1, 2. Mbuyumuyumu nzi Jefita amwanaakwe musimbi mbobakajana?

MUSIMBI umwi wakabalika kuyoocinga bausyi. Wakalikkomene kapati kubona kuti bapiluka muluumuno kuzwa kunkondo. Kuzunda kwabo kupati kwakapa musimbi ooyu kwiimba akuzyana calukkomano. Pele ncobakacita alimwi anzyobakaamba bausyi zyeelede kuti zyakamugambya kapati. Bakazapula zisani zyabo akwaamba kuti: “Maawe, mwanaangu! Wandipenzya mumoyo.” Mpoonya bausyi bakamwaambila kuti bakasyomezya Jehova cintu icakali kuyoocinca buumi bwakwe. Cisyomezyo cabo cakali kwaamba kuti tanaakali kuyookwatwa naa kuba abana. Pele mpoonya-mpoonya wakapa bwiinguzi bubotu, akukulwaizya bausyi kuti bazuzikizye cisyomezyo cabo kuli Jehova. Bwiinguzi bwakwe bwakatondezya kuti wakali kusyoma cakumaninina kuti kufwumbwa Jehova ncaakamwaambila kucita cakali kuyooba cibotu. (Babetesi 11:34-37) Ciindi bausyi nobakabona lusyomo ndwaakajisi, bakakkomana kapati nkaambo bakazyiba kuti kulyaaba kwakwe kwakali kuyoomukkomanisya Jehova.

 ² Jefita amwanaakwe musimbi bakali kusyoma Jehova cakumaninina alimwi anzila mbwacita zintu. Bakasyomeka nokuba kuti tiicakali cuuba-uba kulimbabo. Bakali kuyanda kukkomaninwa a Jehova, alimwi eeci ncintu ciyandika kulyaaba kuli koonse.

3. Nkaambo nzi cikozyanyo ca Jefita amwanaakwe musimbi ncocikonzya kutugwasya mazuba aano?

³ Tacili cuuba-uba lyoonse kuzumanana kusyomeka kuli Jehova. Tuyandika “kulwanina lusyomo.” (Juda 3) Kutegwa tugwasyigwe kucita boobo, atwiiye Jefita amwanaakwe musimbi mbobakaliyumya mubuyumuyumu mbobakajana mubuumi bwabo. Mbuti mbobakazumanana kusyomeka kuli Jehova?

4, 5. (a) Ino malailile nzi Jehova ngaakapa bana Israyeli nobakanjila mu Nyika Yakasyomezyegwa? (b) Kweelana alugwalo lwa Intembauzyo caandaano  106, ncinzi cakabacitikila bana Israyeli akaambo kabuzangi bwabo?

⁴ Buzuba abuzuba, Jefita amwanaakwe musimbi bakali kulibonena zintu zyakali kucitika akaambo kakuzangila Jehova ikwabana Israyeli. Myaka iitandila ku 300 musyule, Jehova wakalailila bana Israyeli kujaya bakombi bakubeja boonse ibakali mu Nyika Yakasyomezyegwa, pele tiibakamumvwida. (Deuteronomo 7:1-4) Bana Israyeli banji bakatalika kwiiya bana Kanana, ibakali kukomba baleza bakubeja alimwi ibakali kupona buumi bwakutalilemeka.—Amubale Intembauzyo 106:34-39.

⁵ Akaambo kabuzangi bwabana Israyeli, Jehova tanaakabakwabilila kuli basinkondonyina. (Babetesi 2:1-3, 11-15; Intembauzyo 106:40-43) Kweelede kuti cakali ciyumu kapati kumikwasyi iyakali kumuyanda Jehova kuzumanana kusyomeka mumazuba aayo aakali kukatazya. Nokuba boobo, Ibbaibbele lilaamba kuti kwakali bantu ibakali kusyomeka mbuli Jefita amwanaakwe musimbi alimwi a Elikana, Hana a Samuele. Bakalikanzide kumukkomanisya Jehova.—1 Samuele 1:20-28; 2:26.

6. Ino nzintu nzi ziyunga munyika iziliko mazuba aano, alimwi ncinzi ncotweelede kucita?

⁶ Mazuba aano ngotupona, bantu bacita zintu akuyeeya mbubwenya mbuli bana Kanana. Mubuumi bwabo babikkila buyo maano kumakani aakoonana, kulwana, alimwi amali. Pele Jehova ulatucenjezya munzila iisalede. Uyanda kutukwabilila mbubwenya mbwaakali kuyanda kukwabilila bana Israyeli kuzintu eezyo zibyaabi. Sena tuyakwiiya ciiyo kukulubizya kwabo? (1 Bakorinto 10:6-11) Tweelede kucita zyoonse nzyotukonzya kutegwa tukutantamuke kuyeeya kwanyika. (Baroma 12:2) Sena tuyoosolekesya kucita boobo?

