Kunyina muntu uuzyi bwini mbwaakali kulibonya Jesu nkaambo kunyina naakafwotolwa cifwoto naa kuzekaulwa muzintu zimwi. Nokuba boobo, wali kutondezyegwa muzintu zyabasikuzekaula banji kuzwa kaindi kusikila sunu.

Mubwini, basikuzekaula aabo tiibakazyi bwini mbwaakali kulibonya Jesu. Zilengwa, zintu nzyobakali kusyoma mubukombi alimwi anzyobakali kulombozya bantu, kanji-kanji nzezyakali kupa kuti basikuzekaula kabatondezya Jesu munzila imwi. Aboobo mbobakali kumuzekaula Jesu, cakali kukonzya kunyonganya bantu kujatikizya mbobakali kumubona alimwi anjiisyo zyakwe.

Basikuzekaula bamwi bakali kutondezya Jesu kuba muntu uukokede uunyina nguzu, uujisi masusu malamfwu amalezu masyoonto naa uuboneka kuusa kapati. Muzintu zyakuzekaula zimwi, Jesu utondezyedwe kuba mungelo noliba leelyo naakali anyika, uuzingulukidwe amumuni naa uutabikkili maano kubantu. Sena zyakuzekaula izili boobu zitondezya bwini mbwaakali kulibonya Jesu? Ino inga twazyiba buti? Nzila imwi, nkwiinda mukulanga-langa twaambo twamu Bbaibbele tukonzya kutugwasya kuzyiba mbwaakali kulibonya. Alimwi kucita boobo inga kwatugwasya kumubona munzila yeelede.

Kuboneka kuti, majwi aaya Jesu wakaamba mumupailo ciindi naakali kubbapatizyigwa. (Bahebrayo 10:5; Matayo 3:13-17) Ino mubili ooyo wakali kulibonya buti? Myaka iibalilwa ku 30 musyule, mungelo Gabriyeli wakaambilide Mariya kuti: “Uyoomita akuzyala mwana musankwa, . . . Mwana wa Leza.” (Luka 1:31, 35) Aboobo, Jesu wakali muntu uulondokede mbubwenya mbwaakabede Adamu ciindi naakalengwa. (Luka 3:38; 1 Bakorinto 15:45) Kweelede kuti Jesu wakali mwaalumi uulibonya kabotu, alimwi ambweni wakali kukozyanya abanyina, ba Mariya balo ibakali ba Juda.

Jesu wakalijisi malezu nkaambo eeci cakali cilengwa caba Juda mukwiimpana abana Roma. Malezu aaya cakali citondezyo cabulemu; tanaakali malamfwu kapati alimwi wakali kwaabamba kabotu. Cakutadooneka, Jesu wakali kwaagela malezu alimwi wakali kwaabamba kabotu masusu aakwe. Balikke aabo ibakasalidwe kuba ba Naziri, mbuli Samusoni mbobatakali kugela masusu aabo.—Myeelwe 6:5; Babetesi 13:5.

Kwamyaka iili mbwiibede, mumyaka iili 30, Jesu wakali sikubeza mapulanga, wakali kubeleka kakunyina zibelesyo zibelesyegwa mazuba aano. (Marko 6:3) Aboobo kweelede kuti wakalizyandamene. Kumatalikilo aamulimo wakwe, kakunyina uumugwasya “wakabatanda boonse aabo bakajisi mbelele aŋombe mutempele, alimwi wakawuumuna makkobili aabasikucinca mali akutingamuna matebulu aabo.” (Johane 2:14-17) Muntu uuzyandamene alimwi singuzu nguukonzya kucita cintu cili boobu. Jesu wakabelesya mubili Leza ngwaakamubambila kuti azuzikizye mulimo ngwaakapegwa kuli Leza naakati: “Akwalo kuminzi iimbi ndileelede kwaambilizya makani mabotu aa Bwami bwa Leza, nkaambo eeci ncindakatuminwa.” (Luka 4:43) Kwakali kuyandika nguzu kutegwa acikonzye kweenda amaulu mu Palesitaini yoonse alimwi akwaambilizya mulumbe ooyu.

