Nzyobaamba Bantu Kujatikizya Kupaila

AMULIZYE

“Ciindi nondipaila, ndilimvwa mbuli kuti Leza uli kumbali lyangu, ulindijatilide kujanza alimwi akundisololela ciindi nondilimvwa kusweeka.”—Ba MARÍA.

“Bakaintu bangu bakafwa abulwazi bwakkansa ciindi nobakamana kupenga kwamyaka iili 13. Ndilayeeya nondakali kupaila kuli Leza abuzuba alimwi akulimvwa kuti wakali kukuswiilila kulila kwangu. Eeci cakandikatalusya.”—Ba RAÚL.

“Mupailo ncipego citaliboteli kubantu kuzwa kuli Leza.”—Ba ARNE.

Kuli ba María, ba Raúl, ba Arne alimwi abamwi banji, mupailo ncipego cilibedelede. Balimvwa kuti kwiinda mumupailo, balakonzya kubandika a Leza, kumulumba alimwi akumulomba kuti abagwasye. Camoyo woonse balacisyoma ncolyaamba Bbaibbele kujatikizya kupaila kuli Leza: “Oolu ndolusyomo ndotujisi mulinguwe, kuti kufwumbwa cintu ncotumulomba ceendelana akuyanda kwakwe, ulatumvwa.”—1 Johane 5:14.

Kulubazu lumwi, bantu banji cilabakatazya kusyoma ncolyaamba Bbaibbele kujatikizya mupailo. Ba Steve bakaamba mbobakali kulimvwa kujatikizya mupailo, bakati: “Ciindi nondakajisi myaka iili 17, beenzuma botatwe bakafwa muntenda. Mpoonya omwe wakafwa muntenda yamumugwagwa mpoonya ibamwi bobilo bakanyikila mulwizi.” Ino ba Steve bakacita buti? Bakaamba kuti: “Ndakapaila kuli Leza kutegwa ndizyibe kaambo zyoonse eezyi ncozyakacitikila, pele kunyina nondakabujana bwiinguzi. Aboobo, ndakalibuzya kuti, ‘Nkaambo nzi ncondeelede kupaila?’” Banji balimvwa kuti mipailo yabo kunyina noyakaingulwa, aboobo balimvwa kuti tacigwasyi kuzumanana kupaila.

Alimwi bantu balijisi twaambo tumbi itubapa kuyeeya kuti mupailo unyina mpindu. Bamwi baamba kuti mbwaanga Leza ulizyi zintu zyoonse, ulizizyi kale zintu nzyotuyandika naa mapenzi ngotujisi, aboobo inga tiikwayandika kumwaambila buya.

Bamwi baamba kuti Leza kunyina nakonzya kwiiswiilila mipailo yabo akaambo kazibi nzyobakacita musyule. Ba Jenny bakaamba kuti: “Ipenzi lyangu lipati nkulimvwa kubula mpindu. Ndakacita zintu izindipa kuusa ndaziyeeya, aboobo ndilimvwa kuti Leza kunyina nakonzya kundiswiilila.”

Ino nywebo mulimvwa buti kujatikizya kupaila? Ikuti naa andinywe mbomulimvwa oobu, mulakonzya kukkomana kuzyiba kuti Bbaibbele lilapa bwiinguzi bukatalusya. Tulakonzya kucisyoma ncolyaamba Bbaibbele kujatikizya mupailo; * lilakonzya kumugwasya kujana bwiinguzi kumibuzyo mbuli yakuti:

Sena masimpe Leza ulaiswiilila mipailo yesu?
Ino nkaambo nzi mipailo imwi ncoyitaingulwi?
Mbuti mbomukonzya kupaila munzila njomukonzya kumvwugwa?
Mbuti mipailo mboikonzya kumugwasya?

^ munc. 9 Bbaibbele lilijisi mipailo yababelesi ba Leza banji, kubikkilizya amipailo ya Jesu Kristo. Magwalo aa Chihebrayo, kanji-kanji aayitwa kuti Cizuminano Cakaindi, alijisi mipailo yiinda ku 150.