Lulayo lwamu Bbaibbele: “Ibukkale bwanu butabi bwakuyandisya mali pe, pele amukkutile azintu nzyomujisi lino.”—Bahebrayo 13:5.

Mazuba aano, kuli zintu zinji kapati bantu nzyobaamba kuti tweelede kuba anzizyo. Pele Bbaibbele lyaamba kuti tulakonzya ‘kukkutila azintu nzyotujisi lino.’ Munzila nzi?

Amweelebe ‘kuyandisya mali.’ Bantu balakonzya kucita cintu cili coonse, nokuba kuti cintu eeco inga kacikonzya kunyonganya buumi bwabo, mukwasyi, zilongwe, zyeelelo zyakulilemeka nobuba bulemu bwabo akaambo buyo ‘kakuyandisya mali.’ (1 Timoteyo 6:10) Eelo kaka eeci tacigwasyi! Pele Bbaibbele lyaamba kuti, muntu uuyandisya lubono ‘takakkutili pe.’—Mukambausi 5:10.

Amubabikkile maano bantu, kutali zintu. Masimpe kuti, zintu zyakumubili zilagwasya kapati. Pele zintu eezyi tazikonzyi kutuyanda naa kutulumba; bantu balikke mbobakonzya kucita boobo. Kuba “amulongwe mwini-mwini” kulakonzya kutupa kukkutila mubuumi.—Tusimpi 17:17.

Lulayo lwamu Bbaibbele: “Moyo uukkomene musamu mubotu uuponya.”—Tusimpi 17:22.

Mbubwenya mbuli “musamu mubotu uuponya,” lukkomano lulakonzya kutugwasya kuliyumya ciindi notuciswa. Pele ino mbuti mbotukonzya kuba alukkomano ciindi notuciswa?

Amube bantu balumba. Ikuti katuyeeya buyo kujatikizya mapenzi eesu, nkokuti “mazuba oonse” anooli mabyaabi. (Tusimpi 15:15) Muciindi caboobo, Bbaibbele lyaamba kuti “amutondezye kuti mulalumba.” (Bakolose 3:15) Amwiiye kulumba akaambo kazintu izimucitikila mubuumi, noziba zintu zisyoonto. Izintu mbuli kauwo ikaunga kabotu, kumweta-mweta kwamuyandwa wanu alimwi akubota kwazuba ciindi nolibbila, zilakonzya kumupa lukkomano mubuumi.

Amucitile bamwi zintu zibotu. Nokuba kuti tulaciswa-ciswa, “kupa kulakkomanisya kapati kwiinda kupegwa.” (Milimo 20:35) Ciindi bamwi nobatulumba akaambo kazintu nzyotwabacitila, tulimvwa kukkomana alimwi eeci cipa kuti tuleke kubikkila maano kumapenzi eesu. Tulakonzya kuba abuumi bukkomanisya kwiinda mukugwasya bamwi kuba abuumi bukkomanisya.

Lulayo lwamu Bbaibbele: ‘Amusinizye zintu ziyandika kapati.’—Bafilipi 1:10.

Banabukwetene ibatajani ciindi cinji cakuba antoomwe balakonzya kunyonganya cilongwe cabo. Aboobo, bamalumi abamakaintu beelede kubona cikwati cabo kuba cintu ciyandika kapati mubuumi bwabo.

Amucitile antoomwe zintu. Muciindi cakucita zintu nzyomukkomanina nywebo nyolikke, amubikke bubambe bwakucitila antoomwe zintu. Bbaibbele lyaamba kuti: “Bobilo bali kabotu kwiinda omwe.” (Mukambausi 4:9) Mulakonzya kujika antoomwe, kunyanyaasya mubili, kulyookezya naa kucitila antoomwe zintu zimwi zimukkomanisya.

Amutondezye kuti mulamuyanda ngomukwetene limwi. Bbaibbele likulwaizya mulumi amukaintu kuti kabayandana alimwi akulemekana. (Baefeso 5:28, 33) Kumwetelana-mwetelana, kukumbatana caluyando naa kupana tuntu tusyoonto-syoonto kulakonzya kuyumya cikwati. Pele banabukwetene tabeelede kutondezya luyando mumakani aakoonana kubantu bambi pe.—Bahebrayo 13:4.