1. Ino Jehova ulimvwa buti ciindi imwi yambelele zyakwe noitalika kumubelekela alimwi?

MBUBWENYA mbotwakaiya mucibalo cainda, Jehova ulyeezyanisya kumweembezi uubikkila maano kapati kumbelele yakwe imwi aimwi. Kuyungizya waawo, Jehova ulaiyandaula mbelele yakwe iili yoonse iileya. Jehova wakaambila bana Israyeli ibakamusiya kuti: “Amujokele kulindime, eelyo andime ndilaboola kulindinywe.” Tulizyi kuti mbwalimvwa oobo amazuba aano nkaambo wakaamba kuti: “Tandicinci pe.” (Malk. 3:6, 7) Jesu wakaamba kuti Jehova alimwi abangelo balakkomana kapati ciindi naba omwe wababelesi bakwe iwakaleya najokela kuli Jehova.—Lk. 15:10, 32.

2. Ino ncinzi ncotutiilange-lange mucibalo eeci?

² Atulange-lange zikozyanyo zya Jesu zyotatwe izijatikizya mbotukonzya kubagwasya aabo ibakaleya kuli Jehova. Tulabandika bube mbotweelede kuba ambubo kutegwa tugwasye mbelele iisweekede ikujokela kulinguwe. Alimwi tulabandika kujatikizya lukkomano ndotukonzya kujana ikuti twabeleka canguzu kugwasya baabo ibatacisungweede kujokela kuli Jehova.

3-4. Kweelana alugwalo lwa Luka 15:8-10, nkaambo nzi mukaintu ncaakaiyandaula cakubikkila maano kkobili yakwe iyakasweekede?

³ Tweelede kubeleka canguzu kutegwa tubajane aabo ibayanda kujokela kuli Jehova. Mucikozyanyo cilembedwe mu Makani Mabotu aa Luka, Jesu wakapandulula mukaintu mbwaakayandaula cintu cimwi ciyandisi icakasweekede, nkokuti kkobili yansiliva. Cibeela ciyandika kapati mucikozyanyo eeci cijatikizya mukaintu mbwaakabeleka canguzu kutegwa aijane kkobili iyakasweekede.—Amubale Luka 15:8-10.

⁴ Jesu wakapandulula mbwaakalimvwa mukaintu iwakajana kkobili yansiliva iyakasweekede. Ciindi Jesu naakali anyika, kulibonya kuti bamakaintu bamwi iba Juda bakali kupa mwanaabo musimbi makkobili aansiliva aali 10 mubuzuba bwabwiinga bwakwe.  Ambweni kkobili eeyo yansiliva iyakasweekede yakali cibeela camakkobili aaya. Mukaintu ooyu wakayeeya kuti kkobbili yansiliva eeyo yakalokela ansi. Aboobo wakayasya lambe akuyandaula koonse-koonse. Mafwuta aakali mulambe tanaakali kukonzya kumunika kapati cakuti ulakonzya kwiibona kkobili yansiliva eeyo nsyoonto. Kumamanino, wakakukula cakubikkila maano muŋanda yoonse. Mulusuko ndwaakakukula, kwakali kkobili liyandisi, ilyakali kumweka akaambo kamumuni walambe lyakwe. Eelo kaka mukaintu ooyu wakalimvwa kabotu kapati naakalijana kkobili eeli! Mpoonya wakaita beenzinyina abasimukobonyina kutegwa basekelele antoomwe kumakani mabotu aaya.

5. Nkaambo nzi ncokuyandika kubeleka canguzu kuyandaula baabo ibatacisungweede?

⁵ Mbubwenya mbotwabona mucikozyanyo ca Jesu, kuyandika kubeleka canguzu kutegwa tucijane cintu cakasweeka. Munzila iikozyenye, kuyandika kubeleka canguzu kutegwa tubajane aabo ibakaleka kuyanzana ambungano. Kulakonzya kwiinda myaka minji kuzwa ciindi nobakaleka kuyanzana andiswe. Balakonzya kuti bakalongela kubusena bakwesu nkobatabazyi. Pele aciindi eeci, tacidoonekwi buya kuti aaba ibatacisungweede balayandisisya kupiluka kuli Jehova. Bayanda kubelekela Jehova antoomwe abakwesu alimwi abacizyi, pele inga tiibacikonzya kucita boobo kakunyina kubagwasya.

