1. Nkasimpe nzi kaumbulizya nkolyaamba Bbaibbele kujatikizya Jehova?

SENA inga mwakkomana ikuti bantu bamubeteka kweelana amubala wanu, mbomulibonya kumeso, naa nsaizi yamubili wanu? Mubwini, tamukonzyi kukkomana pe. Eelo kaka cilakulwaizya kuzyiba kuti Jehova tatubeteki kweelana azintu izilibonya ameso aamuntu! Mucikozyanyo, ciindi Samuele naakalanga bana ba Jese, tanaakacibona eeco ncaakabona Jehova. Jehova wakaambila Samuele kuti umwi akati kabana ba Jese wakali kuyooba mwami wa Israyeli. Pele ino nguni ooyo? Ciindi Samuele naakabona mwana wa Jese mutaanzi, Eliabu, wakati: “Masimpe ooyu ngomunanike wa Jehova.” Eliabu wakali kulibonya kweelela kuba mwami. Pele Jehova wakati kuli Samuele: “Utalangi mbwaboneka pe alimwi abulamfwu bwakwe, nkaambo ndamukaka.” Ncinzi ncotwiiya? Jehova wakazumanana kwaamba kuti: ‘Muntu ubona buyo zilibonya ameso, pele mebo nde Jehova, ndibona zili mumoyo.’—1Sam. 16:1, 6, 7.

2. Kweelana alugwalo lwa Johane 7:24, nkaambo nzi ncotuteelede kubeteka muntu kweelana ambwalibonya atala? Amupe cikozyanyo.

² Mbwaanga tatulondokede, toonse tujisi cilengwa cakubeteka bamwi kweelana ambobalibonya. (Amubale Johane 7:24.) Pele nzisyoonto buyo nzyotukonzya kuzyiba kujatikizya muntu ikuti twaile kumulanga buyo caatala-tala. Mucikozyanyo, naba dokota musongo alimwi uujisi luzyibo lunji takonzyi kuzyiba zinji kujatikizya mulwazi ikuti waile kumulanga buyo caatala-tala. Weelede kumuswiilila cakubikkila maano mulwazi ciindi napandulula bulwazi bwakwe alimwi ambwalimvwa kujatikizya bulwazi oobo. Mane buya dokota ulakonzya kwaamba kuti mulwazi ooyo aunke kuyoopimwa ku X-ray. Buyo-buyo, dokota ulakonzya kumupa musamu uuteendelani abulwazi mbwaciswa. Mbubwenya buyo, tatukonzyi kubazyiba kabotu bakwesu abacizyi kwiinda mukwiile kulanga buyo mbobalibonya atala. Tweelede  kusolekesya kubazyiba kabotu nkokuti, ikuzyiba bwini mbobabede mukati kamoyo. Mubwini, tatukonzyi kulingula myoyo, aboobo kunyina notukonzya kubazyiba mbuli mbwabazyi Jehova. Pele tulakonzya kucita zyoonse nzyotukonzya kutegwa tumwiiye. Munzila nzi?

3. Mbuti zibalo zyamu Bbaibbele izyaambidwe mucibalo eeci mbozikonzya kutugwasya kwiiya Jehova?

³ Ino Jehova ubeendelezya buti bakombi bakwe? Ulabaswiilila, ulabubikkila maano bukkale bwabo alimwi akubatondezya luzyalo. Notulanga-langa kujatikizya Jehova mbwaakeendelezya Jona, Elija, Hagare alimwi a Loti, atubone mbotukonzya kumwiiya Jehova ciindi notweendelezya bakwesu alimwi abacizyi.

4. Nkaambo nzi ncotukonzya kumubona munzila iitali kabotu Jona?

⁴ Akaambo kakuti tatwaazyi makani oonse aajatikizya Jona, tulakonzya kumubona kuti tanaakali kusyomeka. Jehova wakamupa mulawo uulimvwisya wakuti, akakambauke mulumbe walubeta ku Nineve. Muciindi cakumvwida, Jona wakatanta bwato akuunka kubusena bumbi, “kuzwa kumbele lya Jehova.” (Jon. 1:1-3) Ikuti nomwakali ndinywe, sena nomwakamupa coolwe cimbi Jona cakucita mulimo? Ambweni nomwatakacita oobo. Pele, Jehova walo wakabona kuti Jona wakali kuyandika kupegwa coolwe acimbi.—Jon. 3:1, 2.

