1. Mbuti Mwaapostolo Paulo mbwaakali kulimvwa kujatikizya bakutausi?

 BAKUTAUSI bacita mulimo uuyandika kapati mumbungano. Mwaapostolo Paulo wakali kubayanda bamaalumi aaba basyomeka. Mucikozyanyo, ciindi naakali kulembela Banakristo baku Filipi, wakabaanzya bakutausi antoomwe abaalu.—Flp. 1:1.

2. Ino mukwesu Luis ulimvwa buti kujatikizya mulimo wakwe wakubeleka kali mukutausi?

² Tacikwe makani mbana naa mbapati, bakwesu banji babbapatizyidwe balikkomene kapati akaambo kakuba bakutausi. Mucikozyanyo, mukwesu Devan wakajisi myaka iili 18 naakasalwa kuba mukutausi. Mpoonya mukwesu Luis wakasalwa kuba mukutausi naakajisi myaka yiinda ku 50. Ino mukwesu Luis ulimvwa buti kujatikizya kuba mukutausi? Wakaamba kuti: “Ndilikkomene kapati kubelekela bakwesu abacizyi mumbungano munzila eeyi. Banditondezya luyando kapati, aboobo andime ndiyanda kubatondezya luyando!” Oobo mbobalimvwa bakutausi banji.

3. Ino mibuzyo nzi njotutiilange-lange?

³ Ikuti kamuli mukwesu uubbapatizyidwe pele kamutabeleki mbuli mukutausi, sena eeyi inga tiimwaibikka kuba mbaakani yanu? Ncinzi cikonzya kumukulwaizya kucita boobo? Alimwi ino nzyeelelo nzi zyamu Magwalo nzyomweelede kuzuzikizya? Mucibalo eeci, tulalanga-langa bwiinguzi bwamibuzyo eeyi. Pele cakusaanguna, atulange-lange mulimo ngobacita bakutausi.

 INO MULIMO NZI NGOBABELEKA BAKUTAUSI?

4. Ino bakutausi babeleka mulimo nzi? (Amubone acifwanikiso.)

⁴ Mukutausi, mukwesu uubbapatizyidwe uusalwa amuuya kutegwa agwasyilizye baalu mumilimo iiyandika kapati mumbungano. Mucikozyanyo, bakutausi baba masimpe kuti basikumwaya balijisi zilawo amabbuku aakkwene aakubelesya mumulimo wakukambauka. Bamwi balagwasyilizya mukusalazya amukulanganya Ŋanda ya Bwami. Kuyungizya waawo, bakutausi balabeleka kabali basikugwasyilizya akulanganya zyaambawido amavidiyo lyamiswaangano yambungano. Milimo minji njobabeleka bakutausi ilagwasya munzila yacigaminina. Ciinda zyoonse, bakutausi mbaalumi basimide kumuuya, ibamuyanda ncobeni Jehova alimwi ibapona kweelana azyeelelo zyakwe ziluleme. Kunze lyaboobo, balabayanda kapati Banakristonyina. (Mt. 22:​37-39) Mbuti mukwesu uubbapatizyidwe mbwakonzya kweelela kuba mukutausi?

5. Mbuti mukwesu mbwakonzya kweelela kuba mukutausi?

⁵ Bbaibbele lilaamba zintu nzyayelede kucita mukwesu kutegwa ayelele kuba mukutausi. (1Tim. 3:​8-10, 12, 13) Mulakonzya kweelela kupegwa mukuli ooyu kwiinda mukwiiya zyeelelo eezyi zyamu Magwalo alimwi akubeleka canguzu kutegwa muzizuzikizye. Pele mweelede kusaanguna kulibuzya kaambo ncomuyanda kuba mukutausi.

NKAAMBO NZI NCOMUYANDA KUBA MUKUTAUSI?

