Ndakazyalwa mu 1935 mu Darlaston, ibusena bwiitwa kuti Black Country ku England. Busena oobu bwiitwa kuti Black Country akaambo kabusi ibuzwa kumafakitoli manji. Nondakajisi myaka yone, bazyali bangu bakatalika kwiiya Bbaibbele a Bakamboni ba Jehova. Nondakali mukubusi, ndakasinizya kuti aaka nkasimpe, mpoonya ndakabbapatizyigwa mu 1952, kandijisi myaka iili 16.

Aciindi nciconya, ndakatalika kubeleka mukkampani mpati iyakali kupanga zibelesyo zimwi alimwi azibeela zyamyootokala. Mpoonya ndakatalika kuyiisyigwa mulimo wakuba mupati-pati akkampani. Eelo kaka ndakali kuukkomanina kapati mulimo ooyo!

Ciindi mulangizi wabbazu naakanditamba kusololela Ciiyo Cabbuku Cambungano lyamuswaangano wamukati kansondo, kumbungano yesu yaku Willenhall, ndakeelede kusala. Pele kwakali buyumuyumu. Aciindi eeci, ndakali kuswaangana mumbungano zyobilo. Mukati kansondo ndakali kuswaanganina mumbungano iyakali afwaafwi ankondakali kubelekela ku Bromsgrove, ikulampa makkilomita aali 32 kuzwa kuŋanda. Mpoonya nindakali kupiluka kubazyali kumamanino aansondo, ndakali kuswaangana mumbungano yesu ku Willenhall.

Akaambo kakuti ndakali kuyanda kugwasyilizya mbunga ya Jehova, ndakakuzumina kutamba kwamulangizi wabbazu, nokuba kuti eeci cakali kwaamba kuti ndileke mulimo ngondakali kukkomanina kapati. Kuzumizya Jehova kululamika nzila yangu aciindi eeco kwakapa kuti ndibe abuumi bukkomanisya kapati.

Ciindi nondakali kuswaangana mu Mbungano ya Bromsgrove, ndakajana muntu umwi mubotu kapati, nkokuti mucizyi Anne iwakali kubikkila maano kapati kuzintu zyakumuuya. Nitwakakwatana mu 1957, caantoomwe twakakkomana kuba acoolwe cakubeleka katuli bapainiya baciindi coonse, bapainiya baalubazu, mumulimo wakweendeenda alimwi akubelekela a Beteli. Ba Anne balandipa kukkomana mubuumi bwangu boonse.

 Mu 1966, twakakkomana kutambwa kucikolo ca Gilead kkilasi namba 42. Mpoonya twakatumwa ku Malawi, cisi cili mu Africa, ikuli bantu basamausya kapati. Pele tiitwakazyi kuti tuyookkala buyo kwaciindi cisyoonto.

Twakasika ku Malawi mu February 1, 1967. Mumwezi wakusaanguna, twakali kutola ciindi cinji kwiiya mwaambo, mpoonya twakatalika mulimo wacooko. Twakajisi moota wiitwa kuti Kaiser Jeep walo banji ngobakali kuyeeyela kuti ulakonzya kwiinda kufwumbwa, nomuba mumilonga. Pele aayo tanaakali masimpe, wakali kucikonzya buyo kwiinda mumaanzi masyoonto. Zimwi ziindi twakali kukkala mumaanda aabulongo abwizu alo aakali kuyandika kubikka cipulasitiki kutegwa ŋanda kaitasweki ciindi camainza. Oobo mbotwakautalika mulimo wesu wabumisyinali, pele twakali kuuyanda!

Mu April, ndakazyiba kuti talikoolampa kulaba mapenzi kuzwa kumfwulumende. Nkaambo ndakamvwa mubandi awailesi iwakaambwa abaleli bamucisi ca Malawi, ba Hastings Banda. Bakatamikizya Bakamboni ba Jehova kuti tiibakali kutela mitelo alimwi akuti bakali kuleta manyongwe kumfwulumende. Pele aaya tanaakali masimpe. Toonse twakalizyi kuti kaambo keni kayeeme aakutatola lubazu mutwaambo twacisi, kwaambisya kukaka kuula tukkaadi tutondezya cipani muntu nkwazulilwa.

