CIBALO CAKWIIYA 25
“Mebo Lwangu Ndiyooziyandaula Mbelele Zyangu”
“Mebo lwangu ndiyooziyandaula mbelele zyangu akuzilanganya.”—EZK. 34:11.
LWIIMBO 105 “Leza Nduyando”
IZILI MUCIBALO *
1. Nkaambo nzi Jehova ncalyeezyanisya kumutumbu uunyonsya?
“SENA mutumbu inga waluba mwanaakwe uucinyonka?” Ooyu ngomubuzyo Jehova ngwaakabuzya mumazuba aamusinsimi Isaya. Leza wakaambila bantu bakwe kuti, “Nokuba kuti bamatumbu aaba inga baluba, mebo tandikonzyi kukuluba yebo pe.” (Is. 49:15) Kanji-kanji Jehova talyeezyanisyi kumutumbu. Pele mubukkale oobu wakacita oobo. Jehova wakabelesya luyando luyumu iluli akati kamutumbu amwanaakwe kutondezya mbwabayanda kapati babelesi bakwe. Bamatumbu banji balimvwa mbubwenya mbwaakalimvwa mucizyi Jasmin iwakaamba kuti, “Ciindi nookomezya mwanaako, inga uba aluyando luyumu kapati ilulibedelede alimwi lukonzya kukkalilila lyoonse.”
2. Ino Jehova ulimvwa buti ciindi umwi wababelesi bakwe naaleya?
2 Jehova ulazyiba ciindi umwi wababelesi bakwe naacileka kuyanzana ambungano ya Bunakristo alimwi anacileka kukambauka. Aboobo amuyeeye buyo mbocimucisa kubona babelesi bakwe banji ibacileka kusungwaala * mwaka amwaka.
3. Ino ncinzi Jehova ncayanda?
3 Bakwesu abacizyi banji aaba ibaleya, inga balapiluka mumbungano alimwi balatambulwa amaanza obilo! Jehova uyanda kuti bapiluke kulinguwe, andiswe mbotuyanda oobo. (1Pet. 2:25) Mbuti mbotukonzya kubagwasya? Katutanaingula mubuzyo ooyu, cilayandika kuzyiba twaambo itupa kuti bamwi bacileke kuswaangana alimwi akukambauka.
NKAAMBO NZI BAMWI NCOBALEKA KUBELEKELA JEHOVA?
4. Ncinzi cabacitikila bamwi akaambo kamulimo wakumubili?
4 Bamwi babikkila maano kapati kumulimo wakumubili. Mukwesu Hung * uukkala ku Asia nkoili Kumusanza Lwaajwe wakaamba kuti: “Ndakali kulicenga kuyeeya kuti, ikuti nondalivwubide nindali kucikonzya kumubelekela kabotu Jehova. Aboobo ndakali kubeleka mawoola manji. Ndakatalika kulovwa kumiswaangano mpoonya kumamanino ndakacilekela limwi buya kuyanzana ambungano. Saatani ubelesya nyika kunyonganya bantu kutegwa aasyoonto-syoonto baleke kumubelekela Leza.”
5. Ino mbuti mucizyi umwi mbwaakajatikizyigwa amapenzi?
5 Bakwesu abacizyi bamwi balatyompwa akaambo kamapenzi. Ba Anne, ibakkala kucisi ca Britain bajisi bana bosanwe. Bakaamba kuti: “Mwanaangu umwi wakazyalwa kalemene kapati. Mukuya kwaciindi, mwanaangu umwi musimbi wakagusyigwa mumbungano alimwi musankwa wakatalika kuciswa bulwazi bwakusondoka. Ndakatyompwa kapati cakuti ndakacileka kujanika kumiswaangano alimwi akukambauka. Mpoonya ndakaba sikumwaya uutacisungweede.” Tulabeetelela kapati bantu mbuli ba Anne amukwasyi wabo alimwi abamwi buyo ibajisi mapenzi aali boobu!
