1-2. (a) Ino mbuti Saatani mbwabeena bantu? (b) Ncinzi ncotutiilange-lange mucibalo eeci?

Saatani, “usyi wabubeji,” wabeena bantu kuzwa kuciindi ca Adamu a Eva. (Joh. 8:44) Bubeji bwakwe bumwi bubikkilizya anjiisyo zyakubeja kujatikizya lufwu alimwi akuti kuli cizumanana kupona muntu afwa. Zilengwa zidumide zinji ziyeeme anjiisyo eezyi. Akaambo kaceeci, bakwesu alimwi abacizyi ibali mbobabede ‘bakayuma kulwanina lusyomo’ ciindi umwi mumukwasyi wabo naa mucilawo naakafwa.—Jud. 3.

² Ikuti naa mwalijana musunko lili boobu, ino ncinzi cikonzya kumugwasya kutegwa muzumanane kusyomeka kukasimpe nkoliyiisya Bbaibbele kujatikizya lufwu? (Ef. 6:11) Mbuti mbomukonzya kubaumbulizya alimwi akubayumya Banakristonyoko ibasinikizyigwa kutola lubazu muzilengwa zitamukkomanisyi Leza? Mucibalo eeci tulabandika kujatikizya busolozi mbwatupa Jehova. Cakusaanguna, atulange-lange ncolyaamba Bbaibbele kujatikizya lufwu.

3. Ino ncinzi cakacitika akaambo kabubeji bwakusaanguna?

³ Leza tanaakali kuyanda kuti bantu kabafwa. Pele kutegwa bapone mane kukabe kutamani, ba Adamu a Eva bakeelede kumumvwida Jehova, walo iwakabapa mulawo uutakatazyi kutobela wakuti: “Cisamu cakuzyiba bubotu abubi, toyelede kulya kulincico pe, nkaambo mubuzuba mboyoolya kulincico, ncobeni uyoofwa.” (Matl. 2:16, 17) Mpoonya kwakaboola Saatani iwakatalisya mapenzi. Kaambaula kwiinda munzoka, wakaambila Eva kuti: “Tamukonzyi kufwa pe.” Cuusisya ncakuti, wakaasyoma makani aaya aakubeja akulya mucelo. Mpoonya, awalo mulumi wakwe  wakaulya mucelo. (Matl. 3:4, 6) Aboobo, cibi alimwi alufwu zyakanjila mumukwasyi wabantu.—Rom. 5:12.

4-5. Mbuti Saatani mbwaazumanana kubeena bantu?

⁴ Kweelana ambwaakaambide Leza, ba Adamu a Eva bakafwa. Pele Saatani tanaaleka kwaamba zyakubeja kujatikizya lufwu. Mukuya kwaciindi, wakatalika kwaamba makani aambi akubeja. Bubeji bumwi ninjiisyo yakuti mubili ulafwa pele cibeela cimwi camuntu cilazumanana kupona, ambweni kacili muuya. Bubeji bumwi bukozyene aboobu bwapa kuti bantu banji bazumanane kweenwa kusikila sunu.—1Tim. 4:1.

⁵ Nkaambo nzi bantu banji ncobabusyoma bubeji bwa Saatani? Saatani ulizyi mbobalimvwa bantu kujatikizya lufwu aboobo ubelesya makani aaya kubeena. Akaambo kakuti twakalengwa kutegwa tupone mane kukabe kutamani, tatuyandi kufwa pe. (Muk. 3:11) Lufwu tulubona kuba sinkondoma.—1Kor. 15:26.

6-7. (a) Sena Saatani wazwidilila kusisa kasimpe kajatikizya bafwu? Amupandulule. (b) Mbuti kasimpe kamu Bbaibbele mbokatugwasya kutayoowa bafwide?

