Lweetelelo lupandululwa kuti “nkucikonzya kumvwa mbwalimvwide muntu kwiinda mukweezyeezya mbotukonzya kulimvwa kuti katuli mubukkale bwamuntu ooyo.” Syaazibwene umwi mumakani aamizeezo uutegwa Dr. Rick Hanson wakaamba kuti “lweetelelo mbube mbotwakazyalwa aambubo.”

AMULANGE-LANGE KAAMBO AAKA: Nkaambo nzi ncotukonzya kutondezya lweetelelo, ibube mbozitajisi zilenge zimbi zili zyoonse? Bbaibbele lyaamba kuti Leza wakalenga bantu mucinkozya cakwe. (Matalikilo 1:26) Twakalengwa mucinkozya ca Leza mukuti tulakonzya kutondezya bube bwakwe bubotu. Nkakaambo kaako, ciindi lweetelelo nolukulwaizya bantu ibabikkila maano kuti bagwasye bamwi, nkokuti batondezya lweetelelo ndwajisi Mulengi, Jehova Leza.—Tusimpi 14:31.

Leza ulatweetelela alimwi cilamucima kutubona katupenga. Kujatikizya bantu bamu Israyeli yansiku, balo ibakaliyumya kukupenzyegwa ciindi nobakali mubuzike ku Egepita alimwi akupenga kwamyaka iili 40 munkanda, Bbaibbele lyaamba kuti: “Mumapenzi aabo oonse wakali kupenga mumoyo awalo.” (Isaya 63:9) Amubone kuti Leza tanaakaazyi buyo mapenzi aabo, pele awalo wakali kupenga mumoyo. Wakaamba kuti: “Ndilaazyi kabotu mapenzi aabo.” (Kulonga 3:7) Leza wakaamba kuti: “Kufwumbwa uumuguma nywebo uguma mboni yaliso lyangu.” (Zekariya 2:8) Ciindi bamwi nobatucitila cintu citucisizya moyo, awalo cilamucisa.

Bbaibbele litusyomezya kuti nokuba kuti zimwi ziindi tulakonzya kulimvwa kuti tatweeleli kuti Leza atufwide lweetelelo, “Leza mupati kwiinda myoyo yesu, alimwi ulizyi zintu zyoonse.” (1 Johane 3:19, 20) Leza ulituzyi kabotu kwiinda mbotulizyi tobeni. Ulibuzyi kabotu bukkale bwesu, mizeezo yesu alimwi ambotulimvwa. Alimwi ulatweetelela.

 Magwalo atusyomezya kuti

• “Yebo uyakwiita, eelyo Jehova uyookuvwiila; uyoolilila kugwasyigwa, eelyo walo uyakwaamba kuti, ‘Ndime aano!’”—ISAYA 58:9.

• “‘Nkaambo ndiliizyi kabotu mizeezo njendiyeeya kujatikizya ndinywe,’ mbwaamba Jehova, ‘mizeezo yakumuletela luumuno, kutali mapenzi pe, kumupa buumi bwakumbele bubotu alimwi abulangizi. Lino muyoondiita alimwi muyooboola akupaila kulindime, eelyo ndiyoomuswiilila.’”—JEREMIYA 29:11, 12.

• “Kobikka misozi yangu munkomo yako yacikutu. Sena tiilembedwe mubbuku lyako?”—INTEMBAUZYO 56:8.

Sena kuzyiba kuti Leza ulatweetelela inga kwatugwasya kulwana mapenzi? Amubone cakuluula caba Maria:

“Ndakali kulimvwa kuti buumi bwakali kukatazya kapati alimwi tiibwakali kabotu ciindi nondakafwidwa mwanaangu musankwa iwakajisi myaka yakuzyalwa iili 18 walo iwakaciswa bulwazi bwakkansa kwamyaka yobilo. Ndakamunyemena kapati Jehova akaambo kakutamukwabilila kubulwazi oobu alimwi akumuponya!

“Nokwakainda myaka iili cisambomwe, mulongwe umwi siluyando alimwi silweetelelo wamumbungano wakandiswiilila ciindi nondakali kupandulula kuti Jehova tandiyandi. Naakamana kundiswiilila kwamawoola aali mbwaabede kakunyina kundinjila mukanwa, wakazubulula lugwalo lumwi ilwakandikulwaizya kapati. Lwakali lugwalo lwa 1 Johane 3:19, 20, lwalo ilwaamba kuti: ‘Leza mupati kwiinda myoyo yesu alimwi ulizyi zintu zyoonse.’ Wakapandulula kuti Jehova ulaazyi kabotu mapenzi eesu.

“Nokuba kuti ndakakamvwa kaambo aaka, cakandiyumina kuleka kunyema! Mpoonya ndakabala lugwalo lwa Intembauzyo 94:19, ilwaamba kuti: ‘Mizeezo minji iilibilisya neyakandikatazya, yebo wakanduumbulizya akunditontozya.’ Ndakalimvwa mbuli kuti lugwalo oolu lwakalembelwa ndime buya! Mukuya kwaciindi, ndakatalika kulimvwa kwaanguluka kumwaambila Jehova kujatikizya mapenzi aangu akaambo kakuzyiba kuti ulandiswiilila alimwi akundimvwisya.”

Eelo kaka cilaumbulizya kuzyiba kuti Leza ulibuzyi kabotu bukkale bwesu alimwi ulatweetelela! Pele ino nkaambo nzi ncokuli kupenga boobu? Sena cili boobu akaambo kakuti Leza ulimukutusubula akaambo kazibi zyesu? Sena Leza kuli ncayoocita kutegwa akamane kupenga koonse? Mibuzyo eeyi ilaingulwa muzibalo zitobela.