Tulakonzya kumaninwa nguzu ikuti mulongwe wesu kaciswa bulwazi bwamumizeezo. Pele tulakonzya kutondezya mbotumubikkila maano mulongwe wesu kwiinda mukumugwasya kuliyumya kupenzi lyakwe. Mubuti?

“Tweelede kufwambaana kuswiilila.”​—JAKOBO 1:19.

Nzila imwi iinda kubota yakugwasya mulongwe wanu nkumuswiilila naambaula. Mutalimvwi kuti mweelede kwiingula kuzintu zyoonse nzyaamba. Amutondezye kuti mulamuswiilila alimwi akuti mulamubikkila maano. Amusole kumvwisya mbwalimvwa alimwi tamweelede kumubeteka. Kamuyeeyede kuti ulakonzya kulabalika akwaamba zintu zikonzya kumupa kuusa kumbele.—Jobu 6:2, 3.

“Amubaumbulizye.”​—1 BATESALONIKA 5:14.

Mulongwe wanu ulakonzya kulibilika, naa kupenga akaambo kakulimvwa kubula mpindu. Kwiinda mukumwaambila kuti mulamubikkila maano, mulakonzya kumuumbulizya akumukulwaizya, nokuba kuti tamuzyi cini ncomukonzya kwaamba.

“Mulongwe mwini-mwini ulatondezya luyando ciindi coonse.”​—TUSIMPI 17:17.

Amumugwasye munzila zigaminide. Muciindi cakwiile kweezeezya kuti mulicizyi ncomweelede kucita, amumubuzye ncomukonzya kumucitila. Ikuti kacili ciyumu kumulongwe wanu kwaamba zintu nzyayanda, amupe muzeezo wakucitila antoomwe cintu cimwi, mbuli kweendeenda. Naa mulakonzya  kumugwasya kuula zintu, kusalazya aŋanda naa kucita milimo imwi.—Bagalatiya 6:2.

‘Amubakkazikile moyo.’​—1 BATESALONIKA 5:14.

Talili lyoonse mulongwe wanu nakonzya kuzumina kuti mubandike. Amumuzyibye kuti ciindi coonse munoolibambilide kumuswiilila nayanda kwaambaula. Akaambo kabulwazi bwakwe, mulongwe wanu ulakonzya kwaamba naa kucita zintu zikonzya kumucisa. Ulakonzya kumwaya pulogilamu njomwajisi antoomwe naa kuba akabuko. Amukkazike moyo alimwi akumumvwisya ciindi nomumupa lugwasyo.—Tusimpi 18:24.

“Ndilasolekesya kuba mulongwe ngwakonzya kwaambaula anguwe ciindi coonse. Nokuba kuti tandizyi cikonzya kumana penzi lyakwe, lyoonse ndilasolekesya kumuswiilila naambaula. Zimwi ziindi ncayandika buyo, muntu uukonzya kumuswiilila mpoonya ulalimvwa kabotu.”—Ba Farrah, a ibajisi mulongwe uuciswa bulwazi bwakutayanda kulya, kulibilika alimwi akutyompwa.

“Mweenzuma umwi ulaaluyando alimwi ulandikulwaizya. Wakanditamba kucakulya kuŋanda yakwe. Akaambo kaluyando lwakwe cakanduubila kwaamba mbondakali kulimvwa. Eeci cakandikulwaizya kapati!”—Ba Ha-eun, ibaciswa bulwazi bwakutyompwa.

“Kukkazika moyo kulayandika kapati. Ciindi mukaintu wangu nacita cintu cimwi candinyemya, ndilaakuyeeya kuti mbulwazi bumupa kucita boobu kutali kuti mbwabede. Eeci cilandigwasya kutamunyemena alimwi akumutondezya kuti ndilamubikkila maano.”—Ba Jacob, ibakwete bakaintu baciswa bulwazi bwakutyompwa.

“Bakaintu bangu bali kundigwasya kapati alimwi akunduumbulizya. Ciindi nondatyompwa akaambo kakulibilika, tabandisungilizyi kucita cintu nconditayandi. Zimwi ziindi eeci caamba kuti tabeelede kucita zintu zimwi nzyobakkomanina. Muuya wabo wakulyaaba awabwaabi ulilibedelede.”—Ba Enrico, ibaciswa bulwazi bwakulibilika.