Nkaambo Nzi Ncokuli Kusulaikana Kuli Boobu?
Nkaambo nzi ncokuli penzi lyakusulaikana munyika? Kutegwa tuzyibe kaambo, tweelede kusaanguna kuluzyiba kabotu lusulo, kuzyiba kaambo bantu ncobatalika kusulaika bamwi alimwi akaambo ncoluliko munyika yoonse.
Ino Lusulo Ninzi?
Lusulo nkuciindizya kutayanda muntu umwi naa kuzonda musyobo wabantu bamwi. Alimwi takuli buyo kucimwa kwakaindi kasyoonto kujatikizya muntu uumwi, pele lwalo lulazumanana.
KAAMBO BANTU NCOBATALIKA KUSULAIKA BAMWI
Bantu balatalika kusulaika bamwi akaambo katwaambo tusiyene-siyene. Muntu ulakonzya kutalika kusulaika musyobo wabantu bamwi, nokuba kuti bantu aabo kunyina cibi cili coonse ncobacita. Ulakonzya kutalika kubasulaika akaambo kakuyeeya buyo kuti bantu aabo mbabyaabi, mbantu bakonzya kuleta ntenda alimwi ibatalangilwi kucinca. Ulakonzya kubabona kuti mbantu batayi koomoonga, ibakonzya kunyonganya zintu naa ibapa kuti kakuli mapenzi. Bantu ibasulaika bamwi, balakonzya kuba abube oobo ambweni akaambo kakuti bakacitilwa calunya, bakacitilwa cakutalulama naa zintu zimwi buyo izibyaabi kapati.
MBOLUMWAIKA LUSULO
Zimwi ziindi, muntu ulakonzya kusulaika bantu bamwi nokuba kuti tabanabwenene. Mucikozyanyo, muntu cakutazyiba ulakonzya kutalika kutobela mizeezo iitaluzi yabaabo mbalemeka naa mbamvwana limwi. Nkakaambo kaako lusulo lulakonzya kumwaika kubantu banji muciindi cisyoonto buyo.
Ciindi notumvwisya mbolumwaika cakufwambaana lusulo, tulazyiba kaambo bantu banji ncobasulaika bantu bamwi. Nokuba boobo, kutegwa tumane penzi lyakusulaika bamwi, tweelede kuzyiba kujatikizya lusulo mbolwakatalika. Tulakonzya kuzyiba mbolwakatalika kwiinda mukwiiya Bbaibbele.
BBAIBBELE LILAAMBA MBOLWAKATALIKA LUSULO
BANTU TABALI MBABO IBAKATALISYA LUSULO. Lwakatalika ciindi mungelo umwi kujulu naakazangila Leza, akuzikwiitwa kuti Saatani Diabolosi. Diabolosi “wakali mujayi kuzwa naakatalika” buzangi bwakwe. Mbwali ‘mubeji alimwi usyi wabubeji,’ wazumanana kukulwaizya lusulo alimwi alunya. (Johane 8:44; 1 Johane 3:11, 12) Bbaibbele limupandulula kuti ngusikumwaya makani aakubeja, mukali, alimwi ngusilunya.—Jobu 2:7; Ciyubunuzyo 12:9, 12, 17.
NCUUBA-UBA KUBANTU BATALONDOKEDE KUSULAIKA BAMWI. Muntu wakusaanguna Adamu, wakatobela nzila ya Saatani mbyaabi. Akaambo kaceeci, bantu boonse bakakona cibi alimwi akutalondoka. (Baroma 5:12) Kaini mwana wa Adamu wakusaanguna, wakamujaya Abelo mwanookwabo akaambo kalusulo. (1 Johane 3:12) Masimpe kuti bantu banji balijisi luyando alimwi alubomba. Pele akaambo kacibi ncobakakona, bunji bwabo balaliyanda, mbaasimunyono alimwi balalisumpula, ibube bukulwaizya lusulo.—2 Timoteyo 3:1-5.
MUNTU UUTAYANDI BANTU MBAINDENE LIMWI, ULALANGILWA KUBASULAIKA. Nyika ipa bantu kuti kabasulaika bamwi kwiinda mukukulwaizya muuya wakutaba aluse, micito iitali kabotu alimwi abukkale bubyaabi. Kutayanda bantu mbotwiindene limwi, lusalululo, kunonga bamwi, luta, akunyonyoona zintu zyabamwi zyazumanana kubako akaambo kakuti “nyika yoonse ili mumaanza aamubi,” Saatani Diabolosi.—1 Johane 5:19.
Nokuba boobo, Bbaibbele talyaambi buyo lusulo mbolwakatalika. Pele alimwi lilaamba mbolukonzya kumana.
Andiza Inga Mwaakkomanina Ayaaya
MIBUZYO YAMU BBAIBBELE YAINGULWA
Sena Leza Nguwakalenga Diabolosi?
Bwiinguzi bwamu Bbaibbele bulalimvwisya alimwi bulakkazyika moyo.
MIBUZYO YAMU BBAIBBELE YAINGULWA
Ino Ncibi Nzi ba Adamu a Eva Ncobakacita?
Ba Adamu a Eva tiibakamumvwida Leza aboobo bakapa kuti lunyungu lwabo loonse lukone cibi, mbuli kukona bulema.