6. Ncinzi ceelede kumukulwaizya kubelekela Banakristonyoko? (Matayo 20:28; amubone acifwanikiso aacivwumbyo.)

⁶ Amuyeeye kujatikizya cikozyanyo ciinda kubota ca Jesu. Zyoonse nzyaakali kucita wakali kuzicita akaambo kaluyando ndwaakajisi kuli Jehova akubantu. Luyando oolu lwakamugwasya kubeleka canguzu alimwi akucita milimo yaansi kutegwa agwasye bamwi. (Amubale Matayo 20:28; Joh. 13:​5, 14, 15) Ikuti luyando ndolumukulwaizya kusika azyeelelo, Jehova uyoomulongezya alimwi uyoomugwasya kutegwa mweelele kuba mukutausi.—1Kor. 16:14; 1Pet. 5:5.

7. Nkaambo nzi ncocilubide kuyanda kuba mukutausi akaambo kakuyanda kutembaulwa abamwi?

⁷ Munyika, kanji-kanji bantu balabayanda kapati aabo ibalibona kuti balayandika kapati. Pele oobo tabusyi mbocibede mumbunga ya Jehova. Mukwesu uubayanda bamwi  mbubwenya Jesu mbwaakali kucita, tayandi kudyaaminina bamwi naa kubonwa kuti ulayandika kapati kwiinda bamwi. Ikuti muntu uuyanda kubonwa kuti ulayandika kapati kwiinda bamwi wasalwa mumbungano, inga katayandi kubeleka milimo imwi iilibonya kuba yaansi pele iigwasya mbelele zya Jehova ziyandisi. Inga kabona milimo eeyi kuti tiimweeleli walo. (Joh. 10:12) Jehova takonzyi kumulongezya muntu uucita zintu akaambo kakuyanda kubonwa kuti ulayandika kapati kwiinda bamwi.—1Kor. 10:​24, 33; 13:​4, 5.

8. Ino ndulayo nzi Jesu ndwaakapa baapostolo bakwe?

⁸ Zimwi ziindi, nobaba balongwe ba Jesu bakali kuyanda milimo imwi kabajisi makanze aatakali kabotu. Amuyeeye buyo ncaakacita mwaapostolo Jakobo a Johane. Baapostolo aaba bakalomba Jesu kuti akabape zyuuno zyaatala mu Bwami bwakwe. Pele Jesu tanaakakukkomanina kulomba kwabo. Muciindi caboobo, wakapandulwida baapostolo bakwe boonse bali 12 kuti: “Kufwumbwa uuyanda kuba mupati akati kanu weelede kuba mubelesi wanu, alimwi kufwumbwa uuyanda kuba wakusaanguna akati kanu weelede kuba muzike waboonse.” (Mk. 10:​35-37, 43, 44) Aboobo, bakwesu ibajisi makanze mabotu, nkokuti aakubelekela bamwi, bayakwiigwasya kapati mbungano munzila zinji.—1Tes. 2:8.

NCINZI CIKONZYA KUMUGWASYA KUBA ALUYANDISISYO LWAKUBELEKELA BANAKRISTONYOKO?

9. Ncinzi cikonzya kumugwasya kuba aluyandisisyo lwakubeleka kamuli mukutausi?

⁹ Tacidoonekwi buya kuti mulamuyanda Jehova alimwi muyanda kubelekela bamwi. Nokuba boobo, ambweni inga kamutajisi luyandisisyo lwakuyanda kucita milimo njobabeleka bakutausi. Aboobo, ncinzi cikonzya kumugwasya kuba aluyandisisyo lwakubeleka kamuli mukutausi? Amuyeeye buyo lukkomano ndomuyoojana akaambo kakubelekela Banakristonyoko. Jesu wakaamba kuti: “Kupa kulakkomanisya kapati kwiinda kupegwa.” (Mil. 20:35) Amana buya Jesu wakacita kweelana ancaakaamba. Wakajana lukkomano lwini-lwini akaambo kakubelekela bamwi alimwi buya eeci nceciyoomucitikila andinywe.

