MULIMO wesu wakukambauka ulayandika kapati. Pele tabali boonse mbotukambaukila ibakamvwisya kaambo aaka. Nokuba kuti bantu balazikkomanina nzyolyaamba Bbaibbele, talili lyoonse nobacibona kuti cilayandika kwiiya Jwi lya Leza andiswe.

Mucikozyanyo, amubone makani aajatikizya ba Gavin. Bakali kujanika kumiswaangano ku Ŋanda ya Bwami, pele tiibakali kuyanda kuba aciiyo ca Bbaibbele. Ba Gavin bakapandulula kuti tiibakazyi zinji kujatikizya Bbaibbele alimwi tiibakali kuyanda kuti bantu bazyibe. Bakali kuyoowa kuti bakali kuyakwaambilwa kuti balaba Bakamboni ba Jehova, alimwi bakali kulibilika kuti banoofwubaazyigwa. Ino muyeeya buti? Sena cakali kukonzyeka kubagwasya ba Gavin? Amuyeeye bubotu muntu mbwakonzya kujana akaambo kakwiiya njiisyo zyamu Bbaibbele. Jehova wakaambila bana Israyeli kuti: “Majwi aangu aloke mbuli mume, mbuli lusuunsu luwida abwizu.” (Deuteronomo 31:19, 30; 32:2) Atwiiye zintu zimwi kujatikizya mume akukozyanisya mulimo wesu wakukambauka kulinguwo kutegwa tucikonzye kugwasya “bantu boonse.”—1 Timoteyo 2:3, 4.

Mume ulaloka kabotu-kabotu. Mume ulapangika buce-buce ciindi buungu ibuli mumulenga-lenga nobuba tudosi twamaanzi tusyoonto-syoonto. Muunzila nzi majwi aa Jehova ‘mbwaakaloka mbuli mume’? Wakaambaula kubantu bakwe caluzyalo, cakubomba moyo, alimwi cakubabikkila maano. Tulamwiiya ciindi notutondezya bulemu kuzintu nzyobasyoma bamwi. Tulabakulwaizya kuyeeya lwabo beni akulisalila. Ciindi notutondezya kuti tulababikkila maano bantu, bayooyandisisya kuzumina nzyotubaambila, alimwi mulimo wesu wakukambauka uyoozwidilila.

Mume ulakatalusya. Mulimo wesu wakukambauka uyoobakatalusya bantu ciindi notuyeeya nzila ziindene-indene nzyotukonzya kubelesya kutegwa tubagwasye kwiiya kasimpe. Mukwesu uutegwa Chris, iwakasaanguna kwaambila ba Gavin kujatikizya bubambe bwakwiiya Bbaibbele, tanaakabasungilizya kuzumina kwiiya. Muciindi caboobo, wakasola kubelesya nzila ziindene-indene kutegwa ba Gavin balikwaye kubandika makani aamu Bbaibbele. Ba Chris bakaambila ba Gavin kuti kuli mulumbe uuyandika kapati uubandikwa mu Bbaibbele lyoonse mbolibede akuti kwiiya kujatikizya mulumbe ooyu inga kwabagwasya kuzimvwisya kabotu zibandikwa kumiswaangano. Mpoonya, ba Chris bakapandulula kuti businsimi bwamu Bbaibbele bwakabagwasya kusyoma kuti Bbaibbele lyaamba masimpe. Akaambo kakucita boobu, bakabandika zinji kujatikizya mbobwakazuzikizyigwa businsimi bunji. Mibandi eeyi yakabakatalusya ba Gavin, mpoonya mukuya kwaciindi bakazumina kwiiya Bbaibbele.

Mume ulayandika kapati kubuumi bwazisyango. Mumyezi nokupya mucisi ca Israel, zimwi ziindi mvwula inga taiwi kwamyezi iili mbwiibede. Kakunyina mudumu uuzwa kumume, zisyango inga zyayuma. Jehova wakaambilalimwi kuti muciindi cesu kuyooba mbuli kuti kuli cilanga, nkokuti, bantu bayoomvwa nyota “yakuyanda kumvwa majwi aa Jehova.” (Amosi 8:11) Wakasyomezya kuti bananike bayooba “mbuli mume uuzwa kuli Jehova” ciindi nobakambauka makani mabotu aa Bwami, kabagwasyigwa ‘ambelele zimbi.’ (Mika 5:7; Johane 10:16) Mulumbe ngotukambauka ncibeela cabubambe bwa Jehova bwakupa buumi kubantu ibajisi nyota yakasimpe. Sena mulumbe ooyu tuubona kuti ulayandika kapati?

Mume ncilongezyo kuzwa kuli Jehova. (Deuteronomo 33:13) Mulimo wesu wakukambauka ulakonzya kuba cilongezyo naa cipego kuli baabo ibautambula. Ciiyo ca Bbaibbele cakali cipego kuli ba Gavin nkaambo cakabagwasya kujana bwiinguzi kumibuzyo yabo yoonse. Bakayaambele cakufwambaana, bakabbapatizyigwa, alimwi lino balikkomene kukambauka makani mabotu aa Bwami antoomwe abakaintu babo ba Joyce.

Kukozyanisya mulimo wesu wakukambauka kumume alimwi kulakonzya kutugwasya kumvwisya kuti kubeleka nkwacita umwi aumwi wesu mumulimo kulayandika kapati. Munzila nzi? Dosi lyomwe lyamaanzi taligwasyi kapati, pele ciindi nokuli madosi manji kapati, nyika ilateta akuba amudumu. Mbubwenya buyo, nzyotucita swebo tolikke mumulimo wakukambauka inga zyalibonya mbuli kuti nzisyoonto kapati kulindiswe. Pele akaambo kakubelekela antoomwe ababelesi ba Jehova ibabalilwa kumamiliyoni, bumboni bulapegwa “kumasi oonse.” (Matayo 24:14) Sena mulimo wesu wakukambauka uyooba cilongezyo kubantu kuzwa kuli Jehova? Inzya, mulumbe wesu uyooba mbuli mume, nkokuti unoobasikila kabotu-kabotu bantu, unoobakatalusya alimwi ulayandika kapati kubuumi!