1, 2. (a) Ino nkaambo nzi bantu mumazuba aamwaapostolo Paulo ncobakali kulibilika kujatikizya buzike alimwi alwaanguluko? (b) Kutegwa bantu bajane lwaanguluko lwini-lwini, ino Paulo wakabalailila kubikkila maano kuli ni?

BANTU ibakali kupona mubweendelezi bwabana Roma, mwalo Banakristo bakusaanguna mobakali kukkala, bakali kulisumpula kuba bantu ibacibwene caboola kumulawo, kubululami alimwi akulwaanguluko. Pele, nguzu abulemu bwa Bulelo bwa Roma bwakayeeme aabazike. Aciindi cimwi, mweelwe wabantu babalilwa ku 30 pesenti bakali bazike. Cakutadooneka, buzike alimwi alwaanguluko akali makani aakali mumizeezo yabantu-bantu buyo, kubikkilizya a Banakristo.

² Magwalo aamwaapostolo Paulo ajisi zinji zyakwaamba kujatikizya lwaanguluko. Nokuba boobo, makanze aamulimo wakwe tanaakali aakucinca bukkale bwabanamaleya naa twaambo twacisi, makani alo bantu bamumazuba aayo ngobakali kuyanda. Muciindi cakulanga kumweendelezi muntunsi naa mbunga yalwaanguluko, Paulo alimwi a Banakristonyina bakabeleka canguzu kutegwa bagwasye bamwi kwiiya makani mabotu aa Bwami bwa Leza alimwi ampindu mpati yacipaizyo cacinunuzyo ca Kristo Jesu. Paulo wakalailila basyominyina kubikkila maano ku Kasensa kalwaanguluko lwini-lwini.  Mucikozyanyo, mulugwalo lwakwe lwabili ndwaakalembela Banakristo baku Korinto, cakusalazya wakaamba kuti: “Jehova Muuya, alimwi ooko kuli muuya wa Jehova, kuli lwaanguluko.”—2Kor. 3:17.

3, 4. (a) Ino ncinzi cakasololela Paulo kulemba majwi aali ku 2 Bakorinto 3:17? (b) Ino ncinzi ncotweelede kucita kutegwa tukkomane alwaanguluko iluzwa kuli Jehova?

³ Kumatalikilo mulugwalo lwakwe ndwaakalembela bana Korinto, Paulo wakaamba kujatikizya bulemu bwa Musa ciindi naakaseluka kuzwa a Cilundu ca Sinai naakamana kulibonya kumungelo wa Jehova. Mbobakamubona buyo Musa, bantu bakayoowa, alimwi Musa wakalivwumba kubusyu. (Kul. 34:29, 30, 33; 2Kor. 3:7, 13) Paulo wakapandulula kuti, “pele eelyo muntu nasandukila kuli Jehova, cisani eeco cilagusyigwa.” (2Kor. 3:16) Ino majwi aa Paulo apandulula nzi?

⁴ Mbubwenya mbotwakaiya mucibalo cainda, Jehova, Mulengi wazintu zyoonse, alikke nguujisi lwaanguluko cakumaninina alimwi ilutagoli. Tacidoonekwi kuti aali Jehova alimwi “ooko kuli muuya wa Jehova,” kuli lwaanguluko. Kutegwa tukkomane akujana mpindu kulwaanguluko oolo, tweelede ‘kusandukila kuli Jehova,’ nkokuti kuba acilongwe anguwe. Bana Israyeli munkanda tiibakali kubona milimo ya Jehova kulimbabo munzila yakumuuya. Cakali mbuli kuti myoyo yabo amizeezo yakalivwumbidwe alimwi yakali miyumu, yakabikkilide buyo maano kukubelesya lwaanguluko lupya lwakuzwa mu Egepita munzila yakumubili.—Heb. 3:8-10.

5. (a) Ino ndwaanguluko lwamusyobo nzi iluboola amuuya wa Jehova? (b) Ino tuzyi buti kuti buzike bwakumubili tabweelede kumanizya lwaanguluko Jehova ndwapa? (c) Ino mibuzyo nzi njotweelede kwiingula?