5. Ino mwiiya nzi kuli Jona kumajwi aakwe aali kulugwalo lwa Jona 2:1, 2, 9?

⁵ Jona wakaliyubununa kujatikizya bwini mbwaakabede mumupailo wakwe. (Amubale Jona 2:1, 2, 9.) Cakutadooneka, Jona wakapaila mipailo minji kuli Jehova. Umwi akati kamipailo eeyo, nkokuti ooyo ngwaakapaila ciindi naakali mwida lyanswi, utugwasya kumubona kuti tanaakali buyo muntu iwakatija mulimo. Majwi aakwe atondezya kuti wakali muntu uulicesya, uulumba alimwi iwakakanzide kumvwida Jehova. Aboobo tacigambyi kuti Jehova kunyina naakabikkila maano kukulubizya kwa Jona. Muciindi caboobo, wakawiingula mupailo wakwe alimwi wakazumanana kumubelesya kali musinsimi!

6. Nkaambo nzi ncocigwasya kapati kuswiilila cakubikkila maano?

⁶ Kutegwa tubaswiilile cakubikkila maano bantu, tweelede kulicesya alimwi akukkazika moyo. Kucita boobo kuyootugwasya mumbazu zyotatwe. Yakusaanguna, tuyootantamuka cilengwa cakuyeeyela bantu zintu zitali kabotu. Yabili, tuyoozyiba kujatikizya mbobalimvwa bamwi alimwi acibapa kucita zintu munzila imwi, aboobo eeco ciyootugwasya kubafwida luzyalo. Yatatu, tulakonzya kugwasya muntu  kuzyiba cintu cimwi kujatikizya nguwe. Zimwi ziindi muntu takonzyi kumvwisya mbwalimvwa ccita kuti mwamupa ciindi cakwaamba mbwalimvwa. (Tus. 20:5) Mwaalu umwi ku Asia wakaamba kuti: “Aciindi cimwi ndakafwambaana kwaamba kanditanatumvwa twaambo toonse itwakajatikizyidwe. Ndakaambila mucizyi kuti wakeelede kubikkila maano kutegwa kapa bwiinguzi buyaka lyamiswaangano. Mpoonya ndakazoozyiba kuti ujisi buyumu-yumu bwakubala pele ulasolekesya kapati kutegwa kapa bwiinguzi.” Eelo kaka cilayandika kapati kumwaalu umwi aumwi kusaanguna ‘kumvwisya kabotu makani’ katanapa lulayo!—Tus. 18:13.

7. Ncinzi ncomwiiya kujatikizya nzila Jehova mbwaakamweendelezya Elija?

⁷ Bakwesu abacizyi bamwi cilabakatazya kwaamba mbobalimvwa akaambo kazintu zyakabacitikila, mbobakakomezyegwa, naa bube bwabo. Mbuti mbotukonzya kupa kuti kacibaubila kutwaambila mbobalimvwa? Amuyeeye buyo kujatikizya Jehova mbwaakamweendelezya Elija ciindi naakatija Jezebeli. Cakatola mazuba aali mbwaabede kuti Elija amwaambile Usyi wakujulu bwini mbwaakalimvwide. Jehova wakamuswiilila Elija cakubikkila maano. Mpoonya wakamukulwaizya alimwi akumupa mulimo uuyandika kapati. (1Bam. 19:1-18) Cilakonzya kubatolela ciindi bakwesu alimwi abacizyi kwaanguluka kubandika andiswe, pele lilikke buyo kuti baanguluka ndendilyo notukonzya kuzyiba bwini mbobalimvwa. Ikuti twamwiiya Jehova kwiinda mukubakkazikila moyo, balakonzya kwaanguluka kutwaambila mbobalimvwa. Mpoonya ciindi nobatwaambila mbobalimvwa, tweelede kubaswiilila cakubikkila maano.

