MUMYAKA yakuma 1910 bazyali bangu bakalongela ku Canada kuzwa ku Tbilisi, mucisi ca Georgia. Mpoonya twakakkala afaamu nsyoonto muzibanda zyakali afwaafwi adolopo lya Pelly, mucooko ca Saskatchewan, cisi ca Canada nkocili kumbo. Ndakazyalwa mu 1928, alimwi ndendime keela mumukwasyi wabana ibali cisambomwe. Bataata bakafwa kakuceede myezi iili cisambomwe kuti ndizyalwe, mpoonya bamaama bakafwa kandicili muvwanda. Ba Lucy, ibacizyi bangu ibakali bapati mumukwasyi wesu, bakafwa kabajisi myaka iili 17. Kuzwa waawo, baacisya ba Nick bakandibweza mebo antoomwe abanabokwesu akutalika kutulela.

Buzuba bumwi nondakatalika-talika kudampila, bamukwasyi wangu bakandibona kandikwela mucila wabbiza. Kabayoowede kuti bbiza lilandibbakela, bakoongolola kundiita kutegwa nduulekezye mucila, pele taakwe nondakaulekezya pe. Ndakalibafwutatilide, alimwi tiindakakumvwa koongolola kwabo. Mucoolwe, tiilyakandibbakela bbiza, alimwi oobo mbobuzuba bamukwasyi wangu nobakazyiba kuti ndakali musinke matwi.

Mulongwe wesu umwi wakapa muzeezo wakuti kandiiya abana bamwi basinke matwi, aboobo baacisya ba Nick bakandilembya kucikolo cabasinke matwi ku Saskatoon, Saskatchewan. Bakandilonzyela kubusena bwakali kweendwa mawoola manji kuzwa kuŋanda, ndakaliyoowede akaambo kakuti ndakali buyo amyaka yosanwe. Ndakali kubaswaya banamukwasyi lelikke buyo twajala zikolo. Mukuya kwaciindi ndakaiya mwaambo wakutambaika aboobo ndakali kukkomana kusobana abana bamwi.

Mu 1939, bacizyi besu bapati ibakali babili mumukwasyi wesu, ba Marion, bakakwatwa kuli ba Bill Danylchuck. Mpoonya bakandibweza mebo amucizyi wangu Frances kuti katukkala ambabo. Bakali bakusaanguna mumukwasyi wesu ikutalika kwiiya Bbaibbele a Bakamboni ba Jehova. Ciindi nozyakali  kujalwa zikolo, bakali kundiyiisya kusikila mpobagolela zintu nzyobakali kwiiya mu Bbaibbele. Kwaamba masimpe, kubandika ambabo tiicakali cuuba-uba pe mbwaanga tiibakauzyi mwaambo wakutambaika. Pele bakalubona luyandisisyo ndondakajisi lwakwiiya zintu zyakumuuya. Ndakalibonena kuti nzyobakali kucita zyakali kweendelana ancolyaamba Bbaibbele, aboobo ndakatalika kubasangana ciindi nobakali kuunka mukukambauka. Kalitanalampa, ndakali kuyanda kuti ndibbapatizyigwe, aboobo mu September 5, 1941, ba Bill bakandibbapatizya mudilamu lyakatendedwe. Meenda aayo akali kutontola citaambiki!

Mu 1946 nondakapiluka kuŋanda ciindi camainza, twakaunka kumuswaangano wacooko ku Cleveland, Ohio, U.S.A. Buzuba bwakusaanguna bwamuswaangano, bacizyi bangu bakali kucincana kulemba twaambo kutegwa bandigwasye kuutobela kabotu muswaangano. Nokuba boobo, buzuba bwabili ndakakkomana kapati kuzyiba kuti kwakali kakamu kabasinke matwi ikakajisi sikusandulula mumwaambo wakutambaika. Aciindi eeci ndakali kukonzya kuukkomanina muswaangano, alimwi lino cakali kunoneezya ikukamvwisya kabotu kasimpe kamu Bbaibbele kakunyina buyumuyumu!