⁶ Nokuba kuti Saatani wasolekesya kwaamba zyakubeja, kasimpe kujatikizya lufwu kayubununwa. Alimwi buya, bantu banji lino kwiinda lyoonse balizyi alimwi balaambilizya ncoliyiisya Bbaibbele kujatikizya ciimo cabantu bafwide alimwi abulangizi bwabubuke. (Muk. 9:5, 10; Mil. 24:15) Makani aaya aamasimpe alatuumbulizya akutugwasya kutayoowa alimwi akutadooneka kujatikizya cicitika ciindi bantu nobafwa. Mucikozyanyo, tatubayoowi bafwide alimwi tatuyoowi kuti kuli cintu cibyaabi icikonzya kubacitikila bayandwa besu bafwide. Tulizyi kuti tabaponi kubusena kumbi alimwi tabakonzyi kucisa muntu uuli woonse. Cili mbuli kuti baloona. (Joh. 11:11-14) Alimwi tulizyi kuti tabazyi ciindi mboceenda. Aboobo ciindi cabubuke, nobaba baabo ibakafwa myaanda yamyaka musyule bayoobona mbuli kuti ciindi cakainda kuzwa nobakafwa cisyoonto kapati, cili mbuli kuti nkulaba buyo kwaliso.

⁷ Cakutadooneka mulazumina kuti kasimpe kujatikizya ciimo cabafwide kalasalala alimwi takakatazyi kumvwa. Eelo kaka kaliindene kapati abubeji bwa Saatani ibunyonganya! Kunze buyo lyakweena bantu, bubeji oobu busampaula Mulengi wesu. Kutegwa tumvwisye bubeji bwa Saatani mbobwaleta mapenzi, tulalanga-langa mibuzyo yotatwe eeyi: Mbuti bubeji bwa Saatani mbobumusampaula Jehova? Mbuti bubeji bwa Saatani mbobwapa bantu kuyeeya kuti tacigwasyi kusyoma mucipaizyo cacinunuzyo ca Kristo? Mbuti mbobwayungizya mause alimwi akupenga kwabantu?

8. Kweelana alugwalo lwa Jeremiya 19:5, muunzila nzi bubeji bwa Saatani ibujatikizya bafwide mobumusampaula Jehova?

⁸ Bubeji bwa Saatani bujatikizya bafwide bulamusampaula Jehova. Bubeji oobo bulabikkilizya anjiisyo yakubeja yakuti bafwide balapenzyegwa mumulilo. Njiisyo zili boobu zilamusampaula Leza. Mubuti? Zipa kuti bantu basyome kuti Leza siluyando ngusilunya mbubwenya mbuli Saatani. (1Joh. 4:8) Ino eeci citupa kulimvwa buti? Kwiinda zyoonse, ino Jehova ulimvwa buti? Bwini mbwakuti, Jehova taluyandi lunya luli loonse.—Amubale Jeremiya 19:5.

9. Ino bubeji bwa Saatani bulujatikizya buti lusyomo mucipaizyo cacinunuzyo ca Kristo icaambidwe kulugwalo lwa Johane 3:16 alimwi a 15:13?

⁹ Bubeji bwa Saatani kujatikizya lufwu buubya-ubya lusyomo mucipaizyo cacinunuzyo ca Kristo. (Mt. 20:28) Bubeji bumbi bwa Saatani mbwakuti kuli cintu cizumanana kupona muntu afwa. Ikuti nocali boobo, nkokuti bantu boonse nobali kukonzya kupona kukabe kutamani. Kristo naatakapa buumi bwakwe kacili cinunuzyo kulindiswe kutegwa tube abuumi butamani. Amuyeeye kuti cipaizyo ca Kristo ncitondezyo caluyando ciinda zyoonse icakatondezyegwa kubantu. (Amubale Johane 3:16; 15:13.) Amuyeeyele buyo mbwalimvwa Jehova alimwi a Mwanaakwe kujatikizya njiisyo eezyi izyuubya-ubya cipego eeci cibotu kapati!

