1. Ino ncinzi babelesi ba Leza boonse ncobayanda kucita, alimwi nkaambo nzi? (Amubone cifwanikiso icili aacivwumbyo.)

KRISTO JESU wakalailila basikumutobela kuti: “Kamuya mukayiisye bantu bazisi zyoonse kuti babe basikwiiya.” (Mt. 28:19) Babelesi ba Leza basyomeka balayanda kwiiya mbobakonzya ‘kuuzuzikizya cakumaninina’ mulimo ooyu ngobakapegwa kuti baucite. (2Tim. 4:5) Mulimo ooyu ulayandika kapati, alimwi buya ulibindide kwiinda mulimo uumbi uuli woonse. Nokuba boobo, cilakonzya kukatazya kubeleka ciindi cinji mumulimo ooyu kweelana ambotuyanda.

2. Mbuyumuyumu nzi mbotujana ciindi notuzuzikizya mulimo wakukambauka?

² Kuli milimo aimbi iiyandika kapati alimwi iiyanda ciindi anguzu zyesu. Inga twayandika kubeleka mawoola manji mumulimo wakumubili kutegwa tujane nzyotuyandika swebo alimwi amukwasyi wesu. Tulakonzya kujana buyumuyumu kulanganya mikuli imwi yamumukwasyi, kuciswa, kutyompwa naa kucisa kuboola akaambo kakucembaala. Mbuti mbotukonzya kuuzuzikizya mulimo wesu wakukambauka kumwi katuliyumya kubuyumuyumu buli boobu?

3. Ncinzi ncotukonzya kwaamba kumajwi aa Jesu aajanika kulugwalo lwa Matayo 13:23?

³ Ikuti bukkale bwesu kabutupa kutabeleka ciindi cinji mumulimo wa Jehova, tatweelede kutyompwa pe. Jesu wakalizyi kuti tabali boonse ibayoocikonzya kuzyala micelo ya Bwami iyeelene. (Amubale Matayo 13:23.) Jehova ulazibikkila maano zintu zyoonse nzyotucita mumulimo wakwe kufwumbwa buyo kuti katubeleka kusikila mpotugolela. (Heb. 6:10-12) Kulubazu lumbi, tulakonzya kulimvwa kuti bukkale bwesu bulakonzya kutuzumizya kucita zinji. Mucibalo eeci, tulalanga-langa mbotukonzya kubikka mulimo wesu wakukambauka mubusena bwakusaanguna  mubuumi, mbotukonzya kuubya-ubya buumi bwesu alimwi akuyaambele mukukambauka akuyiisya kwesu. Pele cakusaanguna, ino caamba nzi kuuzuzikizya cakumaninina mulimo wesu wakukambauka?

4. Ino caamba nzi kuuzuzikizya cakumaninina mulimo wesu?

⁴ Mubufwaafwi, kutegwa tuuzuzikizye cakumaninina mulimo wesu, tweelede kutola lubazu kusikila mpotugolela mumulimo wakukambauka akuyiisya. Pele nzinji zibikkilizyidwe ikutali buyo ciindi cilikke. Makanze ngotujisi ciindi notukambauka alayandika kapati kuli Jehova. Akaambo kakuti tulamuyanda Jehova alimwi abasimukoboma, tulaubeleka camoyo woonse mulimo wesu wa Bunakristo. * (Mk. 12:30, 31; Kol. 3:23) Kubelekela Leza camoyo woonse caamba kulipa kulinguwe, kubelesya nguzu zyesu kusikila mpotugolela mumulimo wakwe. Ciindi notuzyiba kuti ncoolwe cipati kucita mulimo wakukambauka, tulasolekesya kusikila mpotugolela kubaambila makani mabotu bantu banji.

5-6. Amupe cikozyanyo citondezya muntu uujisi buyo ciindi cisyoonto mbwakonzya kubikka mulimo wakukambauka mubusena bwakusaanguna.

⁵ Amweezyeezye kujatikizya mukubusi uukkomanina kulizya bbanjo. Ulakkomana kulizya nyimbo kufwumbwa najana ciindi cakucita boobo. Mukuya kwaciindi, wanjila mulimo wakulizya bbanjo kumamanino aansondo kubusena bwakulida akwiimba ibuli nkwakkala. Nokuba boobo, mali ngajana taakkwani kuula nzyayandika. Aboobo ulabeleka mucintoolo kuzwa mu Muhulo kusikila muli Bwasanu. Nokuba kuti ciindi cinji ucimanina mucintoolo, moyo wakwe inga uli kukwiimba. Uyandisya kapati kuyungizya luzyibo lwakwe mukwiimba alimwi akuba mwiimbi uucibwene. Nokuba boobo, ulakkomana kubelesya ciindi cili coonse ncajana kulizya nyimbo, tacikwe makani ambocili cisyoonto.