Kuzyikusika mu September, twakabala munyuzipepa kuti baleli bacisi bakatamikizya bakwesu abacizyi kuti baleta manyongwe mucisi coonse. Kumuswaangano umwi wamucisi baleli bakaambilizya kuti, lino-lino balaulesya mulimo wa Bakamboni ba Jehova. Aboobo twakalesyegwa mulimo mu October 20, 1967. Nokwakainda ciindi  cisyoonto, bakapokola alimwi abaabo ibalanga-langa mapepa abasikunjila akuzwa mucisi bakaboola kuzoojala ofesi yamutabi akubatanda bamisyinali mucisi.

Nokwakainda mazuba otatwe katuli muntolongo, twakatolwa ku Mauritius cisi icakali kweendelezyegwa a Britain. Nokuba boobo, beendelezi baku Mauritius tiibakatuzumizya kukkala katuli bamisyinali. Aboobo twakatumwa ku Rhodesia (lino kwiitwa kuti ku Zimbabwe). Notwakasika okuya, twakasikila mumaanza aawalupati-pati ulanganya basikunjila akuzwa mucisi silunya walo iwakatukasya kunjila mucisi akwaamba kuti: “Mwakatandwa ku Malawi aku Mauritius, lino mwaboola kokuno akaambo kakuti mwabula kwakuunka.” Ba Anne bakatalika kulila. Cakali mbuli kuti bantu boonse tiibakali kutuyanda! Aciindi eeco, ndakali kuyanda buyo kujokela kulindiswe ku England. Kumamanino, twakazumizyigwa koona busiku bomwe buyo kuofesi yamutabi, akwaambilwa kuti buzuba butobela tukaunke kumaofesi aabo mapati. Twakalikatede, pele twakazumanana kusiya zyoonse mumaanza aa Jehova. Buzuba bwakatobela kumazuba, twakazumizyigwa kukkala katuli beenzu mu Zimbabwe. Tandikalubi mbondakalimvwide oobuya buzuba, ndakasinizya kuti Jehova ngowakali kusololela nzila yesu.

Kandili kuofesi yamutabi ku Zimbabwe, ndakali kubeleka mu Dipatimenti ya Mulimo kulanganya cisi ca Malawi aca Mozambique. Bakwesu alimwi abacizyi ku Malawi bakali kupenzyegwa kapati. Mulimo wangu wakali wakusandulula malipooti aakali kutumwa kubalangizi bamabazu baku Malawi. Mangolezya aamwi, kandibeleka ovataimu kutegwa ndimanizye lipooti, ndakalila nondakayeeya kujatikizya mbobakali kupenzyegwa bakwesu abacizyi. * Pele alimwi, ndakakulwaizyigwa kapati akaambo kalusyomo lwabo alimwi akuliyumya.—2Kor. 6:4, 5.

Twakacita kufwumbwa ncotwali kukonzya kubona masimpe kuti bakwesu ibakacili ku Malawi alimwi abaabo ibakatijila ku Mozambique balijisi cakulya cakumuuya. Tiimu yabasanduluzi ba Chichewa, mwaambo iwaambaulwa kapati ku Malawi, yakalongela kufaamu mpati yamukwesu ku Zimbabwe. Mukwesu wakabayakila maanda alimwi amaofesi. Mpoonya bakazumanana amulimo wabo uuyandika kapati wakusandulula mabbuku aamba zyamu Bbaibbele.

Twakabikka bubambe bwakuti balangizi bamabazu baku Malawi kabajanika kumuswaangano wacooko wa Chichewa mwaka amwaka ku Zimbabwe. Okuya bakali kupegwa coolwe cakupa makani amuswaangano wacooko. Nobakali kupiluka ku Malawi, bakali kusoleka kusikila mpobagolela kubaambila bakwesu nzyobakaiya kumuswaangano. Mwaka umwi nobakaswaya ku Zimbabwe, kwakabikkwa bubambe bwakutalisya Cikolo Camulimo wa Bwami kutegwa tubayumye balangizi bamabazu aaba basicamba.

