Myaka iibalilwa ku 3,500 yayinda, Jehova Leza wakaambila baabo ibakali kumukomba ncobakeelede kucita kutegwa bakapone buumi bubotu kumbele. Wakaamba kuti: “Ndabikka buumi alufwu, cilongezyo akusinganya kumbele lyanu; aboobo mweelede kusala buumi kutegwa muzumanane kupona, nywebo abana banu.”—Deuteronomo 30:19.

Kutegwa bakapone buumi bubotu kumbele, bantu aaba bakeelede kusala kabotu. Amazuba aano, tulijisi coolwe cakasala. Bbaibbele lilapandulula mbotukonzya kusala buumi bubotu bwakumbele. Lyaamba kuti: ‘Kwiinda mukuyanda Jehova Leza wanu, akuswiilila jwi lyakwe.’—Deuteronomo 30:20.

AMWIIYE BBAIBBELE: Kutegwa mumuyande Jehova, mweelede kusaanguna kwiiya kujatikizya nguwe mu Bbaibbele. Ciindi nomwiiya, muyoozyiba kuti ngu Leza siluyando walo uuyanda kuti zintu kazimweendela kabotu. Umutamba kuti kamupaila kulinguwe “nkaambo ulamubikkila maano.” (1 Petro 5:7) Bbaibbele lisyomezya kuti, ikuti mwasolekesya kwiiya kujatikizya nguwe, “awalo ulaswena kulindinywe.”—Jakobo 4:8.

AMUZIBELESYE NZYOMWIIYA: Kumuswiilila Leza caamba kutobela busolozi bwakwe bwabusongo ibujanika mu Bbaibbele. Ikuti mwacita oobo, ‘muyoozwidilila munzila zyanu alimwi munoocita zintu cabusongo.’—Joshua 1:8.