⁵ Nokuba boobo, lwaanguluko iluswaangene amuuya wa Jehova lulainda akwaanguluka kubuzike bwakumubili. Lulainda kapati akusolekesya kwabantu nkobakonzya kulangila kujana, muuya wa Jehova uleta lwaanguluko kubuzike bwacibi alufwu, alimwi akubuzike bwabukombi bwakubeja alimwi amicito yambubo. (Rom. 6:23; 8:2) Eelo kaka oolo ndwaanguluko lwabulemu! Muntu ulakonzya kukkomana ampindu zyalwaanguluko luli boobo noliba leelyo nali mubuzike. (Matl. 39:20-23) Oobu mbombubo mbocakabede ku Mucizyi Nancy Yuen a Mukwesu Harold King, boonse bobilo ibakaliyumya kwamyaka minji kukwaangwa akaambo kalusyomo lwabo. Mulakonzya kubona akumvwa zyakuluula zya JW Broadcasting. (Amubone aalembedwe kuti INTERVIEWS AND EXPERIENCES > ENDURING TRIALS.) Aboobo tweelede kulanga-langa kuti ino mbuti mbotukonzya kutondezya kuti tulalubikkila maano lwaanguluko lwesu? Alimwi ncinzi ncotukonzya kucita kutegwa tulubelesye kabotu lwaanguluko oolu?

6. Ino mbuti bana Israyeli mbobakatondezya kutalumba akaambo kalwaanguluko Jehova ndwaakabapede?

⁶ Ciindi notuzyiba mbocili ampindu kapati cipego cimwi icidula kapati, tulakulwaizyigwa kutondezya kulumba kuli yooyo iwakatupa. Bana Israyeli kunyina nobakatondezya kulumba kulwaanguluko Jehova ndwaakabapa ciindi naakabaangununa mubuzike mu Egepita. Nokwakainda buyo myezi misyoonto kuzwa nobakaangununwa, bakatalika kulombozya zintu nzyobakali kulya akunywa mu Egepita alimwi bakazitongooka zintu nzyaakali kubapa Jehova, mane buya bakali kuyanda kupiluka ku Egepita. Amweezyeezye buyo, bakabikka ‘nswi, makowa, banamunywa, mahanyisi amagaliki’ mubusena bwakusaanguna ikwiinda lwaanguluko ndwaakabapa Leza lwakukomba Leza mwini-mwini, Jehova. Sena tacigambyi kuti ncencico Jehova ncaakabanyemena kapati bantu bakwe? (My. 11:5, 6, 10; 14:3, 4) Eelo kaka nciiyo kulindiswe!

7. Ino mbuti Paulo mbwaakacita kweelana alulayo lwakwe lujanwa ku 2 Bakorinto 6:1, alimwi mbuti andiswe mbotukonzya kucita boobo?

⁷ Mwaapostolo Paulo wakakulwaizya Banakristo  boonse kuti tabeelede kuubya-ubya lwaanguluko Jehova ndwaabapa caluzyalo kwiinda mu Mwanaakwe, Jesu Kristo. (Amubale 2 Bakorinto 6:1.) Amuyeeye kuusa alimwi akupenga mumoyo kwa Paulo akaambo kakulimvwa kuba mubuzike bwacibi alufwu. Pele, calukkomano wakaamba kuti: “Aalumbwe kaka Leza iwandivwuna kwiinda muli Jesu Kristo Mwami wesu!” Ino nkaambo nzi? Wakapandulwida Banakristonyina kuti: “Nkaambo mulawo wamuuya ooyo uupa buumi muli Kristo Jesu wamwaangununa kumulawo wacibi awalufwu.” (Rom. 7:24, 25; 8:2) Kweelana acikozyanyo ca Paulo, andiswe tatweelede kuubya-ubya lwaanguluko lwakuti Jehova watwaangulula kubuzike bwacibi alimwi alufwu. Kwiinda mucinunuzyo, tulakonzya kubelekela Leza wesu amanjezyeezya aasalala alimwi akujana lukkomano lwini-lwini mukucita boobo.—Int. 40:8.