10. Ncinzi citondezya kuti Jesu wakalikkomene kubelekela bamwi? (Marko 6:​31-34)

¹⁰ Amubone cikozyanyo citondezya kuti Jesu wakalikkomene kubelekela bamwi. (Amubale Marko 6:​31-34.) Aciindi cimwi, Jesu abaapostolo bakwe bakalikatede. Bakali munzila kuunka kubusena ibwakanyina bantu kutegwa bakalyookezye. Pele nkamu yabantu yakabaindila kusika akaambo kakuyanda kuyiisyigwa a Jesu. Naakali kuyanda naakakaka. Kayi walo abalongwe bakwe “bakabula aciindi cakupumuna kuti balye.” Alimwi ikuti naakayanda, naakabayiisya buyo ciindi cisyoonto akubaambila kuti baunke. Pele akaambo kakuti wakali kubayanda, “wakatalika kubayiisya zintu zinji.” Alimwi wakazumanana kubayiisya mane kusika “kumabbililo aazuba.” (Mk. 6:35) Wakacita oobo, ikutali akaambo kakuti wakabula cimbi cakucita, pele akaambo kakuti “wakabeetelela.” Wakali kuyanda kubayiisya akaambo kakuti wakali kubayanda. Kubelekela bamwi kwakapa kuti Jesu akkomane kapati.

11. Ino Jesu wakabagwasya buti bantu munzila yacigaminina? (Amubone acifwanikiso.)

¹¹ Ciindi Jesu naakali kubelekela bamwi, wakacita zinji kunze buyo lyakubayiisya. Wakabapa anzyobakali kuyandika kumubili. Mucikozyanyo, camaleele wakabapa cakulya akulailila basikwiiya kuti babaabile. (Mk. 6:41) Kwiinda mukucita boobo, Jesu wakayiisya basikwiiya bakwe mbobakonzya kubelekela bamwi. Alimwi wakabatondezya kuti milimo yacigaminina mbuli yeeyo njobabeleka bakutausi ilayandika kapati. Amweezeezye buyo baapostolo mbobakakkomene kapati kubeleka a Jesu  mukupa bantu cakulya eeci camaleele, cakuti “boonse bakalya akukkuta”! (Mk. 6:42) Mubwini, eeci tiicakali ciindi cakusaanguna kuli Jesu kubikka nzyobakali kuyandika bamwi mubusena bwakusaanguna kwiinda nzyaakali kuyandika walo mwini. Wakabelesya buumi bwakwe boonse bwaanyika kubelekela bantu. (Mt. 4:23; 8:16) Jesu wakajana lukkomano akukkutila kwiinda mukuyiisya bamwi alimwi akubapa nzyobakali kuyandika. Tacidoonekwi buya kuti, andinywe muyookkomana kapati ikuti mwalyaaba kubelekela bamwi mbuli mukutausi.

12. Nkaambo nzi ncotuteelede kuyeeya kuti tatujisi luzyibo lwaalubazu lwalo ndotukonzya kubelesya kugwasya mbungano?

¹² Ikuti naa mulimvwa kuti tamujisi luzyibo lulibedelede, mutatyompwi pe. Cakutadooneka mulijisi bube bumwi bukonzya kugwasya mbungano. Amuyeeye kujatikizya ncaakaamba Paulo kulugwalo lwa 1 Bakorinto 12:​12-30 akumulomba Jehova kuti amugwasye kulubelesya lugwalo oolu mubuumi bwanu. Majwi aakwe, alacisalazya kuti mbubwenya mbuli babelesi ba Jehova bamwi, andinywe mujisi mulimo uuyandika kapati mumbungano. Ikuti kamutacikonzyi kubeleka mbuli mukutausi lino akaambo kakuti muyandika kubelekela abube bumwi, mutatyompwi pe. Muciindi caboobo, amucite kufwumbwa ncomukonzya kutegwa mubelekele Jehova a Banakristonyoko. Amube masimpe kuti baalu bayoobubikkila maano bukkale bwanu akumupa milimo njomukonzya kucita.—Rom. 12:​4-8.