Aciindi eeco, Nkondo Yabili Yanyika Yoonse yakazwa aakumana alimwi muuya wakuyandisya cisi wakalidumide kapati. Ndakapiluka kuzwa kumuswaangano kandikanzide kwiiminina lusyomo lwangu kucikolo. Aboobo ndakacileka kusuluta ndembela alimwi akwiimba lwiimbo lwacisi mumwaambo wakutambaika. Kuyungizya waawo, ndakacileka kutola lubazu mukusekelela mapobwe aamazuba aakulyookezya alimwi akuunka kucikombelo cakucikolo. Eeci cakabanyemya bamayi, aboobo bakasola kundikonga akwaamba twaambo twakubeja kutegwa ndicince maano. Zintu zyoonse eezyi zyakapa kuti basicikoloma batalike kundibuzya mibuzyo minji, pele eeci cakapa kuti ndibe azyoolwe zyakupa bumboni. Basicikoloma mbuli ba Larry Androsoff, ba Norman Dittrick alimwi aba Emil Schneider mukuya kwaciindi bakakatambula kasimpe, alimwi kusikila sunu baluujisi kubelekela Jehova cakusyomeka.

Ciindi nondiswaya mumadolopo aambi, lyoonse ndali kulibikkila mbaakani yakukambaukila basinke matwi. Mucikozyanyo, ku Montreal abusena mpobajanika-janika basinke matwi, ndakakambaukila mwaalumi mwana-mwana wazina lya Eddie Taeger walo iwakali kuzulilwa mukakamu kabasinke matwi. Kusikila nobakafwa mwaka wamana, bakali kuzulilwa mumbungano iibelesya mwaambo wakutambaika mu Laval, ku Quebec. Kuyungizya waawo, ndakayaanya mukubusi wazina lya Juan Ardanez walo mbubwenya mbuli bana Bereya, wakali kuyandisisya kuvwuntauzya kutegwa asinizye naa ncolyaamba Bbaibbele ncamasimpe. (Mil. 17:10, 11) Awalo wakakaiya kasimpe akubeleka cakusyomeka kali mwaalu mu Ottawa, ku Ontario, kusikila naakafwa.

Mu 1950, ndakalongela ku Vancouver. Nokuba kuti ndiyandisya kukambaukila basinke matwi, tandikalubi cakacitika ciindi nondakakambaukila mukaintu uumvwa wazina lya Chris Spicer ciindi nondakali kweenda munzila. Wakazumina kunoobweza mamagazini  mwezi amwezi alimwi wakali kuyanda kuti ndiswaangane amulumaakwe wazina lya Gary. Aboobo ndakabaswaya kuŋanda yabo, mpoonya twakabandika kwaciindi cilamfwu katulembelana apepa. Eeco ncocakali ciindi cilikke ncotwakabandika, pele cakandigambya ncakuti nokwakainda myaka misyoonto kandili kumuswaangano wacooko ku Toronto, Ontario, banabukwetene aaba bakandizyiba. Oobu mbobuzuba ba Gary mbobakeelede kubbapatizyigwa. Cakacitika eeci icikkomanisya kapati cakandiyeezya mbociyandika kuzumanana kukambauka nkaambo tatukonzyi kuzyiba busena naa ciindi kasimpe nokakonzya kuba amiyanda mumoyo wamuntu.

Mukuya kwaciindi, ndakapiluka ku Saskatoon. Kandili kooko, ndakayaanya bakaintu ibakandilomba kuti kandiiya Bbaibbele abana babo basimbi bobilo, Jean a Joan Rothenberger, balo ibakali basicikolo acikolo cabasinke matwi aawo mpondakali kwiiya. Kalitanalampa, basimbi aaba bobilo bakatalika kwaambila basicikolonyina kujatikizya nzyobakali kwiiya. Mukuya kwaciindi, bosanwe mukkilasi yabo bakaba Bakamboni ba Jehova. Ba Eunice Colin bakali akati kabantu aabo. Ndakayaana aba Eunice ciindi cakusaanguna acikolo cabasinke matwi mumwaka ngondakali kumanizya cikolo. Aciindi eeco bakandipa nswiti akundibuzya naa inga twaba balongwe. Ba Eunice bakali kuyooba muntu uuyandika kapati mubuumi bwangu, nkaambo kumbele bakazooba bakaintu bangu!

Ciindi banyina baba Eunice nobakazyiba kuti ba Eunice bakali kwiiya Bbaibbele, bakaambila mupati wacikolo kuti abakasye. Mane buya wakabanyanga mabbuku ngobakali kubelesya kwiiya Bbaibbele. Nokuba boobo, ba Eunice bakakanzide kuzumanana kwiiya kujatikizya Jehova. Nobakayanda kubbapatizyigwa, bazyali babo bakabaambila kuti, “Ikuti naa ube Kamboni wa Jehova, uzyibe kuti aano taakkalwi!” Kabajisi myaka iili 17, ba Eunice bakazwa ncobeni aŋanda, mpoonya mukwasyi umwi wa Bakamboni wakababweza akutalika kukkala ambabo. Bakazumanana kwiiya alimwi mukuya kwaciindi bakabbapatizyigwa. Ciindi notwakakwatana mu 1960, bazyali babo tiibakaboola kumucado wesu. Nokuba boobo, myaka mboyakali kuyaabuya, bakatalika kutulemeka akaambo kanzyotusyoma alimwi ambotwakabakomezya bana besu.

