1-3. (a) Mbuti Banakristo mbobali kutondezya kuti balakukkomanina kuswaangana antoomwe? (Amubone cifwanikiso icili kumatalikilo aacibalo.) (b) Ncinzi ncotutiibandike mucibalo eeci?

CIINDI ba Corinna nobakali amyaka yakuzyalwa iili 17, banyina bakaangwa akutolwa kucilabba cakupenzyezya icakali kulamfwu kapati. Kumane, ba Corinna abalo bakatolwa ku Siberia, kubusena ibuli kulamfwu kuzwa nkobakali kukkala. Ookuya bakabeleka afaamu alimwi bakali kweendelezyegwa mbuli muzike. Zimwi ziindi bakali kusinikizyigwa kubelekela anze aakali kutontola kapati kakunyina akusama zyakusama nzyampeyo. Nokuba boobo, ba Corinna amucizyi uumbi bakakanzide kucita zyoonse nzyobakali kukonzya kutegwa bazwe afaamu akuyoojanika kumiswaangano yambungano.

² Ba Corinna bakati: “Twakazwa abusena mpotubelekela kumangolezya akweenda kuya kucitisyini cacitima ikulampa makkilomita aali 25. Citima cakanyamuka 02:00 hrs kubucedo, alimwi twakeenda kwamawoola aali cisambomwe katutanaseluka akweenda makkilomita aali 10 kuya kubusena buswaanganinwa.”  Ba Corinna bakakkomana kapati kuti bakeenda lweendo oolo. Bakaamba kuti: “Kumuswaangano, twakaiya Ngazi Yamulindizi akwiimba nyimbo zya Bwami. Muswaangano ooyo wakatuyaka akuyumya lusyomo lwesu.” Bacizyi aaba bobilo bakapiluka kufaamu nokwakainda mazuba otatwe, pele mukamwini faamu kunyina anaakazyiba kuti tiibakaliko.

³ Bantu ba Jehova lyoonse bali kukukkomanina kuswaangana antoomwe abakombinyina. Mucikozyanyo, Banakristo bakusaanguna bakali kuyandisisya kuswaangana antoomwe kutegwa bakombe Jehova alimwi akwiiya kujatikizya nguwe. (Milimo 2:42) Mubwini, cakutadooneka andinywe mulayandisisya kuunka kumiswaangano. Pele mbubwenya mbuli bakombinyoko boonse, cilakonzya kumuyumina kujanika kumiswaangano lyoonse. Ambweni muyandika kubeleka mawoola manji naa mujisi zinji zyakucita naa lyoonse mulimvwa kukatala. Aboobo, ncinzi ciyootugwasya kucita zyoonse nzyotukonzya kutegwa katujanika kumiswaangano? ^[1] (Amubone bupanduluzi buyungizyidwe.) Mbuti mbotukonzya kubakulwaizya mbotwiiya limwi Bbaibbele alimwi abamwi kutegwa kabajanika kumiswaangano lyoonse? Cibalo eeci cilapandulula ikaambo kujanika kumiswaangano (1) ncokutugwasya kapati, (2) mbokubagwasya bamwi, alimwi (3) ambocimukkomanisya Jehova. ^[2]—Amubone bupanduluzi buyungizyidwe.

4. Mbuti kuswaangana antoomwe mbokutugwasya kwiiya kujatikizya Jehova?

⁴ Miswaangano ilatuyiisya. Muswaangano umwi aumwi utugwasya kwiiya zinji kujatikizya Jehova. Mucikozyanyo, mbungano zinji caino-ino zyali kwiiya bbuku lyakuti Amubaa Cilongwe a Jehova lya Muswaangano wa Ciiyo ca Bbaibbele Cambungano. Ino mwakalimvwa buti ciindi notwakabandika bube bwa Jehova alimwi ambobalimvwa bakwesu kujatikizya nguwe? Masimpe eeci cakayungizya luyando ndomujisi kuli Jehova. Alimwi kumiswaangano tulaiya zinji kujatikizya Bbaibbele kwiinda mukuswiilila kumakani azitondezyo alimwi akwiinda mukuswiilila cakubikkila maano ciindi nokubalwa Bbaibbele. (Nehemiya 8:8) Alimwi amuyeeye buyo zintu zinji nzyotwiiya mvwiki amvwiki ciindi notulibambila twaambo tupati-pati twamu Bbaibbele alimwi anotumvwa bambi kabaamba nzyobakaiya.

