Cilengwa cakupandulula bweende bwanyenyeezi ninzila imwi yakusonda yalo iiyeeme alusyomo lwakuti nyenyeezi, mwezi alimwi amapulaneti zilabujatikizya buumi bwabantu anyika. Basikupandulula bweende bwanyenyeezi baamba kuti aawo mpozikkede zintu eezyi zyamujulu ciindi muntu naazyalwa, zilabujatikizya bube bwakwe alimwi abuumi bwakwe bwakumbele.

Nokuba kuti cilengwa cakupandulula bweende bwanyenyeezi cakatalikila ku Babuloni yansiku, cicidumide amazuba aano. Kweelana abuvwuntauzi ibwakacitwa ku United States mu 2012, bantu babalilwa ku 33 pesenti ibakabuzyigwa-buzyigwa bakaamba kuti bayeeya kuti cilengwa cakupandulula bweende bwanyenyeezi “kuli mbociswaangene asayaansi,” mpoonya ibali 10 pesenti bakaamba kuti “ncasayaansi ncobeni.” Sena masimpe aayo? Peepe. Amubone ncotwaambila boobo.

• Mapulaneti alimwi anyenyeezi tazijisi nguzu zyakweendelezya bantu kweelana ambobaamba basikupandulula bweende bwanyenyeezi.

• Kanji-kanji zintu nzyobaamba kuti ziyoocitika inga nzyakuyeeyela buyo cakuti zilakonzya kucitika kumuntu uuli woonse.

• Cilengwa cakupandulula bweende bwanyenyeezi mazuba aano cilacitwa kweelana anzyobakali kusyoma bantu lyansiku kuti mapulaneti azinguluka nyika. Pele mubwini mapulaneti azinguluka zuba.

• Zintu nzyobakaamba basikupandulula bweende bwanyenyeezi baindene-indene kuti ziyoocitika kujatikizya muntu umwi, tazyeendelani pe.

• Basikupandulula bweende bwanyenyeezi baandaanya bantu muzibeela zili 12 naa kweelana azitondezyo izili muccaati njobabelesya basikupandulula bweende bwanyenyeezi kutondezya mpaakkede mapulaneti alimwi anyenyeezi (zodiac signs) kweelana amazuba bantu ngobakazyalwa. Akaambo kakucinca-cinca kwampoibede nyika mububumbo mukwiinda kwamyaka, mazuba aaswaangene azitondezyo izili muccaati ya zodiac taaceendelani kuciindi izuba noliinda muzibunga zyanyenyeezi izijisi zitondezyo zyamazina aayo ngobakaulika.

Zitondezyo izili muccaati ya zodiac zyaambwa kuti zilagwasya kuzyiba bube bwamuntu. Bwini mbwakuti, bantu ibakazyalwa buzuba bomwe tabajisi bube bukozyenye; buzuba muntu mbwaakazyalwa kunyina mbobuyubununa bube bwakwe. Muciindi cakubona bwini mbobabede bantu, basikupandulula bweende bwanyenyeezi babeteka muntu kujatikizya mbwalilemeka alimwi abube bwakwe kweelana ambobayeeyela. Sena oolu taluli lusalululo?

Kuzwa kaindi, bantu bali kusonda. Basondi bamwi bakali kuyandaula bupanduluzi muzintu mbuli bula bwabanyama alimwi abwabantu naa kweelana amukombwe mbwagoma cakulya. Bamwi bakali kwaamba zintu nzyobakali kuyeeyela kwiinda mukulanga mbwaapangidwe matewo aa tii naa busu bwakkofi. Mazuba aano babelesya cimbonimboni, meja, nkoli, mucila alimwi anzila zimwi nzyobabelesya “ikuzyiba” buumi bwamuntu mbobunoobede kumbele. Sena kusonda ninzila mbotu yakuzyiba zyakumbele? Peepe, taili kabotu. Atulange-lange makani aaya.

Atulange-lange kujatikizya kwiindana kwazintu nzyobaamba. Zintu nzyobaamba kuti ziyoocitika kwiinda mukusonda kanji-kanji inga zilakazyanya. Noliba leelyo nobabelesya nzila njimunya, nzyobaamba inga ziliindene. Mucikozyanyo, ikuti muntu wabuzya basondi bobilo mubuzyo uukonzyenye kujatikizya ziyoocitika kumbele mpoonya “babelesya” mucila ngomunya, nkokuti bwiinguzi bweelede kukozyanya. Pele kanji-kanji inga tabukozyanyi pe.

Nzila nzyobabelesya basondi naa makanze aabo zyatalika kuzumbauzyigwa. Basikukazya baamba kuti mucila naa cimbonimboni inga nzyakucengeezya buyo akuti musondi inga ulanga buyo mbwalibonya muntu ikutali zintu nzyabelesya. Mucikozyanyo, musondi uucibwene ulabuzya mibuzyo mpoonya akuswiililisya nzyaamba muntu alimwi akulangisisya nzyacita zyalo izikonzya kumupa kuzyiba cintu cimwi kujatikizya muntu ooyo. Mpoonya musondi ulapegwa bulemu akaambo kakwaamba twaambo twamasimpe alimwi abukkale bucitika mbwaayubununa muntu ooyo cakutazyiba. Akaambo kakuti bantu balabasyoma, basondi bamwi balapegwa mali manji kuzwa kuli baabo ibaunka kukusonda kulimbabo.

Cilengwa cakupandulula bweende bwanyenyeezi alimwi akusonda zipa muzeezo wakuti zintu iziyootucitikila kumbele zyakabambilwa limwi. Pele sena mbocibede oobo? Bbaibbele litwaambila kuti tulijisi lwaanguluko lwakulisalila nzyotusyoma naa zintu nzyotuyanda kucita, alimwi nzyotusala kucita zilabujatikizya buumi bwesu bwakumbele.—Joshua 24:15.

Bakombi ba Leza balijisi kaambo akambi kalimvwisya ncobeelede kucitantamuka cilengwa cakupandulula bweende bwanyenyeezi alimwi akusonda, nkaambo Leza ulakusulaika kusonda kuli koonse. Mu Bbaibbele tujana majwi aaya aakuti: “Takweelede kujanwa akati kanu . . . muŋanga, simasalamuzi, sibusangu, mulozi, simabibo, muntu uubuzya makani kubaŋanga, simaloto naa muntu uubuzya makani kubafwu. Nkaambo kufwumbwa muntu uucita zintu eezyi ncisesemyo kuli Jehova.” a—Deuteronomo 18:10-12.