Sena inga mwayanda kuti mugwasyigwe kapati aciiyo canu nobeni? Amusole kubelesya nzila eezyi zitobela:

• Amusale busena buli kabotu. Ikuti kacikonzyeka, amusole kujana busena bulibonya kabotu alimwi aali mumuni munji. Mpoonya mulakonzya kukkala adesiki naa munsi-munsi akatebulu naa kukkalila aanze aali busena buli kabotu.

• Amujane busena mpomukonzya kuba nyolikke. Jesu wakasala kutalika kupaila “mafwumofwumo kakucisiya ansi . . . kubusena butakwe bantu.” (Mk. 1:35) Pele kuti kacitakonzyeki kujana busena buli boobu, amubazyibye banamukwasyi naa aabo mbomukkala limwi kujatikizya ciindi ncomuyanda kucita ciiyo canu, mpoonya akubalomba kuti batamunyonganyi.

• Amuzumanane kubikkila maano. Amuzitantamuke zintu zikonzya kumunyonganya. Ikuti kamubelesya fooni naa tabbuleti ciindi nomucita ciiyo canu nobeni, amwiibikke asailenti naa a airplane mode kutegwa itamunyonganyi. Ikuti ciindi nomucita ciiyo canu nobeni mwayeeya cintu cimwi ncomweelede kucita, amucilembe kutegwa mutalubi kucicita mwamana, mpoonya akuzumanana aciiyo canu. Ikuti mwabona kuti mwacileka kubikkila maano, amwiime asyoonto kutegwa mweendeende naa kulyoolola.