6. Mbuti boonse mumbungano mbobakonzya kutola lubazu mukuyandaula baabo ibatacisungweede?

⁶ Ino mbaani ibeelede kutola lubazu mukuyandaula baabo batacisungweede? Toonse tuleelede, nkokuti baalu, bapainiya, banamukwasyi alimwi abasikumwaya mumbungano balakonzya kugwasya kujana baabo ibatacisungweede. Sena mulijisi mulongwe naa munamukwasyi uutacisungweede? Sena mwakaswaanganya kale muntu uutacisungweede mubukambausi bwakuŋanda aŋanda naa mubukambausi bwakubuleya? Amumupandulwide muntu ooyo kuti, ikuti kayanda kuswaigwa inga mwabapa baalu namba yakwe yafooni naa adilesi ya e-mail.

7. Ncinzi ncomwaiya kumajwi aamwaalu uutegwa Thomas?

⁷ Ino ninzila nzi zigwasya baalu kubagama nzyobakonzya kutobela kutegwa babajane aabo ibayanda kujokela kuli Jehova? Amubone ncaakaamba mwaalu uutegwa Thomas, * uukkala kucisi ca Spain. Wagwasya Bakamboni bainda ku 40 kuti bajokele kumbungano. Mukwesu ooyu wakati: “Cakusaanguna, ndilababuzya bakwesu abacizyi baindene-indene ibazyi nkobakkala bantu aabo lino. Naa kubuzya basikumwaya ikuti naa kuli ngobayeeyede iwakacileka kujanika kumiswaangano. Ibanji mumbungano balakkomana kugwasya nkaambo balimvwa kuti abalo balijatikizyidwe mukuyandaula ooku. Mpoonya ndabaswaya bakwesu naa bacizyi ibatacisungweede, ndilababuzya kujatikizya bana babo alimwi abanamukwasyi bambi. Bamwi bakali kubaletelezya bana babo kumiswaangano alimwi bana aaba ambweni bakali basikumwaya aciindi cimwi. Abalo balakonzya kugwasyigwa kuti bajokele kuli Jehova.”

8. Mucikozyanyo camwana mutaka icili kulugwalo lwa Luka 15:17-24, mbuti bausyi mbobakamweendelezya mwanaabo iwakeempwa?

⁸ Mbube nzi mbotweelede kuba ambubo kutegwa tubagwasye aabo ibayanda kujokela kuli Jehova? Amubone ncotukonzya kwiiya kucikozyanyo ca Jesu camwana mutaka iwakazwide aŋanda. (Amubale Luka 15:17-24.) Jesu wakapandulula kujatikizya mbwaakaliyeeya mwana ooyu akusala kuti ajokele kuŋanda. Bausyi bakamubalikila mwanaabo akumukumbata munzila yaluyando cakuti wakabona kuti bakali kumuyanda kapati. Mwana wakakatazyigwa amanjezeezya alimwi wakalimvwa kuti taceeleli kwiitwa kuti mwanaabo. Bausyi bakeetezyegwa kapati kujatikizya mwanaabo iwakabaambila bwini mbwaakalimvwide. Mpoonya  bakabweza ntaamu zigwasya kusyomezya mwanaabo kuti watambulwa alimwi aŋanda, ikutali mbuli mubelesi, pele mbuli munamukwasyi uuyandwa. Kutondezya kuti bakali kumuyanda mwanaabo, bausyi bakapanga pobwe alimwi akumupa zisani zibotu mwanaabo iwakeempwa.

9. Mbube nzi mbotweelede kuba ambubo kutegwa tubagwasye aabo ibatacisungweede kupiluka kuli Jehova? (Amubone kabbokesi kakuti “Mbotukonzya Kubagwasya Aabo Ibayanda Kupiluka.”)

⁹ Jehova uli mbuli bausyi bamucikozyanyo camwana mutaka. Ulabayanda bakwesu abacizyi ibatacisungweede alimwi uyanda kuti bapiluke kulinguwe. Kwiinda mukwiiya Jehova, tulakonzya kubagwasya kutegwa bapiluke. Kutegwa tucite oobo, tweelede kutondezya lweetelelo, luzyalo, luyando alimwi akukkazika moyo. Mbuti mbotukonzya kubutondezya bube oobu bugaminide alimwi muunzila nzi motukonzya kucita boobo?