8, 9. (a) Ino nkucenjezya nzi mwaapostolo Petro nkwaakapa kujatikizya kubelesya lwaanguluko lwesu? (b) Ino nintenda nzi ziliko kulindiswe mazuba aano?

⁸ Nokuba boobo, kuyungizya aakutondezya kulumba, tweelede kubikkila maano kutegwa tutabi notulubelesya munzila iitali kabotu lwaanguluko lwesu lwakulisalila iluyandika kapati. Mwaapostolo Petro wakacenjezya kujatikizya kubelesya lwaanguluko lwesu kuba civwumbyo cakucita zisusi zyesu zyanyama. (Amubale 1 Petro 2:16.) Sena kucenjezya ooku takumupi kuyeeya cakabacitikila bana Israyeli munkanda? Alimwi ntenda iciliko kulindiswe, ambweni akwiindila buya. Saatani anyika yakwe bazumanana kuleta zintu zyoongelezya mumakani aakusala zyakusama akulibamba, zyakulya azyakunywa, zyakulikondelezya alimwi azintu buyo zimbi. Basikusambala bacenjezu kanji-kanji babelesya bantu bajisi ziwa zibotu kutegwa basumpule muuya wakuyanda kujana zintu zinji nzyotutayandiki. Eelo kaka ncuuba-uba kucegwa mutukole ootu akubelesya lwaanguluko lwesu munzila iitali kabotu!

⁹ Lulayo lwa Petro lulabeleka amumbazu ziyandika kapati zyabuumi, mbuli kusala muntu nkwacita mumakani aalwiiyo, mulimo naa cintu cimwi ncayandisya kucita. Mucikozyanyo, mazuba aano bakubusi muzikolo basinikizyigwa kuzwidilila kutegwa bakatambulwe muzikolo zilaampuwo ziyiisya lwiiyo lwaatala. Baloongelezyegwa kusyoma kuti lwiiyo lwaatala lujalula mulyango kumulimo uuvwolwa mali manji alimwi uusumpukide, alimwi kanji-kanji myeelwe ilapegwa iitondezya kwiindana kupati kuliko kujatikizya mali aavwolwa akati kabaabo ibakajanika muzikolo eezyo alimwi abaabo ibakamanizya buyo lwiiyo lwakusekondali. Mbwaanga bajisi zyakusala izikonzya kubujatikizya kapati buumi bwabo boonse, bakubusi balakonzya koongelezyegwa kapati azintu eezyi zyoonse. Ino ncinzi balo alimwi abazyali babo ncobeelede kuyeeya?

10. Ino ncinzi ncotweelede kuyeeya caboola kukubelesya lwaanguluko lwesu mumakani aakulisalila?

¹⁰ Bantu bamwi balakonzya kulimvwa kuti mbwaanga kusala mumbazu eezyi makani aakulisalila, beelede kuba alwaanguluko lwakusala cikonzya kubakkomanisya kufwumbwa buyo kuti manjezyeezya aabo kaabazumizya kucita oobo. Ambweni bajisi muzeezo uujanika mumajwi aa Paulo ngaakaambila Banakristo baku Korinto kujatikizya zyakulya aakuti: “Ino nkaambo nzi lwaanguluko lwangu ncolweelede kweendelezyegwa amanjezyeezya aamuntu umbi?” (1Kor. 10:29) Nokuba kuti masimpe kuti tulijisi lwaanguluko lwakulisalila mumakani aalwiiyo alimwi amulimo, tweelede kuyeeya kuti lwaanguluko lwesu kuli mpolugolela alimwi akuti kusala koonse nkotucita kulijisi zintu zibyaabi zikonzya kutobela. Akaambo kaceeci, Paulo mumajwi aakwe wakasaanguna kwaamba majwi aaya aakuti: “Zintu zyoonse zilizumizyidwe, pele tazili zyoonse zilaampindu. Zintu zyoonse zilizumizyidwe, pele tazili zyoonse iziyaka.” (1Kor. 10:23) Cakutadooneka eeci citugwasya kubona kuti kuli zintu ziyandika kapati nzyotweelede kubikkila maano kwiinda kulombozya  kwesu caboola kukubelesya lwaanguluko lwesu mumbazu zyoonse zyabuumi bwesu.

