi nkaambo nzi ncotuteelede kumuyoowa Saatani?

¹⁵ Ciindi cisyoonto buyo kuzwa Jesu naakabikkwa kuba Mwami wabu Mesiya mu 1914, Saatani wakatandwa kujulu. Lino uli waano ansi, kulindila lunyonyooko. (Ciy. 12:9, 12) Pele takkede buyo pe. Saatani ulinyemede alimwi ulabalwana bantu ba Leza. (Ciy. 12:13, 17) Akaambo kaceeci, nyika yaindila buya kubasula bantu ba Leza. Nokuba boobo, tatweelede kumuyoowa Saatani abasikumutobela. Muciindi caboobo, tweelede kuba alusyomo mbuli ndwaakajisi mwaapostolo Paulo, iwakalemba kuti: “Ikuti Leza kalaandiswe, ino nguni uukonzya kutulwana?” (Rom. 8:31) Tweelede kumusyoma Jehova cakumaninina, nkaambo mbubwenya mbotwabona, businsimi bunji bulembedwe ku Matalikilo 3:15 bwazuzikizyigwa kale.

16-18. Mbuti ba Curtis, ba Ursula, alimwi aba Jessica mbobakagwasyigwa kwiinda mukumvwisya ncolyaamba bbuku lya Matalikilo 3:15?

¹⁶ Cisyomezyo ca Jehova icijanika ku Matalikilo 3:15 cilakonzya kutugwasya kuliyumya kusunko lili lyoonse ndyotukonzya kujana. Ba Curtis, bamisyinali babelekela ku Guam, bakaamba kuti: “Zimwi ziindi, ndakali kulwana amasunko alimwi akutyompwa calo icakali kusunka lusyomo lwangu muli  Jehova. Pele kwiinda mukuzinzibala kuyeeya businsimi buli ku Matalikilo 3:15 cakandigwasya kuzumanana kumusyoma Taata wakujulu.” Ba Curtis balangila buzuba ciindi Jehova nayakumanizya masunko oonse.

¹⁷ Mucizyi Ursula uukkala ku Bavaria wakaamba kuti, kumvwisya ncolyaamba bbuku lya Matalikilo 3:15 kwakamugwasya kusinizya kuti Bbaibbele lyakasololelwa a Leza. Wakaamba kuti wakabona businsimi bumbi boonse mbobuswaangene abusinsimi oobu, alimwi eeci cakamukkomanisya kapati. Wakayungizya kuti: “Cakandikkomanisya kapati nondakazyiba kuti Jehova wakabweza ntaamu mpoonya-mpoonya kutegwa bantu batabuli bulangizi.”

¹⁸ Ba Jessica, ibakkala ku Micronesia, baamba kuti: “Ndilayeeya mbondakalimvwa ciindi cakusaanguna nondakazyiba kuti ndakajana kasimpe. Ibusinsimi bulembedwe ku Matalikilo 3:15 bwakali mukuzuzikizyigwa. Eeci cakandigwasya kubona kuti buumi mbotupona lino, tabuli buumi bwini-bwini. Kunze lyaboobo, businsimi oobu bwakandipa kusyoma kuti kubelekela Jehova ncecintu cikonzya kundipa kupona buumi bubotu lino alimwi akuyoopona buumi bwiinda kubota kumbele.”

19. Ncinzi citupa kusyoma kuti cibeela camamanino cabusinsimi oobu ciyoozuzikizyigwa?

¹⁹ Mbubwenya mbotwabona, bbuku lya Matalikilo 3:15 lili mukuzuzikizyigwa lino. Lunyungu lwamukaintu alimwi alunyungu lwanzoka zilizyibidwe kabotu-kabotu. Jesu, walo uuli ncibeela cakusaanguna calunyungu lwamukaintu, wakapona kucilonda cakukasindi, lino Mwami uulemekwa alimwi uutafwi. Kusalwa kwabaabo ibapanga cibeela cabili calunyungu lwamukaintu kulamana ino-ino. Mbwaanga cibeela cakusaanguna cabusinsimi oobu cakazuzikizyigwa kale, tweelede kusyoma cakumaninina kuti cibeela camamanino cabusinsimi oobu, nkokuti kupwayaula mutwe wanzoka, ciyoozuzikizyigwa ncobeni. Eelo kaka babelesi ba Leza bayookkomana kapati ciindi Saatani aakunyonyoonwa! Kusikila ciindi eeco, tutatyompwi pe. Leza wesu ulasyomeka. Kwiinda mulunyungu lwamukaintu, Leza uyooleta zilongezyo zinji kapati ‘kumasi oonse aamunyika.’—Matl. 22:18.