Kumatalikilo, twaamba caano cijatikizya mbwaakeenwa Croesus kuli sikwaamba zyakumbele waku Delphi calo icakapa kuti azundwe kumwami waku Persia. Pele Bbaibbele lijisi businsimi bugambya ibujatikizya mwami waku Persia bwalo ibwakazuzikizyigwa mumbazu zyoonse.

Kakusyeede myaka iibalilwa ku 200, katanazyalwa mwami, musinsimi muna Hebrayo uutegwa Isaya wakamwaamba zina kumugama Koresi alimwi akupandulula mbwaakali kuyoozunda munzi mupati wa Babuloni.

Lugwalo lwa Isaya 44:24, 27, 28 lwaamba kuti: “Mboobu mbwaamba Jehova, . . . ‘ndime ndaambila maanzi malamfwu kuti, ‘Koyuminina, alimwi milonga yako yoonse ndiyakwiipa kuti iyuminine’; ndime ndaamba kujatikizya Koresi kuti, ‘Mweembezi wangu, uyoocita zyoonse nzyondiyanda’; ndime ndaamba kujatikizya Jerusalemu kuti, ‘Uyooyakululwa,’ akujatikizya tempele kuti, ‘Ntalisyo yako iyoobikkwa.’’”

Kweelana ambwaakaamba syaazibwene umwi mumakani aakaindi mu Giriki uutegwa Herodotus, impi ya Koresi yakaanyona maanzi aamu Mulonga wa Firate aakali kukunka mumunzi wa Babuloni. Nzila njaakabelesya Koresi yakagwasya basikalumamba bakwe kunjila mumunzi nkaambo maanzi akaceya. Naakamana kuuzunda munzi, Koresi wakaangununa ba Juda ibakali mubuzike ku Babuloni mpoonya akubazumizya kuti bajokele kuyooyakulula Jerusalemu, walo iwakanyonyookede kakwiindide myaka iili 70.

Lugwalo lwa Isaya 45:1 lwaamba kuti: “Mboobu mbwaamba Jehova kumunanike wakwe, kuli Koresi, ooyo ngondijatilide kujanza lyalulyo kuti azunde masi aali kumbele lyakwe, kutegwa ndibanyange zilwanyo bami, kuti ndimujalwide zijazyo zili kumbele lyakwe, kutegwa milyango yamunzi itajalwi.”

Bana Persia bakanjila mumunzi kwiinda mukubelesya milyango yobilo mipati yakali kubwaanda bwamunzi, yalo iyakasiidwe bukwazi cabuyamba. Ikuti bana Babuloni nobakalizyi ncaakali kuyanda kucita Koresi, nobakaijala milyango iyakali kulubazu lwamulonga. Pele kweelana ambokwakabede, munzi tiiwakakwabilidwe pe.

Businsimi oobu bugambya mbumwi bwabusinsimi bunji ibujanika mu Bbaibbele bwalo ibwakazuzikizyigwa kweelana ambokwakaambidwe. a Mukwiimpana abantu nzyobayeeyela kuti ziyoocitika, zyalo kanji-kanji izyaambwa kuti zilacitika akaambo kabaleza babo bakubeja, businsimi bwamu Bbaibbele buzwa kuli yooyo iwakaamba kuti: “Kuzwa kumatalikilo ndaambila limwi ciyoocitika kumbele, alimwi kuzwa kaindi ndaambila limwi zintu zitanacitika.”—Isaya 46:10.

 Alikke Leza wakasimpe, walo uujisi zina lyakuti Jehova nguukonzya kwaamba boobu. Zina eeli lyaamba kuti “Upa Kuti Kube.” Litondezya nguzu nzyajisi zyakuzyiba alimwi akucinca zintu iziyoocitika kumbele kweelana akuyanda kwakwe. Litusyomezya kuti uyoozizuzikizya ncobeni zintu zyoonse nzyaakasyomezya.

Sena mulayanda kuzyiba businsimi bwamu Bbaibbele ncobwaamba kujatikizya mazuba eesu? Myaka iibalilwa ku 2,000 yainda, Bbaibbele lyakaambila limwi kuti “kumazuba aamamanino” kuyooba “ziindi zikatazya ncobeni.” Ino mazuba aamamanino aanzi? Ikutali mamanino aanyika naa bantu, pele mamanino aamazwanga, kudyaamininwa alimwi akupenga zyalo izyapenzya bantu kwamyaka minji. Lino atulange-lange businsimi bumwi busyoonto bwalo ibutondezya kuti tuli “kumazuba aamamanino.”