11. Ino makanze nzi aakapa kuti swebo twaangununwe?

¹¹ Mukucenjezya kwakwe ikujatikizya kutalubelesya kabotu lwaanguluko, Petro alimwi wakaamba iceelede kutukulwaizya. Wakatukulwaizya kubelesya lwaanguluko lwesu “mbuli bazike ba Leza.” Aboobo makanze eeni aakapa kuti Jehova kwiinda muli Jesu atwaangulule kumulawo wacibi alufwu ngakuti swebo katupona buumi bwakulyaaba “mbuli bazike ba Leza.”

12. Ino ncikozyanyo nzi Nowa amukwasyi wakwe ncobakatusiila?

¹² Nzila iinda kubota yakulikwabilila kutegwa tutalubelesyi munzila iitali kabotu lwaanguluko lwesu akuba bazike alimwi kuzisusi zyanyika, nkujata bubi muzintu zyakumuuya. (Gal. 5:16) Mucikozyanyo, amulange-lange sinsiku Nowa amukwasyi wakwe. Bakali kupona munyika iyakazwide nkondo alimwi akutalilemeka. Nokuba boobo, tiibakajatikizyigwa azisusi nzyobakali kutobela bantu ibakabazingulukide. Ino bakacikonzya buti kucita boobo? Bakasala kujata bubi mumilimo yoonse Jehova njaakabapede kuti bacite—kuyaka bwato, kuyobola cakulya cabo acabanyama alimwi akucenjezya bantu. “Nowa wakacita zyoonse kweelana ambwaakamulailila Leza. Wakacita mbubonya oobo.” (Matl. 6:22) Ino ncinzi cakatobela? Nowa alimwi amukwasyi wakwe bakafwutuka mamanino aanyika iilya.—Heb. 11:7.

13. Ino mulimo nzi Jesu ngwaakatambula akupa basikumutobela?

¹³ Ino ncinzi Jehova ncatulailila kucita mazuba aano? Mbotuli basikwiiya ba Jesu, tuluuzyi kabotu mulimo ngotupedwe a Leza. (Amubale Luka 4:18, 19.) Mazuba aano, bunji bwabantu bacoofwaazyidwe aleza wabweende bwazintu oobu alimwi bali mubuzike—mumakani aabukombi alimwi abukkale. (2Kor. 4:4) Aboobo ncoolwe kutobela cikozyanyo ca Jesu cakugwasya bantu kutegwa bamuzyibe alimwi akumukomba Jehova, Leza waluumuno. (Mt. 28:19, 20) Ooyu tauli mulimo muuba-uba pe, alimwi kuli buyumu-yumu bunji. Mumasi aamwi, bantu bayaabwiindila kutaubikkila maano mulimo wesu, ibamwi nokuba  kukalala buya. Mubuzyo umwi aumwi wesu ngwayelede kulibuzya ngwakuti, ‘Sena lwaanguluko lwangu ndilakonzya kulubelesya kusumpula mulimo wa Bwami?’

14, 15. Ino bantu ba Jehova baubona buti mulimo wakukambauka? (Amubone cifwanikiso icili kumatalikilo aacibalo.)

¹⁴ Cilakulwaizya kapati kubona kuti ibanji bacibona mbocibindide ciindi cesu alimwi babuubya-ubya buumi bwabo kutegwa batole lubazu mumulimo waciindi coonse. (1Kor. 9:19, 23) Bamwi babelekela muzilawo izili mobakkala; bambi balongela kumasena aabulide. Mabbuku atondezya kuti mumyaka yosanwe yainda, mweelwe waakati-kati wabapainiya baciindi coonse wakomena kwiinda ku 1,100,000, alimwi bantu bainda ku 250,000 banjila mumulimo waciindi coonse. Eelo kaka makani aaya atondezya bubotu buboola akaambo kakulubelesya cabusongo lwaanguluko mukubelekela Jehova!—Int. 110:3.

