1. Ino kuyoowa Leza caamba nzi, alimwi nkaambo nzi eeci ncociyandika kuli baabo ibamuyanda Jehova?

BANAKRISTO balamuyanda Leza alimwi akumuyoowa. Mucibalo eeci tulabandika kujatikizya mbociyandika kuyoowa Leza. Pele ino kuyoowa Leza caamba nzi? Bantu ibamuyoowa Leza balamulemeka kuzwa ansi aamoyo. Tabayandi kumunyemya Usyi wakujulu akaambo kakuti kucita boobo inga kwanyonganya cilongwe ncobajisi anguwe.—Int. 111:10; Tus. 8:13.

2. Kweelana amajwi aa Mwami Davida aalembedwe kulugwalo lwa Intembauzyo 86:11, ino ntwaambo nzi tobilo ntotutiibandike?

² Amubale Intembauzyo 86:11. Ciindi nomwaayeeya cakuzinzibala majwi aaya, mulakonzya kubona kuti Mwami Davida uusyomeka wakalizyi mbociyandika kumulemeka kapati Jehova. Lino atulange-lange mbotukonzya kwaatobela majwi aa Davida aakasololelwa amuuya. Cakusaanguna, tulalanga-langa twaambo tumwi ncotweelede kulilemeka kapati zina lya Leza. Cabili, tulabandika mbotukonzya kutondezya kuti tulalilemeka zina lya Leza mubuumi bwesu bwabuzuba abuzuba.

3. Ncinzi icakamugwasya Musa kuzumanana kulemeka zina lya Leza?

³ Amuyeeye kujatikizya mbwaakalimvwa Musa ciindi naakapatide mulwaanzi lwamwala alimwi akubona cilengaano cabulemu bwa Jehova icakainda kumbele lyakwe. “Kulangilwa kuti eeci cakali cintu cigambya kapati icatakacitikilide muntu uuli woonse Jesu katanaboola anyika!” Musa wakaamvwa majwi aaya aakaambwa  amungelo aakuti: “Jehova, Jehova, Leza siluse alimwi silweetelelo, uutafwambaani kukalala alimwi uuzwide luyando lutamani akasimpe, uutondezya luyando lutamani kubantu bali zyuulu, uulekelela milandu, nsotoko alimwi azibi.” (Kul. 33:17-23; 34:5-7) Kulangilwa kuti Musa wakali kwaayeeya makani aaya ciindi naakali kubelesya zina lya Jehova. Nkakaambo kaako wakacenjezya bantu ba Leza bana Israyeli ‘kuyoowa zina eeli lilemekwa alimwi liyoosya.’—Dt. 28:58.

4. Ino nkuzinzibala kuyeeya bube nzi ikukonzya kutukulwaizya kuzumanana kumulemeka Jehova?

⁴ Ciindi notubelesya zina lya Jehova, tweelede kuzinzibala kuyeeya kujatikizya ooyo uujisi zina eeli. Tweelede kuyeeya bube bwakwe, mbuli nguzu, busongo, bululami alimwi aluyando. Kuzinzibala kuyeeya bube oobu alimwi abube bumbi mbwajisi, kulakonzya kutukulwaizya kuzumanana kumulemeka.—Int. 77:11-15.

5-6. (a) Ino zina lya Leza lyaamba nzi? (b) Kweelana alugwalo lwa Kulonga 3:13, 14 alimwi a Isaya 64:8, muunzila nzi Jehova mwapa kuti zintu zicitike?

⁵ Ino ncinzi ncotuzyi kujatikizya ncolyaamba zina lya Leza? Basyaazibwene banji balazumina kuti zina lya Jehova kulangilwa kuti lyaamba kuti “Upa Kuti Kube.” Eeci cituyeezya kuti kunyina icikonzya kumulesya Jehova kucita cintu ncayanda kucita, alimwi ulakonzya kupa zintu kucitika. Munzila nzi?

⁶ Jehova ulapa kuti zintu zicitike kwiinda mukuba kufwumbwa mbwayanda kutegwa azuzikizye makanze aakwe. (Amubale Kulonga 3:13, 14.) Mumabbuku eesu, kanji-kanji tulayeezyegwa kujatikizya makani aaya aagambya. Jehova alimwi ulakonzya kupa bantu batalondokede kuba kufwumbwa mbwayanda kutegwa bamubelekele akuzuzikizya makanze aakwe. (Amubale Isaya 64:8.) Kwiinda mukucita boobo, Jehova upa kuti kuyanda kwakwe kucitwe. Kunyina cikonzya kumulesya kuzuzikizya makanze aakwe.—Is. 46:10, 11.

