1. Ino Jehova wakapa kuyumya-yumya kuli buti ciindi nokwakaba kuzanga mu Edeni?

KUZWA ciindi bantu nobakaba acibi alimwi akutalondoka, Jehova watondezya kuti ngu Leza uuyumya-yumya. Kalitanalampa nobakazanga mu Edeni, wakapa baluzubo lwa Adamu kaambo ncobakeelede kuba basicamba. Bulangizi tiibwakamanina limwi kumukwasyi wabantu. Kufwumbwa buyo kuti bacimvwisya, cisyomezyo cabusinsimi icilembedwe ku Matalikilo 3:15 cakali kuyoopa bantu bulangizi bwakuti mukuya kwaciindi “imuzoka ooyo wakaindi,” Saatani Diabolosi, amilimo yakwe mibi yoonse yakali kuyoonyonyoonwa.—Ciy. 12:9; 1Joh. 3:8.

2. Ino mbuti Jehova mbwaakamuyumya-yumya Nowa?

² Mubelesi wa Jehova Nowa wakapona munyika bantu mobatakali kumuyanda Leza mwalo balikke ibakali kukomba Jehova bakali bamukwasyi wakwe. Kazingulukidwe ankondo alimwi akutalilemeka  mumakani akoonana, Nowa wakali kukonzya kutyompwa. (Matl. 6:4, 5, 11; Jud. 6) Pele Jehova wakamwaambila makani alo akapa kuti abe abusicamba mbwaakali kuyandika kutegwa aliyumye ciindi naakali kusolekesya “kweenda a Leza.” (Matl. 6:9) Jehova wakaambila Nowa kuti wakali kuyooyinyonyoona nyika mbyaabi eeyo alimwi wakamulailila kujatikizya ncaakeelede kucita kutegwa abone masimpe kuti mukwasyi wakwe ulikwabilidwe. (Matl. 6:13-18) Jehova wakamutondezya Nowa kuti wakali Leza uuyumya-yumya.

3. Ino nkuyumizyigwa kuli buti Joshua nkwaakapegwa? (Amubone cifwanikiso icili kumatalikilo aacibalo.)

³ Kumbele, Joshua wakaba amukuli mupati wakugwasya bantu ba Leza kuti bakkale Munyika Yakasyomezyegwa. Eeci cakali kubikkilizya kuzunda masi aakakkede mucilawo eeco alimwi aakajisi basikalumamba basinguzu kapati. Joshua wakalijisi twaambo itwakeelede kumupa kuyoowa. Mbwaanga wakalizyi oobo, Jehova wakalailila Musa kuti amuyumye-yumye Joshua. Leza wakati: “Kobikka Joshua kuba musololi alimwi umukulwaizye akumuyumya-yumya, nkaambo nguuyoosololela bantu aaba alimwi ngonguwe uuyoobapa kuti bakone nyika njotiibone.” (Dt. 3:28) Katanautalika mulimo ooyu, Jehova wakamuyumya-yumya kwiinda mukumwaambila kuti: “Aboobo lino ndikulailila kuti, koyuma akuba sicamba. Utayoowi nokuba kukankama, nkaambo Jehova Leza wako unooli anduwe kufwumbwa nkounka.” (Jos. 1:1, 9) Eelo kaka wakakulwaizyigwa akuumbulizyigwa!

4, 5. (a) Ino nkuyumya-yumya kuli buti Jehova nkwaakapa bantu bakwe bakaindi? (b) Ino mbuti Jehova mbwaakamuyumya-yumya Mwanaakwe?

⁴ Jehova tanaakali kuyumya-yumya buyo muntu omwe kumugama, pele alimwi wakali kwaamba majwi aayumya-yumya kubantu bakwe kabali nkamu. Mumajwi aabusinsimi oobu aakali kukonzya kuumbulizya ba Juda ibakali mubuzike mu Babuloni, Jehova wakaamba kuti: “Utayoowi pe, nkaambo ndilaanduwe. Utalibiliki pe, nkaambo ndime Leza wako. Ndilakuyumya, inzya ndilakugwasya, ncobeni ndinookujatilide ajanza lyangu lyalulyo lyabululami.” (Is. 41:10) Banakristo bakusaanguna bakajisi cisyomezyo ncemunya, alimwi abalo bantu ba Leza mazuba aano ncecisyomezyo ncobajisi.—Amubale 2 Bakorinto 1:3, 4.