Kusangalizya kwa Jesu alimwi ambwaakali kulibonya kumeso kwakapa kuti kutamba ooku kakukwelelezya  kuli baabo ‘ibakakatede akulemenwa.’ (Matayo 11:28-30) Kusangalizya kwakwe alimwi aluzyalo lwakapa kuti abasyomezye kuti balakatalusyigwa aabo ibakalyaabide kwiiya kulinguwe. Nobaba bana basyoonto bakali kuyanda kuba munsi-munsi a Jesu, nkaambo Bbaibbele lyaamba kuti: “Wakababweza bana akubafwukatila.”—Marko 10:13-16.

Nokuba kuti Jesu wakapenga katanafwa, tanaakali muntu iwakali kulibonya kuusa. Mucikozyanyo, wakagwasya kupobwe lyabwiinga ku Kana kwiinda mukusandula maanzi kuba waini mubotu. (Johane 2:1-11) Zimwi ziindi wakali kuyiisya ziiyo zitalubiki.—Matayo 9:9-13; Johane 12:1-8.

Kwiinda zyoonse, kukambauka kwa Jesu kwakapa bantu boonse ibakali kuswiilila kuba abulangizi bubotu bwabuumi butamani. (Johane 11:25, 26; 17:3) Ciindi basikwiiya bakwe bali 70 nobakapa lipooti yakukambauka, wakaamba kuti: “Amukkomane akaambo kakuti mazina aanu alembwa kujulu,” alimwi “wakakondwa kapati.”—Luka 10:20, 21.

Basololi bazikombelo bamumazuba aa Jesu bakali kusinikizya bantu kuti kababaswiilila alimwi akulitondezya kuti balaanguzu. (Myeelwe 15:38-40; Matayo 23:5-7) Mukwiimpana ambabo, Jesu wakalailila basikwiiya bakwe kuti tabeelede ‘kubadyaaminina’ bamwi. (Luka 22:25, 26) Mane buya, Jesu wakacenjezya kuti: “Amubacenjelele balembi ibayandisya kweendeenda kabasamide zisani zilamfwu alimwi bayanda kwaanzyigwa cabulemu kumisika.”—Marko 12:38.

Mukwiimpana, Jesu wakali kusangana munkamu yabantu, zimwi ziindi kakunyina akuzyibwa. (Johane 7:10, 11) Noliba leelyo naakali akati kabaapostolo bakwe bali 11, tanaakaindene ambabo. Sikumwaaba Judasi wakamumyonta kacili “citondezyo ncobakamvwana,”cakuzyibya Jesu kunkamu yabantu.—Marko 14:44, 45.

Aboobo nokuba kuti makani manji taazyibidwe, cilalibonya caantangalala kuti Jesu tanaakali kulibonya mbuli mbobamuyeeyela bamwi kuti mbwaakabede. Cintu ciyandika kapati, takuli mbwaakali kulibonya pe, pele mbotumuzyi lino.

Nokwakainda mawoola aali mbwaabede kuzwa naakaamba majwi aayo, Jesu wakafwa alimwi akuzikkwa. (Johane 14:19) Wakapa buumi bwakwe kuti “bube cinunuzyo cakununuzya banji.” (Matayo 20:28) Mubuzuba bwatatu, Leza wakamubusya “amubili wamuuya” alimwi “akumupa kuti alibonye” kuli basikwiiya bakwe bamwi. (1 Petro 3:18; Milimo 10:40) Ino Jesu wakali kulibonya buti ciindi naakaunka kuli basikwiiya bakwe? Kwakaba kwiindana kweelana ambwaakali kulibonya kumatalikilo, nkaambo nobaba basikwiiya bakwe tiibakamuzyiba mpoonya-mpoonya. Mariya Magadalene wakamuyeeyela kuti ngusikubeleka mumuunda; mpoonya basikwiiya bobilo ibakali kweenda mumugwagwa uuya ku Emau, bakamuyeeyela kuti ngusimweendanzila.—Luka 24:13-18; Johane 20:1, 14, 15.

Mbuti mbotweelede kumuyeeyela Jesu mazuba aano? Kakwiindide myaka iili 60 Jesu kafwide, mwaapostolo uuyandwa Johane wakabona cilengaano ca Jesu. Johane tanaakabona muntu uufwide aciingano. Muciindi caboobo, wakabona “Mwami wabami alimwi Simalelo wabasimalelo,” Mwami wa Bwami bwa Leza, walo lino-lino uuyoozunda basinkondonyina Leza, nkokuti madaimona alimwi abantu, mpoonya uyooleta zilongezyo kubantu kukabe kutamani.—Ciyubunuzyo 19:16; 21:3, 4.