IKUTI NYWEBO naa muyandwa wanu wajanwa aabulwazi bupati ibukonzya kusololela kulufwu, mulizyi kabotu eeci mbocikonzya kumutyompya. Kunze aabulwazi bwini kubugama, inga mwayandika kuliyumya kukukopana kwamizeezo kuboola akaambo kakuba apenzi eelyo. Kuyoowa alimwi akulibilika kulakonzya kwiindila akaambo kanyendo zinji zipangwa izyakuyoobonana abamadokota, kujana naa kubbadelela busilisi buyandika naa mapenzi aaboola akaambo kamisamu imwi. Kupenga mumizeezo ikuboola akaambo kakuciswa bulwazi bupati kulakatazya citaambiki.

Ino nkookuli nkotukonzya kujana lugwasyo? Bantu banji balagwasyigwa kapati kwiinda mukupaila kuli Leza alimwi akubala zibalo zyamu Bbaibbele zyuumbulizya. Lugwasyo lumbi lulakonzya kujanwa kwiinda mukugwasyigwa abanamukwasyi alimwi abalongwe.

Ba Robert ibajisi myaka yakuzyalwa iili 58, bakaamba kuti: “Amube alusyomo muli Leza eelyo uyoomugwasya kuliyumya kubulwazi bwanu. Amupaile kuli Jehova. Amumwaambile mbomulimvwa. Amumulombe kuti amupe muuya uusalala. Amumulombe kuti amugwasye kuzilanga kabotu zintu akuba muntu uubakulwaizya banamukwasyi alimwi akuzumanana kukkazika moyo ciindi nomuliyumya kubulwazi bwanu.”

Bakazumanana kwaamba kuti: “Cilagwasya kapati kuti banamukwasyi kabali afwaafwi nkaambo eeci cipa kukkalikana mumizeezo. Inga balanditumina mafooni buzuba abuzuba banamukwasyi, ambweni omwe naa bobilo ikubuzya kuti, ‘Ino muliswiilide buti?’ Inga ndilaakukulwaizyigwa abeenzuma ibakkala mumasena aaindene-indene. Lyoonse bandipa kulimvwa kabotu alimwi eeci cindipa kuzumanana kuliyumya.”

Ikuti naa muyanda kuyooswaya mulongwe wanu uuciswa, amubone ncobakaamba ba Linda: “Tacidoonekwi kuti mulwazi awalo uyanda kupona mbuli mbobapona bantu boonse, aboobo ambweni inga tanaayanda kunoobandika makani aajatikizya bulwazi bwakwe lyoonse. Aboobo, amusole kubandika buyo makani aambi ngomuvwula kubandika lyoonse.”

Kwiinda mukugwasyigwa a Leza alimwi aluumbulizyo lwamu Magwalo, kubikkilizya alugwasyo lwabanamukwasyi abalongwe, tulakonzya kuba masimpe kuti cilagwasya kuzumanana kupona noliba leelyo notuciswa bulwazi bukatazya kupona.