6. Mbuti kutatobela ncolwaamba lugwalo lwa Bakolose 3:13 mbokukonzya kupa muntu kuleka kuyanzana abantu ba Jehova?
6 Amubale Bakolose 3:13. Babelesi ba Jehova bamwi bakatyompezyegwa abasyominyina. Mwaapostolo Paulo wakabona kuti zimwi ziindi tulakonzya kuba ‘akaambo kalimvwisya kakutongooka’ mukwesu naa mucizyi. Ambweni kuli ciindi notwakeendelezyegwa cakutalulama. Kuti tiitwacenjela, tulakonzya kunyema kapati. Mukuya kwaciindi, kunyema kulakonzya kupa muntu kuleka kuyanzana abantu ba Jehova. Amubone icakacitikila mukwesu Pablo, uukkala ku South America. Wakatamikizyigwa kucita cintu cibyaabi, akaambo kaceeco, wakanyangwa mikuli mumbungano. Ino mukwesu ooyu wakacita buti? Wakaamba kuti, “Ndakanyema kapati alimwi asyoonto-syoonto ndakacileka kuyanzana ambungano.”
7. Ino kukatazyigwa amanjezeezya inga kwamujatikizya buti muntu?
7 Ikuti naa muntu wakacita cibi cipati musyule, manjezeezya aakwe alakonzya kumukatazya kwaciindi cilamfwu. Ambweni ulakonzya kulimvwa kuti taciyandwi a Leza naaceya. Nokuba kuti wakeempwa alimwi akufwidwa luse, ulakonzya kulimvwa kuti taceeleli kuba muntu wa Leza. Oobo mbwaakalimvwa mukwesu Francisco. Wakaamba kuti: “Ndakasinswa akaambo kakucita bwaamu. Nokuba kuti kumatalikilo ndakazumanana kujanika kumiswaangano, ndakatyompwa kapati akulimvwa kuteelela kuba akati kabantu ba Jehova. Manjezeezya aangu akali kundikatazya kapati alimwi ndakalisinizyide kuti Jehova tanaakandilekelela. Mukuya kwaciindi, ndakacileka kuyanzana ambungano.” Ino mulimvwa buti kujatikizya bakwesu alimwi abacizyi ibali mubukkale buli boobu? Sena mulabafwida luzyalo? Kwiinda zyoonse, ino Jehova ulimvwa buti kujatikizya mbabo?
JEHOVA ULAZIYANDA MBELELE ZYAKWE
Mweembezi muna Israyeli wakali kwiilanganya kabotu mbelele iyakasweekede (Amubone muncali 8-9) *
8. Sena Jehova ulabaluba aabo ibakamubelekela? Amupandulule.
8 Jehova tabalubi aabo ibakali kumubelekela pele lino ibakaleka kuyanzana abantu bakwe kwaciindi cili mbocibede; alimwi tailubi milimo njobakabeleka mumulimo wakwe. (Heb. 6:10) Musinsimi Isaya wakalemba cikozyanyo cibotu kapati icitondezya Jehova mbwababikkila maano bantu bakwe. Wakalemba kuti: “Mbubonya mbuli mweembezi, uyoolanganya butanga bwakwe. Ajanza lyakwe uyoobunganya twana twambelele antoomwe. Alimwi uyootunyamuna acamba cakwe.” (Is. 40:11) Ino mbuti Mweembezi Mupati mbwalimvwa ciindi mbelele yakwe imwi noyaleya kuzwa kubutanga? Jesu wakayubununa mbwalimvwa Jehova ciindi naakabuzya basikwiiya bakwe kuti: “Ino muyeeya buti? Ikuti muntu umwi kajisi mbelele zili 100 eelyo yomwe yasweeka, sena takoozisiya mumalundu eezyo zili 99 akuunka kuyooyandaula yeeyo yasweeka? Ncobeni ndimwaambila kuti, ikuti waijana ulakondwa kapati akaambo kanjiyo kwiinda zyeezyo zili 99 zyatasweekede.”—Mt. 18:12, 13.