⁵ Jesu lwakwe mwini wakayumizyigwa kuli Bausyi. Naakali kubbapatizyigwa, Jesu wakamvwa jwi kuzwa kujulu kaliti: “Ooyu Mwanaangu ngweyandisya, ngwekkomanina.” (Mt. 3:17) Eelo kaka kweelede kuti majwi aayo akamuyumya-yumya Jesu mumulimo wakwe woonse waanyika!

6. Ino mbuti cikozyanyo camatalenta mbociyumya-yumya?

⁶ Jesu wakaiya cikozyanyo ca Bausyi. Cikozyanyo camatalenta, icakapegwa mubusinsimi bwa Jesu kujatikizya mamanino aabweende bwazintu, cikulwaizya kusyomeka. Simalelo wakacitila umwi aumwi wabazike bakwe basyomeka cintu cibotu kwiinda mukwaamba majwi aaya aakuti: “Wacita kabotu, omuzike mubotu alimwi uusyomeka! Wakasyomeka muzintu zisyoonto. Ndiyookusala kuti kolanganya zintu zinji. Konjila ukondwe antoomwe asimalelaako.” (Mt. 25:21, 23) Eelo kaka nkukulwaizya kubotu ooku ikupa kuzumanana kubelekela Jehova cakusyomeka!

7. Ino nkukulwaizya kuli buti Jesu nkwaakapa baapostolo bakwe alimwi ikapati kuli Petro?

⁷ Baapostolo ba Jesu kanji-kanji bakali kukazyanya kujatikizya iwakali mupati akati kabo, pele Jesu cakukkazika moyo wakabakulwaizya kulicesya akuba babelesi, ikutali kuba bapati bamulimo. (Lk. 22:24-26) Ikapati Petro ziindi zinji wakali kucita zintu izyakali kupa Jesu kutyompwa.  (Mt. 16:21-23; 26:31-35, 75) Muciindi cakumukaka Petro, Jesu wakamukulwaizya alimwi buya akumupa mukuli wakuyumya basyominyina.—Joh. 21:16.

8. Ino mbuti Hezekiya mbwaakayumya-yumya basilutwe babasikalumamba alimwi abantu ba Juda?

⁸ Noliba leelyo Mwana wa Jehova katanasika anyika akupa cikozyanyo cilondokede cambokucitwa kuyumya-yumya, babelesi basyomeka ba Jehova bakalizyi mbociyandika kuyumya-yumya. Ciindi Hezekiya naakakongwa abana Asuri, wakabunganya basilutwe babasikalumamba alimwi abantu ba Juda kuti abayumye-yumye. ‘Aboobo bantu bakayumizyigwa amajwi aakwe.’—Amubale 2 Makani 32:6-8.

9. Ino bbuku lya Jobu lituyiisya nzi kujatikizya kuyumya-yumya?

⁹ Nokuba kuti walo kumugama wakali kuyandika luumbulizyo, Jobu wakapa “basikuumbulizya bakatazya” botatwe iciiyo kujatikizya kuyumya-yumya. Wakabaambila kuti naakali nguwe, ‘naakabayumya amajwi aazwa kumulomo wakwe, alimwi naakabakatalusya amajwi aaumbulizya aazwa kumilomo yakwe.’ (Job. 16:1-5) Kumamanino, Jobu wakaumbulizyigwa a Elihu alimwi a Jehova kumugama.—Job. 33:24, 25; 36:1, 11; 42:7, 10.

10, 11. (a) Ino nkaambo nzi mwana musimbi wa Jefita ncaakali kuyandika kuyumya-yumya? (b) Ino mbaani mazuba aano ibayandika kuyumya-yumya kuli boobo?

¹⁰ Cikozyanyo acimbi camuntu kaindi iwakali kuyandika kuyumya-yumya, wakali mwana musimbi wa Jefita. Katanaunka kuyoolwana bana Amoni, Mubetesi Jefita wakakonka kuti, ikuti naa Jehova akamupe kuzunda, muntu wakusaanguna iwakali kuyoozwa kumucinga kuzwa kunkondo wakali kuyakwaabwa kumulimo wa Jehova kutente lyakukombela Leza. Lino cakacitika ncakuti mwanaakwe musimbi, mwana alikke ngwaakajisi, ngonguwe iwakazwa kuti asekelele kuzunda antoomwe anguwe. Jefita wakapenga mumoyo. Pele wakacizuzikizya cikonke cakwe aboobo wakatuma mwanaakwe nakalindu ku Silo kutegwa akabeleke kutente lyakukombela kwabuumi bwakwe boonse.—Bab. 11:30-35.

