Makani mabotu aa Bwami bwa Leza ali mukukambaukwa munyika yoonse, mbubwenya mbwaakasinsima Jesu. (Matayo 24:14) Bbuku lyamu Bbaibbele lya Daniele litwaambila kuti Bwami oobu nimfwulumende ya Leza. Caandaano 2 cabbuku eeli cijisi businsimi ibutondezya kutobelana kwamfwulumende zyabantu naa mami amwi aajisi nguzu kapati, kuzwa kubwami bwa Babuloni wansiku kusikila sunu. Kujatikizya iciyoocitika kumbele, kapango 44 kaamba kuti:

“Lino mumazuba aabami aabo Leza wakujulu uyoobikka bwami ibutakanyonyoonwi pe. Bwami oobo tabukapegwi kubantu bambi pe. Buyoopwayaula akumanizya mami aaya oonse, mpoonya bwalo bulikke buyakwiima nji mane kukabe kutamani.”

Businsimi bwamu Bbaibbele oobu alimwi abumbi bwakaambila limwi kuti Bwami bwa Leza buyakwaanjilila busena mami oonse aabantu mpoonya akuleta luumuno kubantu bakkala anyika. Ino buumi bunooli buti mubweendelezi bwa Bwami oobu? Zyeezi zisyomezyo zimwi zikkomanisya iziyoozuzikizyigwa ino-ino.

• NKONDO IYOOMANA

  Lugwalo lwa Intembauzyo 46:9 lwaamba kuti: “[Leza] ulamanizya nkondo munyika yoonse mboizulwa. Ibuta ulabutyolaula alyalo sumo ulalipwayaula; inkalaki zyankondo ulazyuumpa amulilo.”

  Amweezyeezye buyo mboikonzya kuba nyika ikuti naa mali oonse alimwi abusongo bubelesyegwa lino kupanga zilwanyo zyatalika kubelesyegwa kugwasya bantu kutali kubajaya! Cisyomezyo eeci ciyoozuzikizyigwa ncobeni mubweendelezi bwa Bwami bwa Leza.

• KUCISWA KUYOOMANA

  Lugwalo lwa Isaya 33:24 lwaamba kuti: “Taakwe muntu naba omwe uukkala munyika uuyakwaamba kuti: ‘Ndaciswa.’”

  Amweezyeezye buyo nyika mwalo imunoonyina muntu uuciswa bulwazi bwamoyo, kkansa, ntuntumaanzi naa bulwazi buli boonse. Takucinooyandiki zibbadela alimwi amisamu. Bantu bakkala munyika bayoopona buumi bulondokede.

• NZALA IYOOMANA

  Lugwalo lwa Intembauzyo 72:16 lwaamba kuti: “Kuyooba maila manji anyika; atala lyamalundu ayoovwula citaambiki.”

  Kuyooba zyakulya zinji munyika alimwi bantu boonse banoolya zyakulya eezyo. Nzala alimwi amalwazi aaboola akaambo kakubula zyakulya ayoomana.

• KUCISA, BUUMBA ALIMWI ALUFWU ZIYOOMANA

  Lugwalo lwa Ciyubunuzyo 21:4 lwaamba kuti: “[Leza] uyoosindula misozi yoonse kumeso aabo, alimwi lufwu talukabi limbi, akwalo koomoka, kulila nokuba kucisa takukabi limbi pe. Zintu zyakaindi zyamana.”

   Eeci caamba kuti kuyooba kupona buumi butamani ibulondokede munyika yaparadaiso. Eeci ncecisyomezyo ncaakasyomezya Mulengi wesu siluyando, Jehova Leza.

Sena zisyomezyo zyoonse eezyi ziyoozuzikizyigwa ncobeni? Nokuba kuti bantu banji balazumina kuti buumi busyomezyedwe mu Bbaibbele bulalombozyeka kapati, pele akaambo katwaambo twiindene-indene ibanji cilabakatazya kusyoma ncobeni kuti bantu bayoopona kukabe kutamani. Eeci tacigambyi pe, nkaambo kunyina muntu uuli woonse iwakapona kale buumi buli boobo uukonzya kutupandulwida bwini mbobubede.

Kuzwa kaindi, bantu bali mubuzike bwacibi alufwu alimwi bali kupona buumi bwamacise akupenga kwaciindi cilamfwu kapati cakuti banji bayeeya kuti oobu mbobubede buumi naa mbobweelede kuba. Pele eeci ciliindene kapati amakanze ngaakajisi Mulengi wesu Jehova Leza kujatikizya bantu.

Kutegwa atugwasye kusinizya kuti zyoonse nzyaakasyomezya ziyoozuzikizyigwa, Leza wakaamba boobu kujatikizya jwi lyakwe: “Talikapiluki cinkwamaanza kulindime, pele liyoocicita ncobeni coonse eeco ncondiyanda, ncobeni liyoozwidilila muliceeco ncondalituma kuti licite.”—Isaya 55:11.

Mu Bbaibbele, Jehova waambidwe kuti ngu Leza “uutakonzyi kubeja.” (Tito 1:2) Mbwaanga wakasyomezya zintu zibotu zyoonse eezyi, inga cabota kulanga-langa mibuzyo eeyi: Sena ncobeni cilakonzyeka kubantu kuyoopona mu paradaiso anyika kukabe katamani? Ino ncinzi ncotweelede kucita kutegwa tukazibone zisyomezyo zya Leza? Muzibalo zitobela zyamagazini eeyi, mulajana twaambo tugwasya tujisi bwiinguzi kumibuzyo eeyi.