9. Ino beembezi bakaindi bakali kuzyeendelezya buti mbelele zyabo? (Amubone cifwanikiso icili aacivwumbyo.)
9 Nkaambo nzi ncoceelela kweezyanisya Jehova kumweembezi? Nkaambo kakuti kaindi, mweembezi mubotu wakali kuzilanganya kabotu mbelele zyakwe. Mucikozyanyo, Davida wakalwana asyuumbwa alimwi acibbeya kutegwa akwabilile butanga bwakwe. (1Sam. 17:34, 35) Mweembezi mubotu wakali kuzyiba nociba ciindi nokwakali kusweeka mbelele yomwe buyo. (Joh. 10:3, 14) Mweembezi ooyu wakali kuzisiya mbelele izili 99 kazikwabilidwe mucaanda naa mumaanza aamweembezinyina akuunka kuyakuyandaula yeeyo iyasweeka. Jesu wakabelesya cikozyanyo eeci kutuyiisya kasimpe ikayandika kapati kakuti: “Awalo Taata uuli kujulu tayandi kuti umwi wabasyoonto aaba alobe.”—Mt. 18:14.
Mweembezi mu Israyeli yansiku ulanganya mbelele iyakasweekede (Amubone muncali 9)
JEHOVA ULAZIYANDAULA MBELELE ZYAKWE
10. Kweelana alugwalo lwa Ezekieli 34:11-16, ncinzi Jehova ncasyomezya kucita kumbelele zyakwe zisweekede?
10 Jehova ulatuyanda toonse, kubikkilizya “abasyoonto aaba” ibakaleya kuzwa kubutanga bwakwe. Kwiinda mumusinsimi Ezekieli, Leza wakasyomezya kuti uyooziyandaula mbelele zyakwe zisweekede akuzigwasya kubukulusya cilongwe cibotu anguwe. Alimwi wakaamba ntaamu zigaminide nzyaakali kuyoobweza kutegwa azivwune, intaamu zikozyenye anzyaakali kubelesya mweembezi muna Israyeli kuti mbelele yakwe yasweeka. (Amubale Ezekieli 34:11-16.) Kusaanguna, mweembezi wakali kwiiyandaula mbelele, eeci cakali kuyandika ciindi alimwi akubeleka canguzu. Mpoonya ciindi naakali kwiijana mbelele yakasweekede, mweembezi wakali kwiileta kubutanga. Kuyungizya waawo, ikuti mbelele yakalicisa naa kubula cakulya, mweembezi wakali kwiilanganya munzila yaluyando, kuyaanga zilonda, kwiinyamuna alimwi akwiisanina. Baalu, ibeembezi ‘babutanga bwa Leza,’ beelede kubweza ntaamu eezyi kutegwa bagwasye baabo ibakaleka kuyanzana ambungano. (1Pet. 5:2, 3) Baalu balabayandaula bantu aabo, balabagwasya kupiluka kubutanga alimwi akubatondezya luyando kwiinda mukubapa lugwasyo lwakumuuya iluyandika. *
11. Ncinzi ncaakazyi mweembezi mubotu?
11 Mweembezi mubotu wakalizyi kuti mbelele zyakali kukonzya kusweeka. Ikuti naa mbelele yaleya kuzwa kubutanga, mweembezi tanaakali kwiisubula pe. Amubone cikozyanyo ncaakapa Leza ciindi naakali kugwasya babelesi bakwe bamwi, aabo kwakaindi kasyoonto ibakaleya kuzwa kulinguwe.