7. (a) Nzintu nzi nzyobakamucitila Jefita bantu bakwe? (b) Ino Jefita wakacita buti?

⁷ Kuciindi ca Jefita, bana Israyeli bakadyaamininwa abana Filisiti alimwi abana Amoni akaambo kakuti bana Israyeli bakazangila Jehova. (Babetesi 10:7, 8) Kunze aamasi aayo aakali kubapenzya, Jefita alimwi wakajisi mapenzi abanabokwabo alimwi abaalu bamu Israyeli. Akaambo kakuti banabokwabo bakamunyonokela alimwi akumusula, bakamutanda munyika yakwe. (Babetesi 11:1-3) Jefita tanaakalekela lunya lwabo kuti lunyonganye bube bwakwe. Ino tuzyi buti oobo? Tulizyi akaambo kakuti ciindi  baalu bamucisi nobakamukombelezya kuti abagwasye, wakabagwasya mpoonya-mpoonya. (Babetesi 11:4-11) Ino ncinzi cilangilwa kuti ncicakamukulwaizya Jefita kuti acite mbwaakacita?

8, 9. (a) Ninjiisyo nzi zijanika mu Mulawo wa Musa izyeelede kuti nzizyakamugwasya Jefita? (b) Ncinzi icakali kuyandika kapati kuli Jefita?

⁸ Jefita wakali sikalumamba singuzu, alimwi wakalaazyi makani aakacitikila bana Israyeli kaindi alimwi wakaluuzyi kabotu Mulawo wa Musa. Inzila Jehova mbwaakabeendelezya bantu bakwe cakamuyiisya zyeelelo zya Leza izijatikizya ciluzi acitaluzi. (Babetesi 11:12-27) Jefita wakalubelesya luzyibo oolo mubuumi bwakwe ciindi naakali kusala zyakucita. Wakalizyi kabotu-kabotu Jehova mbwalimvwa kujatikizya bukali akupilusya cibi alimwi akuti Leza uyanda bantu bakwe kuti kabayandana. Kuyungizya waawo, Mulawo wakamuyiisya mbwayelede kubeendelezya bamwi, nobaba baabo ibakamusulide.—Amubale Kulonga 23:5; Levitiko 19:17, 18.

⁹ Kweelede kuti cikozyanyo ca Josefa ncecakamugwasya Jefita. Weelede kuti wakaiya Josefa mbwaakabafwida luse banabokwabo nokuba kuti bakalimusulide. (Matalikilo 37:4; 45:4, 5) Kuyeeya cikozyanyo eeci kweelede kuti kwakamugwasya Jefita kucita zintu munzila iyakamukkomanisya Jehova. Ncobakacita banabokwabo cakamucisa ncobeni Jefita. Pele kulwanina zina lya Jehova alimwi abantu bakwe cakali kuyandika kapati kuli Jefita kwiinda mbwaakali kulimvwa. (Babetesi 11:9) Wakalikanzide kusyomeka kuli Jehova. Kucita boobu kwakapa kuti Jehova amulongezye alimwi akulongezya bana Israyeli.—Bahebrayo 11:32, 33.

10. Mbuti mbotukonzya kubelesya njiisyo zyamu Bbaibbele kutugwasya kucita zintu mbuli Banakristo mazuba aano?

¹⁰ Sena tuyakwiiya ciiyo kucikozyanyo ca Jefita? Ncinzi ncotuyakucita ikuti naa Banakristoma batutyompya naa ikuti twalimvwa kuti tiibatweendelezya kabotu? Tatweelede kulekela kunyema kutulesya kubelekela Jehova. Mutacileki pe kuunka kumiswaangano ya Bunakristo naa kuba aciindi cakuba antoomwe ambungano. Atumwiiye Jefita alimwi akumvwida Jehova. Eeci ciyootugwasya kubuzunda bukkale bukatazya kutegwa andiswe tube zikozyanyo zibotu.—Baroma 12:20, 21; Bakolose 3:13.

11, 12. Ino ncikonke nzi Jefita ncaakakonka, alimwi ino eeci cakali kubikkilizya nzi?