⁶ Mbubwenya buyo, ambweni inga kamutajisi ciindi cinji cakukambauka mbuli mbomuyanda. Pele ngomulimo ngomuyandisya kucita. Mulasolekesya kuyungizya luzyibo lwanu kutegwa kamubasika amoyo bantu ciindi nomubakambaukila makani mabotu. Akaambo kakuti mujisi zinji zyakucita, mulakonzya kukatazyigwa kujatikizya mbomukonzya kubikka mulimo wakukambauka mubusena bwakusaanguna.

7-8. Mbuti mbotukonzya kumwiiya Jesu kujatikizya mbwaakali kuubona mulimo wakukambuka?

⁷ Jesu wakapa cikozyanyo cibotu cijatikizya mbwaakali kuubona mulimo wakukambauka. Kubandika makani aajatikizya Bwami bwa Leza cakali cintu ciyandika kapati mubuumi bwakwe. (Joh. 4:34, 35) Wakali kweenda misinzo milamfwu kutegwa akambaukile bantu banji kweelana ambwaakali kukonzya. Wakali kucibelesya coolwe cili coonse ncaakali kujana kubandika abantu mumasena aakubuleya alimwi amumaanda aabo. Buumi bwa Jesu boonse bwakayeeme amulimo wakukambauka.

⁸ Tulakonzya kumwiiya Kristo kwiinda mukujana zyoolwe zyakubandika abantu kujatikizya makani mabotu kufwumbwa ciindi alimwi abusena buli boonse nkotukonzya kucita boobo. Tulilyaabide kusiya buumi bubotu kutegwa tubeleke mulimo wakukambauka. (Mk. 6:31-34; 1Pet. 2:21) Bamwi mumbungano balabeleka kabali bapainiya baalubazu, baciindi coonse naa bakugwasyilizya. Bamwi bakaiya mwaambo uumbi naa kulongela kubusena kuyandika basikumwaya banji. Nokuba boobo, mulimo mupati wakukambauka ulacitwa abasikumwaya ba Bwami, ibatacikonzyi kucita zintu eezyi, balo ibabeleka kusikila mpobagolela. Kufwumbwa mbocibede, Jehova talangili kuti tucite nzyotutakonzyi. Uyanda kuti toonse katuukkomanina mulimo wesu uusetekene ciindi notwaambilizya “makani mabotu aabulemu aazwa kuli Leza uukkomene.”—1Tim. 1:11; Dt. 30:11.

9. (a) Mbuti Paulo mbwaakabikka mulimo wakukambauka mubusena bwakusaanguna nokuba kuti wakali kuyandika kubeleka mulimo wakumubili? (b) Ncinzi lugwalo lwa Milimo 28:16, 30, 31 ncolutondezya kujatikizya mbwaakali kuubona mulimo wakukambauka Paulo?

⁹ Mwaapostolo Paulo wakapa cikozyanyo cibotu cakubikka mulimo wakukambauka mubusena bwakusaanguna mubuumi bwakwe. Ciindi naakali ku Korinto mulweendo lwakwe lwabili lwabumisyinali, wakajisi buyo mali masyoonto, aboobo ciindi cimwi wakeelede kucibelesya kumulimo wakusuma matente. Nokuba boobo, Paulo tanaakaubikka mubusena bwakusaanguna mulimo wakusuma matente. Pele wakali kubeleka mulimo ooyu kutegwa kaligwasya mumulimo wakukambauka, kwaambila bana Korinto makani mabotu “kakunyina kubbadelwa.” (2Kor. 11:7) Nokuba kuti Paulo wakali kubeleka mulimo wakumubili, wakazumanana kubikka mulimo wakukambauka mubusena bwakusaanguna, alimwi wakali kukambauka mu Sabata imwi aimwi. Ciindi bukkale nobwakaba kabotu, Paulo wakacikonzya kubikkila kapati maano kukukambauka. “Wakatalika kubelesya ciindi cakwe coonse kukukambauka jwi lya Leza, kapa bumboni kuba Juda kutegwa asinizye kuti Jesu ngo Kristo.” (Mil. 18:3-5; 2Kor. 11:9) Mukuya kwaciindi, naakaangidwe muŋanda yakwe ku Roma kwamyaka yobilo, Paulo wakali kubakambaukila bantu ibakali kumuswaya alimwi wakali kulemba amagwalo. (Amubale Milimo 28:16, 30, 31.) Paulo wakakanzide kutalekela cintu cili coonse kumunyonganya mulimo wakwe. Wakalemba kuti: “Mbwaanga tujisi mulimo ooyu . . . , tatulengaani pe.” (2Kor. 4:1) Mbubwenya mbuli Paulo, nokuba kuti tuyandika kubeleka mawoola manji mumulimo wakumubili, mulimo wa Bwami tulakonzya kuubona kuba cintu ciyandika kapati mubuumi.