7. Ncinzi ncotweelede kucita kutegwa tumulumbe kapati Taateesu wakujulu?

⁷ Tulakonzya kumulumba kapati Taateesu wakujulu kwiinda mukuzinzibala kuyeeya zintu nzyacita alimwi azintu nzyatugwasya  kuti katucita. Mucikozyanyo, ciindi notuyeeya kujatikizya zintu zyoonse nzyaakalenga, cilatugambya kapati twalanga zintu nzyaakacita. (Int. 8:3, 4) Alimwi ciindi notuzinzibala kuyeeya Jehova mbwaatupa kuba kufwumbwa mbwayanda kutegwa tucite kuyanda kwakwe, citupa kumulemeka kapati. Masimpe zina lya Jehova lilayoosya! Lyaamba mbwabede Taateesu, zintu zyoonse nzyaakacita alimwi anzyayoocita kumbele.—Int. 89:7, 8.

8. Kweelana alugwalo lwa Deuteronomo 32:2, 3, ncinzi Jehova ncayanda kuti babelesi bakwe bacite kujatikizya zina lyakwe?

⁸ Kakusyeede aasyoonto kuti bana Israyeli banjile mu Nyika Yakasyomezyedwe, Jehova wakayiisya Musa lwiimbo. (Dt. 31:19) Awalo Musa wakeelede kuyiisya bantu lwiimbo oolu. (Amubale Deuteronomo 32:2, 3.) Ciindi notuzinzibala kuyeeya kapango 2 alimwi a 3, cilasalala kuti Jehova tayandi kuti zina lyakwe lisiswe alimwi akulibona kuti lilisetekene kapati cakuti talyeelede kwaambwa. Uyanda kuti zina lyakwe lizyibwe kubantu boonse! Eelo kaka cakali coolwe cilibedelede kubantu kumvwa Musa kabayiisya kujatikizya Jehova alimwi azina lyakwe lilemekwa! Zintu nzyaakabayiisya Musa zyakabayumya alimwi akubakatalusya, mbubwenya mbuli lusuunsu luwida azisyango. Mbuti mbotukonzya kuba masimpe kuti kuyiisya kwesu kulikozyenye akwa Musa?

9. Mbuti mbotukonzya kugwasyilizya mukusalazya zina lya Jehova?

⁹ Ciindi notuli mubukambausi bwakuŋanda aŋanda naa bwakubuleya, tulakonzya kubelesya Bbaibbele kutondezya bantu zina lya Leza lyakuti, Jehova. Tulakonzya kubatondezya mabbuku mabotu, mavidiyo mabotu alimwi azimwi buyo izili awebbusaiti yesu izilemeka Jehova. Ciindi notuli kumulimo, kucikolo naa mulweendo, tulakonzya kuba azyoolwe zyakubandika abamwi kujatikizya Leza wesu alimwi ambwabede. Tulakonzya kubaambila kujatikizya zintu zibotu nzyayootucitila Jehova anyika. Aboobo ciindi nobazimvwa zintu eezyo bayoobona mbwatuyanda Jehova. Ciindi notwaambila bantu kasimpe kajatikizya Taateesu siluyando, tulagwasyilizya mukusalazya zina lya Jehova. Tulabagwasya bantu kuzyiba kuti bunji bwazintu nzyobakayiisyigwa kujatikizya Jehova nzyakubeja. Nzyotuyiisya bantu kuzwa mu Bbaibbele zilakatalusya kapati.—Is. 65:13, 14.

10. Nkaambo nzi ncocitazulide kwiile kubayiisya buyo milawo ya Leza basikwiiya Bbaibbele?

¹⁰ Ciindi notusololela ziiyo zya Bbaibbele, tuyanda kugwasya basikwiiya kulizyiba zina lya Jehova alimwi akulibelesya. Kuyungizya waawo, tuyanda kubagwasya kuzyiba ncolyaamba zina eeli. Sena inga twacita oobo kwiinda mukwiile kubayiisya buyo malailile, zyeelelo zyakwe alimwi amilawo yabukkale? Sikwiiya mubotu ulakonzya kwiiya milawo ya Leza alimwi akwiikkomanina. Pele sena sikwiiya ooyo uyoomumvwida Jehova akaambo kakuti ulamuyanda? Amuyeeye kuti Eva wakaluuzyi mulawo wa Leza, pele kunyina naakali kumuyanda ncobeni Sikupa Milawo; ncimwi buyo awalo Adamu. (Matl. 3:1-6) Aboobo tweelede kubayiisya zintu zinji bantu kunze buyo lyakubayiisya zyeelelo zya Leza ziluleme.

11. Ciindi notuyiisya milawo ya Leza alimwi azyeelelo zyakwe, mbuti mbotukonzya kubagwasya basikwiiya besu kumuyanda Sikupa Milawo?

