Leza wakaambila Adamu kuti: “Mubuzuba mboyoolya [kucisamu], ncobeni uyoofwa.” (Matalikilo 2:17) Mulawo ooyu nowatakali kupanga maano kuli Adamu ikuti Leza naakamulengela kuti kacembaala alimwi akufwa. Adamu wakalizyi kuti, ikuti naatakalya kucisamu eeciya, naatakafwa.

Ba Adamu a Eva tiibakali kuyandika kulya kucisamu eeciya kutegwa bazumanane kupona, nkaambo kwakali zisamu zinji izyakali kuzyala micelo mumuunda. (Matalikilo 2:9) Kwiinda mukutalya kucisamu eeciya, banabukwetene bakusaanguna aaba nobakatondezya kuti balamumvwida ooyo iwakabapa buumi. Kuyungizya waawo, nobakatondezya kuti Leza nguujisi nguzu zyakubaambila cakucita.

Kutegwa tuzyibe kaambo ba Adamu a Eva ncobakafwida, tweelede kulanga-langa mubandi walo iwakapa kuti toonse tujatikizyigwe. Saatani Diabolosi wakabelesya nzoka kutegwa aambe makani aakubeja. Bbaibbele lyaamba kuti: “Lino nzoka yakalicenjede kapati kwiinda banyama boonse bamusyokwe Jehova Leza mbaakalenga. Aboobo yakabuzya mukaintu kuti: ‘Sena ncobeni Leza wakaamba kuti tamweelede kulya kuzisamu zyoonse zyamumuunda?’”—Matalikilo 3:1.

Mpoonya Eva wakaingula kuti: “Tulakonzya kulya micelo yazisamu zyoonse izili mumuunda. Pele Leza wakaamba boobu kujatikizya micelo yacisamu icili akati kamuunda: ‘Tamweelede kulya kulincico pe, nokuba kuciguma; buyo-buyo muyoofwa.’” Mpoonya nzoka yakati kumukaintu: “Tamukonzyi kufwa pe. Nkaambo Leza ulizyi kuti buzuba mbomuyoolya kulincico, meso aanu ayoojaluka alimwi muyooba mbuli Leza, muyoozyiba bubotu abubi.” Aboobo, Saatani wakali kwaamba kuti Jehova wakali mubeji walo iwakali kubaima zintu zimwi zibotu bazyali besu bakusaanguna.—Matalikilo 3:2-5.

Eva wakazisyoma nzyaakamvwa. Aboobo wakatalika kucilangisisya cisamu. Eelo kaka cakali kuboneka kabotu alimwi cakali kukkomanisya kulanga! Aboobo wakacela micelo kulincico akutalika kulya. Bbaibbele lyaamba kuti: “Kumane nobakaba antoomwe amulumaakwe, wakamupa eelyo awalo wakalya.”—Matalikilo 3:6.

Eelo kaka cakamucisa kapati Leza kubona bana bakwe bayandwa kabamuzangila acaali! Ino wakacita nzi? Kuli Adamu, Jehova wakaamba kuti: ‘Uyoojokela kubulongo, nkaambo ooko nkookazwa.  Nkaambo uli bulongo, aboobo uyoojokela kubulongo.’ (Matalikilo 3:17-19) Akaambo kaceeci, “myaka yoonse njaakapona Adamu yakali 930, mpoonya wakafwa.” (Matalikilo 5:5) Adamu kunyina naakaunka kujulu pe naa kuzumanana kupona kubusena bumbi bwamyuuya. Tanaakali kupona katanamulenga Jehova kuzwa kubulongo. Aboobo ciindi naakafwa, wakaba bulongo mbubwenya mbwaakabede katanalengwa. Tanaakacili kupona pe. Eelo kaka cilausisya!

Akaambo kakuzanga acaali, ba Adamu a Eva bakasweekelwa buumi bwabo bulondokede alimwi abulangizi bwakupona kukabe kutamani. Buumi bwabo bwakali kuyaabucinca; bakaba bantu batalondokede alimwi basizibi. Pele cibi cabo cakutamvwida Leza tiicakajatikizya buyo mbabo pe. Bakayambukizya bana babo ikutalondoka. Lugwalo lwa Baroma 5:12 lwaamba kuti: ‘Cibi cakanjila munyika kwiinda mumuntu omwe [Adamu] alufwu kwiinda mucibi, eelyo lufwu lwakasikila bantu boonse nkaambo boonse bakabisya.’

Bbaibbele lyaamba cibi alufwu kuti “mulembo uuvwumbide bantu boonse alimwi acivwumbyo civwumbide masi oonse.” (Isaya 25:7) Mulembo ooyu ulibavwumbide bantu mbuli musamu uujaya uumwaikide akati kabantu cakuti kunyina nkobakonzya kutijila. Masimpe, “muli Adamu boonse balafwa.” (1 Bakorinto 15:22) Lino mubuzyo uukonzya kubuzyigwa, kweelana ambwaakabuzya mwaapostolo Paulo, ngwakuti: “Ino nguni utiindivwune kumubili ooyu uunditola kulufwu oolu?” Sena kuli uukonzya kucita oobo?—Baroma 7:24.