10-11. Mbuti mbotukonzya kuuzuzikizya cakumaninina mulimo wesu ikuti kuciswa-ciswa kakutupa kutabeleka mbuli mbotuyanda?

¹⁰ Nokuba kuti tatukonzyi kukambauka kuŋanda aŋanda kweelana ambotuyanda akaambo kakucembaala naa kuciswa-ciswa, tulakonzya kukambauka kwiinda mukubelesya nzila zimwi. Bakambausi bamumwaanda wamyaka wakusaanguna bakali kubasikila bantu kufwumbwa nkobakabede. Bakali kukambauka ciindi cili coonse alimwi kufwumbwa kubusena nkobakali kukonzya kubajana bantu, kuŋanda aŋanda naa kubuleya. (Mil. 17:17; 20:20) Ikuti katutacikonzyi kweenda misinzo milamfwu, tulakonzya kukkala abusena aayinda bantu banji akubakambaukila. Ambweni tulakonzya kucita bukambausi bwamukwiizya, kulemba magwalo naa bukambausi bwaafooni. Basikumwaya banji ibatacikonzyi kukambauka  kuŋanda aŋanda mbuli mbobayanda akaambo kakuciswa-ciswa naa mapenzi aamwi buyo, balakonzya kukkomana kapati kubelesya nzila eezyi zimbi zyakukambauka.

¹¹ Nokuba kuti mulaciswa-ciswa, mulakonzya kuuzuzikizya cakumaninina mulimo wanu. Amubone alimwi cikozyanyo camwaapostolo Paulo. Wakaamba kuti: “Muzintu zyoonse ndilijisi nguzu kwiinda muli yooyo uundipa nguzu.” (Flp. 4:13) Paulo wakali kuyandika nguzu eezyo ciindi naakaciswa mulweendo lwakwe lwabumisyinali lumwi. Wakaambila bana Galatiya kuti: “Kuciswa nkondakaciswa nkokwakandipa coolwe cakuti ndaambilizye makani mabotu kulindinywe ciindi cakusaanguna.” (Gal. 4:13) Mbubwenya buyo, kuciswa-ciswa kulakonzya kumupa coolwe cakubakambaukila makani mabotu bamwi, mbuli bamadokota, bamanesi, alimwi abamwi ibagwasyilizya kumulanganya. Bunji bwabantu aaba inga bali kumulimo ciindi basikumwaya nobaswaya kumaanda aabo.

12. Ino caamba nzi ‘kulanga buyo acintu comwe’?

¹² Jesu wakaamba kuti: “Liso ndelambe lyamubili. Ikuti liso lyako kalilangide buyo acintu comwe, mubili wako woonse ulaba mumumuni.” (Mt. 6:22) Ino wakali kupandulula nzi? Wakali kwaamba kuti tweelede kuubya-ubya buumi bwesu naa kubikkila buyo maano kumbaakani yomwe, naa makanze, kutalekela cintu cili coonse kutunyonganya. Jesu kumugama wakapa cikozyanyo kwiinda mukuubikkila maano mulimo wakukambauka mubuumi bwakwe boonse, alimwi wakayiisya basikwiiya bakwe kubikkila maano kubelekela Jehova alimwi a Bwami bwakwe. Tulamwiiya Jesu kwiinda mukubona mulimo wakukambauka kuba cintu ciyandika kapati mubuumi bwesu, “kusaanguna kuyandaula Bwami abululami [bwa Leza.]”—Mt. 6:33.

13. Ncinzi cikonzya kutugwasya kubikkila maano kumulimo wesu wa Bunakristo?

 ¹³ Nzila imwi mbotukonzya kubikkila maano kumulimo wesu nkwiinda mukuubya-ubya buumi bwesu kutegwa ciindi cinji katucibelesya kugwasya bamwi kumuzyiba alimwi akumuyanda Jehova. * Mucikozyanyo, sena tulakonzya kucesya mawoola ngotubeleka kumulimo wakumubili kutegwa katubeleka ciindi cinji mumulimo wakukambauka mukati kansondo? Sena tulakonzya kucesya-cesya zyakulikondelezya zimwi izimanina ciindi?