¹¹ Zyeelelo zya Jehova lyoonse zilatugwasya. (Int. 119:97, 111, 112) Pele basikwiiya tabakonzyi kuzibona munzila eeyo zintu ikuti naa kabatamvwisyi kuti Jehova wakatupa milawo eeyo akaambo kakuti ulatuyanda. Aboobo tulakonzya kubabuzya basikwiiya besu kuti: “Ino muyeeya kuti nkaambo nzi Leza ncalailila babelesi bakwe kucita naa kutacita cintu eeci? Ino eeci cituyiisya nzi kujatikizya nguwe?”  Ikuti naa twabagwasya basikwiiya besu kuyeeya kujatikizya Jehova alimwi akuliyanda ncobeni zina lyakwe lilemekwa, cakutadooneka tulakonzya kubasika amoyo amulumbe wesu. Basikwiiya besu bayakwiiyanda milawo alimwi a Sikupa Milawo. (Int. 119:68) Bayoozumanana kuba alusyomo alimwi ciyoobagwasya kuliyumya mumasunko aakatazya kumbele.—1Kor. 3:12-15.

12. Mbuti Davida aciindi cimwi mbwaakaba amyoyo yobilo, alimwi ino ncinzi cakacitika?

¹² Majwi ngaakalemba Mwami Davida kulugwalo lwa Intembauzyo 86:11 aakuti “Kondipa kuba amoyo omwe,” aalo alayandika kapati. Mubuumi bwakwe, Davida wakabona mbocili cuuba-uba kuba amyoyo yobilo. Aciindi cimwi, wakali aaciluli caŋanda mpoonya wakabona mukaintu wamwaalumi umwi kasamba. Aciindi eeco, sena Davida wakajisi moyo omwe naa myoyo yobilo? Wakalicizyi ceelelo ca Jehova cakuti: “Utanyonokeli mukaintu wamweenzinyoko.” (Kul. 20:17) Nokuba boobo, walo wakazumanana kumulanga mukaintu. Aboobo wakaba amyoyo yobilo, nkokuti kuyanda Bati-seba alimwi akuyanda kukkomanisya Jehova. Nokuba kuti kuzwa kaindi Davida wakali kumuyanda alimwi akumuyoowa Jehova, wakazundwa akulombozya kwakwe kubyaabi. Akaambo kaceeco, Davida wakacita zintu zibyaabi. Wakaleta masampu kuzina lya Jehova. Alimwi Davida wakaleta mapenzi aatambiki kubantu bakanyina mulandu, kubikkilizya abamukwasyi wakwe.—2Sam. 11:1-5, 14-17; 12:7-12.

13. Ino tuzyi buti kuti Davida wakaba amoyo omwe alimwi?

¹³ Jehova wakamululamika Davida, mpoonya Davida wakaba acilongwe anguwe alimwi. (2Sam. 12:13; Int. 51:2-4, 17) Davida wakaayeeya mapenzi alimwi amasampu akaboola akaambo kakuba amyoyo yobilo. Majwi aakwe aalembedwe kulugwalo lwa Intembauzyo 86:11 alimwi alakonzya kwaamba kuti: “Kondigwasya kutegwa nditabi amyoyo yobilo.” Sena Jehova wakamugwasya Davida kuba aamoyo omwe, naa kutaba aamyoyo yobilo? Inzya, mane buya Ijwi lya Jehova kumbele lyakaamba Davida kuti mwaalumi iwakajisi ‘moyo uumaninide kuli Jehova Leza wakwe.’—1Bam. 11:4; 15:3.

14. Mubuzyo nzi ngotweelede kulibuzya alimwi nkaambo nzi?

¹⁴ Cikozyanyo ca Davida cilakulwaizya alimwi cilatucenjezya. Cibi cipati ncaakacita nincenjezyo kubabelesi ba Leza mazuba aano. Kufwumbwa naa twakatalika caino-ino kubelekela Jehova naa twamubelekela kwamyaka minji, tweelede kulibuzya kuti, ‘Sena ndilasolekesya kutalekela Saatani kundipa kuba aamyoyo yobilo?’

