NYIKA yoonse mwaka wamana, ibaalumi banji bakasalwa kuba baalu abakutausi akati ka Bakamboni ba Jehova. Ikuti kamuli umwi wabakwesu aabo, tacidoonekwi kuti mulikkomene acoolwe cipya camulimo.

Nokuba boobo, cilamvwika kuti kulubazu lumwi ambweni mulalibilika. Ba Jason, mwaalu uucili mwana-mwana bakaamba kuti, “Ciindi cakusaanguna nondakasalwa, ndakalimvwa kuba amikuli minji kapati yakucita.” Musa alimwi a Jeremiya bakalitenga ciindi nobakatambula milimo mipya kuzwa kuli Jehova. (Kul. 4:10; Jer. 1:6) Ikuti naa mbomulimvwa andinywe, mbuti mbomukonzya kuzunda kulimvwa boobo akuzumanana kuyaambele? Amulange-lange cikozyanyo ca Munakristo sikwiiya Timoteyo.—Mil. 16:1-3.

Ambweni Timoteyo wakajisi myaka yakuzyalwa iitandila ku 20 naa kwiinda waawo ciindi mwaapostolo Paulo naakamutamba kuti kabeenda limwi. Kumatalikilo, mbwaanga wakacili mwana, ambweni Timoteyo tanaakali kulisyoma alimwi ambweni wakawayawaya kuubeleka mulimo wakwe mupya. (1Tim. 4:11, 12; 2Tim. 1:1, 2, 7) Pele, nokwakainda myaka iili kkumi, Paulo wakaambila mbungano mu Filipi kuti: “Ndilangila kuti ikuti kakuli kuyanda kwa Mwami Jesu, ndilamutumina Timoteyo lino-lino . . . Nkaambo taakwe uumbi ngondikonzya kutuma uujisi moyo uuli mbuli wakwe.”—Flp. 2:19, 20.

Ino ncinzi cakagwasya Timoteyo kuti abe mwaalu uuli kabotu? Amulange-lange twaambo tuli cisambomwe ntomukonzya kwiiya kucikozyanyo cakwe.

1. Wakali kubalanganya ncobeni bantu. Paulo wakaambila bakwesu ku Filipi kuti: ‘Timoteyo uyoozilanganya bweelede zintu zijatikizya ndinywe.’ (Flp. 2:20) Inzya, Timoteyo wakali kubalanganya bantu. Wakalibikkilide maano ncobeni kubukkale bwabo bwakumuuya, alimwi cakulisungula wakabeleka canguzu kutegwa abagwasye.

Mutanikubi mbuli namutekenya wabbaasi walo uubikkila buyo maano kusika cakufwambaana acitisyini cabbaasi muciindi cakunyamuna bantu. Ba William, imwaalu uulemekwa iwabeleka kwamyaka iinda ku 20, waambila baalumi bakasalwa caino-ino kuti: “Kamubayanda bakwesu. Kamubikkila maano kuzintu nzyobayandika ikutali kuyanda buyo kuti kabazuzikizya zintu zyakumuuya.”

2. Wakali kubikka zintu zyakumuuya mubusena bwakusaanguna. Kaamba kujatikizya kwiindana kwakaliko akati kacikozyanyo ca Timoteyo acabamwi, Paulo wakaamba kuti: “Aaba bamwi boonse bayandaula zintu zyakuligwasya lwabo beni, ikutali zijatikizya Jesu Kristo pe.” (Flp. 2:21) Paulo wakali ku Roma ciindi naakali kulemba. Wakabona kuti bakwesu ooko bakajisi bubi amilimo yabo beni. Munzila imwi, tiibakali kwiibeleka canguzu milimo yakumuuya. Pele kutali Timoteyo! Ciindi nokwakali kuba zyoolwe zyakusumpula makani mabotu, wakali kutondezya bube mbuli bwa Isaya, iwakaamba kuti: “Ndime aano! Kondituma!”—Is. 6:8.

Ino mbuti mbomukonzya kutalemenena kulubazu lomwe ciindi nomucita milimo yanu yakumubili alimwi ayakumuuya? Cakusaanguna, mweelede kubikka zintu ziyandika mubusena bwakusaanguna. Paulo wakaamba kuti: ‘Amusinizye zintu ziyandika kapati.’ (Flp. 1:10) Zintu Leza nzyabikkide mubusena bwakusaanguna amuzibikke mubusena bwakusaanguna andinywe. Cabili,  amuubye-ubye buumi. Amuzileke zintu zimusowela ciindi anguzu. Paulo wakaambila Timoteyo kuti: “Kozitija zisusi zyabukubusi, pele kosungwaala kutobela bululami, lusyomo, luyando, aluumuno.”—2Tim. 2:22.