13. Ncinzi ncotuzyi kujatikizya zyeelelo zyakuba mukutausi?

¹³ Amubone kaambo akambi keelede kumupa kusolekesya kusika azyeelelo zyakuba mukutausi. Mubwini, Banakristo boonse beelede kuba acilongwe a Jehova, kujana lukkomano luboola akaambo kakupa alimwi akuba cikozyanyo cibotu mukupona buumi Bwabunakristo. Nzintu nzi cacigaminina nzyayelede kucita mukwesu kutegwa asike azyeelelo?

NCOMUKONZYA KUCITA KUTEGWA MWEELELE KUBA MUKUTAUSI

14. Ino caamba nzi “kusima mumizeezo”? (1 Timoteyo 3:​8-10, 12)

¹⁴ Lino atulange-lange zyeelelo zimwi zyaambidwe kulugwalo lwa 1 Timoteyo 3:​8-10, 12. (Amubale.) Mukutausi weelede kuba muntu ‘uusimide mumizeezo.’ Majwi aaya alimwi alakonzya kusandululwa kuti “uubikkila maano” naa “uulilemeka munzila iipa kuti bamwi bamulemeke.” Pele eeci tacaambi kuti tamunooseki-seki  abantu naa kulikkomanisya. (Muk. 3:​1, 4) Nokuba boobo, mweelede kwiibikkila maano milimo yanu. Ikuti kamucikonzya kwiimanizya milimo njomwapegwa alimwi akwiicita kabotu, bakwesu abacizyi mumbungano banoomusyoma alimwi akumulemeka.

15. Ino caamba nzi ‘kutaba similaka yobilo’ alimwi ‘akutayanda kujana mpindu cabumpelenge’?

¹⁵ ‘Ikutali similaka yobilo’ caamba kuti mwaamba masimpe alimwi mulasyomeka. Kunze lyaboobo, mulazizuzikizya zisyomezyo zyanu alimwi kunyina nomubabeja bamwi. (Tus. 3:32) ‘Ikutali uuyanda kujana mpindu cabumpelenge’ caamba kuti mulasyomeka mumakwebo aanu amumakani aajatikizya mali. Tamukabelesyi zilongwe nzyomujisi abamwi mumbungano kuba nzila yakujanina mpawo mali.

16. (a) Ino caamba nzi ‘kutanywa waini munji’? (b) Ino caamba nzi kuba ‘amanjezyeezya aasalala’?

¹⁶ ‘Ikutali uunywa waini munji’ caamba kuti tamuciindizyi kunywa bukoko naa kuba muntu uuzyibidwe kuti ulanywa kapati. Ikuba ‘amanjezyeezya aasalala’ caamba kuti mulapona kweelana azyeelelo zya Jehova. Nokuba kuti tamulondokede, mulijisi cilongwe cibotu anguwe calo icimupa kuba aluumuno lwamumizeezo.

17. Mbuti mukwesu mbwakonzya kutondezya kuti ulakonzya kusyomwa ciindi ‘nasolwa naa uleelela’? (1 Timoteyo 3:10; amubone acifwanikiso.)