15. Mbuti kuyoowa Leza mbokutukwabilila ciindi notwabona zintu ziletela muzeezo wakoonana?

 ¹⁵ Mucikozyanyo, ikuti mwabona cifwoto icikonzya kuletela muzeezo wakoonana a TV naa a Intaneti, ino mucita buti? Ncuubauba kuyeeya kuti cifwoto eeci naa filimu eeyi taileteli muzeezo wakoonana. Pele sena ncibelesyo ncabelesya Saatani kumupa kuba aamyoyo yobilo? (2Kor. 2:11) Cifwoto eeco cilakonzya kukozyanisyigwa kucisamu cipati ncagonka muntu. Agonka ciindi cakusaanguna keembe kayasa buyo aasyoonto. Mpoonya mbwayaabugonkela, cisamu cilakosoka. Zifwoto zilakonzya kutunyonganya mbubwenya mbuli keembe mbokakonzya kukosola cisamu cipati. Zintu eezyi izilibonya mbuli kuti tazikonzyi kutunyonganya zilakonzya kupa muntu kuba amyoyo yobilo calo icikonzya kumusololela kukucita cibi alimwi akupa kuti aleke kusyomeka. Aboobo amucikasye cintu cili coonse icitali kabotu kunjila mumoyo wanu! Amuzumanane kuba aamoyo omwe kutegwa kamuyoowa zina lya Jehova!

16. Ciindi notwasunkwa, mibuzyo nzi njotweelede kulibuzya?

¹⁶ Kunze buyo lyakubelesya zifwoto iziletela muzeezo wakoonana, Saatani ulatusunka kwiinda mukubelesya zintu zinji kutegwa tucite cibi. Ino tucita buti? Ncuubauba kuyeeya kuti zintu eezyi kunyina mbozikonzya kundicita. Mucikozyanyo, tulakonzya kuyeeya kuti: ‘Tandikonzyi kugusyigwa mumbungano akaambo kakucita oobo, aaya taali makani mapati boobo.’ Kuyeeya kuli boobu kulilubide kapati. Inga twacita kabotu kulibuzya mibuzyo mbuli bwayeeyi: ‘Sena Saatani ubelesya sunko eeli kusola kundipa kuba aamyoyo yobilo? Ikuti naa ndazundwa akulombozya kubyaabi, sena inga ndaleta masampu kuzina lya Jehova? Sena kucita cintu eeci inga kwandipa kuswena afwaafwi a Leza wangu naa inga kwandipa kuba kulamfwu anguwe?’ Amuzinzibale kuyeeya  kujatikizya mibuzyo eeyi. Amupailile busongo kutegwa mibuzyo eeyi muyiingule cakusyomeka alimwi kakunyina kulyeena. (Jak. 1:5) Kucita boobo kulakonzya kumukwabilila kapati. Kulakonzya kumugwasya kukaka sunko cabusicamba mbubwenya mbwaakacita Jesu naakaamba kuti: “Kozwa aawa Saatani!”—Mt. 4:10.

17. Nkaambo nzi kuba amyoyo yobilo ncokutagwasyi? Amupe cikozyanyo.

¹⁷ Kuba amyoyo yobilo takugwasyi pe. Amweezeezye kuti mutiimu yabasizisobano bamwi tabamvwani. Bamwi bayanda buyo kuba ampuwo, bamwi tabayandi kusobana kweelana amalailile aacisobano alimwi bamwi tabamulemeki naaceya kkoocci. Tiimu iili boobo tayikonzyi kuzwidilila mumuzundano. Mukwiimpana, tiimu iibelekela antoomwe ilakonzya kuzwidilila. Moyo wanu ulakonzya kuba mbuli tiimu eeyo iikonzya kuzwidilila ikuti nzyomuyeeya, nzyomuyanda alimwi ambomulimvwa zileendelana ciindi nomumubelekela Jehova. Mutalubi kuti Saatani uyanda kuti mube amyoyo yobilo. Uyanda kuti mizeezo yanu, nzyomuyanda alimwi ambomulimvwa kaziteendelani azyeelelo zya Jehova. Pele nywebo muyanda kuti mumubelekele Jehova amoyo omwe. (Mt. 22:36-38) Mutamuzumizyi Saatani kumupa kuba amyoyo yobilo!

18. Kweelana alugwalo lwa Mika 4:5, ino mukanzide kucita nzi?

¹⁸ Kamupaila kuli Jehova mbubwenya mbwaakacita Davida naakati: “Kondipa kuba amoyo omwe kutegwa kandiyoowa zina lyako.” Mpoonya amucite kufwumbwa ncomukonzya kutegwa kamupona kweelana amupailo wanu. Buzuba abuzuba, amube amakanze aakuti zintu nzyomusala, zisyoonto naa zipati, mulatondezya kuti mulalilemeka kapati zina lya Jehova lisalala. Kwiinda mukucita boobo, mbomuli Bakamboni ba Jehova, muyoopa kuti zina eeli lilemekwe. (Tus. 27:11) Alimwi toonse tuyoocikonzya kwaamba mbubwenya mbwaakaamba musinsimi Mika naakati: “Swebo tunakweenda muzina lya Jehova Leza wesu lyoonse alyoonse mane kukabe kutamani.”—Mik. 4:5.