5. Ino miswaangano yamugwasya buti kubelesya nzyomwiiya mu Bbaibbele alimwi akuyaambele munzila mbomukambauka?

⁵ Miswaangano ituyiisya kuzibelesya mubuumi bwesu zintu nzyotwiiya mu Bbaibbele. (1 Batesalonika 4:9, 10) Mucikozyanyo, sena kuli nomwakajanika ku Ciiyo ca Ngazi Yamulindizi icakamupa kuba aluyandisisyo lwakucita zinji mumulimo wa Jehova, kubotya mipailo yanu, alimwi akulekelela mukwesu naa mucizyi? Muswaangano ngotuba awalo mukati kamvwiki utuyiisya mbotukonzya kukambauka makani mabotu alimwi ambotukonzya kugwasya bamwi kumvwisya kasimpe kamu Bbaibbele.—Matayo 28:19, 20.

6. Ino miswaangano yesu itukulwaizya buti alimwi itugwasya buti kuba bayumu?

⁶ Miswaangano ilatukulwaizya. Nyika ya  Sataani isola kunyonganya lusyomo lwesu alimwi ilakonzya kutupa kulimvwa kutyompwa. Pele miswaaangano yesu ilatukulwaizya akutupa nguzu zyakuzumanana kubelekela Jehova. (Amubale Milimo 15:30-32.) Kanji-kanji, tubandika businsimi bwamu Bbaibbele mbobwali kuzuzikizyigwa. Eeci cilakonzya kutugwasya kusinizya kuti zisyomezyo zya Jehova zyakumbele ziyoozuzikizyigwa. Bakwesu abacizyi balatukulwaizya ikutali buyo ciindi nobapa makani pele aciindi nobaingula lyamiswaangano alimwi anobatembaula Jehova kwiinda mukwiimba camoyo woonse. (1 Bakorinto 14:26) Alimwi notubandika ambabo ciindi miswaangano kaitanatalika anoyamana, tulimvwa kukatalusyigwa akaambo kakuti tujisi balongwe banji ibatubikkila maano ncobeni.—1 Bakorinto 16:17, 18.

7. Nkaambo nzi ncociyandika kapati kujanika kumiswaangano yesu?

⁷ Kumiswaangano, tulagwasyigwa amuuya uusalala wa Leza. Jesu ubelesya muuya uusalala ooyu kusololela mbungano. Mubwini, wakatwaambila kuti tweelede ‘kumvwa ncowaamba muuya kumbungano.’ (Ciyubunuzyo 2:7) Muuya uusalala ulakonzya kutugwasya kulwana sunko akukambauka cabusicamba. Ulakonzya alimwi kutugwasya kusala kabotu. Nkakaambo kaako tweelede kucita kufwumbwa ncotukonzya kutegwa katujanika kumiswaangano yesu akutambula lugwasyo lwa muuya uusalala wa Leza.

8. Ciindi bakwesu nobatubona kumiswaangano akumvwa notwiingula akwiimba, ino bagwasyigwa buti? (Amubone kabbokesi kakuti “ Lyoonse Yamana Miswaangano Balimvwa Kabotu.”)

⁸ Kumiswaangano, tujisi coolwe cakutondezya bakwesu abacizyi kuti tulabayanda. Ibanji mumbungano yesu balaliyumya mumapenzi manji. Mwaapostolo Paulo wakalemba kuti: “Katuyeeyana.” (Bahebrayo 10:24, 25; bupanduluzi buyungizyidwe) Tulakonzya kutondezya kuti tulababikkila maano bakwesu kwiinda mukuswaangana antoomwe kutegwa tukulwaizyanye. Ciindi twaunka kumiswaangano, tutondezya bakwesu kuti tuyanda kuba ambabo, kubandika ambabo alimwi akuti tulabikkila maano kujatikizya mbobalimvwa. Alimwi tulabakulwaizya ciindi nobatumvwa katwiingula lyamiswaangano alimwi anotwiimba kuzwa ansi amoyo.—Bakolose 3:16.

9, 10. (a) Amupandulule majwi ngaakaamba Jesu mulugwalo lwa Johane 10:16 mbwaatugwasya kumvwisya kaambo ncociyandika kapati kuswaangana antoomwe abakwesu. (b) Ikuti katujanika lyoonse kumiswaangano, mbuti mbotukonzya kugwasya umwi iwakakakwa abanamukwasyi?