Swebo mbuli bazyali basinke matwi, twakakomezya bana basankwa bamvwa ibali ciloba. Eeci cakali kukatazya, pele twakabikkila maano kubona kuti baiya mwaambo wakutambaika kutegwa katucikonzya kubandika ambabo alimwi akubayiisya kasimpe. Bakwesu abacizyi mumbungano bakagwasya kapati. Mucikozyanyo, muzyali umwi wakatulembela kagwalo kakutuzyibya kuti umwi akati kabana besu wakali kwaamba majwi mabi mu Ŋanda ya Bwami. Twakakalanganya kaambo aaka mpoona mpoona. Bana bangu bone, James, Jerry, Nicholas, a Steven, balamubelekela Jehova cakusyomeka antoomwe abamakaintu babo alimwi amikwasyi yabo. Bana aaba boonse bone balabeleka kabali baalu. Kuyungizya waawo, Nicholas amukaintu wakwe Deborah, balagwasyilizya mumulimo wakusandulula mumwaambo wakutambaika kumutabi waku Britain kakuli Steven amukaintu wakwe, Shannan, bali mukabunga kasandulula mwaambo wakutambaika kumutabi waku United States.

Kakuceede mwezi omwe kuti tusekelele myaka iili 40 mucikwati cesu, bulwazi bwakkansa bwakabajaya ba Eunice. Bakatondezya busicamba kapati muciindi eeci coonse cikatazya kapati. Lusyomo ndobakajisi mububuke lwakabagwasya kutegwa bazumanane kuyuma. Ndilangila kumbele kubuzuba mbondiya kubabona alimwi.

Mu February 2012, ndakawa akutyoka kasolo, eelyo cakalibonya antangalala kuti ndakali kuyandika lugwasyo. Aboobo ndakatalika kukkala aumwi wabana bangu basankwa amukaintu wakwe. Lino tuli mu Mbungano ya Calgary yalo iibelesya mwaambo wakutambaika, ooko nkondazumanana kubeleka kandili mwaalu. Mubwini, eeci nceciindi cakusaanguna kuzulilwa mumbungano iibelesya mwaambo wakutambaika. Kamuciyeeyela buyo eeco! Ikuzulilwa mumbungano iibelesya mwaambo wa Chingisi kwamyaka yoonse eeyi, kuzwa mu 1946, ino ndakali kupona buti kumuuya? Jehova wasyomeka kucisyomezyo cakwe cakulanganya bamucaala. (Int. 10:14) Ndilabalumba boonse ibakalilisungwide kundilembela twaambo amapepa, kwiiya mwaambo wakutambaika alimwi akusandulula zyakali kwaambwa kumiswaangano kutegwa ndigwasyigwe.

Kwaamba masimpe, kuli ziindi nondakali kutyompwa akuyanda kucileka akaambo kakuti tiindakali kumvwa izyakali kwaambwa naa akaambo kakuti cakali kulibonya mbuli kuti basinke matwi tiibakali kubikkilwa maano. Nokuba boobo, muziindi eezyo, ndakayeeya majwi aa Petro ngaakaambila Jesu kuti: “Mwami, ino inga twaunka kuli ni? Yebo ujisi majwi aapa buumi butamani.” (Joh. 6:66-68) Pele mbubwenya mbuli bakwesu alimwi abacizyi banji ibasinke matwi bamusela wangu, ndaiya mbociyandika kukkazika moyo. Ndaiya mbociyandika kukkazyika moyo akulindila Jehova ambunga yakwe, eelo kaka ndagwasyigwa kapati kwiinda mukucita boobo! Lino kuli maunda-maunda aacakulya cakumuuya mumwaambo wangu, alimwi ndilakonzya kukkomana akuyanzana kujanika kumiswaangano yambungano alimwi amiswaangano yacooko mumwaambo wakutambaika waku America. Masimpe, ndapona buumi bukkomanisya alimwi ibulaampindu mumulimo wa Jehova, Leza wesu mupati.