¹⁵ Ino ncinzi cakabagwasya bakwesu abacizyi aaba ikulubelesya cabusongo lwaanguluko lwabo? Amubone kujatikizya ba John aba Judith, balo kwamyaka yainda iili 30 ibabeleka mumasi manji. Balayeeya kuti iciindi Cikolo Camulimo Wabupainiya nocakatalika mu 1977, cakakankaizya kapati kujatikizya ikulonga cakulyaaba kuyoobelekela kubusena bubulide. Kutegwa babikkile maano kuzuzikizya makanze aabo aaya, ba John bakaamba kuti kwaziindi zinji bakali kucinca-cinca milimo kutegwa bazumanane kupona buumi buuba-uba. Mukuya kwaciindi, nobakasika kucisi cimbi, bakajana kuti kupaila kuli Jehova alimwi akusyoma nguwe kwakabagwasya ikuzunda zisinkilizyo mbuli kwiiya mwaambo mupya, kuzyibila zilengwa zipya alimwi akuliyumya kubuyumuyumu bwambokuca. Ino myaka eeyo yamulimo yakabajatikizya buti? Ba John bakaamba kuti: “Ndakalimvwa kuti ndakajisi bubi kapati mumulimo wiinda kubota ngondatakaningazyibide naa kucita. Jehova wakaba mwini-mwini ncobeni kulindime, mbubwenya mbuli usyi siluyando mbwakonzya kuba. Lino ndilacimvwisya kabotu ncolwaamba lugwalo lwa Jakobo 4:8 kuti: ‘Amuswene kuli Leza, eelyo awalo ulaswena kulindinywe.’ Ndakalizyi kuti ndakacijana ncondakali kuyandaula, ibuumi bupa kukkutila.”

16. Ino mbuti banji ibajisi bukkale butabazumizyi kubeleka mumulimo waciindi coonse mbobalubelesya lwaanguluko lwabo cabusongo?

¹⁶ Ikwiindana aba John aba Judith, ibamwi bajisi bukkale ibubazumizya kubeleka mumulimo waciindi coonse kwaciindi buyo cisyoonto. Nokuba boobo, ibanji cibabeda coolwe kulyaaba kubeleka milimo yamayake aasumpula bukombi bwakasimpe munyika yoonse. Mucikozyanyo, ciindi maofesi mapati naakali kuyakwa ku Warwick, New York, bakwesu abacizyi ibasika ku 27,000 bakalyaaba kubeleka—kwaciindi citalikila kunsondo zyobilo kusikila kumwaka naa kwiinda waawo. Ibunji bwabo bakazileka kwaciindi cili mbocibede zintu zimwi nzyobakali kucita mubuumi bwabo kutegwa bakabeleke ooko. Eelo kaka taciliboteli cikozyanyo cakubelesya lwaanguluko ndwaakabapa Leza kutegwa bamutembaule akumulemeka Jehova, Leza walwaanguluko!

17. Ino mbulangizi nzi bubotu mbobalangila aabo lino ibabelesya cabusongo lwaanguluko ndobapedwe a Leza?

¹⁷ Tulalumba kapati kuti twamuzyiba Jehova alimwi tulakkomana alwaanguluko iluboola akaambo kabukombi bwakasimpe. Aboobo atutondezye kwiinda muzintu nzyotusala kuti lwaanguluko lwesu tulubona kuti lulayandika kapati. Muciindi cakulubelesya munzila iitali kabotu, lwaanguluko lwesu alimwi azyoolwe ziboola akaambo kandulo atuzibelesye kubelekela Jehova kusikila mpotugolela. Ikuti twacita boobo, tulakonzya kulangila kuyookkomana azilongezyo nzyaasyomezya Jehova kumbele ciindi aakuzuzikizyigwa majwi aabusinsimi oobu: “Zilenge azyalo ziyakwaangununwa kubuzike bwakubola akuba alwaanguluko lwabulemu bwabana ba Leza.”—Rom. 8:21.