14. Ncinzi ncobakacita banabukwetene bamwi kutegwa ciindi cinji bacibelesye mumulimo wakukambauka?

¹⁴ Eeci ncencico ncaakacita mwaalu umwi wazina lyakuti Elias alimwi abakaintu bakwe. Wakaamba kuti: “Tiitwakali kukonzya kucita bupainiya aciindi eeco, pele kwakali zintu nzyotwakali kukonzya kucita kutegwa ciindi cinji tucibelesye mumulimo wakukambauka. Aboobo twakabambulula tuntu tumwi tusyoonto kutegwa ciindi cinji tucibelesye mumulimo wakukambauka. Mucikozyanyo, twakacesya mweelwe wamali ngotwakali kubelesya, twakacileka kucita zyakulikondelezya lino nzyotubona kuti kwakali kuciindizya alimwi twakalomba basikutulemba mulimo kuti bacesye ciindi ncotwakali kubeleka. Akaambo kantaamu njotwakabweza, twakatalika kucikonzya kukambauka kumangolezya, kusololela ziiyo zya Bbaibbele zinji alimwi akutola lubazu mumulimo wakukambauka mukati kansondo ziindi zyobilo amwezi. Eelo kaka cakali kukkomanisya!”

15-16. Kweelana alugwalo lwa 1 Timoteyo 4:13, 15, mbuti mbotukonzya kuzumanana kuyungizya luzyibo lwesu mbwaanga tuli bakambausi? (Alimwi amubone akabbokesi kakuti “ Mbaakani Zikonzya Kundigwasya Kuuzuzikizya Cakumaninina Mulimo Wangu.”)

¹⁵ Nzila aimwi mbotukonzya kuuzuzikizya cakumaninina mulimo wesu nkwiinda mukuyungizya  luzyibo lwesu mumulimo wakukambauka. Bantu ibabeleka milimo iimwi beelede kuzumanana kuyiisyigwa kutegwa bayungizye luzyibo lwabo. Oobu mbocibede akubakambausi ba Bwami. Tuyandika kuzumanana kwiiya kujatikizya mbotukonzya kuba bantu bacibwene mumulimo wesu.—Tus. 1:5; amubale 1 Timoteyo 4:13, 15.

¹⁶ Pele ino mbuti mbotukonzya kuzumanana kuyaambele mumulimo wesu? Kwiinda mukwaabikkila maano kapati malailile ngotutambula nsondo ansondo ku Muswaangano Wabuumi Amulimo. Muswaangano ooyu ulijisi lwiiyo lubotu kapati ilutugwasya kuzumanana kuyungizya luzyibo lwesu mumulimo wakukambauka. Mucikozyanyo, ciindi sicuuno napa lulayo kuli baabo ibali mucikolo, tulakonzya kwiiya nzila zikonzya kutugwasya kuyaambele mumulimo wesu. Tulakonzya kuzibelesya nzila eezyo twaakubandika amuntu umwi kujatikizya makani mabotu. Inga twalomba lugwasyo kumulangizi wakabunga kesu, ambweni kubeleka anguwe mumulimo wakukambauka naa asikumwaya uucibwene, painiya, naa mulangizi wabbazu. Ciindi notuyungizya luzyibo lwesu mukubelesya cibelesyo cimwi acimwi icili mu Zibelesyo Nzyotubelesya Kapati Mukuyiisya, tuyakuukkomanina kapati mulimo wesu wakukambauka akuyiisya.

17. Ino ncinzi ciyoocitika ciindi nomuuzuzikizya cakumaninina mulimo wanu?

¹⁷ Eelo kaka ncoolwe cipati kuzumizyigwa a Jehova kuba “basimilimonyina”! (1Kor. 3:9) Ciindi ‘nomusinizya zintu ziyandika kapati’ alimwi akuubikkila maano mulimo wa Bunakristo, ‘muyoomubelekela Jehova cakukondwa.’ (Flp. 1:10; Int. 100:2) Mbomuli babelesi ba Leza, mulakonzya kuba masimpe kuti uyoomupa nguzu nzyomuyandika kutegwa muuzuzikizye mulimo wanu tacikwe makani abuyumuyumu mbomukonzya kujana. (2Kor. 4:1, 7; 6:4) Kufwumbwa naa bukkale bwanu bulamuzumizya kukambauka ciindi cinji naa pe, mulakonzya ‘kujana kaambo kamupa kukondwa’ ciindi nomuubeleka camoyo woonse mulimo wanu. (Gal. 6:4) Ciindi nomuuzuzikizya cakumaninina mulimo wanu, mutondezya luyando ndomujisi kuli Jehova alimwi akubantunyoko. ‘Kwiinda mukucita boobo muyoolifwutula nobeni alimwi abaabo bamuswiilila.’—1Tim. 4:16.