12. Ino Jehova wakamweendelezya buti Jona?
12 Musinsimi Jona wakautija mulimo wakwe. Nokuba boobo, Jehova kunyina naakamukaka. Mbubwenya mbuli mweembezi mubotu, Jehova wakamuvwuna alimwi akumugwasya kuba anguzu nzyaakali kuyandika kutegwa azuzikizye mulimo wakwe. (Jon. 2:7; 3:1, 2) Mpoonya Leza wakabelesya cisyango cili mbuli ceeco cizyala myuungu kugwasya Jona kuti amvwisye mbobuyandika buumi bwamuntu umwi aumwi. (Jon. 4:10, 11) Ino ncinzi ncotwiiya? Baalu tabeelede kufwambaana kuleka kubagwasyilizya aabo ibatacisungweede. Muciindi caboobo, baalu balasoleka kuzyiba icakapa kuti mbelele ileye kubutanga. Alimwi ciindi mbelele noyapiluka kuli Jehova, baalu balazumanana kwiibikkila maano alimwi akwiiyanda.
13. Ncinzi ncotukonzya kwiiya kuli Jehova kujatikizya ncaakacita kumulembi wa Intembauzyo 73?
13 Mulembi wa Intembauzyo 73 wakatyompwa kapati ciindi naakabona bantu babi ibakali kulibonya kuzwidilila. Wakatalika kulibuzya naa cakali kugwasya kucita kuyanda kwa Leza. (Int. 73:12, 13, 16) Ino Jehova wakacita buti? Kunyina naakamupa mulandu mwaalumi ooyu. Alimwi buya, Leza wakapa kuti majwi aakwe alembwe mu Bbaibbele. Mukuya kwaciindi, sintembauzyo wakabona kuti kuba acilongwe cibotu a Jehova kulayandika kapati kwiinda cintu cili coonse, alimwi kupa kuti buumi kabukkomanisya. (Int. 73:23, 24, 26, 28) Ino twiiya nzi? Baalu tabeelede kufwambaana kubabeteka aabo ibatalika kudooneka, naa cilagwasya kubelekela Jehova. Muciindi caboobo, beelede kusolekesya kumvwisya twaambo tubapa kwaamba naa kucita zintu munzila eeyo. Mpoonya baalu balakonzya kubelesya Bbaibbele kutegwa babakulwaizye.
14. Nkaambo nzi Elija ncaakali kuyandika lugwasyo, alimwi ino Jehova wakamugwasya buti?
14 Ciindi musinsimi Elija naakatija Mwami mukaintu Jezebeli, wakatyompwa kapati cakuti wakali kuyanda kuti afwe. Nkaambo nzi? Nkaambo kakuti wakali kuyeeya kuti kwakacinyina uuli woonse iwakali kubeleka kali musinsimi wa Jehova, alimwi akuti mulimo wakwe wakanyina mpindu. (1Bam. 19:1-4, 10) Muciindi cakumubeteka Elija, Jehova wakamwaambila kuti tanaakali alikke pe, akuti wakeelede kusyoma nguzu zya Leza alimwi akuti kwakacili mulimo mupati ngwaakeelede kucita. Jehova wakaswiilila cakubikkila maano kuzintu izyakali kumupa kulibilika Elija akumupa mulimo uumbi. (1Bam. 19:11-16, 18) Ino ncinzi ncotwiiya? Toonse, kwaambisya baalu, tweelede kuzyeendelezya caluzyalo mbelele zya Jehova. Tacikwe makani naa muntu wanyema naa kulimvwa kuti Jehova takonzyi kumufwida luzyalo, baalu beelede kumuswiilila ciindi nabaambila mbwalimvwa. Mpoonya bayoosoleka kumwaambila kuti Jehova ulamuyanda.
INO TWEELEDE KULIMVWA BUTI KUJATIKIZYA MBELELE ZYA LEZA ZISWEEKEDE?