¹¹ Nokuba kuti eeci cakali ciyumu kuli Jefita, ceelede kuti cakaindila kumuyumina mwanaakwe musimbi, ooyo cakulisungula iwakatobela ncobakasala bausyi. (Bab. 11:36, 37) Aboobo wakasweekelwa coolwe cakukwatwa, cakuba abana alimwi acakupa kuti zina lyamukwasyi alukono zizumanane. Aboobo wakali kuyandika kuumbulizyigwa alimwi akuyumizyigwa. Cibalo camu Bbaibbele caamba kuti: “Cakaba cilengwa mu Israyeli cakuti: Mwaka amwaka, basimbi bana Israyeli kabaunka kuyoolumbaizya mwana wa Jefita muna Gileadi, mazuba one mumwaka.” (Bab. 11:39, 40) Sena tabeelede kulumbaizyigwa akuyumizyigwa abalo Banakristo batakwete naa kukwatwa aabo ibabelesya bukkale bwabo oobu kutegwa babikkile maano kapati ‘kuzintu zya Mwami’?—1Kor. 7:32-35.

12, 13. Ino mbuti Petro ‘mbwaakayumya-yumya basyominyina’?

¹² Mubusiku katanafwa, Jesu wakaambila mwaapostolo Petro kuti: “Simoni, Simoni, bona! Saatani uyanda kuti amupupulule nywebo nyoonse mbuli wiiti. Pele ndakukombelezyela mumupailo kuti lusyomo lwako lutamani; eelyo wapiluka ayebo ubayumye ibanyoko.”—Lk. 22:31, 32.

¹³ Petro wakali musemu mumbungano ya Bunakristo yakusaanguna. (Gal. 2:9) Wakayumya-yumya basyominyina kwiinda mucikozyanyo cakwe cabusicamba lya Pentekoste alimwi akuyakumbele. Kumamanino aamulimo wakwe, wakabalembela Banakristonyina. Naakali  kupandulula kaambo ncaakabalembela, wakaamba kuti: “Ndamulembela majwi aaya masyoonto kutegwa ndimukulwaizye alimwi akupa bumboni businizyide bwakuti oolu nduzyalo lwa Leza lwini-lwini. Amwiime nji mulindulo.” (1Pet. 5:12). Magwalo ngaakasololelwa kulemba Petro azumanana kubayumya-yumya Banakristo kuzwa kaindi kusikila mazuba aano. Eelo kaka tulakuyanda kukulwaizya ooku ciindi notulindila kuzuzikizyigwa kwazisyomezyo zya Jehova!—2Pet. 3:13.

14, 15. Ino mbuti magwalo aakasololelwa amuuya ngaakalemba mwaapostolo Johane mbwaakali kubayumya-yumya Banakristo mumyaanda yamyaka yoonse?

¹⁴ Mwaapostolo Johane awalo wakali musemu mumbungano ya Banakristo yakusaanguna. Cibalo cakwe ca Makani Mabotu cikondelezya icijatikizya mulimo wa Jesu cakali kubakulwaizya Banakristo mumyaanda yamyaka yoonse—alino cicikulwaizya. Makani Mabotu aakwe alikke ngaamba majwi aa Jesu aakuti luyando ndoluzyibya basikwiiya bakwe beni-beni.—Amubale Johane 13:34, 35.

¹⁵ Magwalo aa Johane otatwe alijisi mbono azimwi zyakasimpe. Ciindi notulemenwa akaambo kacibi, sena tatukatalusyigwi notubala kuti “bulowa bwa Jesu . . . bulatusalazya kuzibi zyoonse”? (1Joh. 1:7) Alimwi ikuti naa moyo wesu wazumanana kutupa mulandu, sena tatulimvwi kuusa kapati mpoonya alimwi akulumba kapati ciindi notubala kuti “Leza mupati kwiinda myoyo yesu”? (1Joh. 3:20) Johane alikke nguwakalemba kuti “Leza nduyando.” (1Joh. 4:8, 16) Lugwalo lwakwe lwabili alwatatu lulumbaizya Banakristo ibazumanana “kweenda mukasimpe.”—2Joh. 4; 3Joh. 3, 4.

16, 17. Ino ncinzi mwaapostolo Paulo ncaakabakulwaizya Banakristo bakusaanguna?

¹⁶ Mumwaanda wamyaka wakusaanguna, ambweni mwaapostolo iwakabakulwaizya kapati basyominyina wakali mwaapostolo Paulo. Kulibonya kuti kumatalikilo kwini nobwakatalika  Bunakristo, banji akati kabaapostolo bakasyaala mu Jerusalemu, imunzi iwakazumanana kuba busena nkokakabede kabunga keendelezya. (Mil. 8:14; 15:2) Banakristo mu Judaya bakali kukambauka kujatikizya Kristo kubantu aabo akaambo kakuba mubukombi bwaci Juda ibakali kusyoma kuti kuli Leza omwe. Kulubazu lumwi, mwaapostolo Paulo wakatumwa amuuya uusalala kuyookambauka kubantu bamumasi aaba Giriki abana Roma, aabo ibakali kukomba baleza banji.—Gal. 2:7-9; 1Tim. 2:7.