10. Nkaambo nzi ncotweelede kukkazika moyo kutegwa tugwasye muntu kupiluka kuli Jehova?

¹⁰ Tweelede kukkazika moyo akaambo kakuti citola ciindi kuti muntu apone kumuuya. Bunji bwabaabo ibatakasungweede bakaamba kuti bakapiluka kuli Jehova ciindi nobakaswaigwa cakwiinduluka-induluka abaalu alimwi abamwi mumbungano. Mucizyi Nancy uukkala ku Asia Kumusanza Lwaajwe wakaamba kuti: “Mulongwe mwini-mwini mumbungano wakandigwasya kapati. Wakali kundiyanda mbuli kuti ndili musyoonto wakwe. Wakandiyeezya ziindi zikkomanisya kapati nzyotwakali kuba antoomwe anguwe musyule. Wakali kundiswiilila cakukkazika moyo ciindi nondakali kumwaambila mbondilimvwa, alimwi tanaakawaya-waya kundigwasya. Wakatondezya kuti wakali mulongwe mwini-mwini, iwakalibambilide kugwasya ciindi cili coonse.”

11. Nkaambo nzi ncotuyandika kuba alweetelelo kutegwa tugwasye muntu uunyemende?

¹¹ Ciindi muntu naanyema, cilakonzya kucisa  mbuli cilonda. Aboobo lweetelelo luli mbuli musamu ulaanguzu uukonzya kuponya muntu. Bamwi ibatacisungweede bapenga kwamyaka minji akaambo kakuti umwi mumbungano wakabanyemya. Akaambo kaceeci, cabakatazya kupiluka kuli Jehova. Bamwi balakonzya kuyeeya kuti bakeendelezyegwa cakutalulama. Inga bayandika muntu uukonzya kubaswiilila alimwi akumvwisya bukkale bwabo. (Jak. 1:19) Ba María, ibatakasungweede aciindi cimwi bakaamba kuti, “Ndakali kuyanda muntu uukonzya kundiswiilila, kunduumbulizya alimwi akundipa lulayo lugwasya.”

12. Mbuti luyando lwa Jehova mboluli mbuli caanzyo?

¹² Bbaibbele lyaamba kuti luyando ndwajisi Jehova kubantu bakwe luli mbuli caanzyo naa ntambo. Muunzila nzi luyando lwa Leza mboluli mbuli caanzyo? Amubone cikozyanyo eeci: Amweezeezye kuti mwawida mulwizi imuli mayuwe manji alimwi maanzi alatontola. Mwatalika kunyikila. Mpoonya muntu umwi uuli mubwato ibulaafwafwi andinywe wamufwusila cintu cimwi kutegwa cimugwasye kwiibuka. Mwamulumba muntu ooyo, pele muciyandika lugwasyo lumbi kutegwa mufwutuke. Muyandika kuzwa mumaanzi. Aboobo kuyandika kuti bantu ibali mubwato bamufwusile ntambo akumukwelela mubwato. Mboobu Jehova mbwaakaamba kubana Israyeli ibakaleya: ‘Ndakaluujisi kubakwela azyaanzyo zyaluyando.’ (Hos. 11:4) Oobu mbwalimvwa Leza amazuba aano kujatikizya baabo ibakaleka kumubelekela alimwi ibanyikilide mumapenzi alimwi akulibilika. Uyanda kuti bazyibe kuti ulabayanda alimwi akuti uyanda kubakwelela kulinguwe. Jehova ulakonzya kubelesya ndinywe kugwasya bantu aaba kutegwa balubone luyando ndwajisi kulimbabo.

13. Amupe cikozyanyo icitondezya nguzu nzyolujisi luyando lwabunyina.

¹³ Cilayandika kapati kubaambila aabo ibatacisungweede kuti Jehova ulabayanda alimwi akuti  andiswe tulabayanda. Ba Pablo ibakaambwa mucibalo cainda, tiibakasungweede kwamyaka iinda ku 30. Bakaamba kuti: “Bumwi buzuba mafwumofwumo, nondakali kuunka kubusena bumwi, ndakajana mucizyi uucembeede siluzyalo walo iwakabandika andime munzila yaluyando. Mpoonya ndakatalika kulila mbuli mwana. Ndakaambila mucizyi ooyu kuti kweelede kuti Jehova ngowakamutuma kuti abandike andime. Aciindi aawa ndakasala kuti ndipilukile kuli Jehova.”