10. Mbuti bubeji bwa Saatani mbobwayungizya buumba alimwi akupenga kubantu?

¹⁰ Bubeji bwa Saatani buyungizya mause alimwi akupenga kubantu. Bazyali ibauside akaambo kakufwidwa mwana zimwi ziindi balakonzya kwaambilwa kuti Leza wamubweza mwana kutegwa akabe mungelo kujulu. Sena bubeji buli boobu bupa kuti kuusa kwabo kuceye naa kuti kwiindilile buya? Njiisyo yakubeja yamulilo wahelo yali kubelesyegwa kwaamba kupenzyegwa, kubikkilizya akuumpwa acisamu kwabaabo ibakali kukazya njiisyo zyacikombelo. Kweelana abbuku ilyaamba kujatikizya kabunga ikakali kupenzya bantu (Spanish Inquisition), bamwi ibakali kucita micito yalunya iili boobu kweelede kuti bakali kusyoma kuti kusubula bazangi munzila eeyi kwakali “kubalabizya mbounoobede mulilo wahelo uutamani” calo cakali kukonzya kupa kuti beempwe kabatanafwa alimwi akufwutulwa kumulilo wahelo. Mumasena manji, bantu balasinikizyigwa kukomba basikale bafwide, kubalemeka, naa kulomba zilongezyo kuli mbabo. Bamwi bayanda kukkomanisya basikale babo kutegwa batasubulwi ambabo. Cuusisya ncakuti, kusyoma bubeji bwa Saatani takuleteli luumbulizyo lwini-lwini. Muciindi caboobo, kupa kuciindizya kulibilika naa kuyoowa buya.

11. Mbuti banamukwasyi naa balongwe ibayeeya kuti bajisi mizeezo mibotu mbobakonzya kutusinikizya kucita citeendelani a Jwi lya Leza?

¹¹ Luyando ndotujisi kuli Leza alimwi a Jwi lyakwe lulatukulwaizya kumvwida Jehova noliba leelyo banamukwasyi naa balongwe ibayeeya kuti bajisi mizeezo mibotu nobasola kutusinikizya kuti tutole lubazu muzilengwa izitali zyamumagwalo kujatikizya bafwide. Balakonzya kusola kutupa kulimvwa bubi ikuti naa twakaka kutola lubazu, ambweni kwiinda mukwaamba kuti tiitwakali kubayanda naa kubalemeka basikwaazwa. Ambweni balakonzya kwaamba kuti kusala kwesu kuyoopa kuti muntu iwafwa atalike kupenzya baabo ibacipona. Mbuti mbotukonzya kukakatila kukasimpe kamu Bbaibbele? Atubone mbotukonzya kuzibelesya njiisyo zyamu Bbaibbele zitobela.

12. Nzilengwa nzi zijatikizya bafwide izitali zyamumagwalo?

¹² Amukanze “kulyaandaanya” kuzintu alimwi azilengwa izitali zyamumagwalo. (2Kor. 6:17) Mumasena aaku Caribbean, banji basyoma kuti ciindi muntu naafwa, “ceelo” inga kaciliko afwaafwi kutegwa cisubule baabo ibakali kumupenzya.  Bbuku limwi lyaamba kuti, “Ceelo” cilakonzya nokuba “kubapenzya kapati bantu bali mucilawo.” Mu Africa ncilengwa buya kutazima mulilo busiku boonse aŋanda yadilwe. Nkaambo nzi? Bamwi baamba kuti kucita boobo cigwasya kutanda myuuya! Mbuli babelesi ba Jehova, cakutadooneka tatwaasyomi makani aakubeja aali woonse naa kutola lubazu muzilengwa zisumpula bubeji bwa Saatani!—1Kor. 10:21, 22.

13. Kweelana alugwalo lwa Jakobo 1:5, ikuti kamudooneka kujatikizya cilengwa cimwi, ino ncinzi ncomweelede kucita?

¹³ Ikuti kamudooneka kujatikizya cintu naa cilengwa cimwi, amupaile kuli Jehova akulomba busongo bwakwe. (Amubale Jakobo 1:5.) Mpoonya amuvwuntauzye mumabbuku eesu. Kuti kakuyandika, amubabuzye baalu bamumbungano yanu. Baalu tabakamusalili ncomweelede kucita, pele balakonzya kumugwasya kujana njiisyo zyamu Bbaibbele mbuli zyeezi izyabandikwa aawa. Ciindi nomucita zintu eezyi, muyiisya “maano” aanu, mpoonya maano ayoomugwasya “kwaandaanya ciluzi acitaluzi kwiinda mukwaabelesya.”—Heb. 5:14.