¹⁷ Paulo wakeenda mumasena manji alimwi amasena aali kulamfwu mucisi eeco lino ciitwa kuti Turkey, kubikkilizya acisi ca Greece a Italy, kayaabutalisya mbungano zya Bunakristo akati kabantu ibatakali ba Juda. Aaba ibakazwide aakusanduka kuba Banakristo ‘bakapenzyegwa abasicisinyina’ aboobo bakali kuyandika kuyumya-yumya. (1Tes. 2:14) Mumwaka wakuma 50 C.E., Paulo wakalembela mbungano yaku Tesalonika iyakazwide aakutalisyigwa kuti: “Lyoonse tulamulumba Leza notumubandauka nywebo nyoonse mumipailo yesu, nkaambo tatuleki kuyeeya mulimo wanu walusyomo akubeleka kwanu kwaluyando alimwi akuliyumya kwanu.” (1Tes. 1:2, 3) Kuyungizya waawo, wakabakulwaizya kuyumizyanya kati: “Amuzumanane kukulwaizyanya akuyakana umwi amweenzinyina.”—1Tes. 5:11.

18. Ino mbuti kabunga keendelezya kamumwaanda wamyaka wakusaanguna mbokakamuyumya-yumya Filipo?

¹⁸ Kabunga keendelezya kamumwaanda wamyaka wakusaanguna kakali kuyumya-yumya kapati kuli baabo ibakali kusololela alimwi aku Banakristo boonse. Ciindi Filipo mukambausi naakakambauka kujatikizya Kristo kubana Samariya, wakagwasyilizyigwa kapati abaabo ibakali mukabunga keendelezya. Kakatuma bobilo kuzwa mukabunga, Petro alimwi a Johane, kutegwa bakapailile basyomi bapya kuti batambule muuya uusalala. (Mil. 8:5, 14-17) Eelo kaka kweelede kuti Filipo kumugama alimwi abaabo mbaakasandula bakayumizyigwa kapati kwiinda mukugwasyigwa akabunga keendelezya!

19. Ino lugwalo ilwakatumwa akabunga keendelezya lwakazijatikizya buti mbungano zya Bunakristo zyakusaanguna?

¹⁹ Nokwakainda ciindi, kabunga keendelezya kakalombwa kutegwa kakosole makani naa cilayandika kuti Banakristo ibatakali ba Juda kabapalulwa, kweelana ambocakali kuyandika kuba Juda mu Mulawo wa Musa. (Mil. 15:1, 2) Kwiinda mukusololelwa amuuya uusalala alimwi anobakalanga-langa Magwalo ncaamba, bakwesu beendelezya bakakosola kuti eeci tiicakacili kuyandika pe, alimwi bakalemba lugwalo kumbungano kujatikizya makani aaya. Baiminizi bakabunga keendelezya bakatumwa kutola lugwalo oolu kumbungano. Ino ncinzi cakatobela? “Nobakamana kulubala, bakakondwa kujatikizya makani aayo aakukulwaizya ooko.”—Mil. 15:27-32.

20. (a) Ino nkuyumya-yumya kuli buti nkokapa Kabunga Keendelezya mazuba aano kubunyina bwanyika yoonse? (b) Ino mubuzyo nzi uyakwiingulwa mucibalo citobela?

²⁰ Mazuba aano, Kabunga Keendelezya ka Bakamboni ba Jehova kalabayumya-yumya bamukwasyi wa Beteli, babelesi ibali mumulimo waalubazu waciindi coonse ibabelekela mumuunda alimwi akubunyina bwanyika yoonse bwa Banakristo bakasimpe. Alimwi mbubwenya mbuli mumwaanda wamyaka wakusaanguna, icacitika ncakuti, kuli kukondwa kujatikizya makani aayo aakukulwaizya ooko. Kuyungizya waawo, mu 2015 Kabunga Keendelezya kakamwaya broshuwa yakuti Amupilukile Kuli Jehova, yalo iyabakulwaizya kapati banji munyika yoonse. Pele sena balikke aabo ibeendelezya mbabeelede kwiiya Jehova mukuyumya-yumya bamwi? Bwiinguzi kumubuzyo ooyu buyoolangwa-langwa mucibalo citobela.