14. Kweelana acikozyanyo icili kulugwalo lwa Luka 15:4, 5, ncinzi mweembezi ncaakacita mbwakaijanina buyo mbelele yakasweekede?

¹⁴ Tatweelede kuleka kubagwasyilizya aabo ibatacisungweede. Mbubwenya mbuli cikozyanyo ca Jesu camwana mutaka, cilakonzya kutola ciindi cilamfwu kuti bantu aaba bapilukile kuli Jehova. Alimwi ambweni inga kabatali bayumu kumuuya akaambo kakuti bakali kuyanzana anyika ya Saatani. Tweelede kubagwasya kuyumya lusyomo lwabo muli Jehova. Mucikozyanyo cambelele iyakasweekede, Jesu wakatondezya mweembezi mbwaakabikka mbelele agwezyo akwiipilusya kubutanga. Mweembezi wakalibelekede kale canguzu kuyandaula mbelele eeyo. Pele wakabona kuti wakeelede kwiinyamuna akwiipilusya kubutanga nkaambo tiiyakajisi nguzu zyakweenda.—Amubale Luka 15:4, 5.

15. Mbuti mbotukonzya kubagwasya aabo ibatajisi nguzu ibayanda kupiluka kuli Jehova? (Amubone kabbokesi kakuti “ Cibelesyo Cigwasya Kapati.”)

¹⁵ Tuyandika kubelesya ciindi alimwi anguzu kutegwa tubagwasye aabo ibatacisungweede kuzunda mapenzi aabanyonganya kuti batalike alimwi kubelekela Jehova. Alimwi kwiinda mulugwasyo lwamuuya wa Jehova, Ijwi lyakwe alimwi amabbuku ngotutambula kuzwa kumbunga, tulakonzya kubagwasya kuyuma alimwi kumuuya.  (Rom. 15:1) Mbuti mbotukonzya kucita oobo? Mwaalu umwi iwabeleka kwaciindi cilamfwu wakaamba kuti, “Batacisungweede banji bayandika ciiyo ca Bbaibbele ciindi nobasala kupiluka kuli Jehova.” * Aboobo ikuti mwalombwa kuyiisya muntu uutacisungweede, mweelede kucibona kuba coolwe cipati. Alimwi wakayungizya kuti basikumwaya ibasololela ciiyo beelede kuti kabali balongwe babotu, aabo muntu uutacisungweede mbakonzya kwaambila makani aamaseseke.”

16. Ino tuzyi buti kuti bangelo balatugwasyilizya kujana baabo ibatacisungweede?

¹⁶ Kuli zyakuluula zinji izitondezya kuti bangelo balatugwasyilizya kujana baabo ibatacisungweede ibayanda kupiluka kuli Jehova. (Ciy. 14:6) Mucikozyanyo, ba Silvio, ibakkala ku Ecuador, bakapaila kuli Jehova kutegwa abagwasye kupiluka kumbungano. Nobakacili kupaila, bakamvwa bantu ibakali kukonkomona. Baalu bobilo bakali amulyango wabo. Baalu aaba bakabapa lugwasyo ndobakali kuyandika.

17. Ino inga twalimvwa buti ikuti twabagwasya bantu batacisungweede kupiluka kuli Jehova?

¹⁷ Tuyoojana lukkomano lunji kwiinda mukugwasyilizya baabo ibatacisungweede kupiluka kuli Jehova. Ba Salvador, bapainiya ibasolekesya kubeleka canguzu kugwasya baabo ibatacisungweede bakaamba kuti: “Zimwi ziindi, ndilalila akaambo kalukkomano. Cilandikkomanisya kapati kubona kuti Jehova wavwuna mbelele yakwe imwi njayanda kapati kuzwa munyika ya Saatani alimwi akuti andime ndakaba acoolwe cakubelekela antoomwe anguwe mumulimo ooyu.”—Mil. 20:35.

18. Ikuti naa mwakacileka kuyanzana abantu ba Jehova, ndusyomo nzi ndomweelede kuba andulo?

¹⁸ Ikuti naa mwakacileka kuyanzana abantu ba Jehova, amusyome kuti Jehova ucimuyanda. Uyanda kuti mupiluke kulinguwe. Mweelede kubeleka canguzu kutegwa mupiluke kulinguwe. Pele mbubwenya mbuli usyi wamucikozyanyo ca Jesu, Jehova ulangila kuti mupiluke kulinguwe, alimwi uyoomutambula calukkomano.