• Wakali kuyoosalwa a Leza. “Mebo lwangu, ndabikka mwami . . . ndilakupa masi kuti abe lukono lwako alimwi anyika yoonse kuti ibe lubono lwako.”—Intembauzyo 2:6, 8.

• Wakali kuyooba simulyazina wa Mwami Davida. “Twazyalilwa mwana, twapegwa mwana musankwa . . . Bupati bwabweendelezi bwakwe alimwi aluumuno tazikamani pe, aacuuno cabwami ca Davida alimwi amubwami bwakwe kutegwa abusitikizye.”—Isaya 9:6, 7.

• Wakali kuyoozyalilwa mu Betelehemu. “O Betelehemu . . . , mulinduwe muyoozwa yooyo uuyoondibeda muleli . . . Bupati bwakwe buyoosika kumagolelo aanyika.”—Mika 5:2, 4.

• Wakali kuyookakwa abantu alimwi akujaigwa. “Wakali kunyansyigwa, alimwi twakali kumubona kuti unyina mpindu. . . . Wakayaswa akaambo kansotoko zyesu; wakapwaigwa akaambo kazinyonyoono zyesu.”—Isaya 53:3, 5.

• Wakali kuyoobusyigwa kuzwa kubafwu alimwi akulemekwa. “Tokandisiyi mu Cuumbwe. Tokalekeli uusyomeka wako kuti abone cilindi. . . . Kujanza lyako lyalulyo kuli lukkomano mane kukabe kutamani.”—Intembauzyo 16:10, 11.

Kuli buyo muntu omwe iweelela bupanduluzi oobu, alimwi muntu ooyo ngu Jesu Kristo. Alimwi buya, mungelo wakaambilide Mariya, banyina Jesu kuti: “Leza uyoomupa cuuno cabwami ca Davida usyi, . . . alimwi Bwami bwakwe tabukamani.”—Luka 1:31-33.

Jesu kunyina naakaba mweendelezi anyika. Muciindi caboobo, uyoolela bantu kali Mwami wa Bwami bwa Leza kujulu. Ino ncinzi cipa kuti abe Mweendelezi weelela ncobeni? Amubone zintu nzyaakacita Jesu naakali anyika.

•   Jesu wakali kubabikkila maano bantu. Jesu wakali kubagwasya baalumi abamakaintu, bana alimwi abapati, tacikwe makani abukkale bwabo mbobwakabede. (Matayo 9:36; Marko 10:16) Ciindi sicinsenda naakakombelezya kuti: “Ikuti koyanda, ulakonzya kundisalazya,” Jesu wakamufwida luse akumuponya.—Marko 1:40-42.

• Jesu wakatuyiisya mbotukonzya kumukkomanisya Leza. Wakaamba kuti: “Tamukonzyi kubelekela Leza alimwi a Lubono.” Alimwi wakaamba kuti tweelede kucitila bamwi zintu mbubwenya mbotuyanda kuti batucitile. Kuyungizya waawo, Jesu wakatondezya kuti Leza tabikkili buyo maano kujatikizya zintu nzyotucita, pele alimwi anzyotuyeeya ambotulimvwa. Aboobo kutegwa tumukkomanisye Leza, tweelede kweendelezya mbotulimvwa mumoyo. (Matayo 5:28; 6:24; 7:12) Alimwi Jesu wakakankaizya kuti kutegwa tube alukkomano lwini-lwini, tweelede kuzyiba ncayanda Leza kuti tucite mpoonya akucicita.—Luka 11:28.

• Jesu wakayiisya ncocaamba kuyanda bamwi. Majwi ngaakali kwaamba Jesu alimwi anzyaakali kucita zyakabasika amoyo bantu. “Makamu aabantu akagambwa kapati ambwaakali kuyiisya, nkaambo wakali kubayiisya mbuli muntu uujisi nguzu zya Leza.” (Matayo 7:28, 29) Wakabayiisya kuti: ‘Amubayande basinkondonyoko.’ Mane buya wakabapailila bamwi ibakajatikizyidwe mukumujaya naakati: “Taata, kobalekelela nkaambo tabazyi ncobacita.”—Matayo 5:44; Luka 23:34.

Jesu nguweelela ncobeni kuba Mweendelezi wanyika uugwasya alimwi siluzyalo. Pele ino uyootalika lili kweendelezya?