 ⁹ Ciindi notuunka kumiswaangano, tugwasya mbungano kukamantana. (Amubale Johane 10:16.) Jesu wakalikozyanisya kumweembezi mpoonya basikumutobela wakabakozyanisya kubutanga bwambelele. Amuyeeye kujatikizya kaambo aaka: Ikuti mbelele zyobilo zili acilundu, izimbi zyobilo zili mukkuti, alimwi yomwe mbelele ili kumbi buyo, sena inga mwaamba kuti mbelele eezyo zyosanwe mbutanga? Peepe, nkaambo mbelele izili mutanga lyomwe zikkala antoomwe alimwi zitobela mweembezi. Mbubwenya buyo, tatweelede kulizandula kubakwesu kwiinda mukutajanika kumiswaangano. Tweelede kuswaangana antoomwe kutegwa tube “tanga lyomwe” alimwi akutobela “mweembezi omwe.”

¹⁰ Miswaangano yesu itugwasya kukamantana katuli mukwasyi uuyandana. (Intembauzyo 133:1) Bamwi mumbungano bakakakwa kubazyali babo naa kubanabokwabo. Pele Jesu wakabasyomezya kubapa mukwasyi uuyoobayanda alimwi uuyoobalanganya. (Marko 10:29, 30) Ikuti kamujanika kumiswaangano lyoonse, kumuntu umwi mumbungano mulakonzya kuba bausyi, banyina naa mwanookwabo. Twayeeya makani aaya, tulakulwaizyigwa kusolekesya kujanika kumiswaangano yoonse.

11. Mbuti kujanika kumiswaangano mbokutugwaya kupa Jehova zintu ziyandika kupegwa kulinguwe?

¹¹ Kumiswaangano, tupa Jehova zintu ziyandika kupegwa kulinguwe. Mbwaanga ngo Mulengi wesu, tweelede kumulumba, kumulemeka  alimwi akumutembaula. (Amubale Ciyubunuzyo 7:12.) Tulakonzya kucita boobo kumiswaangano ciindi notupaila kuli Jehova, notumwiimbila alimwi anotwaamba kujatikizya nguwe. Eelo kaka ncoolwe citaliboteli ncotujisi mvwiki amvwiki cakukomba Jehova!

12. Ino Jehova ulimvwa buti ciindi notutobela mulawo wakwe wakuti katujanika kumiswaangano?

¹² Jehova ngowakatulenga, aboobo tweelede kumumvwida. Wakatulailila kuti katuswaangana antoomwe, kwaambisya mamanino mbwayaabuswena afwaafwi. Aboobo ciindi notutobela malailile aaya, Jehova ulakkomana. (1 Johane 3:22) Ulabona kuti tulayandisya kujanika kumiswaangano alimwi ulakukkomanina kapati kusolekesya koonse nkotucita kutegwa katujanika kumiswaangano.—Bahebrayo 6:10.

13, 14. Ino miswaangano itugwasya buti kuba acilongwe a Jehova alimwi a Jesu?

¹³ Ciindi notuunka kumiswaangano, tutondezya Jehova kuti tuyanda kuba acilongwe anguwe alimwi a Mwanaakwe. Kumiswaangano, twiiya makani aamu Bbaibbele akwiiya kuli Jehova nzyotweelede kucita alimwi ambotweelede kupona. (Isaya 30:20, 21) Noliba leelyo bantu bamwi ibatamubelekeli Jehova nobaboola kumiswaangano, balabona kuti Jehova ulatusololela. (1 Bakorinto 14:23-25) Jehova ulaisololela miswaangano yesu kwiinda mukubelesya muuya wakwe uusalala, alimwi nzyotwiiya kumiswaangano zizwa kulinguwe. Aboobo ciindi notuunka kumiswaangano, tulaswiilila nzyatwaambila Jehova, kubona mbwatuyanda kapati alimwi tulaba acilongwe ciyumu anguwe.