8. Kweelana alugwalo lwa Matalikilo 16:7-13, mbuti Jehova mbwaakamugwasya Hagare?

⁸ Hagare, mubelesi wa Sarai, wakacita cabufwubafwuba ciindi naakapegwa kuti abe mukaintu wa Abramu. Hagare wakamita akuleka kumulemeka Sarai, ooyo iwatakajisi bana. Ibukkale bwakabija kapati cakuti Sarai wakamutanda Hagare. (Matl. 16:4-6) Kuzilanga munzila yakutalondoka zintu, inga twaamba kuti Hagare wakali mukaintu silunya iwakali kweelela kutandwa. Pele Jehova kunyina naakamubona munzila iili boobu. Wakatuma mungelo kulinguwe. Ciindi mungelo naakamujana, wakamugwasya kucinca bube bwakwe alimwi wakamulongezya. Hagare wakazyiba kuti Jehova wakalimubwene akuti wakalibuzyi bukkale bwakwe boonse. Mane buya wakakulwaizyigwa kumwaamba kuti “Leza uubona, . . . ooyo uundibona.”—Amubale Matalikilo 16:7-13.

9. Ino ncinzi Leza ncaakabikkila maano kujatikizya Hagare?

⁹ Ino ncinzi Jehova ncaakabona kuli Hagare? Wakalibuzyi bukkale bwakwe boonse alimwi azintu zyakamucitikila. (Tus. 15:3) Hagare wakali muna Egepita iwakali kukkala mumukwasyi wabana Hebrayo. Sena zimwi ziindi wakali kulimvwa kuba muzwakule? Sena wakali kuyeeya bamukwasyi wakwe alimwi acisi cakwabo? Alimwi wakali mumaali kuli Abramu. Kaindi, bamaalumi bamwi basyomeka bakakwete maali. Pele aaya tanaakali makanze aa Jehova. (Mt. 19:4-6) Aboobo tacigambyi pe kuti, bukkale buli boobu bwakali kupa muntu kuba abuzuba alimwi amfwundiilili. Nokuba kuti Jehova wakalizyi kuti cakalilubide kuli Hagare kutamulemeka Sarai, tulakonzya kuba masimpe kuti wakamvwisya mbwaakali kulimvwa Hagare alimwi abukkale bwakwe.

10. Mbuti mbotukonzya kubazyiba kabotu bakwesu alimwi abacizyi?

¹⁰ Tulakonzya kumwiiya Jehova kwiinda mukusoleka kubamvwisya bakwesu alimwi abacizyi. Amubazyibe kabotu bakwesu alimwi abacizyi. Amubandike ambabo kaitanatalika alimwi  anoyamana miswaangano, amubeleke ambabo mumulimo wakukambauka alimwi kuti kacikonzyeka, amubatambe kucakulya. Kuti mwacita oobo, muyoozyiba kuti mucizyi uulibonya kutaba mulongwe ani ulaansoni, mukwesu ngomwali kuyeeyela kuti uyandisya zintu zyakumubili mwaabi, naa kuti mukwasyi kanji-kanji uumuka kumiswaangano ujisi buyumuyumu bwakukazyigwa. (Job. 6:29) Pele tatweelede kuba ‘basikunjililila twaambo tutatujatikizyi.’ (1Tim. 5:13) Nokuba boobo, cilayandika kuzyiba zintu zimwi kujatikizya bakwesu abacizyi alimwi azintu izyakabacitikila mubuumi. Eeci cilakonzya kutugwasya kubamvwisya kapati.