¹⁷ ‘Kusolwa naa uleelela’ caamba kuti mwatondezya kale kuti mulakonzya kusyomwa akupegwa mikuli iimbi. Aboobo, ikuti naa baalu bamupa mulimo umwi, cakulomya mweelede kwaatobela malailile aabo alimwi amalailile aazwa kumbunga. Mweelede kuba masimpe kuti mwacimvwisya cijatikizyidwe mumulimo ngomwapegwa alimwi anomweelede kuumanizya. Ciindi nomuuzuzikizya cabusungu mulimo umwi aumwi ngomwapegwa, ibamwi mumbungano bayoocibona eeci alimwi bayookubona kuyaambele kwanu. Nobaalu, amube masimpe kuti mwabayiisya bakwesu babbapatizyidwe. (Amubale 1 Timoteyo 3:10.) Sena kuli bakwesu babbapatizyidwe mumbungano yanu ibajisi myaka iili 10 kusika ku 14? Sena balijisi bubambe bubotu bwakucita ciiyo cabo beni akulibambila miswaangano? Sena balaingula lyoonse lyamiswaangano akutola lubazu mumulimo wakukambauka? Ikuti kacili boobo, amubape milimo yeelela kweelana aciimo cabo alimwi abukkale bwabo. Ikuti mwacita oobo, bakwesu aaba ‘bayoosolwa naa baleelela.’ Mpoonya baakuba amyaka yakuzyalwa iili akati ka 17 a 19 balakonzya kweelela kuba bakutausi.

18. Ino caamba nzi ‘kutaba abutongo’?

 ¹⁸ ‘Uutajisi butongo’ caamba kuti kunyina bukkale buli boonse bubyaabi mbobakonzya kumwaamba naa kumutamikizya bamwi. Bwini mbwakuti, Banakristo balakonzya kutamikizyigwa. Jesu wakali kutamikizyigwa twaambo twakubeja alimwi wakaambila limwi kuti abalo basikumutobela bakali kuyootamikizyigwa. (Joh. 15:20) Nokuba boobo, ikuti mwazumanana kulilemeka kabotu mbubwenya mbuli Jesu, muyooba ampuwo mbotu mumbungano.—Mt. 11:19.

19. Ino caamba nzi kuba ‘mulumi uukwete mukaintu omwe’?

¹⁹ ‘Mulumi uukwete mukaintu omwe.’ Ikuti kamukwete, mweelede kutobela zyeelelo zya Jehova kujatikizya cikwati, nkokuti kukwata buyo mukaintu omwe. (Mt. 19:​3-9) Mwaalumi Munakristo tayelede kucita bwaamu. (Heb. 13:4) Pele kuli azimbi zijatikizyidwe. Weelede kusyomeka kumukaintu wakwe, alimwi tayelede kumenena mate bamakaintu bambi.—Job. 31:1.

20. Mbuti mukwesu mbwakonzya kuba muntu ‘iweendelezya kabotu’ bamuŋanda yakwe?

²⁰ ‘Iweendelezya kabotu bana bakwe abamuŋanda yakwe mwini.’ Ikuti kamuli silutwe wamukwasyi, mweelede kwiibikkila maano kapati mikuli yanu. Mweelede kunookomba mumukwasyi lyoonse. Mweelede kunookambauka abakaintu banu alimwi abana banu bunji bwaziindi. Amubagwasye bana banu kuba acilongwe cibageme a Jehova. (Ef. 6:4) Mwaalumi uucikonzya kulanganya mukwasyi wakwe, utondezya kuti ulakonzya kwiilanganya mbungano.—Amweezyanisye a 1 Timoteyo 3:5.

21. Ikuti kamutanaba mukutausi, ncinzi ncomweelede kucita?

²¹ Bakwesu, ikuti naa tamunaba bakutausi, twamulomba kuti mucibale cakulomya cibalo eeci alimwi akwaapailila makani aaya kuli Jehova. Amwiiye kujatikizya zyeelelo zyabakutausi akubeleka canguzu kutegwa muzizuzikizye. Amuyeeye kujatikizya mbomumuyanda Jehova alimwi a Banakristonyoko. Amube aluyandisisyo lwakubabelekela. (1Pet. 4:​8, 10) Amujane lukkomano luboola akaambo kakubelekela mukwasyi wanu wakumuuya. Jehova amulongezye akaambo kakusolekesya nkomucita kutegwa mweelele kuba bakutausi.—Flp. 2:13.