3. Wakali kubeleka canguzu mumulimo uusetekene. Paulo wakayeezya bana Filipi kuti: “Nywebo mulizyi cisinizyo [Timoteyo] ncaakapa lwakwe mwini, kuti mbuli mwana abausyi wakabeleka cabusungu andime mukutola ambele makani mabotu.” (Flp. 2:22) Timoteyo tanaakali mutolo pe. Wakabeleka canguzu antoomwe a Paulo, alimwi eeci cakayumya cilongwe cabo.

Kuli milimo minji mumbunga ya Leza mazuba aano. Milimo eeyi ilakatalusya ncobeni alimwi ilakonzya kupa kuti muzyibane abakwesu abacizyi. Aboobo aabe makanze aanu lyoonse ikuba “azintu zinji zyakucita mumulimo wa Mwami.”—1Kor. 15:58.

4. Wakali kuzibelesya zintu nzyaakali kwiiya. Paulo wakalembela Timoteyo kuti: “Yebo wakabikkila maano kapati kukuyiisya kwangu, kubukkale bwangu, kumakanze aangu, kulusyomo lwangu, kukukkazika moyo kwangu, kuluyando lwangu, kukuliyumya kwangu.” (2Tim. 3:10) Akaambo kakuti Timoteyo wakali kuzibelesya nzyaakali kwiiya, wakeelela ikuba amikuli mipati.—1Kor. 4:17.

Sena mulijisi mulongwe mupati uusimide kumuuya ngomukonzya kunakwiiya? Ikuti naa tamujisi, ino mbuti kuti mwayandaula umwi? Ba Tom, mwaalu iwabeleka kwamyaka minji, balayeeya ategwa: “Imwaalu iwakajisi luzyibo wakali kundibikkila maano alimwi wakandiyiisya kabotu milimo. Ciindi coonse ndakali kulomba lugwasyo lwakwe akulubelesya. Eeci cakapa kuti cilongwe cangu a Jehova ciyume cakufwambaana.”

5. Wakazumanana kuliyiisya. Paulo wakakulwaizya Timoteyo kuti: “Koliyiisya omwini kojisi makanze aakubelekela Leza cakulyaaba.” (1Tim. 4:7) Sikubalika ulakonzya kajisi sikumuyiisya, pele awalo weelede kuliyiisya mwini. Paulo wakaambila Timoteyo kuti: “Kozumanana kulitakata kubala kubuleya, ikulaya, akuyiisya. . . . Kozinzibala kuziyeeya zintu eezyi; litakate kulinzizyo amoyo wako woonse, kutegwa kuyaambele kwako kubonwe abantu boonse.”—1Tim. 4:13-15.

Mbubwenya buyo andinywe mweelede kuzumanana kuyaambele mumilimo yanu. Amube basikwiiya basungu alimwi amuzumanane kweendela antoomwe abusolozi bupya ibuzwa kumbunga. Alimwi, mweelede kuleka kulisyoma cakwiindilila—ambweni kuyeeya kuti mulijisi luzyibo lunji cakuti mulakonzya kubulanganya bukkale buli boonse kakunyina kuvwuntauzya cakulomya. Kutegwa mwiiye Timoteyo, ‘lyoonse kamulibamba nobeni akubikkila maano kapati kukuyiisya kwanu.’—1Tim. 4:16.

6. Wakali kusyoma muuya wa Jehova. Kayeeya kujatikizya mulimo wa Timoteyo, Paulo wakamuyeezya kuti: “Kocibamba kabotu cintu eeci ciyandisi cibikkidwe mumaanza aako kwiinda mumuuya uusalala uuli mulindiswe.” (2Tim. 1:14) Kutegwa aubambe kabotu mulimo wakwe, Timoteyo wakali kuyandika kusyoma muuya wa Leza.

Ba Donald, mwaalu iwabeleka kwamyaka minji, baamba kuti: “Baalumi basalidwe beelede kucikkomanina cilongwe cabo a Leza. Aabo ibacita boobo bayooba ‘anguzu zinji.’ Ikuti kabaupailila muuya wa Leza alimwi akuba amucelo wanguwo, bayooba cilongezyo cini-cini kubakombinyina.”—Int. 84:7; 1Pet. 4:11.

Cilakulwaizya kapati kubona baalumi banji bapya ibasalidwe bali mbuli ndinywe, ibazumanana kuyaambele kumuuya. Ba Jason, ibaambwa kumatalikilo aacibalo, baamba kuti: “Muciindi coonse ncendali mwaalu, ndaiya zinji alimwi lusyomo lwangu lwakomena. Lino ndilaukkomanina mulimo wangu alimwi nduubona kuba coolwe cibotu kapati!”

Sena muyoozumanana kuyaambele mukubelekela Jehova? Aabe makanze aanu kwiiya Timoteyo. Mpoonya andinywe muyooba cilongezyo kubantu ba Leza.