SENA MULIJISI NGUZU ZYAKULISALILA MBOBUYOOBA BUUMI BWANU KUMBELE? Bantu bamwi bayeeya kuti zintu izyakabambilwa limwi kuti ziyoobacitikila nzezyeendelezya buumi bwabo kutali zintu nzyobalisalila kucita. Ciindi nobaalilwa kuzuzikizya mbaakani zimwi, balatakata akwaamba kuti taakwe ncobakonzya kucita. Baamba kuti, “Cakabambilwa limwi kuti tandikacikonzyi kuzizuzikizya mbaakani zyangu!”

Bamwi balatyompwa kapati ciindi nobabona kuti kunyina ncobakonzya kucita kutegwa bakumane kudyaaminina alimwi akutalulama kuli munyika eeyi. Ambweni balasola kubeleka canguzu kutegwa babe abuumi buli kabotu, pele cakwiinduluka-induluka zintu mbuli nkondo, bugwebenga, ntenda zilicitikila alimwi amalwazi zilaanyonganya makanze aabo. Aboobo balalibuzya kuti, ‘Ino ndipengela nzi?’

Masimpe kuti zintu zicitika mubuumi zilakonzya kwaanyonganya kapati makanze aanu. (Mukambausi 9:11) Nokuba boobo, caboola kumakani aajatikizya buumi bwanu bwakumbele, mulijisi nguzu zyakulisalila. Alimwi buya, Bbaibbele litondezya kuti buumi bwanu bwakumbele buyeeme azintu nzyomusala kucita. Amubone ncolyaamba.

Musa, musololi wacisi cabana Israyeli bansiku, wakaambila bantu ibakali afwaafwi kunjila Munyika Yakasyomezyegwa kuti: “Ndabikka buumi alufwu, cilongezyo akusinganya kumbele lyanu; aboobo mweelede kusala buumi kutegwa muzumanane kupona, nywebo abana banu, kwiinda mukuyanda Jehova Leza wanu, kuswiilila jwi lyakwe akukakatila kulinguwe.”—Deuteronomo 30:15, 19, 20.

“Ndabikka buumi alufwu, cilongezyo akusinganya kumbele lyanu; aboobo mweelede kusala buumi kutegwa muzumanane kupona.”​—Deuteronomo 30:19

Masimpe! Leza wakabafwutula bana Israyeli kuzwa mubuzike ku Egepita mpoonya akubapa bulangizi bwakupona buumi bwakuliiba alimwi bukkomanisya Munyika Yakasyomezyedwe. Pele zyoonse eezyi tiizyakali kukonzya kulicitikila buyo. Kutegwa babe aazilongezyo eezyi, bakeelede “kusala buumi.” Munzila nzi? ‘Kwiinda mukuyanda Leza, kuswiilila jwi lyakwe alimwi akukakatila kulinguwe.’

Mazuba aano, andinywe mulicijisi coolwe eeci cakulisalila, aboobo zintu nzyomusala kucita zilakonzya kutondezya mbobuyooba buumi bwanu kumbele. Kwiinda mukusala kuyanda Leza, kuswiilila jwi lyakwe alimwi akukakatila kulinguwe, mubwini musala buumi, nkokuti buumi butamani munyika yaparadaiso. Pele ino ncinzi cijatikizyidwe mukubweza ntaamu eezyi?

Luyando mbobube bupati mbwajisi Leza. Mwaapostolo Johane wakasololelwa kulemba kuti: “Leza nduyando.” (1 Johane 4:8) Nkakaambo kaako, ciindi naakabuzyigwa kuti nguuli mulawo mupati akati kamilawo yoonse, Jesu wakaamba kuti: “Weelede kuyanda Jehova Leza wako amoyo wako woonse, abuumi bwako boonse alimwi amizeezo yako yoonse.” (Matayo 22:37) Luyando ndotujisi kuli Jehova Leza ndolweelede kutupa kuba acilongwe anguwe, kutali akaambo kakumuyoowa naa kumumvwida buyo cakwiinzya mulawo. Pele ino nkaambo nzi ncotweelede kumuyanda?

Luyando ndwajisi Jehova kubantu luli mbuli luyando ndobajisi bazyali kubana babo. Nokuba kuti tabalondokede, bazyali basiluyando balabayiisya bana babo, balabakulwaizya, balabagwasyilizya alimwi akubalaya nkaambo bayanda kuti kabakkomene akuti zintu kazibeendela kabotu. Ino bazyali balo balangila nzi kubana babo? Bazyali bayanda kuti bana babo kababayanda alimwi akuzitobela zintu nzyobakabayiisya kutegwa bagwasyigwe. Aboobo cileelela kuti Taateesu wakujulu ulangila kuti andiswe katumuyanda akumulumba akaambo kazintu zyoonse nzyaatucitila.