11. Nkaambo nzi baalu ncobeelede kuzizyiba kabotu mbelele?

¹¹ Kwaambisya baalu, beelede kubuzyiba bukkale bwabakwesu alimwi abacizyi mbobeembela. Amubone cikozyanyo camukwesu Artur iwakali kubeleka kali mulangizi wabbazu. Walo alimwi amwaalu uumbi bakaswaya mucizyi iwakali aansoni. Mukwesu Artur wakati: “Twakazyiba kuti mulumi wamucizyi ooyu wakafwa nokwakainda myaka misyoonto buyo kuzwa nobakakwatana. Nokuba kuti ujisi buyumuyumu, wakayiisya bana bakwe bobilo kuyanda Jehova. Pele aciindi eeco, wakali kuyaaboofwaala alimwi akuciswa bulwazi bwakutyompwa kapati. Nokuba boobo, luyando alimwi alusyomo ndwajisi kuli Jehova mucizyi ooyu lwazumanana kuyuma. Twakabona kuti kuli zintu zinji nzyotwakeelede kwiiya kucikozyanyo cibotu camucizyi ooyu.” (Flp. 2:3) Mulangizi wabbazu ooyu wakali kwiiya Jehova. Jehova ulizizyi mbelele zyakwe alimwi amapenzi ngozijisi. (Kul. 3:7) Baalu bazizyi kabotu mbelele balakonzya kuzigwasya.

12. Mbuti mucizyi Yip Yee mbwaakagwasyigwa akaambo kakumuzyiba kabotu mucizyi umwi mumbungano?

¹² Kuti mwabuzyiba bukkale bwamukwesu naa mucizyi ooyo ngomutakkomanini, ciyoomugwasya kumumvwisya alimwi akumufwida luzyalo. Amubone cikozyanyo eeci. Ba Yip Yee ibakkala ku Asia bakaamba kuti, “Mucizyi umwi mumbungano mondizulilwa wakali kutola jwi mujulu ciindi naakali kwaambaula. Aboobo mebo ndakali kuyeeya kuti ulaacilengwa cibyaabi. Pele ciindi nondakabeleka anguwe mubukambausi, ndakazyiba kuti wakali kugwasyilizya bazyali bakwe kusambala nswi kumaaketi. Aboobo wakali koongolola kwiita basikuula.” Ba Yip Yee bakayungizya kuti: “Ndakaiya kuti kutegwa kandibamvwisya bakwesu alimwi abacizyi, ndeelede kubuzyiba kabotu bukkale bwabo.” Kuyandika kusolekesya kapati kutegwa tubazyibe kabotu bakwesu. Nokuba boobo, kuti twalutobela lulayo lwamu Bbaibbele lwakujalula myoyo yesu, twiiya Jehova,  walo uubayanda “bantu boonse.”—1Tim. 2:3, 4; 2Kor. 6:11-13.

13. Kweelana alugwalo lwa Matalikilo 19:15, 16, ncinzi bangelo ncobakacita ciindi Loti naakacili kuwayawaya, alimwi nkaambo nzi?

¹³ Aciindi icakali kukatazya kapati mubuumi bwakwe, Loti wakawayawaya kumvwida malailile aa Jehova. Bangelo bobilo bakamuswaya akumwaambila kuti walo amukwasyi wakwe bazwe mu Sodoma. Nkaambo nzi? Bangelo bakaamba kuti: “Tulaunyonyoona munzi ooyu.” (Matl. 19:12, 13) Buzuba bwakatobela mafwumofwumo, Loti amukwasyi wakwe bakacili aŋanda. Aboobo bangelo bakamucenjezya alimwi Loti. Pele walo ‘wakacili kuwayawaya.’ Ambweni inga twayeeya kuti Loti tanaakabikkila maano kujatikizya ncaakamwaambila kucita Jehova, naa kuti tanaakamvwida. Nokuba boobo, Jehova wakazumanana kusoleka kumufwutula. “Nkaambo Jehova wakamufwida lubomba,” bangelo bakamujata kujanza walo amukwasyi wakwe alimwi akubagwisya mumunzi.—Amubale Matalikilo 19:15, 16.