14. Muunzila nzi motukonzya kutantamuka kulebya bantu?

¹⁴ “Amucite zintu zyoonse kutegwa Leza alemekwe. Amuleke kuba zilebyo.” (1Kor. 10:31, 32) Ciindi notusala kutola lubazu mucilengwa cimwi, tweelede kuyeeya kujatikizya kusala kwesu mbokukonzya kwaajatikizya manjezyeezya aabamwi, kwaambisya Banakristoma. Masimpe, tatuyandi kulebya bamwi! (Mk. 9:42) Alimwi tuyanda kutantamuka kunyemya bantu batali Bakamboni. Luyando luyootupa kwaambaula ambabo cabulemu, calo icipa kuti Jehova alemekwe. Cakutadooneka kunyina notuyanda kuzwangana abantu naa kusampaula zilengwa zyabo. Amuyeeye kuti luyando lulaanguzu! Ciindi notulutondezya munzila yakubikkila maano alimwi yabulemu, tulakonzya kupa kuti noiba myoyo yabasikukazya ibombe.

15-16. (a) Nkaambo nzi ncocili cabusongo kuzyibya bamwi nzyomusyoma? Amupe cikozyanyo. (b) Ino majwi aa Paulo aali kulugwalo lwa Baroma 1:16 atujatikizya buti?

¹⁵ Amulizyibye mucilawo canu kuti muli Bakamboni ba Jehova. (Is. 43:10) Ikuti umwi mumukwasyi wanu wafwa, banamukwasyi alimwi abasimukobonyoko balakonzya kunyema kapati ikuti naa mwakaka kutola lubazu muzilengwa zimwi. Cilakonzya kuubauba kulwana bukkale buli boobu kuti naa mwakabaambilila limwi nzyomusyoma kakucili ciindi. Ba Francisco, ibakkala ku Mozambique, bakalemba kuti: “Ciindi mebo abakaintu bangu ba Carolina notwakaiya kasimpe, twakaambila banamukwasyi kuti  kunyina notuyoobakomba bafwide. Kusala kwesu kwakasunkwa ciindi mucizyi waba Carolina naakafwa. Kubusena nkotukkala ncilengwa buya kusanzya mutunta muŋanda mwaakali kukkala mufwu ciindi nokucitwa zilengwa zyabukombi. Mpoonya munamukwasyi weelede koona mazuba otatwe abusena mpaakatililwa maanzi aakabelesyegwa kusanzya mutunta. Zilengwa eezyi nzyakukkomanisya muuya wamufwu. Banamukwasyi bakali kuyanda kuti ba Carolina boone aawo aakatililwa maanzi aakabelesyegwa kusanzya mutunta.”

¹⁶ Ino ba Francisco abakaintu babo bakacita buti? Ba Francisco bakaamba kuti: “Akaambo kakuti tulamuyanda Jehova alimwi tuyanda kumukkomanisya, twakakaka kutola lubazu mucilengwa eeci. Bamukwasyi waba Carolina bakanyema kapati. Bakatwaamba kuti tatubalemeki bafwide alimwi akuti kunyina nobayootuswaya limbi naa kutugwasya. Mbwaanga twakali baambilide kale nzyotusyoma kumatalikilo, kunyina notwakaabandika makani aaya ambabo kabanyemede. Banamukwasyi bamwi bakatwiiminina, bakaamba kuti twakaamba kale mpotwiimvwi kujatikizya makani aaya. Mukuya kwaciindi, bamukwasyi waba Carolina bakaleka kunyema, alimwi twakabamba luumuno. Alimwi buya, bamwi bakaboola kuŋanda yesu kulomba mabbuku aamba zyamu Bbaibbele.” Tatweelede kufwa nsoni akaambo kakukakatila kwiiminina kasimpe kujatikizya lufwu.—Amubale Baroma 1:16.