¹¹ Jefita wakalizyi kuti wakali kuyandika kugwasyigwa a Leza kutegwa afwutule bana Israyeli kuzwa kubana Amoni. Wakasyomezya Jehova kuti, ikuti naa wamugwasya kuzunda munkondo, wakali kuyoomupa muntu uyoosaanguna kuzwa muŋanda yakwe ciindi aakupiluka kuzwa kunkondo kuti abe “cituuzyo cuumpwa” kulinguwe. (Babetesi 11:30, 31) Ino eeci cakali kwaamba nzi?

¹² Jehova ulikusulide kutuula bantu, aboobo tulizyi kuti Jefita tanaakali kuyootuula muntu wini buya. (Deuteronomo 18:9, 10)  Mu Mulawo wa Musa, cituuzyo cuumpwa cakali cipego cilibedelede muntu ncaakali kupa cakumaninina kuli Jehova. Aboobo Jefita wakali kupandulula kuti muntu ooyo ngwaakali kuyoopa kuli Jehova wakali kuyoobelekela atente lyakubunganina buumi bwakwe boonse. Jehova wakaswiilila kuli Jefita akumugwasya kutegwa azunde cakumaninina. (Babetesi 11:32, 33) Pele ino nguni Jefita ngwaakali kuyoopa kuli Jehova?

13, 14. Ncinzi majwi ngaakaamba Jefita aalembedwe mulugwalo lwa Babetesi 11:35 ncaatondezya kujatikizya lusyomo ndwaakajisi?

¹³ Amuyeeye kujatikizya bukkale bwaambidwe kumatalikilo aacibalo eeci. Ciindi Jefita naakapiluka kuzwa kunkondo, muntu wakusaanguna iwakazwa kuyoomucinga wakali mwanaakwe musimbi ngwaakali kuyandisya, imwanaakwe omwe buyo! Sena Jefita wakali kuyoocizuzikizya cisyomezyo cakwe? Sena wakali kuyoopa Jehova mwanaakwe musimbi alikke buyo kutegwa abeleke atente lyakubunganina kwabuumi bwakwe boonse?

¹⁴ Alimwi njiisyo zili mu Mulawo wa Leza zyeelede kuti zyakamugwasya Jefita kusala kabotu. Ambweni wakayeeya majwi aali mulugwalo lwa Kulonga 23:19, ooko bantu ba Leza nkobakaambilwa kupa Jehova zintu ziinda kubota. Alimwi Mulawo wakali kwaamba kuti, ikuti naa muntu wakonka kuli Jehova, “tayelede kucinca majwi aakwe pe. Weelede kucita zyoonse nzyaakakonka kuti ulazicita.” (Myeelwe 30:2) Mbubwenya mbuli Hana iwakali kusyomeka, ambweni iwakapona kuciindi cakwe, Jefita wakeelede kuzuzikizya ncaakasyomezya, nokuba kuti wakalizyi eeci mbocakali kuyoomujatikizya walo amwanaakwe musimbi. Akaambo kakuti mwanaakwe wakali kuyoobelekela kutente lyakubunganina, kunyina naakali kuyooba abana. Aboobo kunyina iwakali kuyooba simulyazina wa Jefita akukona nyika yakwe. (Babetesi 11:34) Nokuba boobo, cakusyomeka Jefita wakati: “Ndakasyomezya kale kuli Jehova alimwi tandikonzyi kucinca pe.” (Babetesi 11:35)  Jehova wakakutambula kwaaba ooku kupati kwa Jefita alimwi wakamulongezya. Nomwakali ndinywe, sena nimwakasyomeka mbuli Jefita?

15. Ino ncinzi bunji bwesu ncotwakakonka, alimwi mbuti mbotukonzya kutondezya kuti tulasyomeka?

¹⁵ Ciindi nitwakaaba buumi bwesu kuli Jehova, twakakonka kuti tuyoocita kuyanda kwakwe ziyume zitete. Twakalizyi kuti tiicakali kuyooba cuuba-uba lyoonse kuzuzikizya cisyomezyo eeco. Pele ino tulimvwa buti ciindi notwaambilwa kucita cintu cimwi ncotutayandi? Ikuti naa twakuzunda kulibilika nkotujisi alimwi akumumvwida Leza wesu kuzwa ansi amoyo, tutondezya kuti tulacizuzikizya cisyomezyo cesu. Cilakonzya kutucisa kusweekelwa zintu nzyotuyandisya, pele zilongezyo zya Jehova lyoonse nzinji kapati. (Malaki 3:10) Ino mbuti kujatikizya mwana musimbi wa Jefita? Ino wakalimvwa buti kujatikizya cisyomezyo cabausyi?