¹⁴ Jesu, Mutwe wambungano wakaamba kuti: “Ooko nkobabungene antoomwe bantu bobilo naa botatwe muzina lyangu, nkondili andime akati kabo.” (Matayo 18:20) Ibbaibbele alimwi lyaamba kuti Jesu ‘uleendeenda akati’ kambungano. (Ciyubunzyo 1:20–2:1) Cilisalede kuti Jehova a Jesu balaandiswe alimwi balatuyumya kumiswaangano yesu. Ino muyeeya kuti Jehova ulimvwa buti ciindi nabona kuti mulacita kufwumbwa ncomukonzya kutegwa mube acilongwe anguwe alimwi a Mwanaakwe?

15. Notuunka kumiswaangano tutondezya buti kuti tulayanda kumumvwida Leza?

¹⁵ Ciindi notuunka kumiswaangano, tutondezya Jehova kuti tuyanda kumumvwida. Jehova tatusinikizyi kucita nzyaamba. (Isaya 43:23) Aboobo ciindi notusala kutobela mulawo wakwe wakuti katujanika kumiswaangano, tutondezya kuti tulamuyanda akuti tusyoma kuti ulijisi nguzu zyakutwaambila nzyotweelede kucita. (Baroma 6:17) Mucikozyanyo, ncinzi ncotukonzya kucita kuti naa bapati bamulimo bayanda kuti katubeleka mawoola manji cakunga tatukonzyi kunoojanika kumiswaangano lyoonse? Ambweni mfwulumende yaamba kuti ikuti naa muntu kaswaangana kutegwa akombe Jehova, uyoobbadelesyegwa, kwaangwa naa kupegwa cisubulo cipati. Naa zimwi ziindi inga  twayanda buyo kucita zintu zimbi muciindi cakuunka kumiswaangano. Mubukkale oobu boonse, tweelede kusala cakucita. (Milimo 5:29) Pele kufwumbwa ciindi notusala kumumvwida, tulamukkomanisya.—Tusimpi 27:11.

16, 17. (a) Ino tuzyi buti kuti miswaangano yakali kuyandika kapati ku Banakristo mumwaanda wamyaka wakusaanguna? (b) Mbuti mukwesu George Gangas mbwaakali kulimvwa kujatikizya miswaangano ya Bunakristo?

¹⁶ Kuzwa nobakaswaangana antoomwe lya Pentekoste mumwaka wa 33 C.E., Banakristo bakali kuswaangana lyoonse kutegwa bakombe Jehova. Banakristo aabo “bakazumanana kubikkila maano kukuyiisya kwabaapostolo, ikuyanzana antoomwe.” (Milimo 2:42) Alimwi tiibakacileka kuswaangana antoomwe noliba leelyo nobakali kupenzyegwa amfwulumende yabana Roma abasololi bacikombelo caci Juda. Nokuba kuti tiicakali cuuba-uuba, bakacita kufwumbwa ncobakali kukonzya kucita kutegwa bazumanane kuswaangana antoomwe.

¹⁷ Abalo babelesi ba Jehova mazuba aano, balalumba kapati kumiswaangano eeyi alimwi balabotelwa kujanika. Ba George Gangas, ibakali mu Kabunga Keendelezya kwamyaka iinda ku 22 bakati: “Kulindime, kuswaangana abakwesu ncintu cimwi cindikkomanisya kapati mubuumi alimwi icindikulwaizya. Ndilakkomana kuba akati kabaabo basaanguna kusika ku Ŋanda ya Bwami, alimwi akuba akati kabaabo ibasyaalizya kuunka, ikuti naa kacikonzyeka. Ndilabotelwa ciindi nondibandika abantu ba Leza. Ciindi nondili akati kabo ndilimvwa kuliiba amukwasyi wangu, muparadaiso yakumuuya.” Mukwesu ooyu wakayungizya kuti: “Kulimvwa kwangu alimwi akulombozya kwangu nkwakuti kandijanika kumiswaangano.”

18. Ino mulimvwa buti kujatikizya miswaangano yesu, alimwi ncinzi ncomukanzide kucita?

¹⁸ Sena andinywe mbomulimvwa oobo kujatikizya kukomba Jehova? Ikuti kacili boobo, amuzumanane kusikila mpomugolela kutegwa kamuba antoomwe abakombinyoko kumiswaangano, noliba leelyo nocikatazya. Amumutondezye Jehova kuti masimpe mulimvwa mbubwenya mbuli Mwami Davida iwakaamba kuti: “Jehova, ndilaiyanda kapati ŋanda mokkala.”—Intembauzyo 26:8.