17. Ncinzi cikonzya kutugwasya kuba mulongwe mwini-mwini ku Munakristoma uuli mubuumba?

¹⁷ Ciindi Munakristoma naafwidwa muyandwa, tweelede kusolekesya kuba ‘mulongwe mwini-mwini, munyina iwakazyalilwa kuti agwasye muziindi zyamapenzi.’ (Tus. 17:17) Mbuti mbotukonzya kuba “mulongwe mwini-mwini,” ikapati kuti mukwesu naa mucizyi uuli mubuumba kasinikizyigwa kutola lubazu muzilengwa zitali zyamumagwalo? Atulange njiisyo zyobilo zyamu Bbaibbele izikonzya kutugwasya kuumbulizya baabo ibali mubuumba.

18. Ncinzi cakapa kuti Jesu alile, alimwi ncinzi ncotukonzya kwiiya kucikozyanyo cakwe?

¹⁸ “Amulile abaabo balila.” (Rom. 12:15) Cilakonzya kutuyumina kuzyiba ncotukonzya kwaamba kumuntu umwi uuli mubuumba. Nokuba  kuti tatujisi majwi aakwaamba, ikuti batubona katulila, balakonzya kuzyiba kuti tulabikkila maano kujatikizya mbobalimvwa. Ciindi Lazaro mulongwe wa Jesu naakafwa, Mariya, Marta, alimwi abamwi bakamulila munyina alimwi mulongwe wabo. Nokwakainda mazuba one ciindi Jesu naakasika, awalo “yakamweenda misozi,” nokuba kuti wakalizyi kuti ulamubusya Lazaro. (Joh. 11:17, 33-35) Kulila kwa Jesu kwakatondezya mbobakalimvwa Bausyi. Alimwi kwakatondezya luyando ndwaakajisi Jesu kubanamukwasyi, cakutadooneka eeci cakamuumbulizya Mariya alimwi a Marta. Mbubwenya buyo, ikuti bakwesu babona kuti tulabayanda alimwi akubabikkila maano, balazyiba kuti tabali balikke pele balizingulukidwe abalongwe babikkila maano alimwi ibabagwasya.

19. Ciindi notuumbulizya Munakristoma uuli mubuumba, ino inga twalubelesya buti lugwalo lwa Mukambausi 3:7?

¹⁹ “Ciindi cakuumuna aciindi cakwaambaula.” (Muk. 3:7) Nzila imwi mbotukonzya kuumbulizya Munakristoma uuli mubuumba nkwiinda mukuba muswiilizi mubotu. Mweelede kumupa ciindi cakwaamba mbwalimvwa munyoko, alimwi tamweelede kukalala kuti waamba “caambaambe.” (Job. 6:2, 3) Ambweni inga kakopene kapati mumizeezo akaambo kakukatazyigwa abanamukwasyi ibatali Bakamboni. Aboobo tweelede kupaila anguwe. Atumulombe ‘Sikuswiilila mipailo’ kutegwa amupe nguzu alimwi amizeezo iikkalikene. (Int. 65:2) Kuti bukkale kabuzumizya, atubale Bbaibbele antoomwe. Ambweni tulakonzya kubala cibalo ceelela kuzwa mumabbuku eesu, mbuli makani aakuluula aakulwaizya.

20. Ncinzi ncotuyoobandika mucibalo citobela?

²⁰ Eelo kaka tulijisi coolwe cipati cakuzyiba kasimpe kujatikizya bafwide alimwi abulangizi bubotu ibulindila baabo ibali muzyuumbwe! (Joh. 5:28, 29) Aboobo, kwiinda mumajwi amumilimo, cabusicamba atukakatile kukasimpe kamu Bbaibbele alimwi akwaambila bamwi kujatikizya nkako kufwumbwa twajana coolwe cakucita oobo. Mucibalo citobela tuyoolanga-langa nzila imwi Saatani mbwasola kubikka bantu mumudima wakumuuya, nkokuti kusyoma mizimo. Tuyoobona kaambo ncotweelede kutantamuka zilengwa alimwi azyakulikondelezya zijatikizya mizimo.