Mumwaambo molyakasaanguna kulembwa Bbaibbele, ibbala lyakuti “kuswiilila” kanji-kanji lipa muzeezo “wakumvwida.” Sena eeci inga tacili ncico ncotupandulula ciindi notwaambila mwana kuti, “Kobaswiilila bazyali bako”? Aboobo, kuswiilila jwi lya Leza caamba kwiiya alimwi akutobela nzyaamba. Mbwaanga tatukonzyi kulimvwa buya cacigaminina jwi lya Leza, tulamuswiilila kwiinda mukubala alimwi akutobela ncolyaamba Jwi lyakwe, Bbaibbele.—1 Johane 5:3.

Kutegwa atondezye mbociyandika kuswiilila jwi lya Leza, aciindi cimwi Jesu wakaamba kuti: “Muntu teelede kuponena acinkwa cilikke pe, pele weelede kuponena amajwi oonse aazwa kumulomo wa Jehova.” (Matayo 4:4) Mbubwenya mbotuyandika cakulya cakumubili, kwiiya kujatikizya Leza kulayandika kapati. Nkaambo nzi? Mwami musongo Solomoni wakaamba kuti: “Busongo bulakwabilila mbubonya mbuli mali mbwaakwabilila, pele bubotu bwaluzyibo mbwakuti: Busongo bupa kuti ooyo uubujisi azumanane kupona.” (Mukambausi 7:12) Luzyibo alimwi abusongo ibuzwa kuli Leza bulakonzya kutukwabilila mazuba aano akutugwasya kusala kabotu ikukonzya kutusololela kubuumi butamani.

Amuyeeye cikozyanyo ca Jesu ncotwakalanga-langa mucibalo cainda mwalo mwaakaamba kuti: “Ulisyanikide mulyango alimwi ninsyoonto nzila iitola kubuumi, kumane mbasyoonto baijana.” (Matayo 7:13, 14) Ikuti katweendela munzila iili boobo, cakutadooneka inga catugwasya kapati ikuti twasololelwa amuntu wiizyi kabotu nzila eeyo kutegwa tukasike nkotuya, nkokuti kubuumi butamani. Aboobo, tulijisi kaambo kabotu ncotweelede kuswena afwaafwi a Leza. (Intembauzyo 16:8) Pele ino inga twacita buti oobo?

Buzuba abuzuba, kuli zintu zinji nzyotweelede kucita alimwi azimwi nzyotunga twayanda kucita. Zintu zili boobo inga zyatupa kujata bubi naa kutunyonganya cakuti inga twabula aciindi cakulanga-langa zintu nzyayanda Leza kuti tucite. Nkakaambo kaako Bbaibbele litwaambila kuti: “Amucenjele kapati, mutanikweendi mbuli bafwubafwuba pe, pele mbuli bantu basongo, kamucibelesya kabotu ciindi coonse ncomujisi, nkaambo mazuba aaya mabi.” (Baefeso 5:15, 16) Tweelede kuswena kuli Leza kwiinda mukupanga cilongwe cesu anguwe kuba cintu ciyandika kapati mubuumi bwesu.—Matayo 6:33.

Nokuba kuti kunyina ncomukonzya kucita kutegwa mucince zyakamucitikila musyule, kuli zintu nzyomukonzya kucita kutegwa nywebo alimwi abayandwa banu mukakonzye kuba aabuumi buli kabotu kumbele. Bbaibbele litondezya kuti Taateesu wakujulu, Jehova Leza, ulatuyanda kapati alimwi ulatwaambila zintu nzyotweelede kucita. Amubone majwi aamusinsimi Mika:

“Yebo omuntu, wakwaambila kale cintu cibotu. Ino ncinzi Jehova ncayanda kulinduwe? Uyanda buyo kuti kocita bululami, koyandisya kusyomeka, alimwi akweenda cakulibombya a Leza wako!”—Mika 6:8.

Sena mulakuzumina kutamba kwa Jehova kwakuti mweende anguwe alimwi akuyoojana zilongezyo zitamani zyalo nzyabambilide baabo bacita boobo? Kusala nkukwanu!