Mu February 1975, ndakaunka kuyooswaya Bakamboni baku Malawi ibakatijila ku Mozambique. Bakwesu aaba bakali kweendela antoomwe ambunga ya Jehova, kubikkilizya akutobela bubambe bwatubunga twabaalu. Baalu bapya bakabikkide bubambe bunji bwakucita zintu zyakumuuya, kubikkilizya akupa makani aabuleya, kubandika lugwalo lwabuzuba, Ngazi Yamulindizi alimwi buya akucita miswaangano yabbazu. Munkambi zyabo bakabikkide bubambe mbuli bwakumuswaangano wacooko, kwakali madipatimenti aabasalazya, basikwaaba zyakulya alimwi aabasikugatela. Bakwesu aaba basyomeka bakacita zintu zinji kwiinda mukulongezyegwa a Jehova. Eeci cakandiyumya kapati.

Kumamanino aamwaka wa 1970, ofesi yamutabi ku Zambia yakatalika kulanganya mulimo waku Malawi. Nokuba boobo, kanji-kanji ndakali kubayeeya bakwesu abacizyi baku Malawi akubapailila, alimwi abamwi bakali kucita oobo. Kanji-kanji, kandili umwi wabamu Kkomiti Yamutabi ku Zimbabwe, ndakali kuswaangana abaiminizi bakumaofesi mapati, antoomwe abakwesu ibakali kulanganya mulimo ku Malawi, ku South Africa, alimwi  aku Zambia. Lyoonse twakali kulibuzya mubuzyo ngweenya wakuti, “Sena kuli cintu cimwi ncotweelede kubacitila bakwesu abacizyi baku Malawi?”

Nokwakainda ciindi, kupenzyegwa kwakaceya-ceya. Bakwesu ibakatijilide kucisi cimbi, asyoonto-syoonto bakatalika kupiluka ku Malawi, mpoonya aabo ibakasyeede tiibakacili kupenzyegwa kapati. Zisi izyakali munsi-munsi, zyakabazumizya Bakamboni ba Jehova kukambauka akuswaangana antoomwe alimwi akuubya-ubya milawo imwi. Eeci ncecakacitika aku Mozambique mu 1991. Pele twakalibuzya kuti, ‘Ino kwalo ku Malawi Bakamboni ba Jehova bayakwaanguluka lili?’

Zintu zyakacinca ku Malawi, alimwi mu 1993 mfwulumende yakauzumizya mulimo wa Bakamboni ba Jehova. Mpoonya nindakali kubandika amisyinali umwi, wakandibuzya kuti, “Sena mulapiluka ku Malawi?” Aciindi eeco ndakajisi myaka iili 59, aboobo ndakaingula kuti, “Peepe, ndacembaala!” Pele buzuba mbweenya oobo, twakatambula kagwalo kuzwa ku Kabunga Keendelezya kutwaambila kuti tupiluke ku Malawi.

Twakali kuuyanda mulimo wesu ku Zimbabwe, aboobo cakali ciyumu kusala. Twakalikkomene ku Zimbabwe alimwi twakajana balongwe ibali kabotu kapati. Ba Kabunga Keendelezya bakatwaambila kuti tulakonzya kusala naa tuyanda kuzumanana kubelekela ku Zimbabwe. Aboobo cakali cuuba-uba kutobela nzila yesu akuzumanana kukkala ku Zimbabwe. Pele ndakayeeya Abrahamu alimwi a Sara ibakasiya munzi wabo mubotu mubucembele bwabo kutegwa batobele busolozi bwa Jehova.—Matl. 12:1-5.

Twakasala kutobela busolozi bwambunga ya Jehova akupiluka ku Malawi mu February 1, 1995, buzuba notwakakkwanya myaka iili 28 kuzwa notwakasika ku Malawi. Mpoonya kwakabambwa Kkomiti Yamutabi, iyakali kubikkilizya ndime abakwesu bambi bobilo, akutalika kubukulusya milimo ya Bakamboni ba Jehova.