15. Kweelana alugwalo lwa Johane 6:39, mbuti Jesu mbwaakali kulimvwa kujatikizya mbelele zya Bausyi?
15 Ino Jehova uyanda kuti katulimvwa buti kujatikizya mbelele zyakwe zisweekede? Tulakonzya kwiiya kucikozyanyo ca Jesu. Wakalizyi kuti mbelele zya Jehova zyoonse zilayandika kuli Jehova, aboobo Jesu wakacita zyoonse nzyaakali kukonzya kutegwa agwasye ‘mbelele zyakasweekede zyamuŋanda ya Israyeli’ kupilukila kuli Jehova. (Mt. 15:24; Lk. 19:9, 10) Mbwali mweembezi mubotu, Jesu alimwi wakasolekesya kutegwa atasweekelwi noiba yomwe mbelele ya Jehova.—Amubale Johane 6:39.
16-17. Ino baalu beelede kulimvwa buti kujatikizya kugwasya baabo bakaleya? (Amubone kabbokesi kakuti, “ Mboikonzya Kulimvwa Mbelele Iisweekede.”)
16 Mwaapostolo Paulo wakakulwaizya baalu bakumbungano yaku Efeso kwiiya cikozyanyo ca Jesu. Wakaamba kuti: “Mweelede kubagwasya aabo batajisi nguzu, alimwi lyoonse mweelede kuyeeya majwi aa Mwami Jesu, eelyo lwakwe mwini naakaamba kuti: ‘Kupa kulakkomanisya kapati kwiinda kupegwa.’” (Mil. 20:17, 35) Lugwalo oolu lutondezya kuti baalu bajisi mukuli mupati wakulanganya bantu ba Jehova. Ba Salvador, mwaalu waku Spain bakaamba kuti, “Ciindi nondiyeeya kujatikizya Jehova mbwazilanganya mbelele zyakwe zisweekede, cilandikulwaizya kucita kufwumbwa ncondikonzya kutegwa ndizigwasye. Mbondili mweembezi wakumuuya, ndilisinizyide kuti Jehova uyanda kuti ndizilanganye.”
17 Boonse ibaambwa mucibalo eeci aabo ibakaleyede bakagwasyigwa kupilukila kuli Jehova. Lino, banji ibakaleya, abalo bayanda kupilukila kuli Jehova. Cibalo citobela ciyoobandika zinji kujatikizya ncotweelede kucita kutegwa tubagwasye kucita boobo.
LWIIMBO 139 Amweezyeezye Kuti Muli Munyika Mpya
^ munc. 5 Nkaambo nzi bamwi ibakali kumubelekela Jehova cakusyomeka kwamyaka minji ncobakalekela kuyanzana ambungano? Ino Leza ulimvwa buti kujatikizya mbabo? Cibalo eeci cilayiingula mibuzyo eeyi. Alimwi cilabandika mbotukonzya kumwiiya Jehova kujatikizya mbwaakabeendelezya bamwi ibakaleyede kulinguwe kaindi.
^ munc. 2 BUPANDULUZI BWAMABALA: Sikumwaya uutacisungweede ngooyo uutapi lipooti yamumulimo wakukambauka kwamyezi iili cisambomwe naa kwiinda waawo. Nokuba boobo, aabo ibatacisungweede bacili bakwesu abacizyi, alimwi tulabayanda.
^ munc. 4 Mazina amwi acincwa.
^ munc. 10 Cibalo citobela ciyoopandulula baalu mbobakonzya kuzitobela ntaamu eezyi zyotatwe.
^ munc. 60 BUPANDULUZI BWACIFWANIKISO: Akaambo kakubikkila maano kumbelele iisweekede, mweembezi muna Israyeli wakali kwiiyandaula alimwi akwiigwasya kupilukila kubutanga. Beembezi bakumuuya balacita mbubwenya oobo mazuba aano.
^ munc. 64 BUPANDULUZI BWACIFWANIKISO: Mucizyi uutacisungweede uulindila kuti bbaasi lyeende, wabona Bakamboni bobilo ibali mubukambausi bwakubuleya.
