NOKUBA kuti kutamvwida kwabazyali besu bakusaanguna ba Adamu a Eva kwakaleta cibi alimwi alufwu kubantu boonse, tiikwakacinca makanze aa Leza kujatikizya bantu. Kwiinda mu Jwi lyakwe, Bbaibbele, cakwiinduluka-induluka Leza ulatondezya kuti makanze aakwe taacincide pe.

• “Balulami bayookona nyika, alimwi bayookkala alinjiyo lyoonse mane kukabe kutamani.”—Intembauzyo 37:29.

• “Uyoolumena lufwu mane kukabe kutamani, alimwi Mwami Singuzuzyoonse Jehova uyoosindula misozi kumasyu oonse.”—Isaya 25:8.

• “Sinkondo wamamanino uuyoonyonyoonwa, ndufwu.”—1 Bakorinto 15:26.

• “Lufwu talukabi limbi, akwalo koomoka, kulila nokuba kucisa takukabi limbi pe.”—Ciyubunuzyo 21:4.

Ino Leza ‘uyoolumena buti lufwu’ naa ‘kulunyonyoona’ cakumaninina? Kweelana ambotwabona kale, cakusalazya Bbaibbele lyaamba kuti, ‘balulami bayookkala anyika lyoonse mane kukabe kutamani.’ Pele alimwi lyaamba kuti “kunyina muntu mululami munyika uucita buyo zibotu lyoonse kakunyina kubisya.” (Mukambausi 7:20) Kutegwa alumane lufwu, sena Leza uyooleka kuyanda kuti bantu kabatobela zyeelelo zyakwe? Eeco inga tiicacitika! Alimwi kunyina nayakucita oobo nkaambo ‘Leza takonzyi kubeja.’ (Tito 1:2) Aboobo, ino Leza uyoocita buti kutegwa azuzikizye makanze aakwe aaluyando aakulenga bantu?

Jehova Leza wakabikka bubambe bwaluyando bwakunununa bantu kuzwa kulufwu kwiinda mukupa cinunuzyo. Ciindi Bbaibbele nolyaamba cinunuzyo, lyaamba cintu iceelene acintu cakanyonyooka eeco icibbadelwa naa cipegwa kutegwa bululami butobelwe. Mbwaanga bantu boonse mbaasizibi alimwi bakapegwa cisubulo calufwu, cakutainda mumbali Bbaibbele lyaamba kuti: “Kunyina naba omwe wabo uukonzya kunununa mwanookwabo nokuba kupa Leza cinunuzyo cakwe, (muulo wakunununa buumi bwabo ngwaatala kapati cakuti lyoonse tabaukonzyi pe).”—Intembauzyo 49:7, 8.

Ciindi muntu uutalondokede nafwa, inga ubbadelela buyo zibi zyakwe; takonzyi kubbadelela zibi zyamuntu uumbi uuli woonse. (Baroma 6:7) Aboobo twakali kuyandika muntu uulondokede alimwi uunyina cibi kuti aabe buumi bwakwe, ikutali akaambo kazibi zyakwe pele akaambo kazibi zyesu.—Bahebrayo 10:1-4.

Eeci ncencico Leza ncaakacita. Wakatuma Mwanaakwe, Jesu kuzwa kujulu kuti azyalwe anyika kali muntu uulondokede, uunyina cibi. (1 Petro 2:22) Jesu wakaamba kuti wakaboolela “kupa buumi bwakwe kuti bube cinunuzyo cakununuzya banji.” (Marko 10:45) Wakafwa kutegwa abbadelele zibi zyesu alimwi akutwaangununa kuzwa kulufwu.—Johane 3:16.

Kuzuzikizya businsimi bwamu Bbaibbele, mazuba aano tupona ‘muziindi zikatazya ncobeni,’ ikutondezya kuti tupona “kumazuba aamamanino” aabweende  bwazintu oobu bubyaabi. (2 Timoteyo 3:1) Kumamanino aamazuba aamamanino, bantu basampaula Leza ‘bayoobetekwa alimwi akunyonyoonwa.’ (2 Petro 3:3, 7) Pele bantu ibamuyanda Leza bayoofwutuka kulunyonyooko oolu mpoonya akupegwa “buumi butamani.”—Matayo 25:46.

Mamiliyoni aabantu bambi bayooba acoolwe cakuba abuumi butamani ciindi baakubusyigwa. Jesu wakabusya muntu umwi ciindi naakaswaide munzi wa Naini. Ooyu wakali mwana musankwa wamukamufwu walo ngwaakajisi buyo alikke, eelyo Jesu “wakamufwida luzyalo” mukamufwu aboobo wakamubusya mwanaakwe. (Luka 7:11-15) Awalo mwaapostolo Paulo wakalemba kuti: “Ndilijisi bulangizi kuli Leza . . . bwakuti kuyooba bubuke bwabantu baluleme abataluleme.” Bulangizi oobu bwabubuke ncitondezyo caluyando lupati Leza ndwajisi kubantu.—Milimo 24:15.

Mabbiliyoni aabantu balijisi bulangizi bwakuyoopona kukabe kutamani. Bbaibbele lyaamba kuti: “Balulami bayookona nyika, alimwi bayookkala alinjiyo lyoonse mane kukabe kutamani.” (Intembauzyo 37:29) Aciindi eeco, bayookkomana alimwi akukulwaizyigwa kubona kuzuzikizyigwa kwamajwi aamwaapostolo Paulo ngaakalemba myaka iibalilwa ku 2,000 yainda, aakuti: “O lufwu, ino luli kuli luzundo lwako? O lufwu, ino luli kuli lumoola lwako?” (1 Bakorinto 15:55) Aboobo lufwu luyoomana, lwalo luli ngosinkondo wabantu uuyoosya kapati.