16. Mbuti mwana musimbi wa Jefita mbwaakalimvwa kujatikizya cikonke cabausyi? (Amubone cifwanikiso icili kumatalikilo aacibalo.)

¹⁶ Cikonke ca Jefita cakaliindene acikonke ca Hana. Hana wakakonka kuti wakali kuyoopa mwanaakwe Samuele kutegwa abeleke atente lyakubunganina kali mu Naziri. (1 Samuele 1:11) Mu Naziri wakali kuzumizyigwa kukwata akuba abana. Pele mwana musimbi wa Jefita wakapegwa kali “cituuzyo cuumpwa” icimaninide, aboobo tanaakali kuyookwatwa akuba abana. (Babetesi 11:37-40) Amuciyeeyele buyo! Ambweni naakakwatwa kumwaalumi uuli kabotu kapati mucisi akaambo kakuti bausyi bakali basololi mu Israyeli. Pele lino wakali kuyooba mubelesi uulicesya kutente lyakubunganina. Ino musimbi ooyu wakalimvwa buti? Wakatondezya kuti mulimo wa Jehova wakali mubusena bwakusaanguna mubuumi bwakwe kwiinda mukwaambila bausyi kuti: “Amundicitile kweelana ambomwakasyomezya.” (Babetesi 11:36) Kutegwa abelekele Jehova, wakaliimya kulombozya muntu nkwazyalwa ankuko kwakuba amulumi alimwi akuzyala bana. Mbuti  mbotukonzya kwiiya muuya wakwe wakulyaaba?

17. (a) Mbuti mbotukonzya kwiiya lusyomo lwa Jefita amwanaakwe musimbi? (b) Mbuti majwi aali mulugwalo lwa Bahebrayo 6:10-12 mbwaamukulwaizya kuba amuuya wakulyaaba?

¹⁷ Bakwesu abacizyi banji Banakristo ibacili bana-bana baliimya kukwata naa kukwatwa naa kuba abana, kwaciindi cili mbocibede. Nkaambo nzi? Akaambo kakuti bayanda kubikkila maano kukucita zintu ziyungizyidwe mukubelekela Jehova. Alimwi banji bacembeede balaaba ciindi cabo ncobeelede kuba abana babo naa bazyukulu babo. Muciindi caboobo, balapa ciindi cabo alimwi anguzu zyabo kuli Jehova. Bamwi babo balabeleka mumilimo yamayake naa balanjila Cikolo Cabakambausi ba Bwami alimwi akulongela kumbungano kubulide basikumwaya ba Bwami. Bamwi balalibambila kuyungizya mulimo wabo kuli Jehova mumyezi ya Ciibalusyo. Jehova takakulubi pe kulyaaba kwabantu aaba boonse ibasyomeka. (Amubale Bahebrayo 6:10-12.) Ino mbuti kujatikizya ndinywe? Sena mulakonzya kulyaaba kutegwa mumubelekele Jehova cakumaninina?

18, 19. Ncinzi ncotwaiya kumakani aamu Bbaibbele aajatikizya Jefita amwanaakwe musimbi, alimwi mbuti mbotukonzya kubaiya?

¹⁸ Ncinzi cakamugwasya Jefita kuzunda buyumuyumu mbwaakajisi? Wakalekela Jehova kuti amusololele muzintu zyoonse nzyaakali kusala mubuumi. Tanaakalekela bantu bakamuzingulukide kuti bamuyunge. Wakazumanana kusyomeka nociba ciindi bamwi nobakali kumutyompya. Jehova wakamulongezya Jefita amwanaakwe musimbi akaambo kakulyaaba kwabo, alimwi wakababelesya boonse bobilo kusumpula bukombi bwakasimpe. Nociba ciindi bamwi nobakaleka kucita ciluzi, Jefita amwanaakwe musimbi bakazumanana kusyomeka kuli Jehova.

¹⁹ Ibbaibbele lyaamba kuti: ‘Amwiiye baabo kwiinda mulusyomo akukkazika moyo ibayookona zyakasyomezyegwa.’ (Bahebrayo 6:12) Atumwiiye Jefita amwanaakwe musimbi, mbwaanga tulizyi kuti ciindi notuzumanana kusyomeka, Jehova uyootulongezya.