14. Ntwaambo nzi itwakapa kuti Jehova amufwide luzyalo Loti?

¹⁴ Kuli twaambo tunji itwakapa kuti Jehova amufwide luzyalo Loti. Ambweni Loti wakali kuwayawaya kuzwa mumunzi akaambo kakuti wakali kuyoowa bantu ibakali anze aamunzi. Kwakali ntenda azimbi. Kweelede kuti Loti wakalibazyi bami bobilo ibakawida muzilindi zyataala munsi-munsi aakkuti. (Matl. 14:8-12) Mbwaanga Loti wakalikwete alimwi wakalijisi abana, kweelede kuti wakalibilika kujatikizya mukwasyi wakwe. Kuyungizya waawo, Loti wakalivwubide, aboobo kweelede kuti wakajisi ŋanda mbotu mu Sodoma. (Matl. 13:5, 6) Pele kunyina kaambo kali koonse akati katwaambo ootu ikakeelede kupa Loti kwaalilwa kumumvwida Jehova mpoonya-mpoonya. Nokuba boobo, Jehova kunyina naakabikkila maano kukulubizya kwa Loti, alimwi buya wakamubona kuti wakali “muntu uululeme.”—2Pet. 2:7, 8.

15. Muciindi cakubeteka muntu kweelana azintu nzyacita, ncinzi ncotweelede kucita?

¹⁵ Muciindi cakubeteka muntu kweelana azintu nzyacita, amusolekesye kumvwisya mbwalimvwa. Veronica, mucizyi waku Europe, wakasoleka  kucita oobo. Wakaamba kuti: “Mucizyi umwi lyoonse wakali kulibonya kutakkomana alimwi wakali kulizandula. Zimwi ziindi ndakali kuyoowa kubandika anguwe. Pele ndakayeeya kuti, ‘Ikuti nondakali ndime nondili mubukkale bwakwe, inga ndayandika mulongwe.’ Aboobo ndakayeeya kuti ndimubuzye kujatikizya mbwaakali kulimvwa. Mpoonya wakatalika kundaambila mbwaakali kulimvwa. Aboobo lino ndilamumvwisya kapati mucizyi ooyu.”

16. Nkaambo nzi ncotweelede kupaila kutegwa tube aaluzyalo?

¹⁶ Alikke Jehova nguutumvwisya kabotu-kabotu. (Tus. 15:11) Aboobo amumulombe kutegwa amugwasye kubona bamwi mbuli mbwababona walo alimwi akuzyiba mbomukonzya kubatondezya luzyalo. Mupailo wakamugwasya mucizyi Anzhela kuba siluzyalo kapati. Mucizyi umwi mumbungano wakatalika kukatazya kumvwana anguwe. Mucizyi Anzhela wakaamba kuti: “Cakali cuubauba kutalika kumwaamba zintu zibyaabi mucizyi ooyo alimwi akumutantamuka. Pele ndakalomba Jehova kuti andigwasye kumumvwisya mucizyi ooyo.” Sena Jehova wakawiingula mupailo wamucizyi Anzhela? Mucizyi Anzhela wakazumanana kwaamba kuti: “Twakabeleka limwi mubukambausi, mpoonya notwakakotoka twakabandika kwamawoola aali mbwaabede. Ndakamuswiilila caluzyalo. Lino ndilamuyanda kapati, alimwi ndililibambilide kuzumanana kumugwasya.”

17. Makanze nzi ngotweelede kuba angawo?

¹⁷ Tamweelede kusala bakwesu alimwi abacizyi mbomweelede kutondezya luzyalo. Boonse balijisi mapenzi mbubwenya mbuli Jona, Elija, Hagare alimwi Loti. Bunji bwaziindi, bakaliletela mapenzi. Kwaamba masimpe, toonse kuli mapenzi ngotwakaliletela aciindi cimwi. Aboobo cileelela kuli Jehova kutwaambila kuti katweetelelana. (1Pet. 3:8) Ciindi notumumvwida Jehova, tuyumya lukamantano lutaliboteli ndotujisi kumukwasyi wanyika yoonse. Aboobo ciindi notweendelezya umwi amweenzinyina, atube amakanze akuswiililana, kuzyibana kabotu alimwi akutondezyanya luzyalo.