Lugwalo lwa 2 Timoteyo 3:1-5 lwaamba kuti: “Kumazuba aamamanino . . . , bantu bayooba basikuliyanda, bayandisya mali, basikulidunda, basikulisumpula, basikusampaula, batamvwidi bazyali, batalumbi, batasyomeki, batajisi luyando lwakuzyalwa andulo, batanyoneki, basikubejelezya, batalilesyi, bakali, batayandi bubotu, basikwaaba bamwi, batalaiki, basikulitukumuna, bayandisya zyakulikondelezya kwiinda kuyandisya Leza, ibalibonya mbuli kuti balilyaabide mubukombi, pele nguzu zyambubo balazikazya.”

Sena tamuzumini kuti bukkale buli boobu buyaabwiindila buya mubantu mazuba aano? Sena tamuzumini kuti tuzingulukidwe aabantu ibaliyanda, bayandisya mali alimwi ibalisumpula? Sena tamuzumini kuti bantu bayandisisya zintu zinji alimwi tabanyoneki? Tacidoonekwi kuti mulabona kuti bana tababamvwidi bazyali babo alimwi bunji bwabantu bayandisya zyakulikondelezya kwiinda kuyandisya Leza. Alimwi zintu ziyaabwiindila buya kubija buzuba abuzuba.

Lugwalo lwa Matayo 24:6, 7 lwaamba kuti: “Muyoomvwa nkondo mumasena aalaafwaafwi alimwi amasena aali kule. . . . Cisi ciyoobukila cisinyina abwami buyoobukila bwaminyina.”

Kuyeeyelwa kuti mweelwe wabantu boonse ibakafwa akaambo kankondo alimwi amazwanga kuzwa mu 1914 ulainda ku 100 miliyoni, imweelwe wiinda kumweelwe wabantu boonse muzisi zinji. Amweezyeezye buyo bantu balila, ibali mubuumba alimwi akupenga akaambo kalufwu lwabantu banji boobu. Sena zisi zyaiya kukulubizya kwazyo alimwi akubeleka canguzu kutegwa nkondo zimane?

Lugwalo lwa Matayo 24:7 lwaamba kuti: “Kuyooba nzala.”

Imbunga iitegwa The World Food Programme yaamba kuti: “Munyika mulimwa zyakulya zinji zyakusanina bantu boonse, ibantu bali 815 miliyoni, nkokuti muntu omwe akati kabantu bali 9 ucoona anzala buzuba abuzuba. Alimwi buya muntu omwe akati kabantu botatwe uciswa bulwazi bumwi buboola akaambo kakubula zyakulya.” Kuyeeyelwa kuti mwaka amwaka bana babalilwa ku 3 miliyoni balafwa akaambo kanzala.

Lugwalo lwa Luka 21:11 lwaamba kuti: “Kuyooba mizuzumo yanyika mipati.”

Mwaka amwaka, mizuzumo yanyika iibalilwa ku 50,000 minji kapati kuti kaibacitikila bantu. Mizuzumo iibalilwa ku 100 ilanyonyoona mayake citaambiki alimwi muzuzumo mupati kapati ulacitika mwaka amwaka. Kweelana abuvwuntauzi bumwi ibwakacitwa, akati kamwaka wa 1975 alimwi a 2000, mizuzumo yanyika yakajaya bantu basika ku 471,000.

Lugwalo lwa Matayo 24:14 lwaamba kuti: “Makani mabotu aa Bwami aaya ayookambaukwa munyika yoonse kuti bukabe bumboni kumasi oonse, mpoonya mamanino ayoosika.”

Bakamboni ba Jehova, ibainda ku 8 miliyoni kuzwa kaindi balakambauka alimwi akupa bumboni bwamakani mabotu aa Bwami bwa Leza munyika yoonse mbwiizulwa muzisi zibalilwa ku 240. Balakambauka makani mabotu mumadolopo, muminzi, mutunzi alimwi amusena moonse mujanika bantu. Businsimi bwaamba kuti ciindi mulimo ooyu waakucitwa kweelana ambwayanda Leza, “mamanino ayoosika.” Ino eeci ciyakwaamba nzi? Ciyakwaamba mamanino aabweendelezi bwabantu alimwi akutalika kwabweendelezi bwa Bwami bwa Leza. Ino nzisyomezyo nzi iziyoozuzikizyigwa mubweendelezi bwa Bwami bwa Leza? Amuzumanane kubala kutegwa mujane bwiinguzi.