Eelo kaka ncilongezyo kubona Jehova mbwaakapa kuti mulimo ukomene cakufwambaana! Mweelwe wabasikumwaya wakayaambele kuzwa kumweelwe uutandila ku 30,000 mu 1993 kusika kumweelwe iwiinda ku 42,000 mu 1998. * Ba Kabunga Keendelezya bakauzumina muzeezo wakuyaka ofesi yamutabi mpya kutegwa tulanganye mulimo mupati ngotwakeelede kucita. Twakajana  busena bwamahekeli aali 12 mu Lilongwe, alimwi ndakasalwa kubeleka mukkomiti yamayake.

Mukwesu Guy Pierce wamu Kabunga Keendelezya ngowakapa makani aakwaaba mutabi mupya mu May 2001. Bakamboni bakubusena ooko ibainda ku 2,000 bakajanika, alimwi bunji bwabo bakalibbapatizyidwe kakwiindide myaka iili 40. Bakwesu abacizyi aaba basyomeka, bakaliyumya kumapenzi aataambiki ciindi mulimo wesu nowakalesyedwe. Bakali bacete kumubili, pele kumuuya bakalivwubide kapati. Alimwi bakalikkomene kweendeenda amutabi wabo mupya. Kufwumbwa nkobakali kweendeenda a Beteli, kwakali kulila buyo nyimbo zya Bwami mumwaambo wabo, calo cakapa kuti pulogilamu yoonse indikkomanisye kapati. Eeci cakatondezya kuti Jehova ulabalongezya kapati aabo ibaliyumya mumasunko cakusyomeka.

Nowakamana kuyakwa mutabi, ndakapegwa coolwe cakunoopa makani aakwaaba Maanda aa Bwami. Basimbungano ku Malawi bakagwasyigwa abubambe bwambunga bwakuyaka Maanda aa Bwami muzisi mobatavwubide. Kaindi, mbungano zimwi zyakali kuswaanganina mu Maanda aa Bwami aazisamu. Bakali kubelesya matete kuvwumba ziluli alimwi akupanga mabbenci malamfwu aabulongo. Mpoonya bakwesu bakabeleka canguzu kuumpa matina akuyaka masena aakuswaanganina mapya mabotu. Bakwesu bakasala kubelesya mabbenci mu Maanda aa Bwami, nkaambo abbenci yomwe kulakonzya kukkala bantu banji.

Ndakakkomana kapati kubona Jehova mbwaakabagwasya bantu kusima kumuuya. Kwaambisya bakwesu bamu Africa bacili bana-bana bakandikkomanisya, nkaambo bakalilyaabide kugwasyilizya, alimwi akufwambaana kuba aluzyibo lupegwa ambunga ya Leza. Akaambo kaceeci, bakapegwa mikuli mipati a Beteli alimwi amumbungano. Mbungano zyakayumizyigwa kapati abalangizi bamabazu bapya bakubusena ooko, alimwi bunji bwabo bakalikwete. Banabukwetene aaba bakasala kubelekela Jehova cakulyaaba kwiinda mukutafwambaana kuba abana, tacikwe makani azilengwa zyakubusena oobu alimwi akusinikizyigwa abanamukwasyi.

Nokwakainda myaka iili 52 katubelekela mu Africa, ndakatalika kuciswa. Aboobo bamu Kabunga Keendelezya bakakuzumina kulomba kwa Kkomitii Yamutabi kuti tukabelekele ku Britain. Twakausa kapati kusiya mulimo ngotwakali kuyanda, pele mukwasyi wa Beteli ku Britain ulatubikkila maano kapati mubucembele bwesu.

Ndilisinizyide kuti kuzumizya Jehova kululamika nzila yangu mubuumi, ncecintu ciinda kubota ncondakasala. Ikuti nondakasyoma maanu aangu, nondipona buumi bwiindene aboobu. Jehova wakalizyi ncondakali kuyandika kutegwa ‘alulamike nzila zyangu.’ (Tus. 3:5, 6) Nindakali mwaalumi uucili mwana-mwana, ndakali kuyandisya kwiiya mulimo umwi akkampani mpati. Nokuba boobo, mbunga ya Jehova yanyika yoonse yakandipa mulimo iwakandipa kukkutila kapati. Kulindime kubelekela Jehova, ncintu ciyandika mubuumi bwangu!